Wanpela Wik i Bin Kamapim Bikpela Senis Long Graun
“God i ken mekim gut long dispela man i kam long nem bilong [Jehova]”!—MATYU 21:9.
1. Ol bikpela samting i bin kamap long Ogas 1991, dispela i bin mekim sampela samting long wanem narapela narapela lain?
“TRIPELA DE BILONG BIKPELA HEVI I KAMAPIM BIKPELA SENIS LONG GRAUN.” Kain het-tok olsem long ol nius long Ogas 1991 i kamapim klia olsem insait long liklik hap taim tasol, inap sampela de, bikpela senis inap kamap. Ol dispela bikpela samting i bin kamap long pinis bilong mun Ogas long yia 1991 i mekim sampela samting long ol lain bilong dispela graun na long narapela lain tu. Jisas i tok, dispela narapela lain “ol i no bilong dispela graun.” Dispela lain em ol Witnes Bilong Jehova.—Jon 17:14.
2, 3. (a) Maski bikpela pait i laik kamap, olsem wanem pasin bilong i stap fri i bin kamap ples klia long Sagreb? (b) Long Odesa, ol man i gat strongpela bilip ol i kisim wanem gutpela pe?
2 Ol i bin makim wanpela kibung intenesenel bilong ol Witnes Bilong Jehova bilong kamap long kantri Yugoslavia long Ogas 16-18, 1991. Em namba wan taim ol i laik mekim kain bikpela kibung olsem long dispela kantri, na em namba wan taim wanpela bikpela kibung bilong lain bilong Jehova i kamap long taim ol lain bilong kantri yet i laik pait. Inap tupela mun ol Witnes bilong Yugoslavia yet na bilong sampela kantri klostu ol i wok wantaim long klinim na stretim bikpela ples bilong pilai kikbal long taun Sagreb (em stediam HAŠK Građanski). Ol i klinim gut tru na em gutpela ples bilong “Ol Man Bilong Laikim Pasin Bilong i Stap Fri” Kibung i ken kamap long en. Planti tausen manmeri bilong ol narapela kantri i tingting long kam long dispela kibung; i gat 600 bilong Amerika ol i laik kam. Tasol dispela bikpela pait i laik kirap na tok i go nabaut olsem: “Ol Amerika i no ken i kam.” Tasol ol i bin kam, na ol manmeri bilong planti narapela kantri tu ol i bin kam. Ol i ting inap olsem 10,000 bai bung. Tasol long laspela de bilong kibung inap olsem 14,684 i bin bung! Olgeta i bin kisim planti blesing, long wanem, ol i no bin “lusim pasin bilong bung wantaim.”—Hibru 10:25.
3 Insait long 3-pela de bihain long kibung long Sagreb, sampela man long Rasia i traim long daunim gavman bilong Rasia, tasol ol i lus long mekim. Long dispela taim ol man i laikim pasin bilong i stap fri em God i givim long ol, ol i wok long redim ol laspela samting bilong mekim kibung bilong ol long Odesa, long hap bilong Yukren long Rasia. Tasol i gat dispela hevi i painim gavman, na ating kibung inap kamap o nogat? Ol brata i bilip strong na ol i wok strong long inapim wok bilong ol long stretim stediam, em ol i bin stretim olgeta, na ol manmeri bilong kam long kibung ol i wok long i kam. Wantu, i olsem wanpela mirakel i kamap—hevi bilong gavman i pinis. Gutpela kibung tru i bin kamap long Ogas 24, 25, na inap olsem 12,115 i bung na 1,943 i kisim baptais—em olsem 16 pesen bilong dispela lain i bung! Ol dispela nupela Witnes wantaim ol Witnes i bin i stap gut long God inap longtaim, olgeta i amamas long ol i bin bilip strong long Jehova na kam long kibung.—Sindaun 3:5, 6.
