Sapta 25
Yu Laikim Dispela Graun Bilong Seten o Nupela Taim God Bai Kamapim?
1. Wanem samting bai kamapim bel bilong yu, yu laikim nupela taim God bai kamapim?
YU LAIKIM stretpela pasin na nupela taim God bai kamapim na yu wet long en? Yu laik bai dispela graun bilong Seten i ken pinis? Ating bai yu tok, ‘Yes, mi laikim olsem.’ Tasol sapos yumi tok tasol long maus na yumi no mekim wanpela samting, yu ting em tasol inap? Sapos yu bilip long dispela nupela taim bilong God, orait ol samting yu mekim bai kamapim dispela bilip bilong yu.—Matyu 7:21-23; 15:7, 8.
2. (a) I gat wanem tupela bos i stap? (b) Yumi mekim wanem na yumi stap wokboi bilong wanpela man?
2 I gat tupela bos i stap. Yu inap mekim wok bilong Jehova, o wok bilong Seten. Yu no inap mekim wok bilong tupela wantaim. Wanpela lo i stap long Baibel em i kamapim gut dispela samting, em i tok: “Sapos yupela i givim bodi bilong yupela long wanpela man na bihainim tok bilong em, orait bai yupela i stap wokboi bilong em.” (Rom 6:16) Orait, yu save bihainim tok bilong husat? Yu save mekim laik bilong husat? Sapos yu bihainim pasin nogut bilong dispela graun, orait yu no mekim wok bilong God Jehova.
WANEM DISPELA GRAUN BILONG SETEN?
3. (a) Husat i hetman bilong dispela graun, olsem Baibel i tok? (b) Olsem na ol disaipel bilong Krais i mas mekim wanem?
3 Jisas i kolim Seten olsem “hetman bilong dispela graun” na em i tok, ol disaipel bilong em “ol i no bilong dispela graun.” (Jon 12:31; 17:16; 15:18, 19) Yumi lukim dispela tok na yumi save, ol disaipel i mas klia long “dispela graun” Seten i bosim. Orait, yumi laik save, “dispela graun” i makim wanem samting?
4. (a) Sampela taim Baibel i kolim dispela tok “graun” bilong makim wanem samting? (b) Tasol wanem “dispela graun” ol Kristen i mas klia long en?
4 Sampela taim Baibel i kolim dispela tok “graun” bilong makim olgeta manmeri bilong graun. God i salim Pikinini bilong em i kam bilong baim bek ol dispela manmeri. (Jon 3:16) Tasol Seten i bosim planti manmeri bilong graun na ol i birua long God. (1 Jon 5:19) Ol dispela manmeri Seten i bosim ol na ol i no insait long lain bilong God ol i olsem dispela graun bilong Seten. Jisas i tok: “Mi beten bilong helpim ol [disaipel]. Mi no beten bilong helpim ol manmeri bilong graun,” em ol manmeri Seten i bosim ol. Olsem na “dispela graun” ol Kristen tru i mas klia long en em ol lain manmeri Seten i bosim ol.—Jon 17:9; Jems 1:27.
5. Wanem wanpela bikpela hap bilong dispela graun bilong Seten? Baibel i tok piksa long en olsem wanem?
5 Dispela graun bilong Seten—em ol manmeri Seten i bosim ol—i gat planti hap bilong en i wok wantaim. Wanpela bikpela hap em ol lotu giaman. Baibel i tok piksa long ol lotu giaman olsem wanpela “pamukmeri” o “Bikpela taun Babilon.” Dispela “meri” em i “stap olsem het bilong olgeta king bilong graun.” (Revelesen 17:1, 5, 18) Tasol olsem wanem yumi ken save, dispela “meri” o Bikpela Babilon em i makim ol lotu ol i bosim ol manmeri bilong dispela graun?
6, 7. (a) Olsem wanem yumi save, Bikpela Babilon em ol lotu ol i bosim ol manmeri bilong dispela graun? (b) Ol lotu giaman i bin mekim wanem long ol gavman?
6 Baibel i tok “ol king bilong graun” i mekim “pasin pamuk” wantaim dispela “meri,” olsem na em i no makim ol gavman bilong dispela graun. Na “ol man i wok bisnis” ol i “sanap longwe long em, na ol i krai” taim em i bagarap. Olsem na yumi save dispela “meri” i no makim ol bikpela kampani na bisnis ol i bosim ol manmeri bilong dispela graun. Nogat. (Revelesen 17:2; 18:15) Em i makim tru ol lotu ol i bosim ol manmeri bilong dispela graun. Baibel i tok, dispela “meri” o Bikpela Babilon i bin “giamanim olgeta lain man long kain kain posin” bilong en.—Revelesen 18:23.
