Sapta 4
Krais Jisas—Ki Bilong Kisim Save Long God
1, 2. Olsem wanem ol lotu bilong dispela graun i bin mekim nabaut long ki bilong opim dua bilong kisim save long God?
YU SANAP long dua bilong haus na yu wok long putim ki i go insait long lok. Ples i kol na tudak, na yu laik go insait kwik, tasol ki i no wok. Yu ting em i ki stret bilong dispela dua, tasol dua i no op. Yu les na lukim gen ol ki. Olsem wanem? Em ki stret? Wanpela man i bin bagarapim ki?
2 Dispela i makim gut ol samting ol kain kain lotu bilong graun i mekim na ol man i no save long God—ol dispela lotu i longlong nabaut na paulim dispela save. Planti ol i bin mekim nabaut long ki em inap opim dua na givim dispela save long yumi—dispela ki em Krais Jisas. Sampela lotu i bin tekewe ki—ol i givim baksait olgeta long Jisas. Sampela i bin paulim tingting bilong ol man long wok bilong Jisas, na ol i lotuim em olsem God i Gat Olgeta Strong. Tasol sapos yumi no kisim stretpela save long Krais Jisas, em rot bilong kisim save long God, yumi no inap kisim dispela save; i olsem dua i pas long yumi.
3. I gat wanem as na yumi ken tok, Jisas em i ki bilong kisim save long God?
3 Ating yu save long tok bilong Jisas olsem: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Jisas i no hambak na em i tok olsem, nogat. Planti taim Baibel i kamapim klia olsem yumi mas kisim stretpela save long Krais. (Efesus 4:13; Kolosi 2:2; 2 Pita 1:8; 2:20) Aposel Pita i tok: “Olgeta profet i bin autim tok long ol samting [Krais Jisas] bai i mekim.” (Aposel 10:43) Na aposel Pol i tok: “Olgeta kain save na tingting hait i pulap long Krais.” (Kolosi 2:3) Na Pol i tok, long Jisas olgeta tok promis bilong Jehova i kamap tru. (2 Korin 1:20) Olsem na Krais Jisas em i ki bilong kisim save long God. Yumi mas kisim stretpela save long Jisas na long ol wok God i givim long em, nogut sampela tok bilong ol lotu i paulim tingting bilong yumi long Jisas. Tasol bilong wanem ol disaipel bilong Jisas i ting em i nambawan rot bilong kamapim laik bilong God?
MESAIA GOD I TOK PROMIS LONG EN
4, 5. Ol man i ting Mesaia bai mekim wanem wok bilong helpim ol? Ol disaipel i gat wanem tingting long Jisas?
4 Kirap long taim bilong gutpela man Abel, ol wokboi bilong God i bin wetim Pikinini em God Jehova yet i tok promis long em bai kamap. (Stat 3:15; 4:1-8; Hibru 11:4) God i tok, dispela Pikinini bai mekim wok bilong Em olsem Mesaia, em “Man God i Makim.” Em bai “pinisim olgeta pasin nogut,” na Buk Song i tokaut long ol gutpela wok bilong Kingdom bilong em. (Daniel 9:24-26; Song 72:1-20) Orait, husat bai kamap Mesaia?
5 Tingim bikpela amamas bilong yangpela Judaman Andru, em i harim tok bilong Jisas bilong Nasaret na em i sut i go tokim brata bilong em, Saimon Pita: “Mipela i lukim pinis Mesaia.” (Jon 1:41) Ol disaipel bilong Jisas i bilip tru olsem em i Mesaia God i tok promis long em bai kamap. (Matyu 16:16) Ol Kristen tru i redi long i dai bilong holimpas bilip bilong ol olsem Jisas em i Mesaia, o Krais, em ol profet i tok em bai kam. Wanem as bilong bilip bilong ol? Yumi ken stori long 3-pela samting i makim Jisas em i Mesaia.
OL SAMTING I MAKIM JISAS EM I MESAIA
6. (a) Pikinini bilong promis i mas kamap long wanem lain? Olsem wanem yumi save Jisas i bin kamap long dispela lain? (b) Olsem wanem na bihain long yia 70, sapos wanpela man i tok em i Mesaia em i no gat rot bilong truim dispela tok?
