Yu Tingim?

Olsem wanem? Yu bin amamas long kaunim tok bilong ol nupela Wastaua? Sapos olsem ating bai yu amamas long tingim bek ol dispela tok hia:

▫ Ol narapela narapela strongpela wok bilong spirit holi i bin kamap long taim bilong ol aposel, i kamapim klia wanem samting? Ol dispela wok i olsem mak bilong kamapim klia olsem God i lusim pinis olpela lain Israel em ol i bin i stap lain bilong em yet inap 1,500 yia, tasol nau em i kisim nupela lain o kongrigesen Kristen, em Pikinini bilong em i bin kamapim. (Lukim Hibru 2:​2-4.)​—⁠8/15, pes 5.

▫ Wanem ol samting i mekim na lain Witnes Bilong Jehova i go bikpela? God yet i mekim gut long ol wok bilong ol. Wok ol i mekim, em wok bilong God yet. Baibel i as bilong ol tok ol Witnes Bilong Jehova i autim long ol man. Na ol i save daun tu long Krais Jisas, em God i putim bilong bosim lain Kristen, olsem na wok bilong ol i kamap gutpela.​—⁠9/1, pes 19.

▫ Bilong wanem God i marimari long Devit taim em i mekim bikpela rong wantaim Batseba? Em i mekim, long wanem, em i tingim kontrak bilong Kingdom em i mekim wantaim Devit, na em i tingim Devit i tanim bel tru na em i hevi long rong em i bin mekim. (1 Samuel 24:​4-7; 2 Samuel 7:12; 12:13; Song 51:​1, 2, 17)​—⁠9/15, pes 10, 11.

▫ Nupela Testamen i kamapim wanem 3-pela as na yumi ken save, Jisas em i Mesaia tru? Namba wan as em ol tumbuna bilong Jisas. (Matyu 1:​1-16; Luk 3:​23-38) Namba 2 as em truim bilong ol tok profet. Planti tok profet olsem tok profet long Daniel 9:25 i makim Jisas em i Mesaia. Namba 3 as em God yet i kamapim tok i makim Jisas em i Mesaia; inap 3-pela taim maus bilong God yet i kamapim tok, olsem na yumi save God i orait long Jisas. (Matyu 17:5; Luk 3:​21, 22; Jon 12:28)​—⁠10/1, pes 10, 12.

▫ Wanem insait bilong dispela tok Jisas i mekim long Matyu 24:​37: “Kain pasin ol i bin mekim long taim bilong Noa, ol bai i mekim wankain pasin tasol long taim Pikinini Bilong Man i kamap”? Inap planti yia Noa i bin wokim bot na em i toksave long ol man long bikpela Tait Wara bai kam na pinisim pasin nogut bilong ol. Na i olsem tasol long taim Krais i kam bek na i stap. Em wanpela hap taim inap planti yia, na insait long dispela taim ol i mas autim tok long olgeta hap, na bihain bikpela bagarap bai painim ol man bilong dispela graun.​—⁠10/1, pes 16.

▫ Wanem samting yupela papa i ken mekim na bai i gat gutpela famili-stadi? Yu mas makim taim bilong mekim famili-stadi. Long dispela taim stret yu no ken larim narapela samting i kamap, olsem televisen samting. Yu mas tingim ol wan wan bilong famili. Givim askim long pikinini na bai yu save pikinini i kisim gut tok. (Matyu 17:25) Helpim ol long i stap bel isi. Yu yet yu mas amamas taim yu bosim famili-stadi, na helpim olgeta wan wan long mekim sampela tok.​—⁠10/15, pes 17.

▫ Sapos Kristen i ting ol i putim samting bilong blut i go long kaikai, em i mas tingim dispela, o olsem wanem? Kristen i no ken tingim tumas ol tok long kaikai i gat blut i stap long en, na em i no ken ting em i mas glasim tumas ol stori em kampani i putim long kaikai o givim planti askim tumas long ol man em i baim abus long ol. Tasol sapos Kristen i save tru ol i putim blut long kaikai o mekim wok long en bilong oraitim sik, em i mas strong long bihainim tok bilong God long abrusim blut. (Aposel 15:​28, 29)​—⁠10/15, pes 30, 31.

▫ Olsem wanem buk Sindaun long Baibel i kamapim klia olsem ol Israel i save skulim gut ol man long ol samting bilong spirit? Buk Sindaun i bilong “givim gutpela save long ol yangpela,” na gutpela tingting, na stretim ol, na bai ol i “mas aninit long Bikpela.” (Sindaun 1:​1-7; 2:​1-14)​—⁠11/1, pes 12.

▫ Ol yangpela bilong nau i mas kisim wanem stretpela tingting long skul? Nau long dispela taim bilong pinis ol Kristen i mas ting, skul i bilong helpim ol long mekim laik bilong Jehova, olsem mekim wok painia, na mekim gut dispela wok.​—⁠11/1, pes 18.

▫ Bilong wanem Jehova i tokim ol Israel long givim ol namba 10 hap? Namba wan as i olsem: Bilong makim amamas na tenkyu bilong ol long gutpela pasin Jehova i mekim long ol. Na namba 2 as i olsem: Bilong lukautim lain Livai na bai ol i ken givim bel long mekim wok bilong ol na ol i ken lainim ol man long Lo. (Lukim 2 Stori 17:​7-9.)​—⁠12/1, pes 9.

▫ Wanem dispela namba 10 hap ol Kristen i mas bringim long Jehova? (Malakai 3:10) Jehova i larim yumi i mekim wok bilong em long ol samting yumi holim, na namba 10 hap i makim dispela samting tasol. Na i makim olsem yumi laikim em tumas, na yumi save em i papa bilong yumi.​—⁠12/1, pes 15.