Baibel i Tok Wanem?
Yu Ting Satan i Gat Asua Long Ol Sin Bilong Yumi?
NAMBA WAN sin i bin kamap long graun, ol i bin putim asua bilong en i go long Satan. Iv i tok: “Snek i grisim mi na mi kaikai pikinini bilong dispela diwai.” (Stat 3:13) Kirap long dispela taim i kam inap nau, ‘dispela snek bilong bipo yet, ol i kolim em Satan,’ em i wok yet long mekim nogut long ol manmeri na ‘pasim tingting’ bilong ol na “giamanim olgeta manmeri bilong graun.” (KTH 12:9; 2 Korin 4:4) I no gat wanpela man em inap abrusim ol hevi Satan i save putim long yumi man. Tasol olsem wanem? Dispela i makim olsem yumi no inap sakim em? Na olgeta taim yumi mekim sin, yu ting em asua bilong em?
Baibel i tok Satan i giamanim Iv. (1 Timoti 2:14) Em i giamanim Iv na em i ting, sapos em i brukim lo bilong God, em inap kisim wankain save olsem God na bosim em yet. (Stat 3:4, 5) Dispela tingting kranki i mekim na Iv i mekim sin. Tasol God i tok, em asua bilong Iv yet, na God i kolim strafe bilong em olsem em i mas i dai. Bilong wanem? Long wanem, maski Satan i tok giaman, Iv i save gut long lo bilong God. Satan i no subim Iv strong long sakim tok bilong God, nogat; Iv i bosim pasin bilong em yet, na em inap tru long sakim Satan.
Sakim Satan
Yumi ol man inap sakim Satan. Efesus 6:12 i tok, “yumi pait long olgeta spirit nogut i stap antap.” Em nau, God i laik bai yumi wok strong long sakim Satan. Tasol olsem wanem wanpela man bilong dispela graun em inap sakim bikpela strong bilong Satan na ol spirit nogut bilong em? Olsem wanem? God i laik bai yumi insait long wanpela pait yumi no inap tru long winim? Nogat, long wanem, God i no tokim yumi long sakim Satan long strong bilong yumi yet. Jehova i save helpim yumi long kain kain rot inap long yumi ken sakim ol samting Satan i laik grisim yumi long en na yumi winim pait. Baibel i tokim yumi long Satan em i husat, na em i wok olsem wanem, na olsem wanem yumi ken lukautim yumi yet na bai em i no ken bagarapim yumi.—Jon 8:44; 2 Korin 2:11; 11:14.
Rot Bilong “Sakim Satan”
Baibel i tokaut long tupela gutpela rot bilong sakim Satan. Olsem: “Yupela i mas daunim yupela yet na i stap aninit long God. Yupela i mas sakim Satan, na em bai i lusim yupela na ranawe.” (Jems 4:7) Namba wan samting yumi mas mekim bilong stap aninit long God, em yumi mas bihainim ol lo bilong em. Sapos oltaim yumi tingim God olsem em i stap tru, na yumi tingim gutpela pasin bilong em, na bikpela strong na wok bos bilong em, na ol gutpela lo bilong em, dispela bai givim strong long yumi bilong sakim Satan. Na pasin bilong beten oltaim long God, dispela tu i bikpela samting.—Efesus 6:18.
Tingim taim Satan i traim Jisas. Jisas i tingim na kolim sampela lo bilong God, na dispela i helpim Jisas long sakim Satan. Satan i no inap pulim Jisas long mekim sin, olsem na Satan i lusim em. Bihain long dispela traim, Jehova i strongim Jisas moa long rot bilong ol ensel. (Matyu 4:1-11) Olsem na Jisas inap kirapim ol disaipel bilong em long askim God long ‘tekewe ol long man nogut.’—Matyu 6:13.
Taim God i kisim bek yumi long dispela man nogut, dispela i no makim olsem em i banisim yumi, nogat. Em i tokim yumi long bihainim ol pasin bilong em, olsem tok i tru, stretpela pasin, bel isi, na bilip. Dispela ol pasin i olsem “klos pait” bilong helpim yumi long “sanap strong na sakim olgeta kain pasin bilong trik na giaman Satan i save hait na mekim.” (Efesus 6:11, 13-18) Em nau, long strong bilong God yumi inap winim ol traim bilong Satan.
