Baibel i Tok Wanem?
Yu Ting Baibel i No Orait Long Man i Bihainim Tingting Bilong Em Yet?
PAIA i go bikpela tru taim sampela bikman Jeman i wok long tromoi ol gutpela buk i go long paia. Olsem wanem? Dispela samting i bin kamap long taim ol Natsi i bosim Jemani? Yes, tasol wankain samting i bin kamap long yia 1199 taim wanpela asbisop bilong ol Katolik i tokim ol man long kukim ol Baibel bilong tok ples Jeman.
Dispela samting i no nupela samting—long planti kantri ol i bin mekim planti taim—bipo tru na i kam inap long nau. Ol i ting long dispela rot ol bai pasim man long kamapim tingting bilong em o pasim em long tokaut long bilip bilong em. Planti taim ol bikman bilong lotu i kirapim ol man long mekim dispela samting, long wanem, ol i pret, nogut ol dispela man i laik bihainim tingting bilong ol yet i kirapim ol man nating long mekim olsem.
Olsem na planti man long nau i ting Baibel i tambuim man long toktok long ol samting i save kirapim tingting bilong em. Olsem wanem? Baibel i tambuim man long mekim olsem? Baibel i no orait long man i bihainim tingting bilong em yet?
‘Laikim Jehova Long Tingting Bilong Yu’
Baibel i no tambuim yumi long mekim wok long tingting bilong yumi, nogat tru. Jisas i strongim yumi long ‘laikim Jehova long tingting bilong yumi.’ (Mak 12:30, NW) Taim yumi skelim wok bilong Jisas, yumi ken save em i bin tingim wok gavman na sindaun bilong ol man long taim bilong em (Luk 13:1-5), na em i bin tingim ol samting i gat laip (Matyu 6:26, 28; Mak 7:18, 19), na pasin didiman (Matyu 13:31, 32), na pasin bilong yumi sinman (Matyu 5:28; 6:22-24). Ol tok piksa Jisas i kamapim i makim olsem em i save gut long ol lo bilong Baibel na olsem wanem Baibel i ken helpim sindaun na tingting bilong ol man i harim tok bilong em.
Pol i tokim ol Kristen long bihainim “tingting i stret” taim ol i lotu long God. (Rom 12:1, NW) Na em i bin strongim ol Tesalonaika long ol i no ken larim tok nating bilong ol man i paulim ol. (2 Tesalonaika 2:2) Pol i gat save long sampela hap tok olsem song bilong ol Grik na Krit (Aposel 17:28; Taitus 1:12), na ol samting bilong ami (Efesus 6:14-17; 2 Korin 2:14-16). Na Pol i bin tingim pasin bilong ol man bilong ples.—Aposel 17:22, 23.
Maski planti taim Jisas na Pol i kamapim tingting bilong ol yet, ol i no mekim olsem ol yet tasol i save wanem samting i stret na wanem samting i no stret, nogat. Jisas i no sakim tok bilong Baibel na bihainim tingting bilong em yet, nogat; planti taim em i kamapim tok bilong Baibel. Taim Jisas i tok em i mas bihainim laik bilong God na i dai olsem wanpela ofa, Pita i strong long tokim em long tingim narapela rot, nogut em i mas i dai. Tasol wantu Jisas i krosim Pita, na dispela i kamapim klia olsem em i no inap tingting long mekim wanpela samting God i no orait long en. (Matyu 16:22, 23) Na yumi save, Pol i gat wankain tingting taim em i tokim ol Korin olsem: “Taim mi bin i kam long yupela na mi autim tok hait bilong God long yupela, mi no bin mekim ol kain kain bikpela toktok olsem ol saveman i save mekim.” (1 Korin 2:1) Olsem Jisas, Baibel i as bilong tingting bilong Pol.—Aposel 17:2.
Baibel i save strongim yumi long mekim wok long tingting bilong yumi, tasol i no olsem i no gat wanpela lo bilong Baibel i ken stiaim tingting bilong yumi, nogat. Tasol tingting bilong Kristen i mas wankain long tingting bilong Jehova, na em wok bilong wan wan Kristen long bosim tingting bilong em yet, i no wok bilong lain Kristen long mekim olsem. Olsem na taim sampela Efesus i lusim pasin bilong wokim posin na marila samting na kamap Kristen, na ol i kamapim dispela samting long ai bilong ol man, Pol i no bin kisim ol buk bilong ol na kukim long paia. Baibel i tok: “Planti manmeri i bin wokim posin na marila samting, ol i bungim ol buk bilong ol i gat tok long pasin bilong wokim ol dispela samting, na ol i kukim long paia long ai bilong olgeta manmeri.” (Aposel 19:19) Bilong wanem ol dispela Kristen i ting i stret ol i kukim buk bilong ol yet?
