Askim

◼ Lain bilong God ol i mas ‘lukautim ol wanlain bilong ol yet,’ orait olsem wanem long pasin bilong Ebraham, em i rausim Hega na Ismal i go long ples nating?

I stret ol wokboi bilong God i mas bihainim pasin sori na lukautim ol famili bilong ol, em ol i sot long samting. Aposel Pol i stori long ol papamama Kristen na em i tok: “Man i no lukautim ol wanlain bilong em yet, man i no lukaut liklik long ol wanblut tru bilong en, dispela man em i lusim bilip pinis, na em i man nogut tru. Ol haiden yet i no save mekim pasin nogut olsem.”−1 Timoti 5:⁠8.

Yumi ken save, pasin Ebraham i mekim i no sakim dispela tok bilong God, long wanem Ebraham em i man bilong bilip tru na God i kolim em “Pren bilong mi.”−Jems 2:23; Hibru 11:​8-19.

God i bin tok promis long givim blesing long ol man long rot bilong lain o pikinini bilong Ebraham. Tasol meri bilong Ebraham, em Sera, em i go lapun na em i no bin kamapim wanpela pikinini, olsem na em i strong long Ebraham i mas kamapim wanpela pikinini long wokmeri bilong em, em i bilong Isip, nem bilong em Hega. Bihain, Hega i gat bel na em i bikhet long Sera. Em i mekim pasin nogut tru long meri bilong Ebraham, em Ebraham i laikim tumas em, na yumi ken tok i olsem em i “asua pinis long wanpela rong.” (Eksodas 23:1; 2 Samuel 22:49; Sam 11:⁠5) Ebraham i larim Sera i stretim Hega, olsem na Hega i ranawe i go long ples nating, ating em i laik ranawe i go bek long Isip. Baibel i no stori long Hega i kisim sampela kaikai i go wantaim em, tasol ating em i save em inap kisim kaikai na wara long han bilong ol man i save raun long dispela hap, olsem ol lain Beduin.−Jenesis 12:​1-3, 7; 16:​1-6.

God i salim wanpela ensel i go tokim Hega long i go bek. Na ensel i tokim em, lain tumbuna bilong em bai kamap planti, na pikinini man bilong em, Ismal, bai “birua long olgeta man.” (Jenesis 16:​7-12) Sampela yia bihain, Ismal i kirap birua long liklik brata bilong em, Aisak, em pikinini tru bilong Ebraham tupela Sera. Ismal i ‘tok bilas’ o tok nogut long Aisak. Dispela i no olsem liklik kros i kamap namel long tupela brata. Nogat. Em pasin nogut. Baibel i tok i olsem Ismal i “birua” long dispela pikinini bilong Ebraham em God i bin makim. Olsem na i stret Ebraham i mas mekim strongpela samting bilong stretim.−Jenesis 21:​1-9; Galesia 4:​29-31.

Jehova i tokim Ebraham em i mas bihainim tok bilong meri bilong em na ‘rausim Hega wantaim pikinini bilong em.’ Ebraham i no amamas long mekim olsem, tasol em i givim kaikai na wara long tupela na rausim ol i go. Pastaim, taim Hega i ranawe i go, em i no kisim sampela kaikai o wara i go, tasol dispela taim em i gat sampela kaikai na em i gat wara, em Ebraham i givim long em. Tasol long rot em i lus long “hap bilong Biasiba ol man i no save stap long en,” na taim em i no kamap yet long wanpela hul wara i stap long dispela ples, wara i pinis long botol. Tasol dispela i no asua bilong Ebraham, long wanem em i bin givim kaikai na wara long em, em i bin ‘lukautim ol wanlain bilong em’ maski ol i bin mekim pasin nogut na em i mas rausim ol long haus.−Jenesis 21:​10-21.

[Mep/Piksa long pes 31]

(Bilong save ol dispela rait i stap we long pes, lukim buk o magasin)

Solwara Mediterenian

Maunten Kamel

Megido

Jerusalem

Hebron

Biasiba

Det Si

Negev

[Kredit Lain]

Based on a map copyrighted by Pictorial Archive (Near Eastern History) Est. and Survey of Israel

[Piksa]

Ples wetsan nating i stap klostu long Biasiba long hap bilong saut, ol i kolim Wadi Sin