Jems 4:7 i tokaut long namba 2 rot, olsem: Yumi mas “sakim Satan.” Bilong mekim olsem yumi mas strong long ranawe long ol samting nogut bilong em, em inap bagarapim yumi. Yumi mas wok long abrusim strong bilong em i save giamanim man, na sakim tingting nogut bilong planti man bilong dispela graun em ol i tingting tumas long mani kago na ol i ting pasin pamuk i no gat rong long en. Kain pasin olsem bilong sakim Satan, na pasin bilong givim bel long mekim olgeta samting God i save laikim, dispela i bikpela samting bilong helpim yumi long mekim pait long Satan. Tasol olsem wanem? Satan i as bilong olgeta sin?
Pait Insait Long Bel
Wanpela man bilong raitim Baibel, em Jems, em i tok: “Bel bilong yumi olgeta wan wan i save kirap na pulim yumi. Dispela laik nogut bilong yumi yet i save grisim yumi na giamanim yumi, bilong kirapim yumi long mekim sin. Orait na dispela pasin bilong bel i kirap, em i olsem meri i kisim bel, na bihain em i save kamapim sin.” (Jems 1:14, 15) Sori tru, yumi no inap daunim olgeta laik na tingting nogut em sin i kamapim long skin bilong yumi. (Rom 5:12) Baibel i tok: “I no gat wanpela stretpela man i save mekim gutpela pasin oltaim. Nogat.”—Saveman 7:20.
Tasol dispela i no makim olsem yumi no inap abrusim sampela sin, nogat. Sampela taim yumi makim rot nogut yumi laik bihainim, olsem na yumi putim traim long yumi yet. Olsem na maski as bilong wanpela laik nogut em sin i stap long skin bilong yumi o em i samting Satan i bin kamapim, orait yumi ken larim dispela laik nogut i stap long bel bilong yumi o yumi ken sakim—em samting bilong yumi yet. Olsem na aposel Pol i tok: “Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu.”—Galesia 6:7.
No Ken Putim Asua i Go Long Narapela
Sampela taim i hatwok long ol man i luksave long ol pasin kranki bilong ol yet, na long ol samting ol i no mekim stret—em ol sin bilong ol. (Song 36:2) Taim yumi save God i no ting yumi mas stap olsem man i stret olgeta long nau, dispela em inap helpim yumi na yumi no putim asua bilong sin bilong yumi i go long narapela. Man bilong raitim Song, em Devit, em i tok: “Yumi inap kisim pe nogut bilong sin bilong yumi, tasol em i no save givim dispela pe nogut long yumi. Yumi bin mekim planti pasin nogut, na em inap bekim bikpela hevi long yumi, tasol em i no save mekim olsem.” (Song 103:10) Tasol maski God i lusim sin bilong yumi, em i laik bai yumi pait strong long daunim ol laik nogut bilong skin, na bosim gut skin bilong yumi na bai yumi inap sakim ol samting Satan i mekim bilong pulim yumi long mekim sin.—1 Korin 9:27.
Yumi mas tingim dispela samting: God i save Satan em inap paulim pasin bilong yumi na em i gat bikpela asua long sin i stap long skin bilong olgeta man, tasol dispela i no makim olsem yumi no gat asua long ol samting nogut yumi mekim, nogat. Olsem na Rom 14:12 i tok: “Yumi olgeta wan wan bai yumi mas tokim God long as bilong olgeta pasin yumi bin mekim.”
Tasol sapos yumi “givim baksait tru long pasin nogut” na “pas tru long gutpela pasin,” yumi inap winim ol pasin nogut. (Rom 12:9, 21) Namba wan meri, Iv, em i no bin mekim olsem, na em i kisim strafe long pasin bikhet bilong em. Em inap sakim Satan na bihainim tok bilong God. (Stat 3:16) Tasol God i no givim baksait long samting Satan i bin mekim bilong giamanim Iv. God i demim Satan na makim em bilong kisim bagarap long bihain. (Stat 3:14, 15; Rom 16:20; Hibru 2:14) Klostu nau bai yumi no gat hatwok moa long sakim ol pasin nogut bilong Satan long pulim yumi.—KTH 20:1-3, 10.
[Piksa Kredit Lain long pes 24]
Erich Lessing/Art Resource, NY