Askim

Ol Filistia, em Baibel i stori long ol, ol i husat?

Planti taim Baibel i stori long ol Filistia i bin stap long Kenan taim lain bilong God bilong bipo i kisim Graun Bilong Promis. Inap longpela taim ol Filistia bilong bipo i birua long lain bilong God. Stori bilong Devit i pait wantaim Goliat, em traipela man Filistia, i kamapim klia dispela samting.​—⁠1 Samuel 17:​1-3, 23-53.

Baibel i tok ol Filistia i lusim Kapta (Capthor) na i kam long nambis long hap saut-wes bilong Kenan. (Jeremaia 47:⁠4, NW) Kapta i bin i stap long wanem hap? Buk The International Standard Bible Encyclopedia (1979) i tok: “Ol i no save gut long dispela samting, tasol ol saveman i ting ailan Krit (o ating Krit wantaim ol ailan Ijian, em ol i gat wankain pasin tumbuna) em i dispela ples Kapta.”​—⁠Volyum 1, pes 610.

Olsem na tok bilong Amos 9:7 i stret, em i tok: “Yupela Israel, mi save lukautim gut ol Itiopia tu, olsem mi save lukautim yupela. Mi bin kisim ol Filistia long ples Krit na bringim ol i kam, . . . olsem mi bin kisim yupela long Isip na bringim yupela i kam.”

Nogat man i save long wanem taim dispela lain i save raun long solwara i bin lusim Krit na i kam long hap bilong Kenan, em bihain ol i bin kolim Filistia. Em hap nambis long saut-wes namel long Jopa na Gasa. Long taim bilong Abraham na Aisak ol i bin i stap pinis long dispela stretpela hap graun long nambis.​—⁠Stat 20:​1, 2; 21:​32-34; 26:​1-18.

Inap longpela taim ol Filistia i bin i stap olsem wanpela strongpela lain long dispela hap God i bin givim pinis long ol Israel. (Kisim Bek 13:17; Josua 13:2; Hetman 1:​18, 19; 3:​3, 4; 15:​9, 10; 1 Samuel 4:​1-11; 7:​7-14; 13:​19-23; 1 King 16:15) Inap long taim bilong King Usia bilong Juda ol Filistia i stap long ol taun bilong ol, em Get na Japne na Asdot. (2 Stori 26:⁠6) Planti taim Baibel i stori long sampela narapela taun bilong ol, olsem Ekron na Askelon na Gasa.

King Aleksander i winim na kisim taun Gasa bilong ol Filistia, tasol bihain ol Filistia i no stap moa olsem wanpela lain. Profesa Lawrence E. Stager i tok olsem: “Ol Filistia tu i bin i stap kalabus long Babilon. . . . Tasol i no gat wanpela buk i tokaut long samting i bin painim ol taim ol i kalabus. Ol Filistia i no bin lusim Askelon taim Nebukatnesar i daunim ol; lain bilong ol i pinis nating. Ol man i no save moa long ol.”​—⁠Nius Biblical Archaeology Review (Me/Jun 1991).

Dispela nem Palestain bilong nau i kam long tok Latin na Grik, na wanpela tok Hibru ol i tanim olsem “Filistia” i as bilong en. Sampela Baibel long tok Arap i kolim wanpela tok i makim “ol Filistia” na dispela tok i klostu olsem tok i makim ol Palestain bilong nau, na man inap paul long dispela tupela tok. Tasol Baibel Today’s Arabic Version i raitim narapela tok Arap bilong makim ol Filistia. Olsem na dispela Baibel i kolim wanpela tok bilong makim ol Filistia bilong bipo na narapela tok bilong makim ol Palestain bilong nau.

[Piksa long pes 31]

Sampela ston bilong bipo long Askelon

[Kredit Lain]

Pictorial Archive (Near Eastern History) Est.