Sapta 18

Tingting Long Mekim Wok Bilong God Oltaim Oltaim

1, 2. Yu mas kisim save long God na mekim wanem samting moa?

TINGIM olsem yu sanap ausait long wanpela rum i gat ol gutpela gutpela samting i stap insait, tasol dua i lok. Man bilong bosim ki i givim ki long yu na em i tok yu ken kisim ol dispela gutpela samting. Tasol ki i no inap helpim yu sapos yu no mekim wok long en. Olsem tasol yu mas mekim wok long save yu kisim bambai em inap helpim yu.

² Dispela i stret moa yet long save yu kisim long God. Tru tumas, bilong kisim laip oltaim yu mas kisim stretpela save long God Jehova na Krais Jisas. (Jon 17:3) Tasol sapos yu kisim save na yu no mekim wok long en, dispela i no inap helpim yu. Yu mas mekim wok long dispela save, olsem yu mekim wok long ki bilong kisim gutpela samting. Jisas i tok ol manmeri i bihainim laik bilong God ol inap “go insait long kingdom.” Ol dispela manmeri inap mekim wok bilong God oltaim oltaim! Em gutpela samting tru.—Matyu 7:21; 1 Jon 2:17.

3. God i laik bai yumi mekim wanem?

³ Taim yu kisim save pinis long laik bilong God, yu mas bihainim. Orait, yu ting God i laik bai yu mekim wanem? Laik bilong em i olsem: Em i laik bai yu bihainim lek bilong Jisas. Namba Wan Pita 2:21 i tok: “[Krais] i soim yupela pinis dispela pasin bilong em, bai yupela i ken bihainim.” Olsem na bilong mekim laik bilong God, yu mas bihainim gut pasin bilong Jisas. Long dispela rot bai yu mekim wok long save yu kisim long God.

WOK JISAS I MEKIM LONG SAVE EM I KISIM LONG GOD

4. Olsem wanem na Jisas i save moa yet long Jehova? Em i mekim wanem wok long dispela save?

⁴ Krais Jisas i save moa yet long God, winim olgeta narapela. Taim em i no kam daun yet long graun, em i stap wantaim God Jehova long heven na wok wantaim em inap longtaim tru. (Kolosi 1:15, 16) Na Jisas i mekim wanem long bikpela save em i kisim? Em i no laik kisim tasol; em i bihainim. Olsem na em i mekim gutpela pasin tru long ol man, na em i isi long ol na mekim pasin sori long ol. Em i bihainim pasin bilong Papa bilong em long heven; em i mekim pasin i stret wantaim save em i kisim long pasin na laik bilong Jehova.—Jon 8:23, 28, 29, 38; 1 Jon 4:8.

5. Bilong wanem Jisas i kisim baptais? Olsem wanem em i truim ol samting baptais bilong em i makim?

⁵ Save Jisas i bin kisim i kirapim em long mekim wanpela bikpela samting. Em i lusim Galili i go long wara Jordan na Jon i baptaisim em. (Matyu 3:13-15) Baptais bilong Jisas i makim wanem samting? Jisas i kamap insait long lain Juda, na dispela lain olgeta i dediket pinis long God. Olsem na taim mama i karim em, em i dediket pinis. (Kisim Bek 19:5, 6) Taim em i kisim baptais, em i givim em yet long Jehova bilong mekim ol samting Jehova i laik bai em i mekim long graun. (Hibru 10:5, 7) Na Jisas i bihainim tru ol samting baptais bilong em i makim. Em i wok strong tru long mekim wok bilong Jehova; long olgeta taim em i wok long helpim ol man long save long God. Jisas i amamas long bihainim laik bilong God; em i tok, dispela i olsem kaikai bilong em.—Jon 4:34.

6. Olsem wanem Jisas i daunim laik bilong em yet?

⁶ Jisas i save em i mas lusim planti samting—laip bilong em tu—bambai em inap bihainim laik bilong Jehova. Tasol em i daunim laik bilong em yet na em i putim ol samting bilong helpim em yet i stap nambatu. Long olgeta taim laik bilong God i nambawan bikpela samting long em. Olsem wanem yumi ken bihainim dispela gutpela pasin bilong Jisas?