6 Lain tumbuna bilong Jisas em namba wan samting i makim em i Mesaia. Jehova i bin tokim wokboi bilong em Abraham, Pikinini bilong promis bai kamap long lain bilong em. Jehova i mekim wankain tok promis long pikinini bilong Abraham, em Aisak, na long pikinini bilong Aisak, em Jekop, na long pikinini bilong Jekop, em Juda. (Stat 22:18; 26:2-5; 28:12-15; 49:10) Sampela handet yia bihain, tok promis i go long King Devit olsem wanpela bilong ol lain pikinini bilong em bai kamap Mesaia. (Song 132:11; Aisaia 11:1, 10) Gutnius bilong Matyu na Luk i kamapim klia olsem Jisas em i bilong lain bilong Devit. (Matyu 1:1-16; Luk 3:23-38) Planti man i birua tru long Jisas, tasol i no gat wanpela i sakim dispela samting planti man i tokaut long en, olsem Jisas em i pikinini bilong Devit. (Matyu 21:9, 15) Olsem na yumi save tru long lain tumbuna bilong Jisas. Tasol ol buk i kolim lain tumbuna bilong ol narapela Juda, ol dispela buk i bagarap long yia 70, long taim ol Rom i bagarapim Jerusalem, na sapos bihain wanpela i tok em i Mesaia, em i no gat rot bilong truim dispela tok.
7. (a) Wanem namba 2 samting i makim olsem Jisas em i Mesaia? (b) Olsem wanem tok bilong Maika 5:2 i kamap tru long Jisas?
7 Truim bilong ol tok profet em namba 2 samting i makim Jisas em i Mesaia. Planti tok profet long Ol Skripsa Hibru i kolim kain kain samting bilong Mesaia. Long yia 750 samting paslain long Krais, profet Maika i tok dispela hetman bai kamap long liklik taun nating Betlehem. Tupela taun long Israel i gat nem Betlehem, tasol dispela tok profet i kolim stret wanem taun Mesaia bai kamap long en, olsem Betlehem Efrata, em as ples bilong King Devit. (Maika 5:2) Papamama bilong Jisas, em Josep na Maria, tupela i sindaun long Nasaret, em longwe long Betlehem inap 150 kilomita long hap not. Tasol taim Maria i gat bel, king bilong Rom, em Sisar Ogastus, i putim lo long olgeta manmeri i mas go bek long as ples bambai gavman i ken kisim nem bilong ol.a Olsem na Josep i mas kisim Maria i go long Betlehem, na Maria i karim Jisas long dispela ples.—Luk 2:1-7.
8. (a) Hap taim bilong 69 taims “7-pela yia” i kirap long wanem taim? Wanem samting i kamap na dispela hap taim i kirap? (b) Dispela hap taim bilong 69 taims “7-pela yia” em hamas yia tru? Wanem samting i kamap long pinis bilong dispela hap taim?
8 Long yia 550 samting paslain long Krais profet Daniel i tok, kirap long taim tok i kamap bilong wokim gen Jerusalem, 69 taims “7-pela yia”b i mas pinis pastaim na “dispela bikman [Mesaia] God i bin makim” bai i kamap. (Daniel 9:24, 25) Stori bilong Baibel na ol stori bilong ol samting i bin kamap bipo i makim olsem tok bilong wokim gen Jerusalem i bin kamap long yia 455 paslain long Krais. (Nehemia 2:1-8) Olsem na Mesaia i mas kamap 483 (69 taims 7) yia bihain long yia 455 paslain long Krais. Em olsem yia 29, na long dispela yia yet Jehova i bin makim Jisas long spirit holi. Long dispela rot Jisas i kamap Krais, o Mesaia, “em i dispela man God i makim.”—Luk 3:15, 16, 21, 22.
9. (a) Truim bilong Song 2:2 i kamap olsem wanem? (b) Wanem sampela tok profet moa i kamap tru long Jisas? (Lukim lista.)
9 Tasol sampela ol i no kisim Jisas olsem Mesaia God i tok promis long em bai kamap, na Baibel i tok profet pinis olsem. Long Song 2:2, God i kirapim King Devit long tok profet olsem: “Ol king bilong olgeta hap graun, ol i redi long pait. Na ol hetman i bung na painim rot bilong daunim Bikpela na dispela man em i makim.” Dispela tok profet i makim olsem ol hetman bilong sampela kantri bai bung na pait long Man Jehova i Makim, em Mesaia. Na samting i kamap olsem. Ol hetman bilong lotu Juda, na King Herot, na namba wan gavman Pontius Pailat bilong Rom, olgeta i insait long wok bilong kilim i dai Jisas. Bipo Herot tupela Pailat i stap birua birua, tasol kirap long dispela taim tupela i kamap pren. (Matyu 27:1, 2; Luk 23:10-12; Aposel 4:25-28) Bilong save long sampela samting moa i makim Jisas em i Mesaia, lukim lista hia “Sampela Bikpela Tok Profet Long Mesaia.”
