Amamas Bilong Ol Man i Painim Pinis Tok i Tru
WANPELA man bilong Finlan i painim pinis buk The Divine Plan of the Ages long haus, long liklik rum antap. Em i kirap stret long kaunim. I no longtaim na em i tokim em yet, ‘Dispela em tok i tru; em tok i tru.’ Em i lusim rum i kam daun, na em i tokim meri bilong em, “Mi painim pinis lotu i tru.”
Em i painim pinis tok i tru long narapela kain rot, tasol amamas bilong em i wankain olsem i bin painim planti Witnes Bilong Jehova. Olgeta inap stori long yu long amamas ol i bin kisim taim ol i painim pinis tok i tru. Ol stori hia i kamapim klia dispela samting.
Ol Tok i Tru Bilong Baibel i Kamapim Amamas
Margarita Königer i go bikpela long Munik, long Jemani, long taim bilong Namba 2 Pait. Planti taim em i lukim ol haus em bom i bagarapim na ol i paia. Bikbrata bilong em i bagarap long pait. Em i save go long lotu Katolik na em i harim ol pris i beten askim God long helpim ol soldia bilong Jemani, na bikman Hitler. Pait i pinis na em i go skul long wanpela bikpela skul long Amerika, em sampela kantri i save helpim ol sumatin long kisim gutpela skul long narapela kantri. Long Amerika, ol manmeri i mekim gut long em na em i tingting, ‘Ol manmeri i laik sindaun gut wantaim, olsem na wanem samting i kirapim ol long birua birua long taim bilong pait?’ Taim em i go bek long Munik, em i bungim ol Witnes Bilong Jehova na ol i lainim em long Baibel, na long dispela rot em i kisim save long bekim bilong askim bilong em. Em i tok: “Ol i opim Baibel na soim mi, ol spirit nogut i as bilong dispela . . . Baibel i tok ol i ‘bosim graun,’ na i tok, Satan i ‘giamanim olgeta manmeri bilong graun.’ . . . Pasin bilong ol lain manmeri long givim baksait long God na mekim ol pasin nogut tru i kamapim klia olsem dispela tok i stret na i bekim gut askim bilong mi!”—Efesus 6:12; KTH 12:9.
Margarita i stori moa olsem: “Mi amamas tru long kisim save long samting God i kamapim bilong stretim ol hevi bilong graun. I no long rot bilong sampela tingting o gavman ol saveman bilong graun i kamapim. Nogat. Baibel i tok, nupela gavman bilong heven bai kirap bosim graun. . . . Krais Jisas i lainim ol disaipel long beten olsem, ‘Kingdom bilong yu i mas i kam.’ Mi kisim save olsem dispela Kingdom em i wanpela gavman tru, na long rot bilong en tasol bai gutaim tru i kamap long olgeta hap bilong graun.” Inap 30 yia pinis Margarita i bin mekim wok misineri long 5-pela kantri long Afrika—inap 19 yia nau em i stap long kantri Bekina Faso na autim tok i tru long ol gutpela man bilong Wagadugu.
Stori bilong Margarita i no narapela kain. Planti manmeri i gat tingting wankain olsem em long taim ol i kisim save olsem ol pris pasto bilong olgeta lain insait long pait ol i save beten askim God long helpim lain bilong ol yet long winim pait. Ol man i gat stretpela tingting i save tok bilong Baibel i stret, em Baibel i tok God i no helpim liklik ol pait bilong ol man, na ol dispela pait i save kamap, long wanem, “dispela graun olgeta em i stap aninit long strong bilong Satan.” Ol dispela man bilong painim tok i tru ol i kisim save olsem ol Kristen tru “i no bilong dispela graun” na ol i no save insait long ol pait o wok politik bilong en. Ol i lukim ol Witnes Bilong Jehova i mekim olsem, na ol i bilip olsem ol i painim pinis tok i tru. Bilip na amamas bilong ol i wok long kamap strong taim ol i kisim sampela save moa long i gat wanem as na God i larim pasin nogut i stap, na klostu nau bai em i kamapim gutaim na stretpela pasin long graun long rot bilong Kingdom bilong em.—1 Jon 5:19; Jon 17:16; Matyu 6:9, 10.