4. Ol Witnes long Isten Yurop i bihainim wanem pasin em Jisas i makim?
4 Ol dispela gutpela Witnes i bihainim pasin Krais Jisas i makim—em i no bin les long i go long ol bikpela bung bilong lotu olsem lo bilong Jehova i makim. Maski ol Juda i laik kilim em i dai tu, em i go long bung. Em i kamap klostu long Jerusalem bilong lukim laspela Pasova bilong em (em Bikpela De Bilong Tingim De God I Larim Ol Israel I Stap Gut), na sampela man i sanap klostu long bikpela haus lotu ol i wok long askim olsem: “Yupela i ting wanem? Em bai i kam lukim ol bikpela de bilong lotu, o nogat?” (Jon 11:56) Tasol em i kam! Na nau wanpela wik i kirap na long pinis bilong en wanpela bikpela samting tru i bin kamap em i senisim tru ol samting i mas painim ol man. Orait, nau yumi ken stori long sampela bikpela samting i bin kamap insait long dispela wik, olsem 7-pela de—em de 8 i go inap de 14 bilong mun Nisan long kalenda bilong ol Juda.
Nisan 8
5. Taim Jisas i wokabaut i go long Betani long Nisan 8 long yia 33, em i save long wanem samting?
5 Long de namba 8 bilong mun Nisan Jisas wantaim ol disaipel i kamap long Betani. Long dispela ples, Jisas i slip 6-pela nait long haus bilong gutpela pren bilong em Lasarus, em nau tasol Jisas i bin kirapim bek em long matmat. Ples Betani i stap klostu long Jerusalem. Jisas i bin toktok wantaim ol disaipel tasol na em i tokim ol olsem: “Harim. Nau yumi go long Jerusalem. Na bai ol i givim Pikinini Bilong Man long han bilong ol bikpris na ol saveman bilong lo. Na bai ol i mekim kot long em na pasim tok long kilim em i dai. Na bai ol i givim em long ol man bilong ol arapela lain, bai ol dispela lain i ken tok bilas long em na wipim em na nilim em long diwai [pos]. Na long de namba 3 bai em i kirap bek.” (Matyu 20:18, 19) Jisas i save, nau bai bikpela pen na hevi na traim i painim em. Tasol maski taim bilong bikpela traim i kam klostu, em i wok strong yet long helpim ol brata bilong em. Oltaim yumi tu i “mas holim wankain tingting olsem Krais Jisas i bin holim.”—Filipai 2:1-5; 1 Jon 3:16.
Nisan 9
6. Long apinun i kirapim de 9 bilong mun Nisan, Maria i bin mekim wanem? Na Jisas i tok wanem long Judas?
6 San i go daun pinis long de namba 8, na nau de namba 9 i kirap na Jisas i kaikai long haus bilong Saimon, bipo em i lepraman. Long haus bilong Saimon, susa bilong Lasarus, em Maria, em i welim het na lek bilong Jisas long sanda i gat bikpela pe, na long pasin daun em i mekim drai long gras bilong het bilong em yet. Judas i no amamas long dispela, tasol Jisas i tok: “Larim dispela meri. Em i ken holim dispela sanda inap long de mi dai na ol i planim mi.” Ol bikpris i harim tok olsem planti Juda i go long Betani bilong lukim Jisas na ol i bilip long em, olsem na ol bikpris i pasim tok long kilim i dai Jisas na Lasarus tu.—Jon 12:1-7.
7. Long moningtaim long Nisan 9, wanem samting i bin kamap na i litimapim nem bilong Jehova? Jisas i mekim wanem tok profet?
7 Long moningtaim tru, Jisas i lusim Betani na em i laik i go long Jerusalem. Bikpela lain manmeri i kam bungim em long rot, na ol i holim han bilong diwai pam na ol i singaut na tok olsem: “Amamas long God. God i ken mekim gut long dispela man i kam long nem bilong [Jehova]. Em i king bilong Israel.” Nau Jisas i truim tok profet bilong Sekaraia 9:9—em i sindaun long donki na i kam long taun. Em i kamap klostu long taun Jerusalem na em i krai long taun na i tok, bihain ol Rom i mas banisim na bagarapim olgeta—truim bilong dispela tok profet i kamap 37 yia bihain. (Kain bikpela hevi olsem i mas painim tu ol misin long nau i holim nating nem Kristen, long wanem, ol i bin lusim God tru na bihainim ol narapela god wankain olsem Jerusalem bilong bipo i bin mekim.) Ol hetman bilong lain Juda i no laik bai Jisas i kamap king bilong ol. Ol i belhat na tok: “Lukim. . . . Olgeta manmeri i go bihainim em.”—Jon 12:13, 19.
