I Stap na Wok Bilong Jisas

Jisas i Singautim Matyu

JISAS i mekim orait wanpela sikman, bun bilong em i dai olgeta, na bihain em i lusim Kapaneam i go long nambis bilong Raunwara Galili. Na bikpela lain manmeri i kam long em na em i kirap lainim ol. Em i wokabaut i go na em i lukim Matyu, narapela nem bilong em Livai, em i sindaun long haus takis. Na Jisas i tokim em: “Yu kam bihainim mi.”

Ating Matyu i save pinis long ol tok Jisas i lainim ol man long en, olsem Pita na Andru na Jems na Jon tu i save long ol tok bilong Jisas paslain long taim Jisas i singautim ol. Fopela i kirap wantu tasol na i go bihainim Jisas na Matyu tu i mekim olsem. Em i lusim wok bilong em long haus takis na em i go bihainim Jisas.

Bihain Matyu i mekim wanpela bikpela kaikai bilong Jisas long haus bilong em. Ating em i amamas long Jisas i bin singautim em na em i mekim olsem. Jisas wantaim ol disaipel bilong Em i go long dispela kaikai, na planti wanwok bilong Matyu long bipo, ol tu i go. Ol Juda i save bel nogut long ol dispela man bilong kisim takis, long wanem ol i wokboi bilong ol Rom na ol Juda i no laikim tru ol dispela Rom i bosim ples bilong ol. Na tu, planti man bilong kisim takis ol i save giamanim ol man na pulim bikpela mani moa long ol, winim skel bilong takis.

Sampela Farisi i lukim Jisas i kaikai wantaim ol dispela kain man na ol i tokim ol disaipel bilong Jisas: “Watpo tisa bilong yupela em i kaikai wantaim ol man bilong kisim takis na ol man bilong sin?” Jisas i harim dispela, na em i tok, “Ol man i no gat sik, ol i no save go long dokta. Nogat. Ol sikman tasol i save go long dokta. Yupela i go kisim save long dispela tok bilong Baibel: ‘Mi no laikim ofa, mi laikim marimari.’ Mi no kam bilong singautim ol stretpela man. Nogat. Mi kam bilong singautim ol man bilong sin.”

Matyu i singautim ol dispela man bilong kisim takis i kam long dispela kaikai bambai ol i ken harim tok bilong Jisas na ol i ken orait bek long spirit. Olsem na Jisas i bung wantaim ol bilong helpim ol long kamap gutpela long ai bilong God. Ol Farisi i hambak na tingim ol yet ol i stretpela man, olsem na ol i tingting nogut long ol dispela man bilong kisim takis. Tasol Jisas i no tingting nogut long ol. Em i sori long ol na em i mekim wok bilong oraitim bek ol long spirit.

Jisas i marimari long ol man bilong sin, tasol i no olsem em i orait long sin bilong ol. Nogat. Em i sori long ol dispela man i gat sik long spirit olsem em i save sori long ol man i gat sik long skin. Taim em i oraitim wanpela lepraman em i kamapim bikpela sori bilong em. Em i putim han na holim skin bilong lepraman na em i tok: “Mi laik. Yu kamap klin.” Yumi tu i mas sori long ol man na helpim ol; yumi mas wok strong long helpim ol long ol samting bilong spirit. Matyu 8:3; 9:9-13; Mak 2:13-17; Luk 5:27-32.

◆ Jisas i stap we na em i lukim Matyu?

◆ Matyu em i man bilong mekim wanem wok? Bilong wanem ol Juda i bel nogut long ol man i mekim dispela wok?

◆ Ol Farisi i sutim wanem tok long Jisas? Na Jisas i tok wanem?

◆ Bilong wanem Jisas i bung wantaim ol man bilong sin?