Baibel i Tok Wanem?
“Yupela i No Man Bilong Dispela Graun”—Wanem Insait Bilong Dispela Tok?
LONG yia 350 samting, planti tausen manmeri i tok ol i Kristen, ol i lusim olgeta samting bilong skin, na ol wanblut, na sindaun bilong ol, na ol i go stap longwe long ol man long ol ples nating bilong Isip. Ol i kisim nem ankorait, em wanpela nem i kam long hap tok Grik a·na·kho·reʹo, insait bilong en i olsem, “Mi lusim yu.” Wanpela saveman bilong raitim stori bilong ol samting i bin kamap bipo, em i stori olsem dispela lain i no laik stap wantaim ol narapela man. Ol ankorait i ting sapos ol i stap longwe long ol man, ol i save bihainim lo Kristen i tok, “yupela i no man bilong dispela graun.”—Jon 15:19.
Baibel i tok, ol Kristen i mas was gut long wokabaut bilong ol bambai “pasin bilong dispela graun i no ken mekim [ol] i kamap doti.” (Jems 1:27) Na Baibel i tokaut klia olsem: “Yupela i lusim God, olsem meri i lusim man bilong en na i go pamuk nabaut. Harim. Sapos man i laikim pasin bilong graun, em i mekim pasin birua long God. Ating yupela i no save long dispela, a? Olsem na sapos man i laik pren wantaim ol pasin bilong graun, em bai i kamap birua bilong God.” (Jems 4:4) Tasol olsem wanem? Ol Kristen i mas kamap olsem ol ankorait na lusim tru ol man? Ol i mas stap longwe long ol man i no gat wankain bilip bilong lotu?
Ol Kristen i No Birua Long Ol Man
Dispela tingting olsem ol Kristen i no man bilong dispela graun na ol i mas klia long ol man i stap longwe long God, em i save kamap long planti stori bilong Baibel. (Skelim wantaim 2 Korin 6:14-17; Efesus 4:18; 2 Pita 2:20.) Olsem na ol Kristen tru i save bihainim gutpela tingting, ol i sakim tingting na toktok na pasin i save pait wantaim ol gutpela lo bilong Jehova, olsem pasin bilong planti manmeri bilong dispela graun, em ol i laik tumas long kisim planti mani kago na biknem na amamas. (1 Jon 2:15-17) Na ol i no insait liklik long wok politik o ol pait bilong ol lain man.
Krais Jisas i tok, ol disaipel bilong em ol i “no man bilong dispela graun.” Tasol em i beten long God olsem: “Mi no askim yu long tekewe ol long dispela graun. Nogat. Mi beten long yu long yu ken lukautim ol, na man nogut i no ken bagarapim ol.” (Jon 17:14-16) Olsem na Jisas i no laik ol disaipel bilong em i birua long ol man na klia olgeta long ol man i no Kristen, nogat. Sapos wanpela Kristen i klia olgeta long ol man, em i no inap truim wok bilong em long autim tok long ol haus na skulim ol man.—Aposel 20:20; Matyu 5:16; 1 Korin 5:9, 10.
Dispela tok olsem ol Kristen i mas was gut na pasin bilong dispela graun i no ken mekim ol i kamap doti long ai bilong God, em i no givim rot na ol Kristen i ken ting ol i winim ol narapela man. Man i save aninit long Jehova em i nolaik tru long “litimapim nem bilong em yet.” (Sindaun 8:13) Galesia 6:3 i tok: “Sapos wanpela man i ting em i gat nem, tasol em i no gat nem, orait dispela man i giamanim em yet.” Ol man i ting ol i winim ol narapela man, ol i giamanim bel bilong ol yet, long wanem, “yumi olgeta man yumi bin mekim sin.”—Rom 3:23.
“No Ken Tok Nogut Long Wanpela Man”
Long taim bilong Jisas i gat sampela man i daunim tru ol narapela man i no insait long lain tru bilong ol. Sampela em ol Farisi. Ol Farisi i save tru long Lo Bilong Moses na olgeta liklik liklik samting bilong pasin bilong lotu Juda. (Matyu 15:1, 2; 23:2) Ol i amamas long bihainim ol planti bilaspasin bilong lotu na ol i strong tumas long mekim olsem. Ol Farisi i mekim olsem ol i winim tru ol man, long wanem, ol i gat bikpela save na namba long lotu. Pasin na tingting nogut bilong ol i kamap klia taim ol i tok: “Ol dispela lain manmeri ol i no save long lo. God i tok pinis long ol bai i bagarap.”—Jon 7:49.