Nisan 10
8. Long Nisan 10, olsem wanem Jisas i bin kamapim klia olsem em i tingim tru haus bilong beten long Jehova? Wanem samting i kamap bihain long dispela?
8 Long de namba 10, Jisas i go gen long haus lotu. Nau long namba 2 taim em i rausim ol man bilong mangalim mani ol i wok bisnis na ol man bilong senisim mani. “Pasin bilong laikim tumas mani” i no ken kamap insait long haus bilong beten long Jehova! (1 Timoti 6:9, 10) I no longtaim na bai Jisas i dai. Em i stori long planim pikinini wit bilong makim dispela samting. Pikinini yet i dai, tasol kru i kamap long en i go bikpela na i karim planti kaikai. Olsem tasol bai Jisas i dai, tasol long rot bilong i dai bilong em planti man tru, em ol i bilip long em, bai ol inap kisim laip i stap oltaim. Bel bilong Jisas i hevi, long wanem, em i save klostu nau bai em i dai na em i laik bai i dai bilong em i ken litimapim nem bilong Papa, olsem na em i beten long Papa long dispela samting. Nek bilong God i pairap long heven na olgeta man i stap wantaim Jisas long dispela taim ol i harim, na God i bekim tok long Jisas olsem: “Mi mekim nem bilong mi i kamap bikpela pinis, na bai mi mekim olsem gen.”—Jon 12:27, 28.
Nisan 11—Em i Bin Mekim Planti Wok Long Dispela De
9. (a) Long moningtaim tru long Nisan 11, Jisas i mekim wanem wok long ol tok piksa bilong kamapim asua bilong ol Juda i bin lusim Jehova? (b) Husat ol i lus long kisim gutpela wok tru, olsem Jisas i makim long tok piksa bilong em?
9 Long Nisan 11, Jisas na ol disaipel i lusim gen Betani bilong i go mekim planti wok. Jisas i mekim 3-pela tok piksa bilong kamapim klia as bilong kros bilong God long ol Juda i bin lusim em na bihainim ol narapela god. Long rot Jisas i tokim wanpela diwai fik i no karim kaikai, em i mas drai. Em i mekim olsem bilong makim strafe i mas painim lain Juda, long wanem, ol i no bilip na ol i no karim kaikai. Em i go insait long haus lotu na em i stori long ol man nogut i lukautim gaden wain bilong wanpela man, na bihain ol i kilim i dai pikinini bilong em, long wanem, em i man bilong kisim dispela gaden wain na olgeta narapela samting bilong papa. Dispela tok piksa i makim ol Juda ol i no stap gut long wok Jehova i bin givim long ol, na bihain ol i kilim i dai Jisas. Jisas i stori tu long wanpela bikpela kaikai bilong marit em king—Jehova—i redim, na ol man em i bin tokim ol pastaim long i kam long kaikai (ol Juda) ol i tingim ol samting bilong ol yet na ol i no laik i kam. Olsem na singaut i go long ol narapela man long i kam, em ol i no bilong lain Juda, na sampela ol i kam. Tasol wanpela man i kam em i no putim klos bilong marit na ol i rausim em i go ausait. Em i makim ol Kristen giaman long ol misin i gat nem Kristen. Long taim bilong Jisas ol i bin singautim planti Juda long i kam long dispela kaikai, “tasol [God] i makim wanpela wanpela tasol” bilong kam insait long lain 144,000, em ol i gat mak na ol i bilong kisim Kingdom bilong heven.—Matyu 22:14; Kamapim Tok Hait 7:4.
10-12. (a) Bilong wanem Jisas i krosim ol hetman bilong lotu Juda? Em i mekim wanem ol tok kros long ol dispela man bilong tupela maus? (b) Bihain wanem strafe i bin painim lain Juda, em ol i lusim pinis Jehova?
