Yu Tingim Gut Pastaim?
WANPELA gutpela meri i save gut long mekim wok bilong em, kampani i laik salim em i go long narapela kantri bilong skul inap tupela yia, na kampani bai baim skul na olgeta samting bilong em. Tasol dispela meri i no laik i go, na bos i kirap nogut tru na i tok: “Olaman! Yu no laik i go!” Bilong wanem em i no laik i go?
Meri i stori olsem: Sapos em i kisim dispela wok, bai em i lusim man na tupela pikinini bilong em inap tupela yia. Bai em i wari long ol. Tasol bikpela samting moa em i olsem: Bai em i lusim ol wok em God i givim long ol mama na meri marit. Dispela bai bagarapim bel bilong em na nogutim em long ai bilong God. Em i tingim gut ol dispela samting pastaim na em i no laik i go.
Sapos yu dispela meri, bai yu mekim wanem? Planti bai ol i no wanbel wantaim dispela meri Kristen. Sampela, olsem ol wanwok bilong em, ating ol i pilim olsem em i lusim nating gutpela samting bilong helpim em long kisim bikpela wok moa. O sampela, ating ol i tok em i no tingim gut sindaun bilong famili bilong em long bihain—tupela yia i no longpela taim. Tasol bel bilong em i no kirap nating na em i tok em i no laik i go; em i tingting gut pastaim, na larim sampela gutpela lo i stiaim tingting bilong em. Em wanem ol lo?
I No Gutpela Tingting Tasol
Nambawan man tru i gat gutpela tingting, em Krais Jisas, em i mekim wanpela tok piksa na kamapim lo bilong stiaim tingting. Em i tok: “Sapos wanpela [man] i laik wokim wanpela haus . . . ating em bai i sindaun pastaim na tingim gut pe bilong wokim dispela haus. Em i laik save, mani bilong en bai inap long pinisim dispela haus, o nogat. Sapos em i no mekim olsem pastaim, na em i putim simen na bihain em i no inap pinisim dispela haus, orait olgeta man i lukim, ol bai i tok bilas long em. Ol bai i tok, ‘Dispela man i statim dispela haus, tasol em i no inap pinisim.’ ”—Luk 14:28-30.
Yumi olgeta i save, sapos man i laik mekim wanpela bikpela samting na em i tingim gut pastaim, em i bihainim savepasin. Olsem: Sapos man i laik baim haus, yu ting em bai hariap sainim kontrak sapos em i no save pe bilong haus em hamas, na mani bilong em inap o nogat? Sapos em i no tingim gut pastaim, bai ol man i ting em i mekim longlong pasin, a? Tru tumas, sapos yumi laik mekim wanpela samting, yumi mas bihainim gutpela tingting na tingim gut pastaim.
Tasol wanem as tru bilong dispela tok piksa bilong Jisas? Paslain long em i mekim, em i tok: “Man i no karim diwai [pos] bilong en na bihainim mi, em i no inap i stap disaipel bilong mi.” (Luk 14:27) Olsem na Jisas i no givim tok long yumi bilong helpim yumi long bihainim gutpela tingting bilong olgeta de. Nogat. Em i toktok long kamap disaipel bilong em, na em i tok, yumi mas tingim gut pastaim.
Long rot bilong dispela tok piksa, Jisas i kamapim klia olsem sapos man i laik kamap disaipel bilong em, em i mas redi long senisim sampela pasin bilong em na lusim sampela samting bilong em. Long wanem, ol man bilong dispela graun long nau i tingting long helpim ol yet tasol na ol i tingim tumas ol samting bilong skin. Planti man i tingting tasol long inapim ol laik bilong skin na ol i no tingim God o ol i tingim em liklik tasol. (2 Timoti 3:1-4) Tingting bilong ol i narapela kain tru long tingting bilong Krais Jisas, em i tok: “Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek [ol].” Em i tingim ol samting bilong spirit i winim ol samting bilong skin na em i tok: “Holi Spirit yet i save givim laip long ol manmeri. Bodi em i no inap helpim yumi liklik.”—Matyu 20:28; Jon 6:63.