10. Long wanem ol rot Jehova i tokaut olsem Jisas em i dispela Man God i Makim?
10 Tok bilong God Jehova yet em namba 3 samting i makim olsem Jisas em i Mesaia. Jehova i salim ol ensel i go tokim ol manmeri, Jisas em i Mesaia. (Luk 2:10-14) Na taim Jisas i stap long graun, Jehova yet long heven i tok em i amamas long Jisas. (Matyu 3:16, 17; 17:1-5) God Jehova i givim strong long Jisas bilong wokim ol mirakel. Olgeta wan wan mirakel i makim olsem Jisas em i Mesaia tru; God i no ken givim kain strong olsem long wanpela Mesaia giaman. Na long rot bilong spirit holi God i kirapim ol man long raitim ol stori bilong Jisas, olsem na stori bilong ol samting i makim Jisas em i Mesaia i stap long Baibel, em buk ol i bin tanim long planti tok ples na tilim long planti hap moa, winim olgeta narapela buk.—Jon 4:25, 26.
11. I gat hamas samting i makim olsem Jisas em i Mesaia?
11 Insait long dispela 3-pela samting i makim Jisas em i Mesaia, i gat planti handet samting i kamapim klia dispela samting. Olsem na i stret ol Kristen tru i ken ting Jisas em i dispela man “olgeta profet i bin autim tok long ol samting em bai i mekim,” na em i ki bilong kisim save long God. (Aposel 10:43) Yumi mas save Krais Jisas em i Mesaia, tasol i gat planti samting moa bilong em yumi mas save long en. Em i bilong we tru? Taim em i kamap pastaim tru em i wanem kain?
TAIM JISAS I NO KAM DAUN YET LONG GRAUN
12, 13. (a) Olsem wanem yumi save, taim Jisas i no kam daun yet long graun, em i bin i stap long heven? (b) “Tok” em i husat? Em i mekim wanem wok taim em i no kamap man yet long graun?
12 I stap bilong Jisas i olsem i gat 3-pela hap bilong en. Namba wan hap bilong i stap bilong em i bin kirap long bipo bipo tru, taim em i no kam daun yet long graun. Maika 5:2 i tok Mesaia em i bilong “bipo tru.” (NW) Na Jisas i tok klia em i “bilong antap,” olsem em i kam long heven. (Jon 8:23; 16:28) Taim em i no kam daun yet long graun, em i bin stap hamas yia long heven?
13 Baibel i kolim Jisas olsem dispela “wanpela Pikinini tasol” bilong God, long wanem, God Jehova yet i wokim em. (Jon 3:16) Em i namba wan samting God i wokim, na bihain God i givim wok long em bilong wokim olgeta narapela samting. (Kolosi 1:15; KTH 3:14) Jon 1:1 i tok, “Tok” (em Jisas taim em i no kam daun yet long graun) i stap wantaim God long “bipo bipo tru.” Olsem na Tok i stap wantaim God taim God i mekim kamap “skai na graun.” Taim God i tok, “nau yumi wokim ol manmeri,” em i toktok wantaim Tok. (Stat 1:1, 26) Na tu, Tok em dispela “saveman i bosim wok” em God i laikim tumas, em Sindaun 8:22-31 i stori long em, na em i wok wantaim Jehova long wokim olgeta samting. Taim Jehova i wokim pinis Tok, Tok i stap longpela taim tru wantaim em long heven, na bihain Tok i kamap man long graun.
14. Olsem wanem na Baibel i tok Jisas em i “wankain olsem God yet”?
14 Olsem na yumi no kirap nogut long Kolosi 1:15 i tok, Jisas em i “wankain olsem God yet”! Inap longpela taim moa yet, yumi no save hamas yia tru, dispela Pikinini, em man bilong bihainim tok, em i stap wantaim Papa Jehova na em i kamap wankain olsem Em. Dispela tu i as na Jisas em i ki bilong kisim save long God, em dispela save inap givim laip oltaim long yumi. Olgeta samting Jisas i mekim long graun i wankain stret olsem ol pasin bilong Jehova yet. Olsem na taim yumi kisim save long Jisas, yumi inap save gut long Jehova. (Jon 8:28; 14:8-10) Tru tumas, em bikpela samting yumi mas kisim sampela save moa long Krais Jisas.