10 Ol hetman bilong lotu Juda, em ol i man bilong tupela maus, ol i wok long painim rot bilong holim Jisas. Jisas i bekim gut sampela askim ol i givim long em bilong trikim em na ol i no inap bekim wanpela tok long em, na dispela i daunim ol long ai bilong ol man. Ol dispela Juda i lusim pinis lotu i tru na ol i bikhet stret! Na Jisas i krosim ol stret! Ol i laik tumas long kisim biknem, na ol i pasim ol narapela kain klos bilong makim dispela, na ol i laik kisim ol bikpela nem olsem ‘Tisa’ na ‘Papa’—ol i wankain olsem planti pris na pasto long nau. Jisas i kolim lo bilong dispela, em i tok: “Man i litimapim nem bilong em yet, nem bilong en bai i go daun. Na man i daunim em yet, em bai i kisim biknem.”—Matyu 23:12.
11 Jisas i krosim ol dispela hetman bilong lotu na inap 7-pela taim em i tok: “Yupela lukaut”! Em i tok ol i aipas, tasol ol i laik soim rot long ol narapela, na em i tok ol i man bilong tupela maus. Na long olgeta dispela 7-pela taim, em i kolim as bilong dispela tok kros em i mekim long ol. Ol i pasim rot bilong ol man i laik go insait long Kingdom. Taim ol i mekim wanpela man i kamap disaipel bilong ol, ol i mekim em i kamap man bilong lus long Gehena—i olsem em i redi pinis long kisim bagarap, long wanem, bipo em i bin mekim bikpela rong tru o em i strong tumas long mekim lotu na em i mekim olsem wanpela longlong man. Jisas i tokim ol Farisi ol i “longlong na aipas,” long wanem, ol i ting gol i stap long haus lotu i bikpela samting moa, winim pasin bilong mekim lotu i tru insait long dispela haus. Ol i strong long tilim ol liklik sayor samting bilong gaden long 10-pela hap na givim wanpela hap long God, tasol ol i lusim pinis ol bikpela hap tok bilong Lo, olsem tok bilong stretpela pasin bilong skelim man na pasin bilong marimari na pasin bilong bilip. Ol i save bihainim ol bilaspasin bilong lotu long wasim ol samting, tasol dispela i no inap mekim bel bilong ol i kamap klin. I gat wanpela rot tasol bilong mekim dispela—ol i mas bilip long ofa Jisas i laik mekim. Long skin i olsem ol i stap klinpela, olsem samting ol man i bin “penim long waitpela pen,” tasol pasin giaman na pasin bilong sakim lo i pulap long bel bilong ol.—Matyu 23:13-29.
12 Tru tumas, ol Farisi i mas lukaut, long wanem, ol i “lain pikinini bilong ol man i bin kilim i dai ol profet” bilong bipo! Ol i snek nogut na ol i pikinini bilong snek na ol i mas bagarap long Gehena, long wanem, ol bai kilim i dai Jisas na ol man em i salim ol i go. Jisas i tok, dispela strafe i mas “kamap long dispela lain manmeri nau i stap.” Olsem na truim bilong dispela tok i bin kamap 37 yia bihain, taim Jerusalem i bagarap olgeta.—Matyu 23:30-36.
13. Ol tok Jisas i mekim long givim mani olsem ofa long haus lotu i makim wanem ol samting i save kamap long nau?
13 Jisas i laik lusim haus lotu i go, tasol pastaim em i litimapim nem bilong wanpela rabismeri em man bilong em i dai pinis. Dispela meri i tromoi tupela liklik mani long bokis mani bilong haus lotu—em “olgeta mani em i holim bilong baim kaikai bilong en.” Pasin bilong dispela meri i narapela kain tru long pasin bilong ol maniman i mangalim mani, em ol i givim ofa, tasol em liklik hap tasol bilong samting ol inap long givim! Ol Witnes Bilong Jehova long nau i mekim pasin olsem dispela rabismeri—ol i amamas long lusim bikpela hap taim na strong na mani samting bilong ol bilong helpim wok bilong Kingdom na mekim i go bikpela long olgeta hap. Ol i narapela kain tru long sampela evanjelis long televisen, em ol i save pamuk na pulim bikpela mani long lain bilong ol bilong helpim ol yet long kamap maniman i gat planti samting tru!—Luk 20:45–21:4.