Na ol Farisi i gat wanpela tok nogut ol i bin kolim long ol man i no insait long lain Farisi. Bipo, hap tok Hibru olsem ʽam ha·ʼaʹrets, em wanpela gutpela tok i makim ol man i insait long wanpela lain. Tasol bihain ol hetman bilong lotu Juda em ol i gat pasin antap, ol i senisim insait bilong tok ʽam ha·ʼaʹrets na em i kamap wanpela tok nogut. Sampela lain moa—ol man i tok ol i Kristen tu—ol i bin kolim sampela kain tok olsem “haiden” bilong makim ol man i gat bilip bilong lotu i narapela kain long bilip bilong ol, tasol dispela i olsem ol i tok nogut long ol.
Tasol ol Kristen long taim bilong Jisas, ol i bin ting olsem wanem long ol man i no kamap Kristen? Jisas i tokim ol disaipel bilong em long “tok isi” na mekim “gutpela pasin” long ol man i no bilip. (2 Timoti 2:25; 1 Pita 3:15, 16) Aposel Pol i stap olsem gutpela piksa ol man i ken bihainim long dispela samting. Ol man i no pret long i go klostu long em, na em i no gat pasin hambak. Em i no gat pasin antap na i laik winim ol narapela, nogat; em i gat pasin daun na em i save strongim bel bilong ol narapela. (1 Korin 9:22, 23) Long pas em spirit holi i bin helpim Pol long raitim i go long Taitus, Pol i tok yumi “no ken tok nogut long wanpela man, na [yumi] no ken tok pait. Oltaim [yumi] mas stap isi tasol na mekim gutpela pasin long olgeta manmeri.”—Taitus 3:2.
Long Baibel, sampela taim dispela tok “man i no bilip” em i makim man i no kamap Kristen yet. Tasol i no gat wanpela samting i makim olsem ol Kristen i bin kolim dispela tok olsem wanpela nem long ol man i no Kristen. Tru tumas, ol i no bin tok olsem bilong daunim o semim ol man i no kamap Kristen yet, long wanem, dispela i no stret long ol lo bilong Baibel. (Sindaun 24:9) Ol Witnes Bilong Jehova long nau, ol i no save mekim hatpela pasin o pasin hambak long ol man i no bilip. Na ol i ting i no stret long mekim tok bilas long ol wanblut o ol man i sindaun klostu long ol na ol i no Witnes. Ol i save bihainim tok bilong Baibel i tok: “Wokman bilong Bikpela i . . . mas mekim gutpela pasin long olgeta man.”—2 Timoti 2:24.
“Mekim Gutpela Pasin Long Ol Arapela”
Em i bikpela samting long save, sapos yumi pas wantaim ol man bilong dispela graun dispela inap nogutim yumi, na sapos yumi pas wantaim ol man i sakim tru ol lo bilong God, dispela i moa nogut. (Skelim 1 Korin 15:33.) Tasol taim Baibel i tok, yumi mas “mekim gutpela pasin long ol arapela,” dispela tok “ol arapela” i makim tu ol man i no gat wankain bilip Kristen olsem yumi. (Galesia 6:10) Olsem na sampela taim, ol Kristen long taim bilong ol aposel, ol i bin kaikai wantaim ol man i no bilip. (1 Korin 10:27) Olsem na long nau, ol Kristen i save mekim gutpela pasin long ol man i no bilip, na ol i tingim ol olsem ol i wantok bilong ol.—Matyu 22:39.
Sapos man i no save long ol tok i tru bilong Baibel, i no stret yumi ting em i olsem wanpela man nogut. Sindaun bilong yumi olgeta i narapela narapela kain, olsem na olgeta wan wan Kristen yet i mas tingim hamas taim em bai lusim long bung wantaim ol man i no bilip. Tasol i no gat wok long wanpela Kristen i stap longwe long ol man olsem ol ankorait i bin mekim, o Kristen i pilim olsem em i winim ol narapela man olsem ol Farisi i bin ting—na tu dispela pasin i no stret wantaim tok bilong Baibel.