I STAP BILONG JISAS LONG GRAUN
15. Taim Jisas i kam long graun, olsem wanem em i kamap pikinini i gutpela olgeta?
15 Namba 2 hap bilong i stap bilong Jisas, em i kam i stap hia long graun. Em i amamas long larim God i kisim laip bilong em long heven na putim long bel bilong gutpela meri singel bilong lain Juda, nem bilong em Maria. Strongpela spirit holi, em strong bilong Jehova, i “karamapim” Maria na em i gat bel na em i karim pikinini i gutpela olgeta. (Luk 1:34, 35) Jisas i no kisim sin, long wanem, As bilong laip bilong em i gutpela olgeta. Em i go bikpela long haus bilong man nating i stap waspapa bilong em, em kamda Josep; em i namba wan pikinini bilong dispela famili na em i gat ol brata susa bilong em.—Aisaia 7:14; Matyu 1:22, 23; Mak 6:3.
16, 17. (a) Jisas i kisim we strong bilong wokim ol mirakel? Wanem sampela mirakel em i bin wokim? (b) Wanem sampela gutpela pasin bilong Jisas?
16 Taim Jisas i gat 12-pela krismas tasol, em i kamapim klia olsem em i laikim tumas God Jehova. (Luk 2:41-49) Em i go bikpela na i kirap mekim wok bilong em taim em i gat 30 krismas, na nau em i kamapim klia olsem em i laikim tumas ol man tu. Em i sori long ol na taim spirit bilong God i givim strong long em bilong wokim ol mirakel, em i oraitim ol sikman, na ol lek nogut, na ol man i kisim bagarap, na ol aipas, na ol yaupas, na ol lepraman. (Matyu 8:2-4; 15:30) Jisas i givim kaikai long planti tausen manmeri i hangre. (Matyu 15:35-38) Em i mekim i dai traipela win na si i laik bagarapim ol pren bilong em. (Mak 4:37-39) Na em i kirapim bek sampela man i dai pinis. (Jon 11:43, 44) Ol man bilong bipo i save ol dispela mirakel i bin kamap tru. Ol birua bilong Jisas tu i tokaut olsem em i save “wokim planti mirakel.”—Jon 11:47, 48.
17 Jisas i raun long olgeta hap long ples bilong em na lainim ol manmeri long Kingdom bilong God. (Matyu 4:17) Em i stap olsem nambawan piksa tru long pasin bilong isi long ol man na no ken les kwik. Na maski sampela taim ol disaipel i no bihainim gut tok bilong em, em i sori long ol na em i tok: “Tru, bel em i gat laik bilong mekim samting, tasol bodi em i no gat strong.” (Mak 14:37, 38) Tasol Jisas i no pret long kamapim pasin nogut bilong ol man i rabisim tok i tru na daunim ol man i no gat helpim bilong ol. (Matyu 23:27-33) Na bikpela samting, em i bihainim tru pasin bilong Papa long laikim ol narapela. Em i redi long i dai tu bilong helpim ol man i gat sin bambai gutpela samting i ken painim ol long bihain. Olsem na i stret yumi ken tok Jisas em i ki bilong kisim save long God! Tru tumas, em ki i stap laip! Bilong wanem mipela i tok olsem? Orait, nau yumi ken stori long namba 3 hap bilong i stap bilong em.
JISAS LONG NAU
18. Yumi mas tingim Krais Jisas i stap olsem wanem long nau?
18 Tru, Baibel i stori olsem Jisas i dai, tasol nau em i stap laip! Taim em i kirap bek pinis, planti handet man i bin i stap long dispela taim ol i lukim em long ai bilong ol yet. (1 Korin 15:3-8) Bihain, olsem tok profet i makim, em i go sindaun long han sut bilong Papa na wet long kisim strong bilong mekim wok king long heven. (Song 110:1; Hibru 10:12, 13) Orait, yumi mas tingim em i stap olsem wanem long nau? Yu ting yumi mas tingim em olsem liklik pikinini nating long bokis kaikai bilong bulmakau? O yumi mas tingim em olsem man i karim bikpela pen na ol i kilim em i dai? Nogat. Nau em i stap bikpela strongpela King! Klostu nau em bai kirap bosim dispela graun i gat planti hevi.
19. Klostu nau bai Jisas i mekim wanem?
19 Long Kamapim Tok Hait 19:11-15, Baibel i stori klia tru long King Krais Jisas i kam wantaim bikpela strong bilong bagarapim olgeta man nogut. Yumi save, dispela gutpela King bilong heven i laik tru long pinisim hevi bilong ol planti milion manmeri long nau! Na em i gat bikpela laik tu long helpim ol manmeri i wok strong long bihainim gutpela pasin em i bin makim taim em i stap long graun. (1 Pita 2:21) Long Armagedon, em pait bilong “bikpela de bilong God I Gat Olgeta Strong” i hariap i kam, Jisas i laik lukautim ol na bai ol i ken i stap oltaim long graun aninit long Kingdom bilong God i stap long heven.—KTH 7:9, 14; 16:14, 16.