ROT I BRINGIM YU LONG LAIP OLTAIM

7. Wanem sampela samting yu mas mekim pastaim bambai yu inap kisim baptais?

⁷ Yumi no gutpela olgeta olsem Jisas, na i gat sampela bikpela samting yumi mas mekim pastaim bambai yumi inap kisim baptais. Namba wan, em yumi mas kisim stretpela save long God Jehova na Krais Jisas na putim long bel bilong yumi. Taim yumi mekim olsem, dispela bai kirapim yumi long bilip na laikim tumas God. (Matyu 22:37-40; Rom 10:17; Hibru 11:6) Bilong bihainim ol lo na ol stiatok bilong God, yumi mas kirap na tanim bel; yumi mas hevi long ol rong yumi mekim bipo, long wanem, yumi bin brukim lo bilong God. Dispela i save kirapim yumi long baut, olsem lusim ol pasin nogut yumi bihainim taim yumi no save yet long God. (Aposel 3:19) Sapos yumi hait na mekim yet sampela rong na yumi no bihainim stretpela pasin, yumi no baut tru na yumi no bin giamanim God, long wanem, Jehova inap save long olgeta pasin giaman yumi mekim.—Luk 12:2, 3.

8. Taim yu laik insait long wok bilong autim tok bilong Kingdom, yu mas mekim wanem?

⁸ Yu kisim save long God, olsem na i stret yu yet yu mas tingim gut ol samting bilong spirit, a? Ating yu laik tru long tokim ol famili na pren na ol narapela long ol tok yu kisim save long en. Ating yu kirap pinis long mekim olsem. Jisas tu i bin autim gutnius long ol man long kain kain taim na ples. (Luk 10:38, 39; Jon 4:6-15) Nau yu laik mekim sampela wok moa bilong autim tok, a? Ol elda Kristen bai amamas long toktok wantaim yu bambai ol i ken save yu winim mak na yu inap long wok wantaim ol Witnes Bilong Jehova long autim tok bilong Kingdom. Sapos yu winim mak na yu inap, ol elda bai stretim rot bambai yu ken wok wantaim wanpela Witnes long autim tok. Ol disaipel bilong Jisas i bihainim tok bilong em long pasin bilong mekim gut wok bilong ol long autim tok. (Mak 6:7, 30; Luk 10:1) Taim yu bihainim ol tok bilong skulim yu long pasin bilong autim tok bilong Kingdom, dispela bai helpim yu long mekim stret wok autim tok taim yu go long ol haus o yu autim tok long narapela taim na ples.—Aposel 20:20, 21.

9. Man i dediket long God olsem wanem? Taim em i dediket pinis, dispela i mekim wanem long laip bilong em?

⁹ Taim yu autim tok bilong Kingdom long olgeta kain man i stap long hap em kongrigesen i autim tok long en, em rot bilong painim ol man i laikim stretpela pasin, na em i wanpela gutpela wok yu ken mekim bilong kamapim klia bilip bilong yu. (Aposel 10:34, 35; Jems 2:17, 18, 26) Na sapos yu go oltaim long ol miting Kristen na givim bel long autim tok, dispela tu em rot bilong kamapim klia olsem yu tanim bel na baut pinis na nau yu strong long bihainim save yu kisim long God. Orait, nau yu mas mekim wanem? Yu mas dediket long God Jehova. Bilong mekim olsem, yu mas beten long God na tokim em yu laik givim laip bilong yu na givim bel olgeta long mekim laik bilong em. Em rot bilong dediket long Jehova na kisim plang bilong Krais Jisas i no hatwok long karim.—Matyu 11:29, 30.

BAPTAIS—EM I MEKIM WANEM LONG YU?

10. Taim yu dediket pinis long Jehova, bilong wanem yu mas kisim baptais?

¹⁰ Jisas i tok, olgeta manmeri i laik kamap disaipel bilong em ol i mas baptais. (Matyu 28:19, 20) Taim yu dediket pinis, bilong wanem yu mas baptais? Yu dediket long Jehova, olsem na em i save yu laikim em tumas. Tasol yu laik mekim sampela samting bambai ol narapela i ken save yu laikim tumas God, a? Baptais em i rot bilong tokaut long ai bilong ol man olsem yu dediket long God Jehova.—Rom 10:9, 10.

