Ol Marit i No Strong Moa
YANGPELA mama i holim pikinini bilong em, na wantu em i tromoi i go long plua, long wanem, em i kros. Bihain pikinini i dai. Mama i tok: “Mi bin mekim olsem, long wanem, mi kros long man bilong mi, em i no tingim mipela famili bilong em.” Tasol meri i no laik toktok gut pastaim wantaim man bilong em. Em i kamapim kros bilong em long pikinini i no gat rong.
Tru, i no planti mama i mekim olsem, tasol planti ol i gat wankain hevi olsem dispela mama. Long nau planti marit i hatwok long i stap amamas wantaim. Wanpela nius (Journal of Marriage and the Family) i tok: ‘Long nau long Amerika planti marit i no strong, na bilong stretim dispela samting, ol i mas givim bel long stretim, tasol ol i ting i hatwok tumas na planti hevi moa bai painim ol, olsem na ol i no mekim.’
Long nau em taim nogut, na i gat planti pasin pamuk, na planti man i no gat wankain tingting olsem bilong meri bilong ol, na sampela i gat bikpela dinau, na papamama bilong ol marit i skrapim bel bilong ol, na wan wan i tingim laik bilong em yet, na ol dispela kain samting i mekim na kros i save kamap namel long tupela, na nau ol i katim marit. Dispela pasin i go bikpela tru long Japan, olsem na maski Misin Katolik i no orait long ol man i katim marit, misin i kirapim komiti bilong helpim ol manmeri i bin katim marit na ol i maritim narapela poroman. Planti marit i gat hevi long marit bilong ol, maski ol i save go lotu.
Sampela lain bilong skelim dispela samting ol i tok, sindaun bilong planti marit i no gutpela, na dispela i mekim na ol i katim marit, na i no olsem ol i laik bihainim pasin bilong ol narapela manmeri o ol i ting i no hatwok long katim marit. Na planti ol i marit yet i stap, tasol hevi i stap namel long man na meri bilong em. Tupela i no amamas moa olsem long taim ol i marit nupela. Ol i no slip wantaim o toktok wantaim. Wanpela meri olsem, em i no inap katim marit bilong em, olsem na em i tok, taim em i dai em i laik bai ol i katim marit bilong em na ol i no ken planim em klostu long matmat bilong man bilong em. Sori tumas, planti marit ol i sindaun yet wantaim, tasol ol i no amamas long marit bilong ol.
Isao i olsem. Em i man marit na em i wok draiva, na em i tromoi pe bilong em long kaikai na dring, na em i no lukautim famili bilong em. Em wantaim meri bilong em i save tok pait long olgeta taim. Isao i tok: “Sapos mi bin kros long wanpela samting long ples wok, mi save go long haus na pait wantaim famili bilong mi.” Narapela i stap bel nogut long narapela, na long olgeta de ol i toktok long katim marit bilong ol.
Planti marit i no sindaun gut wantaim. Narapela i givim hevi na pen long narapela. Ol i no stap amamas. Olsem wanem? Inap ol i ken stretim marit bilong ol na kamap amamas gen? Ol i ken mekim wanem bilong strongim marit bilong ol?