Olsem na taim Jisas i tok, ol man i laik kamap disaipel bilong em ol i mas tingim gut pastaim, em i no toktok long ol samting bilong skin tasol; em i toktok long ol samting bilong spirit. Ol i mas tingting gut: Ol i laik kisim ol samting bilong graun o ol i laik kamap disaipel bilong em na kisim ol gutpela samting bilong spirit? Olsem na taim em i mekim pinis dispela tok piksa na narapela tok piksa i wankain, bihain em i tok: “Sapos wanpela bilong yupela i no givim baksait long olgeta samting bilong en, orait em i no inap i stap disaipel bilong mi.” (Luk 14:33) Olsem wanem? Man i laik kamap disaipel bilong Jisas, em i redi long mekim olsem, o em i ting ol samting em i mas lusim i planti tumas?
Stretpela Tingting
Tru, i olsem ol samting bilong graun inap helpim gut yumi long nau, tasol sapos yumi mekim wok bilong God, dispela inap helpim yumi moa yet na inap longtaim bihain. Jisas i tok olsem: “Yupela i no ken bungim ol gutpela gutpela samting bilong yupela hia long dispela graun. Long dispela graun ol binatang na ros i save bagarapim ol samting, na ol stilman i save brukim banis na stilim. Tasol yupela i mas bungim ol gutpela samting bilong yupela long heven. Long heven ol binatang na ros i no save bagarapim ol samting, na ol stilman i no save brukim banis na stilim.” (Matyu 6:19, 20) Long taim bilong yumi, pe bilong ol samting i go antap na wok bilong planti beng i bagarap, olsem na planti man i bin bungim bikpela mani na ol i ting dispela inap helpim ol, ol i lus. Tasol aposel Pol i kirapim yumi long “lukluk strong long ol samting yumi no inap lukim long ai, long wanem, samting yumi save lukim long ai, em bai i stap sotpela taim tasol. Tasol ol dispela gutpela samting yumi no inap lukim long ai, ol bai i stap oltaim oltaim.” (2 Korin 4:18) Olsem wanem yumi ken mekim olsem?
Yumi mas bihainim pasin bilong Krais Jisas. Taim em i stap long graun em i no sakim olgeta gutpela laik bilong skin; nogat; em i bin go long sampela bikpela kaikai, olsem kaikai bilong marit. Tasol ol samting bilong spirit i nambawan bikpela samting long tingting bilong em. Bilong bihainim laik bilong God, em i redi long lusim sampela samting bilong skin em ol man i ting ol i mas kisim. Em i tok: “Ol weldok i gat hul long graun, na ol pisin i gat haus bilong ol. Tasol Pikinini Bilong Man em i no gat ples bilong slip.” (Luk 9:58) Em i laik tru na amamas tru long bihainim laik bilong God, olsem na em i tok: “Kaikai bilong mi, em long bihainim laik bilong God. . . . Na mi mas pinisim wok bilong em.”—Jon 4:34.
Jisas i sakim ol traim bilong Satan na dispela i kamapim klia ol samting Jisas i tingim i nambawan samting. God i bin givim strong long Jisas, na Satan i laik kirapim Jisas long mekim wok long dispela strong bilong helpim Em yet, na bilong inapim skin bilong Em long kaikai samting, na bilong kisim bikpela nem long dispela graun. Jisas i save, sapos em i mekim olsem bai God i no ken orait moa long em. Tasol em i laik pas gut wantaim Papa, na dispela i olsem nambawan bikpela samting long tingting bilong em. Olsem na em i sakim Satan—em i no gat tupela tingting.—Matyu 4:1-10.
Yumi ol disaipel bilong Krais, yumi laik kisim wankain tingting olsem em. I gat planti samting bilong dispela graun bilong Satan em ol man i ting em inap helpim ol gut, tasol ol dispela samting inap mekim na bai ol i no pas gut moa wantaim God. Olsem: Sapos man i wok long kisim bikpela wok moa, o bikpela skul moa, o em i laik maritim meri ausait, o em i insait long sampela wok bisnis i no stret, dispela inap mekim na bai em i lusim bilip na bihain God i no ken laikim em moa. Taim kain traim olsem i painim yumi, yumi mas tingim gut ol samting yumi laik mekim.
