Baibel—Em Buk Yumi Mas Kaunim

BAIBEL em i gutpela buk tru i winim olgeta narapela buk, na ating yumi sot tru long ol gutpela tok bilong stori long dispela. I gat planti Baibel moa, na em i olpela buk moa, na ol i bin tanim long planti tok ples moa, na planti man moa i kolim tok bilong en, na em i senisim tingting bilong planti man moa, na planti man moa i givim biknem long en. Na i no gat narapela buk em planti man moa i tok pait long en. Ol i bin tambuim Baibel, na kukim ol Baibel, na birua moa yet long en, winim olgeta narapela buk, tasol Baibel i abrusim bagarap na i stap yet. Tasol sori tru, ating nau yumi no ken tok planti man moa i kaunim Baibel, winim olgeta narapela buk.

Planti man i gat Baibel, tasol ol i gat planti wok na ol i pilim olsem ol i no gat taim bilong kaunim Baibel. Bipo planti man i save amamas long kaunim buk. Tasol nau ol i save amamas long lukim televisen o mekim narapela samting. Na ol man i amamas yet long kaunim sampela buk, ol i laik kaunim buk i no hatwok long save long tok bilong en. Sapos yu kaunim Baibel, yu mas tingim gut ol tok yu kaunim, na planti man i no laik mekim olsem.

Tasol Baibel i no abrusim bagarap bilong i stap nating long haus. I gat planti gutpela as na yumi mas kaunim. Tingim dispela:

I Gat As na Em i Abrusim Bagarap!

Dispela tok “Baibel” i kam long hap tok Grik bi·bliʹa, insait bilong en i olsem “ol liklik buk.” Em nau, Baibel i olsem planti liklik buk ol i pasim wantaim, tasol sampela i no liklik buk, a? Ol man i bin raitim insait long 1,600 yia. Ol man i raitim, tasol God i as bilong en. Wanpela man bilong raitim Baibel i tok: “I no gat wanpela tok profet i bin kamap long laik bilong man i autim. Nogat. Holi Spirit yet i kirapim ol man na ol i autim tok God i givim long ol.” (2 Pita 1:21) God i as bilong ol tok profet na ol narapela tok bilong Baibel. Ol tingting bilong God Jehova i pulap long dispela “ol liklik buk.” (Aisaia 55:⁠9) Olsem na Baibel i abrusim bagarap!

Baibel em i nambawan buk bilong ol wokman bilong God. Ol i wanbel wantaim narapela man bilong raitim Baibel, em aposel Pol, em i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi.” (2 Timoti 3:16) Olsem na Baibel em i as bilong bilip bilong ol Witnes Bilong Jehova long nau. Em i bosim tingting na pasin bilong ol. Ol i givim bel long kirapim ol man long kaunim long olgeta de na tingim gut ol tok bilong en.​—⁠Song 1:​1-3.

Pasin Bilong Kaunim Baibel

Pasin bilong kaunim Baibel i bin helpim ol man long bipo. God i tok, ol king bilong Israel i mas lukim buk bilong Lo​—⁠em bikpela hap bilong Baibel long nau​—⁠na raitim wankain tok tasol long wanpela buk na kaunim long olgeta de, bai ol i ken tingim ol samting God i laik bai ol i mekim. (Lo 17:​18-20) Planti king i no mekim olsem na ol i pundaun.

Sapos yumi stadi long Baibel, dispela inap helpim yumi, olsem em i bin helpim lapun profet Daniel. Daniel i stadi gut long ol hap bilong Baibel i stap long taim bilong em, olsem na taim em i stap long Babilon, em i “ritim ol buk bilong God” na kisim save olsem klostu bai truim bilong wanpela bikpela tok profet bilong Jeremaia i kamap.​—⁠Daniel 9:⁠2.

Taim mama i karim Jisas, ‘stretpela man’ Simeon i wet long lukim Mesaia i kam. God i tok promis olsem Simeon i no ken i dai kwik; pastaim em i mas lukim dispela man God i salim bilong kisim bek ol man. Taim Simeon i holim pikinini Jisas, em i kolim wanpela tok profet bilong Aisaia, olsem na yumi save, em i save kaunim ol buk bilong Baibel ol i raitim pinis long taim bilong em, na tingim gut ol tok bilong en.​—⁠Luk 2:​25-32; Aisaia 42:⁠6.

Taim Jon Bilong Baptais i kirap long autim tok, ol Juda i tingting olsem: “Ating Jon em i dispela man God i makim bilong kisim bek ol manmeri bilong en?” As bilong dispela i olsem: Planti ol i save long ol tok profet bilong Baibel i makim olsem dispela man bai kam. (Luk 3:15) Yumi kirap nogut long dispela, long wanem, long dispela taim bipo i hatwok long kisim ol buk. Bilong raitim ol buk bilong Baibel, ol i mas raitim long han na was gut tru bai ol i raitim stret ol tok. Olsem na ol i no wokim planti Baibel, na i gat bikpela pe bilong en. Orait, olsem wanem ol man i save long ol tok bilong en?

