Askim

Olsem wanem? Kontrak bilong Lo i pinis long taim Jisas i dai long pos? Wanem taim nupela kontrak i senisim olpela kontrak bilong Lo?

Planti man i bin askim olsem. Ol i tingim 3-pela samting: Jisas i dai long pos long apinun long mun Naisan, 33 Y.B., na long heven em i givim long God pe bilong blut bilong em, na long de Pentikos, 33 Y.B., em i salim spirit holi i kam. Nupela kontrak i senisim kontrak bilong Lo long de Pentikos. Nau yumi ken stori long dispela.

Jehova i bin tok em bai pinisim kontrak bilong Lo na em bai “mekim nupela kontrak” na bai em inap lusim tingting long rong bilong ol man. Long kontrak bilong Lo em i no inap mekim olsem. (Jeremaia 31:​31-34) Wanem taim em i mekim dispela nupela kontrak?

Olpela kontrak bilong Lo i mekim pinis wok bilong en, olsem na God i pinisim. (Galesia 3:​19, 24, 25) Aposel Pol i tok: “God i bin lusim olgeta rong bilong yumi. Lo i bin kotim yumi na kamapim ol rong bilong yumi, na mekim yumi i stap aninit long ol tok na strong bilong en. Tasol God i bin rausim olgeta dispela tok bilong kotim yumi, na em i pinisim strong bilong lo na nilim em long diwai [pos] bilong Krais.” (Kolosi 2:​13, 14) Olsem wanem? Taim Jisas i dai, wantu nupela kontrak i senisim kontrak bilong Lo, o nogat?

Nogat, long wanem, i mas i gat blut bilong wanpela ofa na bai nupela kontrak i ken kirap, na em i mas kirap long wanpela nupela lain man, olsem Isrel bilong spirit. (Hibru 8:​5, 6; 9:​15-22) God i kirapim bek Jisas long Naisan 16, na 40 de bihain em i go long heven. (Aposel 1:​3-9) Tenpela de bihain, olsem long Pentikos, Jisas i kisim spirit holi long Papa bilong em na em i kapsaitim long ol disaipel bilong em, olsem em i bin tok promis long mekim, na long dispela taim stret lain Isrel bilong spirit i kirap. (Aposel 2:33) God i mekim nupela kontrak long Isrel bilong spirit long rot bilong dispela Namelman, em Krais Jisas.

Orait, wanem taim nupela kontrak i bin senisim kontrak bilong Lo?

Kontrak bilong Lo i no pinis taim Jisas i dai, long wanem, inap 40 de bihain long Jisas i kirap bek olsem spirit em i stap yet long graun na ol disaipel i bihainim yet ol samting bilong Lo. Lo i tok, hetpris i mas i go insait long Rum Tambu Tru. Dispela i makim Jisas i mas i go insait long heven, olsem Namelman bilong nupela kontrak, na em i ken givim pe bilong ofa bilong em long God. (Hibru 9:​23, 24) Jisas i mekim pinis, na nau nupela kontrak inap kamap na truim tok bilong Jeremaia 31:​31-34.

Jehova i orait long dispela ofa na nau em i kirap salim spirit holi i kam long ol disaipel bilong Jisas na long dispela taim stret nupela kontrak i kirap, na long dispela taim stret nupela lain i kamap, em Isrel bilong spirit, ol i insait long kontrak bilong Kingdom. (Luk 22:29; Aposel 2:​1-4) Dispela i makim olsem God i pinisim pinis kontrak bilong Lo, olsem nilim long pos em Jisas i bin dai long en. Olsem na yumi ken tok, kontrak bilong Lo i pinis long Pentikos long 33 Y.B., taim nupela kontrak i kirap na nupela lain i kirap, em Isrel bilong spirit.​—⁠Hibru 7:12; 8:​1, 2.

Tasol God i no givim baksait long olpela lain Isrel taim kontrak bilong Lo i pinis na nupela kontrak i kirap long de Pentikos 33 Y.B. Namba 70 “wik” i pinis long 36 Y.B., na long dispela taim Jehova i mekim gut long ol Juda, em ol Isrel, na long sampela long ol narapela lain ol i bin kisim lotu Juda, na long ol Samaria, na dispela i stret wantaim kontrak Jehova i bin mekim wantaim Ebraham. (Jenesis 12:​1-3; 15:18; 22:18; Danyel 9:27; Aposel 10:​9-28, 44-48) Na sampela Juda Kristen em spirit i bin makim ol ol i no lusim kwik ol pasin bilong Lo; ol i mas save, bihain long 33 Y.B. ol i no gat wok moa long bihainim dispela olpela kontrak bilong Lo, tasol pastaim ol i no klia, olsem na long 49 Y.B. ol i bin salim askim long lain bilong bosim ol Kristen. (Aposel 15:​1, 2) Tasol long 70 Y.B. ol Rom i bagarapim haus lotu wantaim lista bilong ol famili na ol pepa bilong Lo, na dispela i kamapim long ples klia olsem nau kontrak bilong Lo i pinis tru.​—⁠Matyu 23:⁠38.

[Piksa Kredit Lain long pes 31]

Pictorial Archive (Near Eastern History) Est.