San i Hat Moa na Ples i Drai—Baibel i Tok Wanem?

• “Saina i ripot olsem long dispela yia ‘san i hat nogut tru’ na em namba 3 taim bilong kain drai sisen olsem i kamap.”—The Guardian, Septemba 7, 2022.

• “Inap 5-pela yia nau bai san i hat nogut tru na bai i no gat ren long sampela hap bilong Afrika.”—UN Nius, Ogas 26, 2022.

• “Winim 50 pesen bilong Yurop bai i no gat ren, na i luk olsem dispela kain drai sisen i bin kamap inap 500 yia i go pinis.”—BBC Nius, Ogas 23, 2022.

Planti saveman i tok dispela kain drai sisen bai wok yet long kamap na em bai go nogut moa. Yu ting i gat gutpela samting yumi inap bilip na wet long en? Baibel i tok wanem?

Ol Drai sisen na tok profet bilong Baibel

Baibel i tok profet olsem long taim bilong yumi:

• “Bai i gat . . . bikpela hangre.”—Luk 21:11.

Ol drai sisen i save mekim na ol man i sot long kaikai na ol i stap hangre. Taim dispela hevi i kamap na ol man i dai, dispela i truim tok profet bilong Baibel.—Revelesen 6:6, 8.

Risen na ol drai sisen i go nogut moa

Baibel i tokaut long nambawan risen na drai sisen i go nogut moa. Em i tok:

• “Man i no gat rait long stiaim wokabaut bilong em yet.”​—Jeremaia 10:23.

Dispela i makim olsem ol man i no inap long “stiaim wokabaut bilong [ol] yet” o stiaim gut ol samting ol i mekim. Planti taim disisen bilong ol i mekim na i gat drai sisen na wara i sot.

• Planti saientis i wanbel olsem ol samting ol man i mekim i as na graun i wok long kamap hat moa, na dispela i mekim na wara i sot long olgeta hap bilong graun.

• Pasin gridi na pasin bilong i no tingim hevi bai kamap bihain i mekim na polisi ol man i kamapim i bagarapim ol bikbus na wara samting, na long dispela rot i no gat gutpela wara bilong ol man i yusim.

Tasol Baibel i givim yumi hop.

Yu ting i gat gutpela samting bai kamap bihain?

Baibel i tok olsem God bai stretim dispela hevi bilong sot long wara. Hau ba em i mekim?

1. 1. God bai “bagarapim ol man i wok long bagarapim graun.” (Revelesen 11:18) Em bai rausim samting i mekim na wara i sot—ol gridi man husat i mekim ol samting i bagarapim envairomen.—2 Timoti 3:1, 2.

2. 2. “Graun i hat na drai nogut tru bai kamap raunwara.” (Aisaia 35:1, 6, 7) God bai stretim gen bagarap em hevi bilong wara i sot i kamapim na dispela graun bai kamap wanpela paradais i gat inap wara.

3. 3. “Yu save lukautim gut graun, na mekim em i gat planti gris na planti kaikai i kamap.” (Buk Song 65:9) God bai blesim dispela graun na olgeta manmeri bai i gat planti gutpela kaikai na klinpela wara.