Bai Yu Makim Wanem Buk i Gutpela Bilong Helpim Olgeta Man?
SAPOS yu gat taim bilong kaunim olgeta tok bilong wanpela buk long olgeta wik, yu inap pinisim 3,000 buk taim yu stap laip. Ol man i wokim planti buk moa. Long Amerika, long olgeta yia ol i wokim olsem 30 tausen nupela buk. Na i gat planti tausen olpela buk tu ol i tok ol man i laik skul gut ol i mas kaunim.
Bipo wanpela man i mekim wanpela tok long ol buk na em i tok: “Ol i wokim wokim planti buk, ol i no pinis long mekim olsem; na sapos man i givim bel tumas long kaunim ol dispela buk, bai skin bilong em i les.”—Eklisiastis 12:12.
Olsem na i gat planti buk tru. Tasol olsem wanem? I gat wanpela buk i winim ol narapela buk na i gutpela bilong olgeta man i ken kaunim? I gat wanpela buk i stret long olgeta man i ken kaunim, maski tok ples bilong ol o ol i bilong wanem lain? I gat wanpela buk, em yumi ken tok, em i bilong olgeta man bilong graun?
Ol buk samting yumi kaunim, i bikpela samting, long wanem, dispela bai stiaim tingting bilong yumi, na em bai kirapim yumi long skelim ol samting—i bikpela samting o i no bikpela samting. Ol bikman bilong edukesen na ol papamama na ol narapela man tu, long bipo na long nau, ol i bin tingting long wanem kain ol buk i gutpela bilong ol man i ken kaunim. Ol i bin askim ol man long dispela, na yumi laik save ol man i tok wanem.
Buk Em Ol Saveman i Makim
Long yia 1890 wanpela man i save wokim ol buk em i toktok wantaim sampela ol saveman na em i askim ol, wanem ol buk i gutpela, na ol i tok, Baibel na ol rait bilong Shakespeare na bilong Homer. Wanpela ripot i stori long dispela na i tok, long nau tu ol man i ting dispela ol buk i winim ol narapela buk.
Wanpela nius (Time) bilong Septemba 1982 i stori long wanpela askim ol i givim long 8-pela saveman, olsem: “Ol man i bin skul gut ol i mas kaunim wanem 5-pela buk?” Planti bilong dispela 8-pela ol i makim Baibel em i wanpela buk ol man i mas kaunim. Na narapela nius (Psychology Today) i tok, ol dispela saveman i kolim nem bilong 165 buk, na ol i makim ol buk ol i laikim, na planti ol i makim Baibel i win.
Na narapela nius (The Korea Times) i stori long ol man bilong Korea i no bilong lotu Kristen ol i gat wanem tingting long ol lotu long Korea ol i kolim Kristen. Na nius hia i tok: “Ol dispela man i ting, lain bilong ol dispela misin ol i kolim Kristen ol i gat pasin antap, na ol i givim bel long mani, na ol i giaman na ol i no truim ol tok ol i mekim.” Tasol dispela nius i tok moa olsem: “Ol man i mekim dispela tok ol i no bilip long lotu Kristen, tasol planti ol i ting Baibel em i gutpela buk.”
Planti Ol i Laikim Baibel
Planti taim ol i bin askim ol man, wanem buk i win, na ol man i bin makim Baibel i winim ol narapela buk. Long bipo, na long nau tu, ol man bilong olgeta hap ol i bin tok Baibel em i gutpela buk, winim ol narapela buk.
Tasol bikpela samting em olsem: Yu yet yu ting olsem wanem long Baibel? Ating ol man bilong sampela hap ol i ting, long nau saiens i kamapim ol nupela save na yumi no gat wok moa long ol tok bilong Baibel, na dispela tok i no inap helpim yumi long stretim ol hevi bilong nau. Na ating ol man bilong sampela hap moa ol i ting, Baibel i bilong ol wetman tasol na i no inap helpim ol narapela lain. Tasol olsem wanem? Baibel i gat sampela tok olgeta man i mas harim na i ken helpim ol? Tok bilong Baibel inap helpim ol man long stretim ol hevi bilong nau? Olsem wanem? Baibel i gutpela bilong helpim olgeta man?