Ol i save bungim ol man na kaunim. Moses i makim sampela de bilong ol Israel i mas bung na ol pris i mas kaunim olgeta tok bilong Lo bilong God long ol. (Lo 31:​10-13) Long taim bilong ol aposel, ol i save mekim long planti hap. Disaipel Jems i tok: “Yumi save, long bipo yet na i kam inap long nau, long olgeta taun . . . i gat ol man i save autim tok bilong Moses. Na long olgeta de Sabat ol i save ritim tok bilong em insait long ol haus lotu.”​—⁠Aposel 15:⁠21.

Long nau, i no hatwok long kisim Baibel. Klostu olgeta man long graun inap kisim sampela bilong dispela “ol liklik buk” long tok ples ol i save long en. Tasol sori tru, planti ol i no laik save long tok bilong Baibel. Nau em taim bilong bikpela save bilong saiens, tasol tok bilong Baibel em i nambawan samting yet “bilong skulim yumi.” Baibel i skulim yumi long stretpela pasin yumi mas bihainim, na long sindaun gut wantaim ol narapela man, na planti samting moa. Na Baibel i tokim yumi long rot bilong kamapim gutaim em yumi ken bilip tru long en.

Kaunim Long Olgeta Taim

Olsem na ol Witnes Bilong Jehova i wok strong long kirapim ol man long kaunim Baibel long olgeta taim. Ol i putim bikpela rait antap long haus faktori long nambawan ofis bilong ol long Bruklin, Nu Yok, em rait i tok: “KAUNIM BAIBEL HOLI LONG OLGETA DE.” Planti milion manmeri i lukim dispela rait taim ol i wokabaut long dispela hap, na ol Witnes i laik bai em i kirapim ol long kaunim Baibel.

I gat inap olsem 73,000 kongrigesen bilong ol Witnes Bilong Jehova, na long olgeta wik ol i save mekim Skul Bilong Wok Autim Tok. Wanpela hap bilong skul em bilong kaunim hap tok bilong Baibel long kongrigesen. Ol i makim sampela sapta bilong Baibel bilong olgeta i ken kaunim long haus pastaim. Taim ol i mekim olsem ol i kaunim olgeta tok bilong Baibel insait long sampela yia tasol.

Dispela pasin i stret wantaim tok bilong wanpela buk bilong skul (Buk Bilong Skul Bilong Wok Autim Tok), em i tok: “Yu mas makim taim tu bilong kaunim Baibel. Gutpela tru sapos yu yet yu kaunim ol tok bilong en long kirap i go inap long pinis. . . . Tasol yu no ken kaunim nating; yu mas tingting long kisim gut as bilong ol tok bambai yu inap holim long tingting. Tingim gut olgeta tok yu kaunim.”

Ol Witnes Bilong Jehova i wokim ol narapela buk na ol tu i kirapim ol man long kaunim Baibel. Narapela nius bilong ol, em Kirap!, em i bin kirapim ol yangpela long kaunim Baibel, em i tok olsem: “Yu kaunim pinis olgeta hap bilong Baibel? Tru, i gat planti liklik hap bilong Baibel, olsem na yu inap makim wanem hap bilong Baibel yu laik kirap long kaunim pastaim. . . . Ol manmeri long Beria ‘ol i gutpela lain manmeri’ na ‘long olgeta de ol i save ritim na skelim tok i stap long buk bilong God.’ (Aposel 17:11) Sapos yu kaunim Baibel inap 15 minit tasol long olgeta de . . . insait long wanpela yia yu kaunim pinis olgeta tok bilong en.”

Ol Witnes i tingim dispela na ol i mekim wok long samting bilong nau i olsem pasin bilong kaunim Baibel long ol man. Long sampela tok ples, ol i wokim ol kaset i gat olgeta tok bilong Baibel long en. Dispela i bin helpim planti man i gat sampela samting i pasim rot bilong ol long kaunim Baibel. Sampela i save putim ol dispela kaset long taim ol i wok long haus, o raun long ka, o mekim narapela wok. Tasol sapos yu inap sindaun isi na harim tok bilong Baibel long kaset na lukim long Baibel bilong yu yet, dispela i gutpela tru.

Sapos nau yu no kaunim Baibel long olgeta de, gutpela sapos yu kirap long mekim, a? Tru, ating yu no inap lusim bikpela hap taim tumas long mekim, tasol dispela bai helpim yu tru, long wanem, taim yu bihainim ol tok yu kaunim, bai yu bihainim gutpela tingting na kisim ol blesing bilong spirit. Bai yu bihainim tok God i givim long Josua, em hetman bilong Israel long bipo. God i tok: “Yu no ken lusim tingting long dispela buk bilong lo. Long san na long nait yu mas skul gut long olgeta lo. Na yu mas was gut na bihainim tru olgeta tok i stap long lo. Sapos yu mekim olsem, orait olgeta arapela samting yu mekim bai i kamap gutpela tasol.”​—⁠Josua 1:⁠8.

Ol tok bilong Baibel i kamapim ol gutpela samting Jehova i laik mekim bilong helpim ol man i bihainim tok bilong em. Sapos yu kisim stretpela save long ol tok bilong em, bai yu inap i stap amamas tru na kisim laip i stap oltaim long Paradais long gutpela nupela taim i gat ol blesing bilong oltaim. (Luk 23:43; 2 Pita 3:13) Nau yu mas kaunim na stadi long Baibel na wok strong bambai yu inap kisim dispela gutpela sindaun.