Namba Wan Samting Bilong Helpim Man
Tingim wanpela tok piksa. Ami bilong winim pait i no save bihainim wanpela pasin tasol bilong pait, nogat; ami i bihainim kain kain pasin. Na kepten bilong ami bai ting wan wan pasin ol i bihainim bilong pait i bikpela samting na ol i mas strong long bihainim olgeta, no ken lusim wanpela. Ol Kristen i insait long wanpela pait—em pait bilong daunim ol laik nogut i save kamap, na Kristen inap mekim wok long sampela samting bilong helpim em long daunim ol dispela laik nogut.
Jems 1:14, 15 i tok, “bel bilong yumi olgeta wan wan i save kirap na pulim yumi. Dispela laik nogut bilong yumi yet i save grisim yumi na giamanim yumi, bilong kirapim yumi long mekim sin.” Namba wan samting man i mas was gut long en, em tingting bilong em. Tingting kranki inap kamapim laik nogut long bel na pulim em long mekim rong. Olsem na em i mas wok strong long bosim tingting bilong em na daunim dispela laik nogut—dispela i namba wan samting bilong helpim em.
Tingting na pasin i save poroman wantaim, olsem na Baibel i givim tok lukaut olsem: “Oltaim yupela i mas tingting long ol samting bilong antap. Yupela i no ken tingting long ol samting bilong graun.” (Kolosi 3:2) Taim ol Kristen i no laik tingting long pasin pamuk, o ol samting bilong posin na marila, o pasin bilong bikhet na givim baksait long bilip tru, i no olsem ol i ting tingting bilong ol yet i winim tok bilong Baibel, nogat; ol i mekim, long wanem, ol i laik abrusim ol samting inap pulim ol long mekim pasin i no stret.
‘Olgeta Samting i Stap Ples Klia’
Yumi save laikim tru Jehova na yumi save olgeta tingting bilong yumi i stap ples klia long em—dispela i narapela bikpela as na yumi mas bosim tingting bilong yumi. Olsem wanem sapos wanpela gutpela pren o wanblut bilong yu i no laikim doti o das? Bai yu no singautim em i kam long haus bilong yu long wanem yu les long klinim gut haus? Nogat, a? Yu laikim tru dispela pren o wanblut, olsem na bai yu hatwok long klinim gut haus, a? Jehova i save skelim olgeta tingting bilong yumi—ol gutpela tingting na ol tingting nogut. Na Song 44:21 i truim dispela tok olsem: “Yu save long olgeta tingting i hait i stap long bel bilong mipela man.” Na Pol i tok God bai kotim tingting bilong yumi: “I no gat wanpela samting God i bin wokim, em inap hait long pes bilong God. Nogat tru. Olgeta samting i op olgeta na i stap ples klia tru long ai bilong God. Na God tasol bai i skelim olgeta pasin yumi mekim.”—Hibru 4:13; Song 10:4; Sindaun 6:16, 18.
Jop i save, samting man i tingting long en, em yet i mas kot long dispela. Olsem na “Jop . . . i save mekim ol ofa . . . long wanem, em i ting olsem, ‘Nogut ol pikinini bilong mi i bin tok nogut long God long tingting bilong ol.’ ” (Jop 1:5) Olsem na long ai bilong Jehova, man i tingting strong long mekim wanpela samting i no stret, i olsem em i mekim pinis sin.—Skelim wantaim Kisim Bek 20:17.
Rot Tru Bilong Bihainim Tingting Bilong Yu
Baibel i save strongim olgeta wan wan Kristen long “kalabusim olgeta tingting bilong ol . . . bilong mekim tingting bilong ol i bihainim laik bilong Krais.” (2 Korin 10:5) Dispela i no save kamap taim ol bikman bilong lotu i putim sampela tambu long ol, nogat; em i kamap taim Kristen i bosim tingting bilong em yet, na em i laikim tru Jehova na save gut long em na ol lo bilong em. Taim Kristen i mekim olsem, em i stap fri tru long bihainim tingting bilong em yet—lo bilong God tasol bai bosim tingting bilong em. Na Kristen bai amamas long mekim olsem, long wanem, em i save i no long pasin tasol em i amamasim Jehova, nogat; long tingting tu.
[Piksa Kredit Lain long pes 14]
From the book Bildersaal deutscher Geschichte