11. Baptais i makim wanem samting?

¹¹ Baptais i makim bikpela samting. Taim ol i putim yu i go insait long wara, olsem “planim” yu, dispela i makim olsem yu dai pinis long olpela pasin bilong yu. Taim yu lusim wara na kam antap, i olsem yu bihainim nupela wokabaut em laik bilong God i bosim, i no laik bilong yu yet. Tasol i no olsem bai yu no popaia na mekim sampela pasin kranki moa. Nogat. Yumi no gutpela olgeta na yumi save popaia long olgeta de. Tasol taim yu dediket na baptais na stap wokboi bilong Jehova, nau yu kamap wanbel wantaim em. Yu tanim bel pinis na daunim yu yet na kisim baptais, olsem na Jehova i redi long lusim ol rong bilong yu long rot bilong ofa bilong Jisas. Olsem na baptais i mekim na bel bilong yu i kamap klin long ai bilong God.—1 Pita 3:21.

12. (a) Baptais long “nem bilong Papa” i makim wanem samting? (b) Baptais long ‘nem bilong Pikinini’ i makim wanem samting? (c) Baptais long ‘nem bilong spirit holi’ i makim wanem samting?

¹² Jisas i tok, ol disaipel bilong em i mas baptaisim ol nupela disaipel “long nem bilong Papa na bilong Pikinini na bilong Holi Spirit.” (Matyu 28:19) Wanem insait bilong tok bilong Jisas? Taim man i baptais long “nem bilong Papa,” dispela i makim olsem em i bilip tru olsem God Jehova em i Man bilong wokim olgeta samting na em i King tru bilong heven na graun. (Song 36:9; 83:18; Saveman 12:1) Taim man i baptais long ‘nem bilong Pikinini,’ i olsem em i bilip tru olsem Krais Jisas—na ofa bilong em—em tasol i rot bilong God long kisim bek yumi. (Aposel 4:12) Baptais long ‘nem bilong spirit holi’ i makim olsem man bilong kisim baptais i save spirit holi o strong bilong Jehova em samting God i mekim wok long en bilong kamapim laik bilong Em, na bilong strongim ol wokboi bilong em long mekim stretpela laik bilong em na wok wantaim oganaisesen bilong em, em spirit i stiaim.—Stat 1:2; Song 104:30; Jon 14:26; 2 Pita 1:21.

YU REDI LONG BAPTAIS?

13, 14. Bilong wanem yumi no ken pret long mekim wok bilong God Jehova?

¹³ Baptais i makim bikpela samting na em i nambawan bikpela samting man i mekim, olsem na yu ting yu mas pret long mekim? Nogat tru! Tru, yu no ken kirap nating na kisim baptais; yu mas tingting gut pastaim. Tasol sapos yu tingting pinis long kisim baptais, yu bihainim tru savepasin.

¹⁴ Taim yu kisim baptais, dispela i kamapim long ples klia olsem yu laik mekim wok bilong God Jehova. Tingim ol manmeri yu save long ol. Olgeta i stap aninit long wanpela bos, a? Sampela i wok strong long kisim mani na i olsem mani i bosim ol. (Matyu 6:24) Sampela i givim bel long mekim wok ol i laik holim oltaim, o long inapim laik bilong ol yet; em nambawan samting long ol. Sampela ol i mekim wok bilong ol god giaman. Tasol yu tingting pinis long yu laik aninit long God tru, em Jehova, na mekim wok bilong em. No gat narapela man i mekim gutpela pasin tru, na pasin marimari, na pasin sori, olsem Jehova. God i save mekim gut long ol man, na em i givim gutpela wok long ol i bringim ol long rot bilong kisim bek ol. Em i givim gutpela pe long ol wokboi bilong em, em laip i stap oltaim. Tru tumas, yumi no ken pret long bihainim pasin bilong Jisas na givim laip bilong yumi long Jehova. Dispela tasol em rot bilong mekim Jehova i belgut tru, na i stret tru yumi mekim olsem.—1 King 18:21.