De 11 Bilong Mun Nisan i Laik Pinis
14. Jisas i krai long wanem samting? Em i bekim wanem tok long askim bilong ol disaipel bilong em?
14 Jisas i krai long Jerusalem wantaim lain bilong en, na em i tok: “Yupela bai i no lukim mi moa, inap long taim yupela bai i tok, ‘God i ken mekim gut long dispela man i kam long nem bilong [Jehova].’ ” (Matyu 23:37-39) Bihain, taim ol i sindaun long Maunten Oliv, sampela disaipel i pren tru bilong em ol i askim em long dispela tok, na taim em i bekim tok long ol em i kolim ol samting i mas kamap olsem mak bilong em i stap king pinis long Kingdom na ol pasin na wok nogut Satan i bin kamapim long graun i mas pinis.—Matyu 24:1–25:46; Mak 13:1-37; Luk 21:5-36.
15. Jisas i kolim wanem ol samting bai kamap olsem mak bilong taim em i kam bek na em i laik skelim ol man? Kirap long wanem taim truim bilong dispela i bin wok long kamap?
15 Jisas i stori long strafe bilong Jehova liklik taim bai painim bikpela haus lotu long Jerusalem, na em i makim olsem dispela i olsem piksa bilong bikpela bagarap i mas kamap long las de bilong dispela graun. Jisas i tok, taim em i kam bek olsem king ol samting bilong makim dispela i olsem: Bikpela pait tru bai kirap, winim olgeta pait bilong bipo, na bai i gat bikpela hangre na guria na sik, na bai ol man i lusim pasin bilong laikim ol arapela, na pasin bilong sakim lo bai i go bikpela. Ol dispela samting i bin kamap tru long taim bilong yumi, kirap long yia 1914 na bihain long en!
16, 17. Jisas i stori long wanem ol samting i mas kamap long graun? Dispela tok profet i mas kirapim ol Kristen long mekim wanem?
16 Na las tru bai “bikpela hevi tru” i kamap. “Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.” Bikpela bagarap tru bai kamap wankain olsem long taim bilong Bikpela Tait Wara long taim bilong Noa, olsem na Jisas i tok, yumi mas was gut, nogut yumi givim bel long mekim ol wok bilong dispela graun na yumi no tingim dispela samting i mas kamap. Jisas i tok: “Yupela i mas was gut. Yupela i no save wanem de Bikpela bilong yupela bai i kam.” Yumi ken amamas, long wanem, Bikpela i givim wok pinis long sampela Kristen em God i makim ol na ol i olsem ‘gutpela wokboi’ na ol i toksave long ol man na givim planti kaikai bilong spirit long ol nau long taim Jisas i kam bek pinis na em i stap king long heven.—Matyu 24:21, 42, 45-47.
17 Long taim bilong yumi, yumi lukim ‘tingting bilong olgeta lain man i bagarap tru na planti manmeri i tingting long ol samting i laik kamap long graun, na ol i pret tru.’ Tasol Jisas i tokim yumi: “Taim ol dispela samting i stat long kamap, orait yupela i mas sanap na litimapim het bilong yupela, long wanem, taim bilong God i kisim bek yupela em i kam klostu pinis.” Na em i tok: “Yupela lukaut gut. Nogut yupela i dring nabaut oltaim na yupela i spak. Na nogut yupela i wari long ol samting bilong bodi. Sapos kain pasin olsem i daunim yupela, orait dispela de bilong Bikpela bai i kamap long yupela wantu tasol, olsem umben i save holimpas abus.” Yumi mas was i stap bambai yumi inap sanap long ai bilong “Pikinini Bilong Man,” olsem em i ken orait long yumi long taim em i kam bek i stap olsem king.—Luk 21:25-28, 34-36.
18. Tok piksa bilong Jisas long 10-pela yangpela meri na ol wokman i kisim mani, dispela inap strongim yumi olsem wanem?
18 Jisas i stori gut tru long ol samting i mas kamap nau long taim bilong yumi, na bihain em i mekim 3-pela tok piksa. Namba wan em tok piksa bilong 10-pela yangpela meri. Long dispela tok piksa em i kamapim klia gen olsem yumi mas “was gut.” Na long tok piksa bilong ol wokboi i kisim mani em i makim olsem sapos man i wok strong bai em i kisim gutpela pe—bai Jisas i tokim em: “Yu kam amamas wantaim mi.” Ol dispela tok piksa i makim ol Kristen em God i singautim ol bilong kisim laip long heven, na ol dispela gutpela stori inap strongim tru bel bilong ol na bel bilong ol arapela sipsip tu.—Matyu 25:1-30.
