Krais Bai Kam—Yu Ting Em Samting Yumi Mas Pret Long En?
TAIM Jisas Krais i kam, yu ting em bai wanem kain taim? Yu ting em wanpela taim we hevi, bagarap, na strafe bai painim ol man? O yu ting em wanpela taim we ol hevi bilong yumi bai pinis? Yu ting yumi mas pret long dispela taim bilong Krais i kam? O yu ting em samting yumi ken amamas long wetim i kamap?
Baibel i stori long Krais i kam, olsem: “Lukim. Em i stap namel long ol klaut na i kam, na olgeta man bai i lukim em long ai bilong ol yet. . . . Olgeta lain manmeri bilong graun bai i tingting long em, na ol bai i krai sori moa yet.” (KTH 1:7) Dispela ves i stori long Krais i kam, em i makim wanpela taim long bihain we Krais bai kam bilong givim gutpela pe long ol stretpela man na strafe long ol man nogut.
Aposel Jon i amamas long wetim Krais i kam, em i no pret long dispela, nogat. Taim em i harim pinis ol tok long Krais bai kam na ol samting dispela bai mekim long graun, Jon i beten strong olsem: “Bikpela Jisas, yu kam.” (KTH 22:20) Tasol bilong wanem “olgeta lain manmeri bilong graun . . . bai i krai sori moa yet”? Olsem wanem “olgeta man bai i lukim em long ai bilong ol yet”? Taim Krais i kam, em bai mekim wanem? Pasin bilong bilip long Krais bai kam, dispela inap helpim yumi olsem wanem long nau? Stori i kamap bihain long dispela bai bekim ol dispela askim.