15. Wanem sampela samting i pasim rot bilong sampela man na ol i no baptais?

¹⁵ Tasol nogut wanpela man i subim yu na yu kisim baptais. Em samting bilong yu yet na Jehova tasol. (Galesia 6:4) Taim yu wok long kamap strong long bilip, ating sampela taim yu tingting: “Ating wanpela samting i pasim rot na mi no kisim baptais?” (Aposel 8:35, 36) Yu ken askim yu yet: ‘Ol famili i birua long mi na dispela i pasim mi? Mi insait yet long sampela pasin i no stret long Baibel o mi save mekim yet wanpela pasin i no stret? Mi pret, nogut ol man i no laikim mi moa?’ Em sampela samting yu mas tingim na kisim stretpela tingting long en.

16. Sapos yu mekim wok bilong Jehova, dispela bai helpim yu olsem wanem?

¹⁶ Nogut yu tingim tasol ol samting nogut inap painim yu sapos yu mekim wok bilong Jehova; yu mas tingim tu ol gutpela samting bai painim yu. Olsem wanem sapos famili bilong yu i birua long yu? Jisas i tok promis olsem, sapos man i bihainim em na long dispela as famili i givim baksait long em, em bai kisim bikpela famili bilong spirit. (Mak 10:29, 30) Ol dispela brata wanbilip bilong yu bai mekim gut long yu, na helpim yu long sanap strong taim ol man i mekim nogut long yu, na sambai long yu long taim yu wokabaut long rot bilong kisim laip. (1 Pita 5:9) Na ol elda bilong kongrigesen inap helpim yu long karim ol hevi i painim yu. (Jems 5:14-16) Na sapos yu pret, nogut ol man bilong dispela graun i no laikim yu moa, orait askim yu yet: ‘Sapos Man bilong wokim heven na graun i laikim mi, na em i belgut long pasin mi bihainim, i gat wanem samting inap winim dispela?’—Sindaun 27:11.

TRUIM DEDIKET NA BAPTAIS BILONG YU

17. Bilong wanem yu mas tingim baptais i olsem kirap bilong rot, i no pinis bilong en?

¹⁷ Yu mas save, baptais i no pinis bilong rot bilong kamap strong long bilip. Taim yu baptais yu kirap tasol long mekim wok bilong Jehova i go inap long taim bihain, olsem wanpela wokman bilong God na Witnes Bilong Jehova. Baptais em i bikpela samting tru, tasol dispela yet i no mekim olsem yu bai kisim laip. Jisas i no tok, ‘Olgeta man i baptais pinis God bai kisim bek ol.’ Em i tok: “Ol manmeri i stap strong inap long las de, God bai i kisim bek ol.” (Matyu 24:13) Olsem na i bikpela samting tru yu mas painim Kingdom bilong God pastaim; dispela i mas i stap nambawan bikpela samting long laip bilong yu.—Matyu 6:25-34.

18. Taim yu baptais pinis, wanem sampela wok yu ken tingting long mekim?

¹⁸ Bilong i stap strong long wok bilong Jehova, yu mas tingim sampela wok bilong spirit yu laik mekim, na putim olsem mak yu laik winim. Wanpela wok olsem em yu ken stadi yet long Baibel na kisim sampela save moa long God. Makim taim bilong kaunim Baibel long olgeta de. (Song 1:1, 2) Go long ol miting Kristen long olgeta taim, long wanem, taim yu bung wantaim ol brata dispela bai strongim yu. Na yu ken tingting long bekim tok long ol miting. Olsem bai yu inap litimapim nem bilong Jehova na strongim ol narapela. (Rom 1:11, 12) Na yu ken wok long mekim ol beten bilong yu i kamap gutpela moa.—Luk 11:2-4.

