Stadi 18
Stap Pren Bilong God Inap Oltaim Oltaim!
Man i mas wok strong bilong kamap pren bilong narapela, na em i mas wok strong yet i go bilong stap pren bilong narapela. Sapos yu wok strong long kamap pren bilong God na stap yet olsem pren bilong em, God bai mekim gut tru long yu. Jisas i tokim ol man i bilip long em: “Tok tru bai i mekim yupela i kamap fri.” ( Jon 8:32) Wanem insait bilong dispela tok?
Yu inap stap gutpela long nau. Yu no inap kalabus moa long ol bilip giaman na ol tok giaman Satan i kamapim. Planti milion manmeri em ol i no save long Jehova ol i pilim olsem i no gat wanpela gutpela samting bilong wetim i kamap, tasol dispela samting i no inap bagarapim moa bel bilong yu. (Rom 8:22) Na tu, ol pren bilong God i stap fri long pasin bilong “pret long dai.”—Hibru 2:14, 15.
Yu inap i stap gutpela long nupela taim God bai kamapim. Man! Em i gutpela tru long yumi ken i stap gutpela long bihain! Long Paradais long graun, bai yumi stap gutpela na i no gat pait, no gat sik, no gat pasin raskol. Bai yumi no stap rabis na i no gat hangre. Bai yumi no inap kamap lapun na i dai. Bai yumi no inap pret, na ol man bai i no inap daunim yumi, na bai i no gat pasin i no stret. Baibel i tok long God olsem: “Em i save givim kaikai samting long olgeta inap long ol i stap gut.”—Song 145:16.
Ol pren bilong God bai i stap oltaim oltaim. Laip i stap gut oltaim em i wanpela gutpela presen tru God bai givim long olgeta man i laik stap pren bilong em. (Rom 6:23) Man! Tingim ol samting dispela gutpela laip i no gat pinis bilong en em bai mekim long yu!
Yu bai i gat bikpela hap taim long mekim planti samting. Ating yu laik lain long pilaim musik. O ating yu laik lain long droim piksa o yu laik kamap wanpela kamda. Ating yu laik kisim save long ol animal o ol diwai na purpur samting. O ating yu laik raun na lukim ol narapela ples na ol narapela lain manmeri. Man inap mekim olgeta dispela samting sapos em i stap oltaim oltaim!
Yu bai i gat bikpela hap taim long kisim planti pren. Taim man i stap oltaim oltaim bai em inap save long planti narapela man em ol i bin kamap pren bilong God. Yu bai kisim save long ol gutpela pasin bilong ol na long save bilong ol long mekim ol wok na ol gutpela pasin bilong ol, na ol bai i kamap pren bilong yu tu. Yu bai laikim ol na ol bai laikim yu. (1 Korin 13:8) Taim yu stap oltaim oltaim bai yu gat taim long prenim olgeta manmeri long graun! Na gutpela samting moa yet em olsem, taim planti planti yia i kamap na i go, pasin bilong yu long stap pren bilong Jehova bai kamap strong moa yet. Yu mas i stap pren bilong God inap oltaim oltaim!