OLSEM WANEM BAIBEL I NARAPELA KAIN? Ol savetok bilong bipo i no klia tumas na i no bin helpim ol man, na i wankain tu long pasin bilong ol man long nau long lukluk long ol sta bilong painim save. Ol man i save skelim ol samting i kamap long nau na ol i save tokaut long ol samting bai kamap bihain, tasol ol i no inap tokaut stret long olgeta wan wan samting bai kamap sampela handret yia bihain. Tasol ol tok profet bilong Baibel i kolim stret ol samting na olgeta tok bilong en i save kamap tru, na em i save “tok long ol samting bai i kamap, na bihain ol dispela samting i kamap tru.”—Aisaia 46:10.

EKSAMPEL: Long 550 B.C.E. samting, profet Daniel i lukim wanpela visen i tokaut olsem kwiktaim ol Grik bai daunim Midia-Persia. Na tu, em i tok profet olsem “taim strong bilong [king bilong Grik] i kamap bikpela tru,” wok king bilong em bai “bruk,” olsem bagarap. Husat bai kamap senis bilong em? Daniel i tok: “Kantri Grik bai i bruk na i kamap 4-pela nupela kantri. Tasol ol bai i no gat strong olsem bipo taim kantri i no bruk yet.”—Daniel 8:5-8, 20-22.

TOK BILONG OL SAVEMAN: Olsem 200 yia bihain long taim bilong Daniel, Aleksander i kamap king bilong Grik. Insait long 10-pela yia, Aleksander i daunim gavman Midia-Persia na skruim wok bos bilong Grik i go inap long wara Indus (nau em Pakistan). Tasol wantu em i dai taim em i gat 32 krismas tasol. Pait i kamap klostu long Ipsus long Esia Maina i mekim na ol hap em i bosim i bruk i go liklik liklik. Fopela jeneral em ol i bin winim dispela pait, ol i brukim gavman Grik i go long 4-pela hap na bosim wan wan hap. Tasol i no gat wanpela bilong ol i gat wankain bikpela strong olsem Aleksander.

YU GAT WANEM TINGTING? Yu ting i gat wanpela narapela buk em oltaim ol tok profet bilong en i save kamap tru? O yu ting Baibel i narapela kain?

OLSEM WANEM BAIBEL I NARAPELA KAIN? Planti taim ol buk bilong bipo i bin kamapim ol tok we i no stret na i no bin helpim ol man, na save bilong saiens long nau i kamapim klia olsem ol dispela tok i no tru. Long nau tu, ol man i mas stretim na raitim gen ol tok bilong ol buk na bai i stret wantaim ol nupela save. Tasol Baibel i tok olsem Man Bilong Wokim olgeta samting em i As bilong tok bilong en na dispela Tok “i save stap oltaim oltaim.”—1 Pita 1:25.

EKSAMPEL: Lo Bilong Moses i tok long ol Israel i mas wokim hul long graun na karamapim pekpek bilong ol “ausait long kem.” (Lo 23:12, 13) Sapos ol Israel i tatsim bodi bilong animal o man i dai pinis, ol i mas wasim han long wara. (Wok Pris 11:27, 28; Namba 19:14-16) Ol lepraman bilong bipo i save lusim ol narapela na i go stap ol yet inap long pris i glasim ol gut na luksave olsem sik bilong ol i pinis o nogat.—Wok Pris 13:1-8.

SAMTING SAIENS LONG NAU I KAMAPIM: Pasin bilong karamapim gut pekpek, wasim gut han, na putim ol sikman i stap longwe long ol narapela, dispela em ol gutpela rot tru bilong daunim sik. Sapos i no gat ol toilet samting i stap klostu, lain U.S. Centers for Disease Control and Prevention (CDC) i tok: “Go inap 30 mita longwe long hap i gat wara na wokim hul long graun, na karamapim pekpek bilong yupela.” Lain Wol Helt Oganaisesen i tok, sapos ol komiuniti i bihainim gut dispela pasin, ol inap helpim 36 pesen bilong ol manmeri long abrusim sik pekpek wara. Klostu 200 yia i go pinis, ol dokta i painimaut olsem ol yet i bin givim sik long planti man taim ol i no wasim han bihain long ol i holim bodi bilong ol daiman. Lain CDC i tok, pasin bilong wasim han em i “nambawan gutpela rot bilong pasim sik long kalap long ol narapela.” Olsem wanem long pasin bilong putim ol lepraman na ol narapela sikman i stap longwe long ol narapela? I no longtaim i go pinis, nius Saudi Medical Journal i tok: “Taim wanpela bikpela sik i stat long kamap, wanpela rot tasol bilong daunim dispela sik em long putim ol sikman i stap longwe long ol narapela.”

YU GAT WANEM TINGTING? Yu ting i gat narapela buk holi bilong bipo em ol tok bilong en i stret wantaim save bilong saiens long nau? O yu ting Baibel i narapela kain?

OLSEM WANEM BAIBEL I NARAPELA KAIN? Maski sampela buk bilong bipo ol i bilong wankain taim, planti taim ol tok bilong ol i no stret wantaim. Na tu, ol buk em narapela narapela man i raitim long narapela narapela taim na ples, ol tok bilong ol i no save stret wantaim. Tasol Baibel i tok wanpela Man tasol i bin kamapim ol tok i stap long olgeta 66 buk bilong en, olsem na olgeta tok bilong en i stret wantaim.—2 Timoti 3:16.

EKSAMPEL: Moses, em wanpela wasman bilong sipsip i bin stap long yia 1600 B.C.E., em i raitim tok long namba 1 buk bilong Baibel olsem wanpela pikinini bai kamap bilong kisim bek ol man. Bihain dispela buk i kamapim tok profet olsem dispela pikinini bai kamap long lain tumbuna bilong Abraham, Aisak, na Jekop. (Stat 3:15; 22:17, 18; 26:24; 28:14) Inap olsem 500 yia bihain, profet Natan i tokaut olsem dispela pikinini bai kamap long lain king bilong Devit. (2 Samuel 7:12) Wan tausen yia bihain long dispela, aposel Pol i tok olsem Jisas wantaim sampela disaipel bilong em bai stap olsem dispela pikinini bilong promis. (Rom 1:1-4; Galesia 3:16, 29) Klostu long yia 100 C.E., laspela buk bilong Baibel i tok profet olsem ol manmeri em ol i insait long lain husat bai stap olsem pikinini bilong promis, ol bai tokaut long Jisas i bin kam long graun na i kirap bek na i go long heven, na ol bai mekim wok king wantaim em inap 1,000 yia. Dispela pikinini bilong promis bai pinisim Satan na kisim bek ol manmeri.—Revelesen 12:17; 20:6-10.

TOK BILONG OL SAVEMAN BILONG BAIBEL: Bihain long Louis Gaussen i bin skelim gut 66 buk bilong Baibel, em i tok em i kirap nogut olsem “olgeta tok bilong dispela buk i stret wantaim, maski narapela narapela man i bin raitim insait long 1,500 yia, . . . olgeta i stori planti long wankain as tok, tasol ol dispela man yet i no kliagut long en, em as tok i stori long Pikinini Bilong God bai kisim bek ol man.”—Theopneusty—The Plenary Inspiration of the Holy Scriptures.

YU GAT WANEM TINGTING? Yu ting tok bilong wanpela buk em 40 narapela narapela man i bin raitim insait long 1,500 yia bai stret wantaim? O yu ting Baibel i narapela kain?