Yu Ting Mani Em i As Bilong Olgeta Pasin Nogut?

Bekim bilong Baibel

Nogat. Baibel i no tok mani em samting nogut, na tu, Baibel i no tok olsem mani em as bilong olgeta pasin nogut. Dispela hap tok “mani em as bilong olgeta pasin nogut” em planti man i save kolim, em liklik hap tasol bilong ves bilong Baibel na i no kamapim stret tok i stap long Baibel. Tasol tok Baibel i mekim em “pasin bilong laikim tru mani em i as bilong olgeta pasin nogut.”a—1 Timoti 6:10, King James Version, mipela i mekim dispela tok “laikim tru” i stap long strongpela rait.

Baibel i tok wanem long mani?

Baibel i tok sapos man i mekim stretpela wok long mani, mani inap helpim em na “lukautim” em. (Eklisiastis 7:12) Na tu, Baibel i tok amamas long ol lain i gat pasin bilong givim ol samting long ol narapela, na ol i givim tu mani.—Provep 11:25.

Tasol Baibel i tok lukaut long pasin bilong putim mani i stap nambawan samting long laip bilong yumi. Baibel i tok: “Long sindaun bilong yupela, yupela i no ken bihainim pasin bilong laikim tumas mani. Yupela i mas ting olsem ol samting yupela i gat pinis em inap long yupela.” (Hibru 13:5) Skul yumi kisim long dispela ves em olsem, yumi mas mekim stretpela wok long mani na yumi no ken tingting long kisim planti moa mani. Mobeta yumi belgut long ol samting yumi gat pinis we yumi nidim, olsem kaikai, klos, na haus.—1 Timoti 6:8.

**Wai na Baibel i tok lukaut long pasin bilong laikim tumas mani?**

Ol gridi lain i no inap kisim laip oltaim. (Efesus 5:5) Gridi pasin em wankain olsem pasin bilong lotuim imis, o lotu giaman. (Kolosi 3:5) Na tu, ol gridi lain i save sakim ol stretpela pasin taim ol i laik kisim ol samting ol i laikim. Provep 28:20 i tok, taim “man i hariap long kamap maniman, em bai gat asua.” Ol inap mekim ol pasin nogut olsem pretim man na bai man i baim bikpela mani bilong haitim rong bilong em yet, pulim nating mani kago bilong ol narapela, paulim mani, kidnepim man, o kilim man i dai.

Maski sapos man i laikim tumas mani i no mekim ol pasin nogut, ol narapela hevi inap painim em. Baibel i tok, sapos “ol man i strong long kisim planti mani, ol bai pundaun long traim na ol bai pundaun long trap na ol bai i gat ol laik nogut na bihainim longlong tingting.”—1 Timoti 6:9.

Olsem wanem tok bilong Baibel long sait bilong mani inap helpim yumi?

Sapos yumi mekim ol samting yumi save i stret long mekim na yumi bihainim tok bilong God, yumi bai stap belgut na God bai orait long yumi na helpim yumi. Ol manmeri em ol i laik tru long mekim ol samting i amamasim God, em i tok promis long ol olsem: “Mi no inap tru long lusim yu, na mi no inap givim baksait long yu.” (Hibru 13:5, 6) Na tu, God i tok promis long yumi olsem “gutpela man bai kisim planti blesing.”—Provep 28:20.

Ol Ves Bilong Baibel i Stori Long Mani

Eklisiastis 7:12: “Mani i save lukautim man.”

Wanem mining bilong skripsa?: Sapos yumi mekim gutpela wok long mani, mani inap helpim yumi na lukautim yumi.

Luk 12:15: “Maski man i gat planti samting, em i no kisim laip long ol dispela samting em i holim.”

Wanem mining bilong skripsa?: Mani em i no nambawan bikpela samting long laip, na mani no inap mekim God i kisim bek yumi.

1 Timoti 6:10: “Pasin bilong laikim tumas mani em i as bilong olgeta kain pasin nogut. Sampela i bin laikim tumas mani, na dispela i pulim ol na ol i lusim bilip, i olsem ol i sutim ol yet long ol samting i givim pen long ol.”

Wanem mining bilong skripsa?: Mani em i no samting nogut. Tasol ol manmeri i laikim tumas mani—ol i putim mani i stap nambawan bikpela samting long laip bilong ol—ol i bringim hevi i kam long ol yet, olsem famili i bruk, na tu, ol i givim bel tumas long wok bilong kisim mani na helt bilong ol i bagarap.

Hibru 13:5: “Long sindaun bilong yupela, yupela i no ken bihainim pasin bilong laikim tumas mani. Yupela i mas ting olsem ol samting yupela i gat pinis em inap long yupela.”

Wanem mining bilong skripsa?: Yumi bihainim savepasin sapos yumi amamas long ol samting yumi gat we yumi nidim, na yumi no lusim bikpela haptaim long kisim planti mani.

Matyu 19:24: “Kamel i laik go insait long ai bilong nidol, em i no gat hatwok olsem maniman i laik go insait long Kingdom Bilong God.”

Wanem mining bilong skripsa?: Jisas i invaitim wanpela yangpela maniman long kamap disaipel bilong em. Tasol dispela man i no laik kamap disaipel bikos em i laikim tumas mani kago bilong em. Olsem na Jisas i givim tok lukaut. Sapos man i putim mani kago i stap nambawan samting long laip na em i no tingim God, dispela man bai no inap kisim laip oltaim.

a Narapela Baibel i trensletim tu dispela ves olsem: “Pasin bilong laikim tumas mani em i as bilong olgeta kain pasin nogut.”