Rot Bilong Helpim Tru Famili

WANPELA man i sanap long eleksen bilong kamap presiden bilong Amerika long 1992 i tok: “Famili i wok long bagarap.” Tru tumas, yumi tingting planti long bikpela hevi i painim ol famili. Wanpela nius (Fortune) i tok: “Sapos yumi lukim bikpela senis olsem i kamap long ol wok bilong mani na wok bisnis . . . bai yumi kirap nogut tru.”

Hevi i painim tu sampela famili ol i wok long bihainim ol lo bilong Baibel. Sampela yia bipo wanpela brata Kristen i laik helpim narapela brata i gat 6-pela pikinini ol i no winim yet 13 krismas, tasol em i no tingting gut na em i tok: “Yu mas save, long dispela 6-pela pikinini, fopela bai lusim tok i tru.” Tasol dispela papa i ting, i no gat wanpela pikinini bilong em bai lusim tok i tru. Em i tok:

“Ol pikinini i no bilong mipela. God Jehova i givim ol long mi wantaim meri bilong mi, olsem ‘presen.’ Ol i gutpela blesing mipela i kisim long God. Na God i tok, sapos mipela i skulim ol long bihainim gutpela pasin, ol bai ‘wokabaut long dispela rot’ na i no ken lusim. Olsem na mipela i wok long lukautim ol olsem ol i bilong Jehova.”​—⁠Song 127:3; Sindaun 22:⁠6.

Tok bilong dispela papa i makim rot bilong helpim tru famili, em olsem: Ol papamama i mas lukautim ol pikinini olsem ol i bilong Jehova. Tru, ol pikinini i no ken bihainim tok bilong yu long olgeta taim, tasol yu gat wok long lukautim gut ol dispela pikinini God i givim long yu olsem presen.

Em Bikpela Wok

Yu mas aninit long God na mekim dispela wok, na yu mas tingim gut; yu no ken mekim nating o mekim nabaut. Yu mas givim taim na strong bilong yu long mekim, long wanem, yu save God bai skelim ol wok yu mekim long dispela presen em i givim long yu. Yu no ken traim kain kain rot; God i makim pinis rot long Baibel. Yu mas bihainim gut ol tok bilong God long Baibel.

God Jehova i tok olsem: “Yupela i mas lainim ol pikinini bilong yupela long ol dispela lo [bilong mi]. Na tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok. Na yupela i mas raitim ol long pepa na pasim ol long han bilong yupela na long pes bilong yupela, olsem na bai yupela i no ken lusim tingting long ol.” Na Baibel i tok: “Yupela papa, . . . yupela i mas . . . stretim gut ol pikinini bilong yupela na skulim ol long tok bilong Bikpela.”​—⁠Lo 6:​7-9; Efesus 6:⁠4.

Long olgeta de yu mas mekim ol wok bilong lukautim ol pikinini; yu mas lusim bikpela hap taim long mekim, na yu mas laikim tumas ol pikinini na tingim ol gut. Ol papamama i mekim olsem, ol i bihainim rot God i makim bilong helpim tru famili.

Yu ting em bikpela wok tumas? Planti papamama i ting olsem. Ol samting ol i mekim i kamapim klia dispela tingting bilong ol. Tasol i stret yu mas tingim gut olgeta wan wan pikinini bilong yu​—⁠ol i presen God i givim long yu.

Rot Bilong Lukautim Ol

Bihainim savepasin na tingim pasin bilong ol papamama i bin helpim gut ol pikinini bilong ol. Namba wan stori bilong wanpela nius em “Ol Famili Yumi Kirap Nogut Long En,” na nius i stori long 4-pela samting i bikpela samting bilong helpim gut ol pikinini taim yu mekim bikpela long ol, em olsem: “[1] Famili i mas kaikai wantaim na toktok long ol samting em inap kirapim tingting bilong ol pikinini, na [2] ol pikinini i mas kaunim ol gutpela buk, na [3] bihainim pasin bilong ol man i gat gutpela tingting, na [4] ol i mas save i gat ol lo bilong famili ol i mas bihainim.”​—⁠Nius U.S.News & World Report, Disemba 12, 1988.

