Yu Wok Long “Kikim Samting i Gat Sap”?
LONG taim bilong ol man i bin raitim Baibel, i gat wanpela kain stik ol i pasim ain i gat sap long en na i bilong subim na stiaim ol animal i save pulim ol hevipela samting. Sapos animal i sakim dispela ain i gat sap na subim skin bilong em long en, wanem samting bai kamap? Em i no stap gut, nogat, em bai wok long givim pen long em yet tasol.
Dispela Jisas i kirap bek pinis, i toktok long ain i gat sap taim em i kamap long wanpela man, nem bilong em Sol, husat i go bilong kalabusim sampela disaipel bilong Jisas. Long wanpela lait i mekim em i kamap aipas, Sol i harim Jisas i tok: “Sol, Sol, bilong wanem yu wok long bagarapim mi? Yu wok long kikim samting i gat sap, na yu givim pen long yu yet.” Taim Sol i mekim nogut long ol Kristen, i olsem em i pait long God, na samting em i mekim i wok long givim pen long em yet tasol.—Aposel 26:14.
Ating yumi tu i popaia na yumi “wok long kikim samting i gat sap”? Baibel i tok piksa long “tok bilong ol saveman” i olsem stik i gat sap bilong kirapim yumi na stiaim yumi long wokabaut stret. (Saveman 12:11) Tok bilong God i stap long Baibel inap kirapim yumi na stiaim wokabaut bilong yumi—sapos yu larim em i stiaim yumi. (2 Timoti 3:16) Sapos yu sakim tok bilong em bilong kirapim yumi, dispela bai bagarapim yumi yet tasol.
Sol i pilim long bel tok bilong Jisas, em i senisim pasin bilong em na kamap gutpela Kristen aposel Pol. Taim yumi bihainim ol tok bilong God, dispela bai givim ol gutpela blesing long yumi inap oltaim oltaim.—Sindaun 3:1-6.
[Piksa Kredit Lain long pes 32]
L. Chapons/Illustrirte Familien-Bibel nach der deutschen Uebersetzung Dr. Martin Luthers