Ol Lo Tru Bilong Baibel i Kamapim Amamas
Daniel Rosero bilong Ekwado i pilim olsem i no gat as bilong i stap bilong yumi, olsem na em i kirap long dring. Lotu bilong em i lainim em olsem wanpela samting tasol bai painim em: Em bai i dai na i go long bikpaia. Em i tingting olsem: “Mi bai go long paia, olsem na mi ken dring!” Em i no save lukautim meri na ol 7-pela pikinini bilong em, na em i save pait oltaim wantaim meri bilong em, Delia. Bikpela senis i kamap taim ol Witnes Bilong Jehova i kam long haus bilong em long wanpela Sande long moningtaim na em i kirap long lainim tok bilong Baibel. Namba wan taim Daniel i go long wanpela kibung sekit bilong ol Witnes Bilong Jehova, em i save em i painim pinis tok i tru. Em i tok: “Mi kirap nogut long ol i stretim gut wok. Planti tru ol i kam bung, tasol ol i sindaun gut wantaim. Yu inap pilim olsem narapela i laikim tru narapela. No gat wanpela i smok. No gat wanpela i mekim tok doti. . . . Mi tingting olsem, ‘Dispela em tok i tru!’ Mi no pret long i dai o pret long las de bilong dispela graun na bel bilong mi i kirap. Nogat. Mi pilim tru stretpela klinpela pasin bilong dispela lain.”
Famili Rosero olgeta i kamap Witnes Bilong Jehova. Ol i wok long bihainim ol lo bilong Baibel na ol i pas gut wantaim na sindaun bilong ol i kamap gutpela. Delia Rosero i tok: “Tok i tru bilong Baibel i mekim na ol dispela gutpela samting i painim mi. Sapos mipela i no save long Baibel, nau bai ol pikinini bilong mi i stap nogut tru. Tasol olgeta 7-pela i baptais pinis na i stap gutpela. Tok i tru i mekim na mi gat nupela sindaun olgeta, na nupela amamas.”
Stori bilong famili Rosero i no narapela kain. Planti famili long nau i gat olkain hevi olsem. Wanpela as bilong dispela em olsem: Ol man i no save bihainim ol lo bilong Baibel olsem bipo. Planti lotu tu i mekim olsem, long wanem, ol i ting i gutpela ol i larim ol man i mekim pasin ol i laikim o ol i ting nau em i narapela kain taim na ol tambu bilong bipo i no stret long nau. Olsem na famili Rosero wantaim ol narapela man i paul na ol i no save long gutpela rot Baibel i makim. Tasol taim ol dispela man bilong pasin daun i kisim save long lo bilong God long stretpela pasin na famili, kwiktaim ol i kirap long bihainim. Stori bilong ol i soim yumi ol gutpela samting i kamap long dispela rot.
Wok Long Kisim Pasin Bilong Amamas
Tasol yu ting i olsem ol Kristen i save amamas nating oltaim? Nogat, a? Hevi bilong ol man, olsem no gat wok, na sik, na dai, ol dispela hevi i save painim ol Kristen tu. Na oltaim ol Kristen i mas wok strong long daunim ol laik nogut na ol pasin kranki bilong ol yet. Stori bilong Baibel i tok, Lot “i lukim ol kain kain pasin pamuk samting bilong ol dispela man nogut [bilong Sodom] na em i bel hevi tru.” Ol gutpela Kristen long nau i no inap abrusim dispela kain bel hevi taim ol i lukim ol pasin nogut i pulap long graun.—2 Pita 2:7, 8.
Tasol ol manmeri i painim pinis tok i tru, dispela i helpim ol. Olsem: Taim bilipman i hevi long man i dai pinis, em i no “sori tumas, olsem ol arapela manmeri i no bilip long God na i no wetim taim bilong kirap bek.” I no olsem bel bilong em i bagarap olgeta na bel hevi bilong em i no inap pinis. Nogat. Na i wankain tu long ol narapela hevi. Ol man i painim pinis tok i tru ol i save, ol hevi bilong nau i bilong liklik taim tasol. Bilip i helpim ol long karim ol hevi. Na ol i save bihainim stretpela pasin na dispela tu i helpim ol.—1 Tesalonaika 4:13.
Pol i tokim ol Kristen: “Oltaim yupela i mas amamas long Bikpela. Mi tok gen, yupela i mas amamas.” (Filipai 4:4) Dispela i makim olsem i gat rot na yumi olgeta inap i stap amamas, tasol i gat sampela samting inap pasim rot bilong yumi na bai yumi no amamas. Olsem: Sapos yumi tingting planti long ol hevi bilong graun, yumi no inap i stap amamas. Na Baibel i tok pasin bilong amamas em samting yumi mas wok long kisim, em wanpela gutpela pasin spirit bilong God i kamapim. (Galesia 5:22) Sapos yu wok oltaim long kisim sampela save moa long tok i tru na tingim ol gutpela blesing bilong spirit yu bin kisim long dispela rot na yu kisim yet, amamas bilong yu i no ken lus. Em bai kamap strong moa taim yumi kam klostu long taim God bai “mekim drai wara” i stap long ai bilong ol manmeri, na ol bai ‘i no i dai moa, o bel hevi moa, o kisim pen gen.’—KTH 21:4.
[Ol Piksa long pes 8]
Planti ol i pilim tru amamas na pasin bilong stretim gut wok ol i lukim long ol kibung bilong ol Witnes Bilong Jehova