Planti man long olgeta hap bilong graun i tingim Baibel olsem wanpela gutpela buk tru. Maski i olsem, planti bilong ol i no save gut long ol tok bilong Baibel. Planti bilong ol dispela milion man i stap long Esia, na tu, long ol kantri we planti i gat Baibel bilong ol yet.

Tasol ating bai yu askim olsem, ‘Bilong wanem mi mas kliagut long tok bilong Baibel?’ Sapos yu kliagut long ol tok bilong Baibel, yu inap long mekim ol dispela samting:

• Stap belgut na amamas

• Karim hevi insait long famili

• Helpim yu long karim ol hevi

• Helpim yu long pas gut wantaim ol narapela

• Basetim gut mani

Tingim stori bilong Yoshiko long Japan. Em i laik save long tok bilong Baibel, olsem na em i kirap long ritim Baibel. Wanem gutpela samting i kamap long dispela? Em i tok: “Baibel i helpim mi long save long as bilong laip, na mi bilip na wet long ol gutpela samting bai kamap bihain. Nau mi stap amamas tru.” Amit em yumi stori pinis long en i kirap long skelim ol tok bilong Baibel. Em i tok: “Mi kirap nogut olsem Baibel i gat ol tok bilong helpim olgeta man.”

Ol tok bilong Baibel i bin helpim i stap bilong planti milion manmeri. I gutpela yu yet i skelim Baibel, na kisim save long olsem wanem ol tok bilong en i ken helpim yu.

Baibel em wanpela buk bilong bipo tru. Em i bin stap inap hamas yia olgeta? Ol man i kirap long raitim Baibel inap 3,500 yia i go pinis long hap bilong Midel Is. Klostu 1,000 yia bihain long dispela taim, lotu Buda i kamap long India. Na tu, long taim ol i kirap long raitim Baibel, lain Shang i bin stap king long Saina.—Lukim blok “Sampela Save Long Baibel.”

Bilong wanpela buk i ken helpim na stiaim ol man long mekim ol gutpela disisen, ol man i mas kliagut long ol tok bilong en, na tu, ol tok bilong dispela buk i mas stret long ol man i ritim. Baibel em kain buk olsem. Em inap tru long bekim ol bikpela askim bilong laip em ol man i gat long nau.

Olsem, ating yu gat askim,‘Yumi stap bilong mekim wanem?’ Ol man i painim bekim bilong dispela askim inap planti tausen yia, na ol i wok yet long mekim olsem. Tasol bekim bilong en i stap long Baibel long Buk Stat sapta 1 na 2. Baibel i stori olsem “bipo bipo tru,” em planti bilion yia i go pinis, God i bin wokim yunives, em ol galaksi, ol sta, na graun bilong yumi. (Stat 1:1) Na em i stori tu long olsem wanem God i redim graun bilong ol samting i gat laip i ken stap long en, hau ol animal, na gras na diwai samting i kamap, na hau ol manmeri i kamap. Na tu, Baibel i stori long as na God i wokim graun na yumi ol man.

OL I RAITIM BAIBEL BILONG OL MAN I KEN KLIAGUT

Baibel i givim ol gutpela skultok bilong helpim yumi long karim ol hevi bilong wan wan de. Ol skultok bilong Baibel i no hatwok long kliagut long en. I gat 2-pela risen na yumi tok olsem.

Namba 1, tok bilong Baibel i klia na i stret, olsem na ol man i amamas long ritim. Baibel i no yusim ol tok i hatwok long kliagut long en, na tu, em i kamapim ol tok em yumi save gut long en, na long dispela rot yumi inap long piksaim long tingting ol samting. Na Baibel i yusim ol tok yumi save long en bilong helpim yumi long kliagut long ol bikpela tok.

Olsem, planti taim Jisas i mekim tok piksa long ol samting ol man i save mekim long wan wan de bilong skulim gut ol manmeri na bai ol i pilim tru tok bilong en. Planti bilong ol dispela tok piksa i stap long Baibel long Matyu sapta 5 i go long sapta 7. Jisas i kamapim ol dispela tok piksa taim em i mekim Bikpela Tok Long Maunten. Wanpela saveman i tok: “Ol dispela stiatok i bilong helpim na stiaim wokabaut bilong yumi, na i no bilong kisim save tasol long en.” Yu inap ritim ol dispela sapta insait long 15 i go 20 minit samting, na bai yu luksave olsem ol tok bilong Jisas i no hatwok long kliagut long en na inap tru long helpim yu.

Namba 2, Baibel i stori long ol man wankain olsem yumi, ol hevi ol i karim, na ol gutpela samting i painim ol. Em i no wanpela buk i kamapim ol stori tumbuna na ol stori nating, nogat. Olsem buk The World Book Encyclopedia i tok, Baibel i stori long “ol man i gat biknem na ol man nating,” na tu, em i tokaut long “ol samting ol i tingting planti long en, ol hevi ol i karim, na ol gutpela samting i kamap long ol.” Yumi inap kisim skul long stori bilong ol dispela man na kliagut long ol samting i kamap long ol, na pilim tingting bilong ol.—Rom 15:4.

OLGETA MAN I GAT BAIBEL

Sapos yu laik kliagut long ol tok bilong wanpela buk, orait ol i mas raitim dispela buk long tokples bilong yu. Long nau, Baibel i stap long tokples yu save long en, maski yu stap long wanem kantri o yu bilong wanem lain. Yumi bai stori long wok bilong trensletim na prinim Baibel.