7 Na sapos yumi tingim ol samting Bikpela Babilon em i mekim long wanpela “wel abus,” bai yumi save em i makim ol dispela lotu ol i bosim ol manmeri bilong dispela graun. Baibel i save tok piksa long ol wel abus bilong makim ol gavman. (Danyel 8:20, 21) Baibel i stori long Bikpela Babilon “i sindaun antap long retpela wel abus. Dispela wel abus em i gat . . . 7-pela het na 10-pela kom.” Em i laik bosim dispela “wel abus” o gavman bilong graun. (Revelesen 17:3) Planti man i save pinis, ol lotu i save insait long ol wok politik na ol i laik bosim ol gavman. Tru tumas dispela “pamukmeri” i “stap olsem het bilong olgeta king bilong graun.”—Revelesen 17:18.
8. Wanem narapela bikpela hap bilong dispela graun bilong Seten? Baibel i tok piksa long ol olsem wanem?
8 Ol dispela gavman politik tu i hap bilong dispela graun bilong Seten, na Baibel i save tok piksa long ol olsem ol wel abus. (Danyel 7:1-8, 17,23) Seten i givim strong long ol dispela gavman, olsem aposel Jon i tok: “Mi lukim wanpela wel abus i kamap long solwara. Em i gat 10-pela kom na 7-pela het. . . . Na dispela snek i givim strong bilong en long wel abus.” (Revelesen 13:1, 2; 12:9) Na yumi save ol dispela kingdom o gavman i hap bilong dispela graun bilong Seten, long wanem taim Seten i traim Jisas em i tok long givim ol dispela kingdom long Jisas. Seten i no inap mekim olsem sapos em i no bos bilong ol.—Matyu 4:8, 9.
9. (a) Revelesen 18:11 i stori olsem wanem long narapela hap bilong dispela graun bilong Seten? (b) Dispela lain ol i mekim wanem na kamapim wanem kain pasin na yumi save, ol i lain bilong Seten?
9 Narapela bikpela hap bilong dispela graun bilong Seten em ol bikpela kampani na bisnis i pulim mani long ol man na putim hevi long ol. Baibel i kolim ol olsem “ol man bilong graun i save wok bisnis.” (Revelesen 18:11) Dispela lain bilong wok bisnis ol i grisim ol man long laikim tumas ol samting ol i wokim, maski ol i no sot long en o i no inap helpim ol tu. Na ol i bungim planti kaikai i stap nating long ol bakstua na planti milion manmeri ol i hangre na ol i dai, long wanem ol i no gat mani bilong baim dispela kaikai. Na ol i wokim ol samting nogut nogut bilong pait na baim i go long ol man bilong kisim win mani. Dispela lain bilong Seten ol i wok bisnis, na ol lotu giaman na gavman tu, ol i kamapim pasin nogut na ol pait nogut, na ol i kirapim ol man long tingim skin bilong ol yet tasol.
10, 11. (a) Wanem wanpela mak moa bilong dispela graun bilong Seten? (b) Wanem sampela tok bilong Baibel i tok, yumi no ken insait long dispela samting?
10 Ol dispela lain manmeri Seten i bosim ol, pasin bilong ol i nogut olgeta. Ol i birua long ol stretpela lo bilong God, na pasin pamuk na kain kain pasin sem i pulap long dispela graun. Olsem na narapela mak moa bilong dispela graun bilong Seten em pasin nogut bilong en. Aposel Pol na Pita i tingim dispela samting na tupela i tokim ol Kristen ol i mas klia long pasin nogut bilong ol manmeri bilong dispela graun.—Efesas 2:1-3; 4:17-19; 1 Pita 4:3,4.
11 Aposel Jon tu i tok strong long ol Kristen i mas was gut, nogut ol i bihainim ol laik nogut na pasin nogut bilong dispela graun. Em i tok: “Yupela i no ken laikim pasin bilong graun, na olgeta samting bilong graun. Sapos wanpela man i laikim pasin bilong graun, orait em i no save laikim tru Papa. Yumi save, olgeta pasin bilong man bilong graun, em pasin bilong bel i kirap na aigris na bikhet, ol dispela i no kam long Papa. Nogat. Ol i kamap long pasin bilong graun.” (1 Jon 2:15, 16) Na disaipel Jems i tok: “Man i laikim pasin bilong graun, em i mekim pasin birua long God.”—Jems 4:4.
