Ol i Painim Rot Bilong i Stap Amamas

I NO longtaim i go pinis na wanpela lain i givim askim long ol manmeri long Amerika, Briten, Frans, na Jemani, olsem: “Wanem samting inap mekim na bai yu stap amamas?” Orait 89 pesen bilong ol dispela manmeri i tok, gutpela helt; na 79 pesen i tok marit bilong ol i mas gutpela; 62 pesen i tok long amamas ol i kisim long stap olsem papamama; na 51 pesen i ting ol i mas i gat gutpela wok mani na bai ol i stap amamas. Na maski ol i save pinis long dispela savetingting olsem mani i no save kamapim amamas, 47 pesen i bilip tru olsem mani inap mekim olsem. Tasol ol samting i bin kamap i kamapim klia wanem samting?

Orait pastaim yumi ken skelim dispela tok olsem mani i save kamapim amamas. Wanpela lain i bin givim askim long 100 man long Amerika em ol i maniman tru, na ol i kisim save olsem ol dispela maniman i no stap amamas moa winim ol arapela man. Na tu, planti manmeri long Amerika ol i dabolim mani kago ol i bin holim inap 30 yia i go pinis, tasol sampela saveman bilong sik bilong tingting ol i tok, amamas bilong ol dispela lain long nau i no winim amamas bilong ol long bipo. Wanpela ripot i tok: “Insait long dispela taim, namba bilong ol manmeri i gat bikpela bel hevi i go antap tru. Namba bilong ol yangpela i kilim i dai ol yet i go bikpela inap 3-pela taim. Namba bilong ol marit i bruk i go bikpela inap olsem dabol.” Ol saveman i bin skelim ol samting bilong mani na amamas bilong ol man long 50 kantri na ol i kisim save olsem mani no inap baim amamas.

Orait olsem wanem? Gutpela helt, marit i stap gutpela, na gutpela wok mani ol i bikpela samting bilong i stap amamas? Sapos yumi mas i gat ol dispela samting bilong i stap amamas, olsem wanem long ol planti milion manmeri i no gat gutpela helt, na ol man na meri em marit bilong ol i no gutpela? Na olsem wanem long ol marit i no gat pikinini na olgeta man na meri i no gat gutpela wok mani? Yu ting ol dispela lain i no inap i stap amamas? Na ol manmeri i gat gutpela helt na marit bilong ol i gutpela, yu ting ol bai i no stap amamas moa sapos helt na sindaun bilong ol i senis?

Yumi Wok Long Painim Long Ples Stret?

Olgeta man i laik i stap amamas. Yumi no kirap nogut long dispela, long wanem, Man Bilong Wokim yumi em i God bilong amamas, na em i wokim yumi i wankain olsem em. (1 Timoti 1:11; Stat 1:​26, 27) Olsem na em i pasin bilong yumi ol man long painim rot bilong i stap amamas. Tasol planti ol i pilim olsem pasin bilong holimpas amamas i wankain olsem yumi holimpas wesan​—⁠tupela wantaim i save lusim kwik han bilong yumi.

Tasol ating sampela i wok strong tumas long painim rot bilong i stap amamas, o olsem wanem? Wanpela saveman, em Eric Hoffer, em i ting olsem. Em i tok: “Pasin bilong painim painim amamas em i wanpela bikpela as na sampela man i no stap amamas.” Dispela tok i stret sapos yumi wok long painim amamas long ples i no stret long painim. Sapos olsem, bai yumi bel hevi na tingting planti. Pasin bilong wok strong long kamap maniman, o kisim biknem; o painim rot bilong insait long wok politik, o kisim gutpela sindaun, o gutpela wok mani; o helpim yumi yet tasol na wok strong long inapim kwik ol laik bilong skin, olgeta dispela samting i no inap kamapim amamas. Olsem na sampela i bin kisim wankain tingting olsem wanpela man bilong raitim buk, em i tok: “Sapos yumi lusim pasin bilong painim painim amamas, bai yumi stap amamas”!

Na wok bilong dispela lain yumi bin stori pastaim long en i kamapim olsem, fopela long olgeta 10-pela 10-pela man i ting, amamas i save kamap taim man i mekim gutpela pasin long ol arapela na i helpim ol. Na wanpela long olgeta 4-pela 4-pela man i tok, pasin bilong bilip na bilip tru long ol samting bilong lotu, em i bikpela samting bilong helpim man long i stap amamas. Em nau, i klia tru olsem yumi mas skelim gut wanem samting inap mekim na bai yumi stap amamas tru. Stori i kamap bihain long dispela bai helpim yumi long mekim olsem.

[Ol Piksa long pes 3]

Planti man i ting mani, famili i sindaun gut wantaim, o gutpela wok mani em i as bilong i stap amamas. Yu ting olsem?