20. Taim Jisas i bosim graun inap 1,000 yia em bai mekim wanem bilong helpim ol manmeri?
20 Taim Jisas i bosim graun inap 1,000 yia na kamapim gutaim, olsem Baibel i tok profet pinis, em bai wokim ol mirakel bilong helpim olgeta manmeri. (Aisaia 9:6, 7; 11:1-10; KTH 20:6) Jisas bai oraitim olgeta kain sik na pinisim i dai. Em bai kirapim bek planti bilion manmeri bambai ol tu i gat rot long kisim laip i stap oltaim long graun. (Jon 5:28, 29) Bai yu amamas long kisim sampela save moa long Kingdom bilong em long wanpela sapta bihain. Yu ken save tru olsem: Yumi no inap tingim olgeta gutpela gutpela samting bai painim yumi taim Kingdom i bosim dispela graun. Em bikpela samting tru long yumi mas save gut long Krais Jisas! Tru tumas, yumi no ken lusim tingting long Jisas, em dispela ki i stap laip, olsem rot bilong kisim save long God, em dispela save inap bringim yumi long laip oltaim.
[Ol Futnot]
a Dispela lo bilong gavman bilong Rom i helpim gavman long kisim takis long olgeta man. Olsem na Ogastus i helpim truim bilong tok profet olsem wanpela king bai “salim wanpela man i go kisim takis.” Em dispela tok profet i tok tu, taim narapela king i senisim dispela king ol bai daunim “hetpris bilong ol manmeri bilong God,” em Mesaia. Ol i bin kilim i dai Jisas long taim senis bilong Ogastus, em Taiberius, i stap king.—Daniel 11:20-22.
b Ol Juda bilong bipo i save brukim ol yia i go 7-pela 7-pela. Olsem: Ol i save makim namba 7 de bilong wik i olsem de Sabat, na olsem tasol ol i save makim namba 7 yia i olsem yia Sabat.—Kisim Bek 20:8-11; 23:10, 11.
TRAIM SAVE BILONG YU
Olsem wanem lain tumbuna bilong Jisas i truim tok bilong em olsem em i Mesaia?
Wanem sampela tok profet long Mesaia i kamap tru long Jisas?
God yet i mekim wanem na em i kamapim klia olsem Jisas em i dispela Man God i Makim?
Olsem wanem Jisas i stap yet olsem ki bilong kisim save long God?
[Sat long pes 37]
SAMPELA BIKPELA TOK PROFET LONG MESAIA
TOK PROFET SAMTING I KAMAP TRUIM
TAIM EM I PIKININI
Aisaia 7:14 Mama i nupela meri Matyu 1:18-23
Jeremaia 31:15 Em i kamap pinis na ol i Matyu 2:16-18
kilim i dai ol bebi
WOK BILONG EM
Aisaia 61:1, 2 God i givim wok long em Luk 4:18-21
Aisaia 9:1, 2 Wok bilong em i mekim na ol Matyu 4:13-16
manmeri i lukim bikpela lait
Song 69:9 Em i wok strong long mekim haus Jon 2:13-17
bilong Jehova i stap gut
Aisaia 53:1 Ol i no bilip long em Jon 12:37, 38
Sekaraia 9:9; Em i sindaun long donki na Matyu 21:1-9
KAMAPIM EM NA DAI BILONG EM
Song 41:9; 109:8 Wanpela aposel i no stap gut Aposel 1:15-20
long Jisas; em i kamapim Jisas
long ol birua, na bihain narapela
i kisim wok bilong em
Sekaraia 11:12 Man i kamapim em bilong Matyu 26:14, 15
kisim 30 mani silva
Song 27:12 Sampela i sutim tok giaman Matyu 26:59-61
long em long kot
Song 22:18 Ol i pilai satu bilong kisim Jon 19:23, 24
klos bilong em
Aisaia 53:12 Ol i lukim em i olsem man nogut Matyu 27:38
Song 22:7, 8 Em i laik i dai na ol i tok Mak 15:29-32
bilas long em
Song 69:21 Givim wain i gat marasin nogut Mak 15:23, 36
Aisaia 53:5; Sutim em long spia Jon 19:34, 37
Aisaia 53:9 Planim em wantaim ol maniman Matyu 27:57-60
Song 16:8-11 Bodi i no sting yet na Aposel 2:25-32;
em i kirap bek Aposel 13:34-37
[Piksa long pes 35]
God i givim strong long Jisas bilong oraitim ol sikman