KLIA LONG PASIN BILONG DISPELA GRAUN
12, 13. (a) Jisas i tok wanem na yumi save ol Kristen i mas i stap long dispela graun? (b) Olsem wanem ol inap i stap long dispela graun, tasol ol i no bilong dispela graun?
12 Taim dispela graun bilong Seten i stap yet, ol Kristen i mas i stap long en. Jisas i beten tokim Papa: “Mi no askim yu long tekewe ol long dispela graun.” Tasol bihain gen em i tok, ol disaipel “i no bilong dispela graun.” (Jon 17:15, 16) Orait, olsem wanem ol Kristen inap i stap long dispela graun bilong Seten, tasol ol i no bilong dispela graun?
13 Yu stap namel long ol manmeri ol i pamuk, na mangalim planti samting, na mekim ol narapela pasin nogut. Ating yu save wok wantaim ol o skul wantaim ol o mekim narapela samting olsem wantaim ol. (1 Korin 5:9, 10) Na yu mas laikim tumas ol, olsem God i mekim. (Jon 3:16) Tasol Kristen tru em i no save laikim pasin nogut bilong ol. Em i no save bihainim tingting bilong ol, em i no save mekim ol samting ol i mekim, em i no wok long kisim ol samting ol i wok long kisim. Em i no save insait long lotu giaman o wok politik bilong ol. Tru, ating em i mas wok mani long wanpela kampani o wok bisnis bilong ol, tasol em i no save mekim sampela pasin i no stret olsem ol yet i save mekim long bisnis bilong ol, na em i no tingting tasol long kisim ol samting bilong skin. Nogat. Em i laikim nupela taim God bai kamapim, olsem na em i no save poroman wantaim ol manmeri i laikim pasin nogut bilong dispela graun, na em i klia long ol. (1 Korin 15:33; Sam 1:1; 26:3-6, 9, 10) Olsem na Kristen tru em i stap long dispela graun bilong Seten, tasol em i no bilong dispela graun.
14. Sapos yu laikim nupela taim God bai kamapim, orait bai yu bihainim wanem tok bilong Baibel?
14 Olsem wanem long yu yet? Yu laik insait long dispela graun bilong Seten? O yu laikim nupela taim God bai kamapim? Sapos yu laikim nupela taim God bai kamapim, orait, yu mas klia long dispela graun wantaim lotu giaman bilong en. Yu mas bihainim tok bilong Baibel i tok: “Ol manmeri bilong mi, yupela i mas lusim dispela ples [Bikpela taun Babilon].” (Revelesen 18:4) Bilong lusim Bikpela Babilon, em olgeta lotu giaman, yu mas lusim ol lotu giaman bipo yu insait long en. Tasol yu mas mekim wanpela samting moa tu. Yu mas klia olgeta long ol bikpela de bilong ol lotu giaman bilong dispela graun.—2 Korin 6:14-18.
15. (a) Jisas i no tok ol Kristen i mas tingim de mama i karim em, em i tok ol i mas tingim wanem de? (b) Olsem wanem yumi save, mama i no karim Jisas long taim bilong kol, olsem long Desemba? (c) Bilong wanem ol misin i makim Desemba 25 olsem de bilong amamas long mama i karim Jisas?
15 Krismas em i wanpela bikpela de bilong lotu long nau. Tasol ol Kristen bilong pastaim i no save mekim Krismas. Jisas i tokim lain bilong em ol i mas tingim de em i dai, em i no tokim ol long tingim de mama i karim em. (1 Korin 11:24-26) Na mama i no karim em long Desemba 25 tu. Long wanem Baibel i tok, taim mama i karim em ol wasman bilong sipsip i stap ausait yet long taun na ol i was long ol sipsip bilong ol long nait. Tasol long taim bilong kol na ren olsem long Desemba, ol i no ken i stap ausait. (Luk 2:8-12) Ol misin i makim Desemba 25 olsem de bilong amamas long mama i karim Jisas, long wanem, olsem wanpela bikpela buk i tok, dispela de em i wanpela bikpela de bilong ol Rom long bipo. Ol i save wokim bikpela kaikai na amamas long san.—The World Book Encyclopædia.
16. (a) Wanem narapela bikpela de bilong lotu tu ol haiden i as bilong en? (b) Bilong wanem ol Kristen tru i no save insait long ol samting bilong Krismas na Ista?