Tingim pasin bilong ‘kaikai wantaim na toktok wantaim.’ God i tok, ol papamama i mas lainim ol pikinini long taim ol i stap long haus, a? Olsem wanem long famili bilong yu? Yupela i save kaikai wantaim, na bai i gat taim long olgeta de bilong papamama na ol pikinini i poroman wantaim na toktok gut wantaim? Em bikpela samting bilong helpim ol pikinini long i stap amamas na bel isi. Wanpela manki i gat 6-pela krismas i tok, em i save amamas long taim bilong kaikai, long wanem, “yu no tingting planti long ol narapela i stap we”​—⁠olgeta i bung wantaim.

Olsem wanem long ol tok yupela i mekim long taim yupela i kaikai wantaim? Planti taim yupela i stori long tok bilong “ol gutpela buk,” olsem Baibel na ol buk na nius bilong Baibel, na yupela i toktok long wok bilong God yumi mekim, na ol samting God i wokim? Famili i mas toktok wantaim olsem, na ol i mas i gat taim bilong stadi wantaim, na bai papamama inap kirapim ol pikinini long laikim tumas Jehova na ol stretpela lo bilong em.

Dispela papa i gat 6-pela pikinini, em i tok: “I no hatwok long mipela i kaikai wantaim. Mipela i save mekim long olgeta taim, na dispela i helpim mipela long pas gut wantaim. Tasol i hatwok long mekim famili-stadi long olgeta taim.” Papa i save wok leba long san, na taim em i kam bek long haus, skin bilong em i les tru, na sampela taim em i slip long taim ol i mekim famili-stadi. Tasol em i no lusim pasin bilong stadi wantaim ol pikinini long Baibel. Na em i save toktok wantaim olgeta wan wan, na lusim bikpela hap taim long harim toktok na stori bilong ol.

Olsem wanem long yu? Yu go pas long mekim ol gutpela tok long taim famili i kaikai wantaim, na yu kirapim ol pikinini long kaunim ol gutpela buk? Na yu helpim ol pikinini bambai ol inap “bihainim pasin bilong ol man i gat gutpela tingting”? Yu mas stretim rot bambai ol inap bung wantaim ol manmeri i save bihainim pasin bilong nambawan man tru i bin stap long graun, em Krais Jisas. Dispela em i bikpela samting bilong helpim ol long kamap gutpela man na meri.

Na tu yu mas helpim ol long save “i gat ol lo bilong famili ol i mas bihainim.” Ol i mas save, i gat sampela kain pasin na tok na klos samting em famili i no ken orait long en. Na ol i mas save, sapos ol i brukim lo bilong famili em samting nogut​—⁠bai yu bel hevi tru, olsem Jekop long bipo long taim ol pikinini man bilong em i mekim pasin i no stret, na ol man bilong Kenan i lukim Jekop i olsem “man nogut tru.”​—⁠Stat 34:30.

Dispela papa i gat 6-pela pikinini na em i tingim ol pikinini bilong em i bilong Jehova, em i strong long tokim ol pikinini long “lo bilong famili.” Planti taim em i toktok gut wantaim ol bambai ol i ken save, lo bilong famili long bilas, na mekim gut skin, na klia long pasin bilong graun, dispela i stret wantaim tingting na tok bilong Man bilong wokim olgeta samting, em God Jehova. Papa hia i lusim bikpela hap taim long helpim ol pikinini, na em i laikim ol tumas, na tingim ol gut, na lainim ol long ol gutpela pasin ol i mas bihainim, olsem na olgeta 6-pela pikinini i “wokabaut long dispela rot” na ol i no lusim.​—⁠Sindaun 22:⁠6.

Long olgeta hap i gat planti tausen famili i stap strong olsem. Dispela i litimapim nem bilong Man bilong wokim ol, na i olsem gutpela pe papamama i kisim long gutpela wok ol i mekim! Taim ol pikinini i wok long i go bikpela, ol i pilim moa yet gutpela wok papamama i mekim bilong helpim ol. Tingim stori i kamap bihain long dispela, em stori bilong wanpela meri i gat gutpela papamama i aninit long God. Tingim ol gutpela samting dispela stori inap lainim yu long en.