Painim Gutpela Samting i Stap Hait

LONG 1848 ol i painim gol long graun bilong famili Sutter long Kalifonia. Na long 1849 planti tausen manmeri i kam long dispela hap, long wanem, ol i gat strongpela tingting long painim gol na kamap maniman hariap. Insait long wanpela yia liklik taun San Fransisko i kamap biktaun na 25,000 manmeri i stap long en. Tingting long kamap maniman hariap i pulim ol i kam.

King Solomon bilong Israel i bin save, sapos man i laik painim gol samting i stap hait insait long graun em i mas wok strong tru, olsem na em i tok: “Na yu mas askim gutpela tingting na save long kam long yu, olsem yu singautim wanpela man i kam bilong helpim yu. Na yu mas wok hat long painim gutpela tingting, olsem man i wok long painim silva ol i bin haitim insait long graun na olsem man i wok long painim mani samting ol i bin haitim. Sapos yu mekim ol dispela samting, orait bai yu save tru long pasin bilong stap aninit long Bikpela, na bai yu save gut long God.”​—⁠Sindaun 2:​3-5.

Long gol na silva yu ken mekim planti samting, tasol gutpela tingting na save i winim tru dispela. Em bai helpim yu long skelim gut ol samting, na stretim hevi bilong yu, na helpim marit bilong yu, na stap amamas. (Sindaun 2:​11, 12) Gutpela tingting na save bai helpim yu long save gut long God na laik bilong em, na bihainim tok na amamasim em. Gol i no inap helpim yu long ol dispela samting.

Tok bilong Baibel i tru: “Gutpela tingting i olsem mani, na i save helpim yumi long taim nogut. Tasol gutpela tingting na save i winim mani, na i helpim yumi moa yet na yumi stap gut olgeta.” (Saveman 7:12) Planti man i tingting strong long kamap maniman hariap, tasol kisim gutpela save na tingting na savepasin​—⁠dispela i winim tru ol mani kago bilong dispela graun.