16 Ista o Paska tu em i bikpela de holi bilong ol lotu. Tasol ol Kristen bilong pastaim i no gat Ista, long wanem ol haiden i as bilong dispela de tu. Wanpela bikpela buk i tok: “Hap bilong Nupela Testamen i no stori long ol Kristen i tingim Ista.” (The Encyclopædia Britannica) Tasol sapos ol haiden i as bilong ol samting ol manmeri i mekim long taim bilong Krismas na Ista na i no samting bilong ol Kristen, em bikpela samting o nogat? Pol i toksave olsem: Yumi no ken bungim samting i tru wantaim samting i giaman, maski em i liklik samting tasol. Em i tok: “Liklik yis tasol em inap long mekim olgeta bret i solap.” (Galesia 5:9) Em i tokim sampela Kristen bilong pastaim, i no stret ol i lukim ol bikpela de lo bilong Moses i makim na God i pinisim pinis. (Galesia 4:10, 11) Olsem na ol Kristen tru long nau ol i no ken insait liklik long ol samting bilong ol dispela bikpela de. Long wanem, God i no tokim yumi long mekim, na tu lotu giaman i as bilong en!
17. (a) Ol bikpela de bilong litimapim man i gat nem o bilong litimapim ples, bilong wanem ol i no stret? (b) Baibel i tok wanem na i makim pasin ol Kristen i mas bihainim long dispela samting?
17 Sampela bikpela de bilong dispela graun i bilong litimapim nem bilong wanpela bikpela man, o bilong litimapim ples o wanpela lain. Tasol Baibel i tok, yumi no ken litimapim nem bilong wanpela man bilong graun olsem ‘god’ bilong yumi, o givim bel long wanpela lain bilong dispela graun na ting ol inap mekim wok em God tasol inap mekim. (Aposel 10:25, 26; 12:21-23; Revelesen 19:10; Jeremaia 17:5-7) Olsem na ol dispela bikpela de i no stret wantaim laik bilong God, na ol Kristen tru i no save insait liklik long en.—Rom 12:2.
18. (a) Ol man i bin wokim wanem ol samting bilong litimapim o lotuim? (b) Tasol lo bilong God i tok wanem long dispela samting?
18 Ol man i bin wokim kain kain samting na tokim ol man long litimapim o lotuim. Sampela ol i wokim long ain o diwai. Sampela ol i wokim long laplap na ol i samapim o penim piksa long en, em piksa bilong wanpela samting bilong graun o bilong antap. Sampela taim wanpela lain i putim lo na ol i tok, olgeta man bilong ples ol i mas lotuim wanpela samting olsem. Tasol lo bilong God i tambuim dispela pasin. (Eksodas 20:4, 5; Matyu 4:10) Bipo, lain bilong God i mekim wanem long ol kain samting olsem?
19. (a) King bilong Babilon i tok olgeta manmeri i mas mekim wanem? (b) Ol Kristen i mas bihainim pasin bilong husat?
19 Bipo King Nebukatnesa bilong Babilon em i sanapim wanpela draipela piksa gol, olsem wanpela god giaman na em i tokim olgeta manmeri long brukim skru long en. Em i tok, ‘Man i no mekim olsem bai ol i tromoi em i go long bikpela paia.’ Baibel i tok, tripela yangpela man bilong lain Hibru, em Sadrak, na Misak, na Abednego, ol i no bihainim tok bilong king, long wanem ol i save ol i mas lotuim Jehova tasol. God i amamas long ol na em i kisim bek ol long paia. Na bihain Nebukatnesa i save ol dispela man i mekim wok bilong Jehova i no gat tingting long bagarapim Gavman, olsem na em i putim wanpela lo bilong lukautim ol na bai ol man i no ken pasim ol long lotuim God bilong ol. (Danyel 3:1-30) Ating yu amamas long tripela yangpela man ol i bihainim lo bilong God? Olsem wanem long yu? Bai yu bihainim olgeta lo bilong God na kamapim bel bilong yu, yu laikim tru nupela taim God bai kamapim?—Aposel 5:29.
20. Long wanem ol rot Seten i wok long pulim yumi long brukim lo bilong God i tambuim pamuk samting?
20 Tasol Seten i no laik bai yumi mekim wok bilong Jehova. Seten i laik bai yumi mekim wok bilong em. Olsem na em i strong long pulim yumi long bihainim em, long wanem em i save sapos yumi bihainim tok bilong wanpela man yumi stap wokboi bilong em. (Rom 6:16) Long kain kain rot, olsem long rot bilong video o televisen, o piksa wokabaut, sampela kain danis, ol buk na komik nogut, Seten i kirapim bel bilong ol man na pulim ol long mekim pasin pamuk na bagarapim marit. Em i giamanim ol manmeri na ol i ting ol dispela pasin i gutpela. Tasol God i tambuim. (Hibru 13:4; Efesas 5:3-5) Man i mekim kain pasin olsem em i kamapim bel bilong em, em i laikim dispela graun bilong Seten.