19, 20. Long tok piksa bilong Jisas long ol sipsip na meme, em i kamapim klia wanem gutpela pasin pren i stap long nau?
19 Namba 3 tok piksa i stori long taim Jisas i kamap king pinis long Kingdom na em i sindaun long sia king bilong em long heven. Em taim bilong skelim ol lain man na tilim ol i go tupela lain, olsem ol man i gat pasin daun na ol i kain olsem sipsip, na ol bikhetman i olsem meme. “Ol sipsip” i wok strong tru long mekim ol samting i kamapim klia olsem ol i laik helpim ol brata bilong King—em hap lain God i makim bilong i go long heven na ol i stap yet long graun nau long taim bilong pinis, olsem lain remnan. “Ol sipsip” bai kisim laip i stap oltaim, tasol ol meme i no pilim gutpela pasin God na Krais i mekim, na ol bai i bagarap na lus olgeta.—Matyu 25:31-46.
20 Gutpela pasin pren i stap namel long ol arapela sipsip na ol brata bilong King nau long taim bilong pinis! Taim Jisas i kamap King pinis, pastaim lain remnan i bin karim ol hevi na mekim bikpela wok, tasol nau sampela milion arapela sipsip ol i wok strong long mekim wok bilong God, na ol inap olsem 99.8 pesen bilong lain wokboi bilong God long nau. (Jon 10:16) Ol dispela arapela sipsip tu i redi long karim ol hevi, olsem ‘stap hangre, na dai long wara, na no gat laplap, na i gat sik, na i go kalabus,’ bambai ol i ken poromanim ol manmeri bilong lain God i makim, em ol i stap gut long Em.a
Nisan 12
21. Wanem wok nogut i wok long kamap hariap long Nisan 12? Olsem wanem i kamap olsem?
21 Sampela man i pasim tok long kilim i dai Jisas, na nau ol samting bilong helpim ol long mekim dispela wok nogut i wok long kamap hariap. Judas i go lukim ol bikpris long bikpela haus lotu na em i orait long ol i givim 30 mani silva long em bilong baim em na bai em i kamapim Jisas long ol. Baibel i tok profet pinis long dispela samting tu.—Sekaraia 11:12.
Nisan 13
22. Ol i redim wanem samting long Nisan 13?
22 Jisas i stap long Betani na em i salim ol disaipel i go long Jerusalem bilong painim “wanpela man,” tasol Jisas yet i no i go. Ating em i laik beten na tingim gut ol samting i laik kamap. Ol disaipel i painim pinis dispela man na long wanpela bikpela rum antap long haus bilong em, ol i redim ol samting bilong mekim kaikai bilong Pasova. (Matyu 26:17-19) San i go daun long Nisan 13 na nau de namba 14 i kirap. Jisas i bung wantaim ol disaipel long dispela rum antap, na em i kirapim wanpela bikpela bung i winim olgeta narapela. Orait, wanem ol bikpela samting i bin kamap long de namba 14 bilong mun Nisan? Stori i kamap bihain long dispela bai kolim.
[Ol Futnot]
a Stori i kamap bihain long dispela i mas helpim yumi long pilim moa yet gutpela pasin pren i stap namel long liklik lain na bikpela lain arapela sipsip.
Bai Yu Stori Olsem Wanem Long Ol Dispela Askim?
◻ Sampela i bin mekim wanem gutpela pasin long Jisas bilong lukautim em long haus na amamas long em long Nisan 8 i go inap 10?
◻ Long Nisan 11 Jisas i tok wanem na em i kamapim rong bilong ol hetman bilong lotu Juda, em ol i man bilong tupela maus?
◻ Jisas i bin mekim wanem bikpela tok profet? Olsem wanem dispela tok profet i kamap tru long nau?
◻ Wanem ol bikpela samting i bin kamap long Nisan 12 na 13 na i redim rot bilong bikpela samting tru i laik kamap long Nisan 14?
[Piksa long pes 12]
Jisas i litimapim nem bilong rabismeri i givim tupela liklik mani—em olgeta mani bilong em