Bai i Gat Inap Kaikai Long Graun—Long Wanem Rot?
“MASKI yumi wok strong tru, ating yumi no inap long kamapim kaikai inap long planti man olsem yumi bin mekim inap planti yia long taim bilong yumi.” Lester Brown em presiden bilong Worldwatch Institute long Wosington, D.C., em i bin mekim dispela tok. Wanpela nius (New Scientist) i tok, long kirap bilong 1995, mak bilong ol wit ol man i save bungim bilong lukautim ol man long olgeta hap bilong graun i go daun tru inap 255 milion ton—em inap lukautim ol man long 48 de tasol. Long ol yia i go pinis taim ol wit i go aninit long mak bilong lukautim ol man inap 60 de, ol inap kisim gen planti nupela wit. Tasol nau dispela lain (Worldwatch) i no save gut bai graun i kamapim inap kaikai bilong inapim ol dispela kaikai i sot.
Inap tripela yia nau ol kaikai i no karim gut, na ol kantri i stap rabis i mekim wok long wit olsem kaikai bilong ol bulmakau sipsip samting, na nau i no gat planti wit bilong helpim ol man i stap rabis em ol i mas kisim olsem kaikai bilong ol long olgeta de. Nius (New Scientist) i tok lukaut olsem, sapos ol man i no stretim dispela hevi hariap, dispela wan milion manmeri i save tromoi 70 pesen bilong mani ol i save kisim bilong baim kaikai, ating hangre bai painim ol.
Baibel i tok profet olsem long taim bilong yumi ol manmeri long graun bai i gat hevi bilong “bikpela hangre.” (Luk 21:11) Tasol God i no givim baksait long dispela hevi. Tru tumas, pasin bilong God long tingim hevi bilong yumi man bai kamap long ples klia taim Kingdom bilong em i bosim ol samting bilong graun. Long dispela taim ‘planti gutpela kaikai bai kamap long graun.’ “Planti rais na wit samting i ken kamap long ol gaden bilong ol manmeri.” (Song 67:6; 72:16) Long dispela taim dispela tok profet bilong Man bilong wokim olgeta samting bai kamap tru: “Yu save salim ren i kam na long dispela pasin yu lukautim gut graun . . . Wit i pulap tru long ol ples daun namel long ol maunten.”—Song 65:9, 13.
Olsem wanem? Dispela gutpela promis i kirapim tingting bilong yu? Yu laik save, olsem wanem yu inap insait long en? Sapos olsem, orait askim ol Witnes Bilong Jehova long tokim yu moa long dispela Paradais long narapela taim ol i kam long haus bilong yu. Sapos yu laik bai wanpela i kam lukim yu long haus na lainim yu long ol tok bilong Baibel, no gat pe, orait raitim pas long IBSA, Box 636, Boroko, NCD 111, Papua New Guinea, o lukim atres long pes 2 em i stret long yu.
[Piksa Kredit Lain long pes 32]
Namel: Pictorial Archive (Near Eastern History) Est.