21. I gat wanem ol narapela pasin tu na sapos man i mekim, em i kamapim bel bilong em, em i laikim dispela graun bilong Seten?
21 I gat ol narapela pasin tu bilong dispela graun planti manmeri i save laikim, tasol God i tambuim. Wanpela em olsem: Pasin bilong spak. (1 Korin 6:9, 10) Na wanpela em pasin bilong kisim marasin olsem drak o buai bilong amamasim skin na pasin bilong smok tu. Ol dispela samting i save bagarapim skin na i no klinpela pasin. Sapos yumi kisim ol dispela samting yumi sakim tok bilong God em i tok: “Yumi mas rausim olgeta doti bilong bodi na bilong spirit, na i stap klin.” (2 Korin 7:1) Taim man i smok, ol manmeri i stap klostu long em ol i mas pulim dispela smok i go insait long nus bilong ol na i bagarapim skin bilong ol. Olsem na dispela man i smok em i brukim lo bilong God i tok, ol Kristen i mas sori long narapela man.—Matyu 22:39.
22. (a) Baibel i tok wanem long blut? (b) Kisim blut long haus sik o kaikai blut, olsem wanem dispela tupela samting i wankain tasol? (c) Yumi ken tok piksa olsem wanem na bai yumi save, ‘abrusim blut’ i olsem yumi no ken tru kisim blut?
22 Na wanpela pasin moa planti man long planti hap bilong graun ol i save mekim, em olsem: Ol i save kaikai blut. Taim ol i kilim wanpela animal bilong kaikai, ol i no rausim blut, o ol i kisim dispela blut na tanim wantaim kaikai. Tasol lo bilong God i tambuim pasin bilong kaikai blut. (Jenesis 9:3, 4; Levitikas 17:10) Orait, olsem wanem long kisim blut long haus sik? Ating sampela man bai tok, dispela i no olsem ol i “kaikai” blut. Tasol yumi save, sapos sikman i no inap kisim kaikai long maus, orait bai dokta i tok long givim wanpela kain wara long em olsem ol i save mekim taim ol i givim blut long wanpela man. Baibel i tok, yumi mas “abrusim . . . blut.” (Aposel 15:20, 29) Yumi ken tok piksa long dispela samting olsem: Sapos dokta i tokim yu, yu mas abrusim dring, yu ting em i tok yu no ken dring long maus, tasol yu ken sutim i go insait long rop bilong blut? Nogat, a? Olsem tasol taim Baibel i tok yumi mas ‘abrusim blut,’ i olsem yumi no ken tru kisim blut; yumi no ken kaikai o kisim long narapela rot.
23. (a) Orait, yu mas kirap mekim wanem? (b) Yu mas mekim wanem na bai yu kamapim bel bilong yu, yu tingting pinis long mekim wok bilong God?
23 Yu mas mekim ol samting bambai God i ken save, yu laikim nupela taim bilong em na yu no bilong dispela graun. Olsem na yu mas mekim wok bilong Jehova na bihainim laik bilong em. Nogut yu gat tupela tingting olsem sampela Isrel bilong bipo. (1 King 18:21) Long wanem, sapos yu no mekim wok bilong Jehova, orait yu mekim wok bilong Seten. Ating yu tok yu laikim nupela taim God bai kamapim, tasol olsem wanem long pasin bilong yu? Sapos yu laikim stretpela pasin na nupela taim bilong God, orait yu mas klia long olgeta pasin God i tambuim.
[Piksa long pes 209]
Jisas i tok, ol disaipel i no bilong “dispela graun.” Orait, wanem “dispela graun”?
[Ol Piksa long pes 211]
Baibel i tok piksa long ol lotu giaman olsem wanpela pamukmeri i dring longlong, na bikpela gavman em i sindaun antap long en i olsem wanpela wel abus
Ol manmeri Seten i bosim ol, ol i save mekim pasin i no stret. Ol bikpela wok bisnis tu i hap bilong dispela graun Seten i bosim
[Piksa long pes 213]
Taim mama i karim Jisas, ol wasman i stap ausait yet long nait wantaim ol sipsip, olsem na yumi save mama i no karim em long taim bilong kol long Desemba 25
[Piksa long pes 214]
Ol wokboi bilong God i no laik lotuim dispela god giaman king i sanapim. Sapos ol i tok yu mas lotuim wanpela samting olsem god giaman, bai yu mekim wanem?