Yu Inap i Stap Amamas Tru!
I LUK olsem planti man long olgeta hap bilong graun i ting olsem man i stap amamas sapos em i gat naispela ka, planti mani long beng, gutpela wok mani, bikpela haus, ol nupela kompiuta na TV samting, na naispela skin o strongpela bodi. Tasol olsem wanem? Tru tru man inap stap amamas sapos em i gat ol dispela samting bilong skin?
Wanpela ripot long nius Time i tok olsem “planti lain moa i mekim wok painimaut long pasin bilong stap amamas, pasin bilong tingting long ol gutpela samting, na ol pasin i helpim man long stap gut long skin na tingting.” Planti man i kirap nogut long save ol i kisim long dispela wok. Ol wok painimaut i kamapim klia olsem ol man husat i ting mani, biknem, o gutpela skin i mekim ol i stap amamas, ol i giamanim ol yet. Ol samting ol i ting em i bikpela samting long laip bilong ol inap kamapim sik bilong tingting na inap mekim na ol i kisim sik bilong bel hevi.
Long Amerika, planti man moa i gat planti mani, winim bilong bipo. Nius Time i tok: “Tasol dispela i no mekim na yumi stap amamas moa.” Yumi inap mekim wankain tok long ol manmeri bilong ol narapela kantri. Long Saina wok bisnis i wok long kamap gutpela tru, tasol namba bilong ol man i stap bel hevi i go antap. Nius Access Asia i tok, “namba wan as na ol manmeri i gat 15 i go inap 34 krismas i dai” em ol i save kilim i dai ol yet. Wanpela as bilong dispela, em ol narapela i strong strong long ol yangpela i mas kisim namba na gutpela sindaun namel long ol lain man i tingting tasol long gutpela wok mani na mani kago.
Tru tumas, planti mani kago i no mekim na man i ken stap bel isi, nogat, ating em i mekim na man i tingting planti moa yet. Ripot bilong wanpela yunivesiti i tok: “Pasin na wokabaut bilong yumi yet i bin kamap nambawan as bilong ol sik bilong tingting na bel hevi.” Saveman Van Wishard i tok: “Sik bilong tingting na bel hevi i mekim na ol kampani i mas tromoi bikpela mani moa long helt insurens.”
Ol pikinini tu i save kisim hevi long pasin bilong dispela graun i wok long senis hariap. Long nau i gat ol buk bilong helpim ol pikinini i gat 8-pela krismas long “luksave long ol mak i soim olsem ol i gat bikpela presa tumas na ol samting ol i ken mekim bilong helpim ol yet.” Wanpela pepa i stori long bel hevi i tokaut olsem long planti kantri long hap bilong Wes, sik bilong bel hevi i wok long go bikpela hariap, olsem 23 pesen long wanpela yia. Na tu, “ol pikinini i no skul yet na i save kisim ol marasin bilong daunim bel hevi, namba bilong ol i go bikpela hariap winim ol arapela.”
Pasin bilong pret tu i wok long i go bikpela. I gat hevi bilong mani, na tu, sampela lain politik na lotu i laik kamapim ol senis long rot bilong pait na bagarapim man, olsem na planti man i save pret long ol samting nogut inap kamap bihain. Olsem wanem? I gat samting bilong helpim ol man?
Inap olsem tu tausen yia i go pinis, Jisas Krais i lainim ol man long wokabaut long pasin i narapela kain na i no putim hevi long ol. Tok em i lainim ol man long en i gat wanpela bikpela tok i tru. Em i tok: “Ol man i hangre long kisim save long God, ol i ken amamas.” (Matyu 5:3, NW ) Em nau, Jisas i kirapim ol man long tingim nambawan bikpela samting ol i mas kisim—em tok i tru bilong Man Bilong Wokim yumi na ol i mas save long samting Em i tingting pinis long mekim.
Olsem stori i kamap bihain long dispela i soim, dispela tok i tru inap helpim yumi long luksave long wanem samting i bikpela samting tru, na dispela bai mekim na yumi stap amamas moa na i stap bilong yumi i gat as tru bilong en. Na tu, dispela tok i tru i mekim na yumi inap wetim gutpela samting bai kamap bihain.
[Rait long pes 3]
Yu ting mani kago inap mekim man i stap amamas?