Yu Ting Baibel i Gutpela Samting?

INAP 200 yia bipo, long liklik ples Lanfiansel, long Wels, klostu long solwara Atlantik, wanpela mama i karim pikinini meri, em Mary Jones. Papamama i man bilong lumim laplap na ol i stap rabis. Ol i no inap baim wanpela Baibel. Tasol ol stori bilong Baibel na ol tok bilong en ol i holim yet long tingting, ol i lainim Mary long en. Olsem na Mary i kirap laikim tru God. Planti taim Mary i kaunim Baibel bilong wanpela man i stap klostu, em Baibel Wels. Em i laik tru long baim Baibel bilong em yet, olsem na em i wok long bungim ol liklik mani.

Long yia 1800, taim Mary i gat 16 krismas, em i harim tok olsem i gat sampela Baibel Wels bilong baim long liklik taun Bala i stap longwe inap 40 kilomita. Maski em i longwe, Mary i wokabaut lek nating na brukim ol liklik maunten, tasol taim em i kamap long taun, i no gat Baibel; ol man i baim pinis. Na em i kisim save olsem liklik mani em i holim i no inap long baim Baibel.

Pasto long dispela taun i sori long Mary, long wanem, Mary i save long Baibel na em i laikim tru, na em i wok strong long kisim, tasol nogat. Taim pasto i lukim Mary i krai, em i givim Baibel bilong em yet long Mary, na em i tok: “Kaunim gut, wok strong long lainim tok bilong en, putim ol dispela tok bilong God long bel na tingting bilong yu, na bihainim.”

Komiti bilong wanpela Sosaiti long Landon, em ol i save tilim ol nius bilong lotu, ol i harim dispela stori long wanpela miting, na ol i pasim tok long helpim ol manmeri long Wels na long olgeta hap bilong graun long kisim Baibel. Long dispela rot planti sosaiti bilong tilim Baibel i bin kamap namel long yia 1800 na 1899. Bihain ol i kirap wokim ol Baibel long planti tok ples.

Long yia 1884, Sosaiti Was Taua i kamap na long nau dispela Sosaiti i wokim ol Baibel na buk bilong Baibel long 200 samting tok ples. Ol i bin tilim 72 milion Baibel New World Translation of the Holy Scriptures long olgeta hap bilong graun. Ol i lukim ol olpela rait bilong Baibel long tok Hibru na tok Grik na wokim dispela Baibel. Ol i tanim pinis olgeta tok o hap tok bilong en long 18 tok ples, na ol i wok yet long tanim long 12 narapela tok ples.

Nau klostu olgeta man inap kisim Baibel, olsem na yu ting olsem wanem long en? Yu ting em i gutpela samting? Yu holim wanpela na yu laikim tru na yu kaunim?

[Piksa Kredit Lain long pes 3]

Ol i kisim long buk The Story of Mary Jones and Her Bible