Stretpela Save na Tingting Bai Lukautim Yu
Long sampela yia i go pinis i gat wanpela yangpela man Kristen i stap long wanpela biktaun long hap bilong Esia na rot i op long em bilong i go long narapela kantri na skul moa. Em i bin kisim gutpela skul na em i save kisim bikpela pe long wok bilong em, tasol em i pilim olsem dispela i no inap; em i laik kisim gutpela sindaun moa. Ol wanbilip i wok long toktok gut wantaim em long ol dispela tok bilong Baibel yumi stori pinis long en, tasol tingting bilong em i strong na em i go. Pastaim em i wok strong long holimpas bilip, tasol isi isi em i no tingim moa ol tok i tru bilong Baibel na bilip bilong em i no strong moa. Insait long wanpela yia samting em i lusim bilip olgeta na em i tok, em i no save God i stap o nogat. Tru em i winim bikpela skul moa na em i amamas long dispela, tasol bilong kisim biknem bilong sotpela taim em i lusim planti samting—bilip bilong em i bagarap na em inap lus long kisim laip oltaim!—1 Timoti 1:19.
Tasol ol man i was gut na ol i no larim wanpela samting i mekim na bai ol i no stap wanbel moa wantaim God, ol i kisim ol bikpela blesing.
Olsem: Wanpela yangpela man long dispela biktaun nau tasol yumi stori long en, em i gat bisnis. Em i kirap long stadi long Baibel wantaim ol Witnes Bilong Jehova na sampela mun bihain traim i painim em. Sampela man i laik givim wok long em bilong stretim wanpela haus na ol i tok long givim K29,000 long em. Tasol bilong mekim dispela wok em i mas kalapim sampela lo bilong kaunsil samting. Em i kisim save pinis olsem ol Kristen i mas bihainim ol lo bilong gavman na em i save, sapos em i kisim dispela wok, God i no ken amamas moa long em. (Rom 13:1, 2) Em i skelim gut dispela samting na em i tok em i no laik mekim dispela wok. Wanem samting i kamap? Em i bilip na em i winim dispela traim na dispela i helpim em long kamap strong long bilip. Insait long wanpela yia tasol, em i dediket na kisim baptais. Em i baim bisnis bilong em i go long ol man na em i kisim wanpela wok i givim hap taim moa long em bilong mekim ol wok bilong God. Nau em i amamas na wok strong long mekim wok bilong Jehova.
Dispela tupela yangpela man wantaim i bin tingim gut pastaim samting ol i laik mekim. Orait, bilong wanem wanpela i bihainim gutpela rot, na wanpela nogat? Wanpela i bihainim gutpela tingting na save i kam long God. Man i gat dispela kain gutpela tingting na save em i mekim wok long save em i kisim bilong bihainim laik bilong God. Dispela tupela yangpela man wantaim i gat hap save long tok bilong Baibel, tasol wok ol i mekim long dispela save i bringim ol i go long narapela narapela rot. Buk Sindaun i tok: “Pasin bilong tingting gut bai i banisim yu na gutpela save bai i was long yu. Na bai yu no bihainim ol man i save mekim pasin nogut.”—Sindaun 2:10-12.
Taim yu mas tingim gut wanpela bikpela samting, yu ken lukim sampela tok bilong Baibel bilong stiaim tingting bilong yu, long wanem, Baibel em i as bilong stretpela save na tingting. “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” (Sindaun 3:5, 6) Yumi mas bihainim pasin daun na larim God i skulim yumi; yumi no ken bihainim pasin bikhet olsem bilong planti man long nau.
Tru tumas, kain kaikai yumi planim, dispela kain kaikai tasol bai yumi kamautim. Yumi inap tingim ol samting yumi laik mekim, tasol yumi gat bikpela wok long dispela na i stret yumi mas karim hevi bilong en. (Galesia 6:7, 8) Olsem na yu mas tingim gut pastaim olgeta samting yu laik mekim. Ating samting yu laik mekim em inap helpim yu, tasol nogut em i bagarapim bilip bilong yu na yu no stap wanbel moa wantaim God Jehova. Beten askim God long givim gutpela tingting na save long yu bambai yu inap skelim gut ol samting yu laik mekim na bihainim stretpela rot. Tingting yu bihainim long nau inap bringim yu long rot bilong kisim laip o bilong i dai—inap oltaim oltaim!—Lukim Lo 30:19, 20.
[Ol Piksa long pes 28]
Em bai tingim wok bilong God pastaim o wok mani?