19. Spirit holi inap helpim yu long kamapim wanem ol gutpela pasin?

¹⁹ Sapos yu laik mekim tru ol samting baptais bilong yu i makim, oltaim yu mas tingim gut ol samting yu mekim; yu mas larim spirit holi bilong God i kirapim yu long mekim ol gutpela pasin olsem laikim tru ol narapela, na amamas, na stap bel isi, na i no belhat kwik, na helpim ol man, na mekim gutpela pasin long ol, na bilip, na wokabaut stret oltaim. (Galesia 5:22, 23; 2 Pita 3:11) Yu mas save, Jehova i save givim spirit bilong em long ol man i beten askim em long givim long ol na ol i bihainim tok bilong em na i stap gut long wok bilong em. (Luk 11:13; Aposel 5:32) Olsem na yu mas beten askim God long givim spirit holi bilong em long yu na helpim yu long bihainim ol gutpela pasin em i laikim. Taim yu larim spirit holi i stiaim yu, ol dispela gutpela pasin bai kamap klia long ol tok na pasin yu mekim. Tru, olgeta insait long lain Kristen ol i wok long kamap “ol nupela manmeri”; ol i wok strong long bihainim moa yet pasin bilong Krais. (Kolosi 3:9-14) Tasol yumi olgeta wan wan i gat narapela narapela hatwok long bihainim ol gutpela pasin olsem, long wanem, sampela i kamap strong long spirit na sampela i no strong yet. Yu no gutpela olgeta, olsem na yu mas wok strong bambai yu inap kisim pasin olsem bilong Krais. Tasol yu no ken les na ting bai yu no inap kisim; God inap helpim yu.

20. Olsem wanem yu ken bihainim pasin bilong Jisas long autim tok?

²⁰ Wanpela wok bilong spirit yu mas tingting long mekim em olsem: Bihainim moa yet pasin bilong Jisas long amamas na mekim wok. (Hibru 12:1-3) Jisas i amamas tru long autim tok. Sapos yu insait long dispela gutpela wok bilong autim tok bilong Kingdom, no ken lusim amamas bilong yu long mekim, na yu kirap mekim nating tasol. Wok long painim amamas long skulim ol man long Kingdom bilong God olsem Jisas i bin mekim. Bihainim gutpela skul yu kisim insait long kongrigesen bilong helpim yu long kamap gutpela tisa moa. Na yu ken save, Jehova bai givim strong long yu bambai yu inap mekim wok bilong em.—1 Korin 9:19-23.

21. (a) Olsem wanem yumi save Jehova i laikim tru ol manmeri i baptais na ol i stap gut long em? (b) Wanem samting i makim olsem baptais i bikpela samting bilong helpim yumi long abrusim bagarap long taim God i pinisim dispela taim nogut bilong nau?

²¹ Man i dediket na baptais na em i wok strong long bihainim pasin bilong Jisas, God i save amamas tru long em. Jehova i skelim bel bilong ol milion milion manmeri i stap long graun na em i save, i no gat planti man olsem. Em i tingim ol i olsem “ol gutpela samting.” (Hagai 2:7, NW) Ol tok profet bilong Baibel i makim olsem God i tingim ol dispela manmeri i olsem i gat mak na bai ol inap abrusim bagarap taim em i pinisim dispela taim nogut bilong nau. (Esekiel 9:1-6; Malakai 3:16, 18) Olsem wanem? Bel bilong yu “i gutpela tru” inap long yu kisim laip oltaim? (Aposel 13:48) Yu laik tru long kisim mak olsem man bilong mekim wok bilong God? Dediket na baptais em hap wok bilong kisim dispela mak, na em i bikpela samting bilong helpim man long abrusim bagarap.

22. Bikpela lain inap tingting long wanem samting?

²² Taim Bikpela Tait i pinis, Noa wantaim lain bilong em i lusim sip na i stap long graun i kamap klin pinis. Olsem tasol long nau, bikpela lain em ol i bihainim save ol i kisim long God na God i orait long ol, ol i ken tingting long abrusim bagarap long pinis bilong dispela taim nogut bilong nau na i stap oltaim long graun i kamap klin pinis na em bai stap olsem inap oltaim oltaim. (KTH 7:9, 14, NW) Bai ol i stap olsem wanem long dispela taim?

TRAIM SAVE BILONG YU

Jehova i laik bai yu mekim wanem wok long save yu kisim long em?

Wanem sampela samting yu mas mekim na bai yu inap kisim baptais?

Olsem wanem na baptais em i no pinis bilong rot, em i kirap tasol bilong en?

Olsem wanem yumi inap truim dediket na baptais bilong yumi?

[Piksa long pes 172]

Yu dediket pinis long God long rot bilong beten?

[Ol Piksa long pes 174]

Wanem samting i pasim rot na yu no kisim baptais?