‘Stap Longpela Taim Olsem Diwai’
WINIM 3,000 yia i go pinis, Moses i tok: “Mipela i save stap inap 70 yia tasol. Na sapos mipela i gat strong, mipela i ken i stap inap 80 yia. Tasol long dispela olgeta yia mipela i stap, mipela i save hatwok na painim hevi tasol.”—Song 90:10.
Long nau i gat planti gutpela marasin bilong helpim man, tasol krismas bilong ol man long nau i no winim krismas bilong ol man long taim bilong Moses. Tasol i no olsem olgeta taim bihain ol man bai i stap sotpela taim tasol. Long Baibel long hap bilong Aisaia, God i tok: “Ol manmeri bilong mi bai i stap longpela taim tru, olsem ol strongpela diwai. Na bai ol i amamas long ol samting ol yet i bin hatwok long kamapim.”—Aisaia 65:22.
Long hap bilong Palestain i no gat narapela diwai i winim diwai oliv long i stap longpela taim tru. Diwai oliv yu lukim long piksa i winim pinis 1,000 yia, na planti diwai olsem i stap yet long Galili. Long wanem taim man bai i stap longpela taim olsem? Tok profet bilong Aisaia i tok dispela samting bai kamap taim God i “wokim nupela skai na nupela graun.”—Aisaia 65:17.
Kamapim Tok Hait tu i tok profet long “nupela skai na nupela graun” bai kamap—em nupela gavman long heven na ol stretpela manmeri i stap long graun. Long dispela taim God “bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.”—KTH 21:1, 4.
Liklik taim nau na God bai truim dispela tok promis bilong em. Long dispela taim ol yia bilong diwai oliv bai i olsem wanpela de i gat 24 aua tasol. Na bai yumi gat planti taim bilong amamas long ol samting yumi bin hatwok long kamapim.