Yu Tingim Yet?

Olsem wanem? Yu pilim olsem ol tok bilong ol nupela Wastaua i bin helpim gut yu? Sapos olsem, orait yu ken traim ol save yu bin kisim long en, yu tingim yet o nogat:

◻ Wanem tupela askim i bin helpim planti Kristen long tingim wanem kain wok ol bai kisim?

Namba wan bikpela askim em olsem: Olsem wanem? Baibel i makim dispela wok em i wok nogut? Namba tu askim i olsem: Taim wanpela i mekim dispela wok, em i insait long dispela rong o nogat?​—⁠4/15, pes 28.

◻ Long wanem rot ol manmeri ‘i stap nogut na ol i save bagarap’? (Rom 8:​20)

Long rot bilong ol samting em tupela tumbuna bilong yumi bilong pastaim i bin mekim, yumi “stap nogut na [yumi] save bagarap.” Dispela i “no kamap long laik bilong [yumi] yet.” Yumi bin kisim long tupela tumbuna bilong pastaim, em Adam na Iv. Tupela inap givim sin na i dai tasol long ol pikinini bilong ol, tasol gutpela samting tru, Jehova i larim ol i kamapim sampela pikinini. Dai i kisim olgeta manmeri, olsem na yumi ken tok God ‘i mekim na olgeta manmeri em i wokim ol i stap nogut na i save bagarap.’​—⁠5/1, pes 5.

◻ Bilong wanem i stret yumi tok, long bihain “dispela samting nogut tru” bai i ‘sanap i stap long haus bilong God yet’? (Matyu 24:15)

Long samting i kamap bipo na i olsem piksa, ‘dispela samting nogut tru i sanap i stap long haus bilong God yet’ i makim ol ami bilong Rom em Jeneral Galus i bosim ol na ol i kam pait long Jerusalem long yia 66 C.E. Samting i mas kamap long nau na i makim dispela samting i bin kamap long bipo​—⁠em kirap bilong bikpela hevi tru​—⁠i no kamap yet. (Matyu 24:21) Olsem na “dispela samting nogut tru” em i no sanap yet long ples holi.​—⁠5/1, pes 16, 17.

◻ Papa na mama i wok mani, olsem wanem tupela inap painim hap taim bilong i stap wantaim ol pikinini?

Sapos wanpela mama i pinis wok na skin bilong em i les olgeta, em i ken askim ol pikinini bilong em long redim kaikai wantaim em. Wanpela papa i gat planti wok bilong mekim long ol Sarere Sande, em inap mekim sampela bilong ol dispela wok bilong haus wantaim ol pikinini bilong em.​—⁠5/15, pes 6.

◻ Ol man i save wokabaut long ‘rot Jehova i makim,’ ol i mas mekim wanem? (Jeremaia 7:​23)

Ol i mas stap gut long Jehova bambai ol i ken wokabaut long rot em i makim​—⁠ol i mas tingting strong long lotuim em wanpela tasol. Ol i mas bilip long Jehova​—⁠ol i mas bilip tru olsem ol tok promis bilong Jehova bai kamap tru. Bilong wokabaut long rot Jehova i makim ol i mas bihainim tok bilong em​—⁠olsem bihainim ol lo bilong em na no ken lusim. (Song 11:⁠7)​—⁠5/15, pes 14.

◻ Ol man i olsem “presen,” ol inap helpim yumi long wanem fopela bikpela rot? (Efesus 4:⁠8)

Long pasin isi ol i save stretim bek yumi, na long pasin sori ol i strongim yumi, na ol i helpim yumi long holimpas pasin wanbel, na ol i strongim bel na lukautim gut yumi. (Efesus 4:​12-​14)​​—⁠6/1, pes 14.

◻ Pasin bilong Pol long pas gut na wok wantaim wan handet samting man na meri em Buk Aposel na sampela pas bilong em i kolim nem bilong ol, dispela inap lainim yumi long wanem samting?

Long olgeta taim yumi mas wok wantaim oganaisesen bilong God, na kongrigesen bilong yumi, na ol wanbilip bilong yumi. Ol i mas helpim yumi na strongim bel bilong yumi long gutpela taim na taim nogut.​—⁠6/1, pes 31.

◻ Wanem 3-pela samting yumi inap mekim wok long en bilong helpim ol man long tingting long Man bilong wokim olgeta samting?

Olgeta samting long traipela ples antap i wok stret olgeta; na ol samting i gat laip i bin kamap olsem wanem long graun; na kru bilong ol man i narapela kain tru long kru bilong ol animal na em inap mekim kain kain wok.​—⁠6/15, pes 18.

◻ Bilong wanem em i bikpela samting tru long yumi save gut long insait bilong nem bilong Man bilong wokim olgeta samting?

Insait bilong nem bilong God i olsem “Em i Mekim i Kamap,” na dispela i kamapim klia olsem em i save tingim ol samting em i laik mekim na em i save mekim tru. Taim yumi save long nem bilong em na yumi kolim dispela nem, yumi inap save gut olsem em i save truim ol tok promis bilong em, na em i save kamapim tru ol laik bilong em.​—⁠6/15, pes 21.

◻ Olsem wanem ol pikinini i ken insait tru long famili stadi?

Sapos inap, stretim rot bambai olgeta wan wan pikinini i gat Baibel bilong em yet na Wastaua bilong stadi. Tokim pikinini long stori long wanpela piksa i stap long buk o nius bilong stadi, o paslain long stadi i kirap tokim em long redi long kaunim wanpela skripsa. Na pikinini i bikpela liklik em i ken stori long sampela rot famili i ken mekim wok long en bilong bihainim ol tok bilong stadi.​—⁠7/1, pes 15.

◻ Famili i ken putim wanem ol mak bilong tingim taim ol i redim ol tok bilong miting?

(1) Olgeta wan wan long famili i redi long bekim sampela tok long ol miting bilong kongrigesen; (2) olgeta wan wan i wok long redim sampela tok na mekim long toktok bilong ol yet; (3) taim ol i bekim tok ol i kamapim sampela tok bilong Baibel; na (4) ol i skelim ol tok na bai ol i ken bihainim.​—⁠7/1, pes 20.

◻ Wanem samting i olsem ki bilong helpim marit long wok gut?

Bilong i stap amamas na kisim ol gutpela samting insait long marit, wanpela bikpela samting em pasin bilong toktok gut wantaim. Na taim ol i toktok gut wantaim, ol bai toktok long ol samting i save strongim man, na givim nupela strong long em, na i klin na i stret, na ol samting yumi inap litimapim nem bilong en, na i mekim gut bel bilong man. (Efesus 4:​29-32; Filipai 4:⁠8)​—⁠7/15, pes 21.

◻ Wanem samting em i ‘rot bilong Jehova’? (Song 25:​8, 9, 12)

Dispela rot em i rot bilong laikim tru ol narapela. As bilong dispela pasin, em pasin bilong mekim ol samting i stret wantaim ol lo bilong God. Baibel i kolim dispela pasin bilong laikim tru ol narapela olsem ‘nambawan presen bilong holi spirit.’ (1 Korin 12:31)​​—⁠8/1, pes 12.