Yu Ting Mani Inap Baim Amamas?
MASKI man i kisim sampela mani moa, dispela i no save mekim em i amamas moa. Nius Psychology Today i tok: ‘Ol man bipo ol i stap rabis na nau ol i kisim sampela mani moa, dispela i no helpim ol long i stap amamas moa.’
Nius New York Times (Oktoba 29, 1993) i truim dispela tok. Long hap i gat toksave long man i dai pinis i gat het-tok olsem: ‘Doris Duke, 80 Krismas, Bikpela Mani Bilong Em i No Baim Amamas. Em i Dai.’ Nius i tok: ‘Long yia 1945 Mis Duke i gat 33 krismas, na wanpela nait long Rom em i bin tokim wanpela pren, mani kago i bin pasim em sampela taim long painim amamas.’
Mis Duke i tokim wanpela pren olsem: ‘Sampela taim mani bilong mi i mekim na mi tingting planti. Mi poromanim wanpela man inap liklik taim na nau em i tok em i laikim mi. Tasol olsem wanem mi ken save em i tok tru?’ Nius Times i tok: ‘Tok bilong Mis Duke long dispela nait i kamapim klia olsem mani i mekim bikpela samting long sindaun bilong em na bagarapim tu.’
Jean Paul Getty, bipo em i wanpela maniman tru, winim olgeta narapela man. Em i bin tok: ‘Mani i no as bilong amamas. Em inap givim bikpela hevi long man.’ Na long 1970 samting Jane Fonda, em wanpela meri i gat nem long ol piksa wokabaut long Holiwut, em i bin kisim 500 tausen kina taim em i insait long wanpela piksa. Em i tok: ‘Mi save long bikpela mani kago—em i samting nating tasol. Maski man i gat planti samting, tingting na bel i save bagarap, marit i bruk na ol pikinini i no save laikim papamama.’
Tru tumas, bikpela mani tasol i no inap kamapim amamas, tasol man i stap rabis tru, em tu i no inap amamas. Olsem na wanpela saveman bilong bipo i tok: “Nogut mi gat planti samting tumas . . . na nogut mi kamap rabisman.” (Sindaun 30:8, 9) Narapela man bilong raitim Baibel i tok, samting man i mas kisim bilong i stap amamas em “pasin bilong God, na em i tingim olgeta samting bilong em yet em inap . . . Mama i karim yumi na . . . long dispela taim yumi no bin karim wanpela samting i kam. Na bihain bai yumi lusim graun, long dispela taim bai yumi no inap karim samting i go. Na sapos yumi gat kaikai na laplap samting, orait yumi ken tok, ‘Em inap long mi.’ ”—1 Timoti 6:6-10, Nupela Testamen na Ol Sam bilong 1980.