Trensletim Baibel. Long pastaim, ol man i bin raitim Baibel long tokples Hibru, Aram, na Grik. Dispela i mekim na ol man husat i save long ol dispela tokples, ol tasol inap long ritim Baibel. Bilong helpim ol man bilong ol narapela tokples long ritim Baibel, ol trensleta i givim bel tru long trensletim tok bilong Baibel. Yumi amamas long gutpela wok ol i mekim, long wanem, long nau Baibel olgeta o sampela hap bilong en i stap long klostu 2,700 tokples. Dispela i makim olsem winim 90 pesen bilong ol man long graun olgeta inap ritim Baibel long tokples stret bilong ol.

Prinim Baibel. Long bipo, ol man i raitim ol tok bilong Baibel long skin bilong animal na gras pitpit (papyrus) samting, em ol samting we inap bagarap hariap. Olsem na planti taim ol i mas raitim gen ol tok na bai ol arapela i ken ritim tok bilong Baibel. Ol dispela rait i gat bikpela pe, olsem na wan wan man tasol inap long baim. Tasol winim 550 yia i go pinis, wanpela man nem bilong en Gutenberg i wokim masin bilong prinim ol buk samting, na dispela i helpim wok bilong tilim planti Baibel. Wanpela wok painimaut i soim olsem ol i tilim long ol man winim 5 bilion Baibel em ol i trensletim olgeta tok bilong en o sampela hap bilong en.

I no gat wanpela buk bilong lotu i wankain olsem Baibel. Dispela i soim olsem yumi inap kliagut long ol tok bilong en, tasol yu mas lusim sampela haptaim long mekim olsem. Maski i olsem, i gat rot bilong kisim helpim. Hau yu inap kisim dispela helpim? Na olsem wanem ol tok bilong Baibel inap helpim yu? Neks atikol bai bekim ol dispela askim.

Tingim olsem yu go long wanpela kantri long namba 1 taim. Na yu bungim ol man i gat narapela kastam, kaikai, na ol i yusim narapela mani. Ating dispela inap mekim yu tingting planti.

Yu inap pilim olsem taim yu ritim Baibel long namba 1 taim. Taim yu ritim Baibel, i olsem yu go long wanpela ples long bipo em yu no klia long en. Long dispela hap, yu bungim lain Filistia, yu lukim ol man i bihainim narakain kastam bilong “brukim ol klos,” o yu kisim save long nupela kaikai olsem mana, na koin ol i kolim drakma. (Kisim Bek 16:31; Josua 13:2; 2 Samuel 3:31; Luk 15:9) Olgeta dispela samting inap mekim yu tingting planti. Tasol wankain olsem yu go long narapela kantri, ating yu bai amamas sapos wanpela i helpim yu long save gut long ples na ol kaikai samting bilong ol.

KISIM HELPIM LONG BIPO

Kirap long taim ol man i raitim Baibel long yia 1500 B.C.E. samting, ol man i kisim helpim long kliagut long ol tok bilong en. Olsem, Moses em namba 1 lida bilong Israel “i stat long skulim ol manmeri” long ol rait holi.—Lo 1:5.

Inap 1,000 yia bihain, ol tisa bilong Baibel i skulim ol manmeri long ol rait holi. Long 455 B.C.E., bikpela lain manmeri bilong lain Juda na ol pikinini bilong ol i bung long wanpela pablik ples long Jerusalem. Na ol tisa bilong Baibel “i ritim lo [bilong ol rait holi] long tok Hibru. . . . Na tu ol Livai i autim as bilong lo long ol [manmeri].”—Nehemia 8:1-8.

Inap 500 yia bihain, Jisas Krais i mekim wankain wok bilong skulim ol man. Ol man i save long Jisas long wok tisa bilong en. (Jon 13:13) Em i skulim bikpela lain manmeri, na tu, em i skulim wan wan man. Wanpela taim em i skulim planti manmeri, na em i mekim Bikpela Tok Long Maunten. Baibel i tok: “Bikpela lain manmeri ol i kirap nogut tru long skul bilong en.” (Matyu 5:1, 2; 7:28) Long yia 33 C.E., Jisas i toktok wantaim tupela disaipel bilong em taim ol i wokabaut long rot i go long wanpela viles klostu long Jerusalem, na em i “kamapim gut ol tok bilong Rait Holi” long tupela.—Luk 24:13-15, 27, 32.

Na tu, ol disaipel bilong Jisas i stap olsem ol tisa bilong Baibel. Wanpela taim, wanpela ofisa bilong Itiopia i ritim sampela hap bilong Tok Bilong God. Na Filip em wanpela disaipel i go long em na askim em olsem: “‘Yu save long samting yu wok long ritim?’ Dispela man i tok: ‘Hau bai mi save sapos i no gat man i skulim mi?’” Olsem na Filip i kamapim gut insait bilong ol tok em i ritim.—Aposel 8:27-35.

KISIM HELPIM LONG NAU

Olsem ol saveman na ol tisa bilong Baibel long bipo, ol Witnes Bilong Jehova i save skulim ol man long Baibel long winim 239 kantri long olgeta hap bilong graun. (Matyu 28:19, 20) Long olgeta wan wan wik, ol i helpim winim 9 milion man long kliagut long tok bilong Baibel. Planti bilong ol dispela sumatin bilong Baibel i no insait long wanpela lotu. Ol Witnes i save mekim ol fri Baibel stadi kos wantaim ol man long haus bilong ol yet o long ol hap we sumatin yet i makim. Na sampela man i stadi long rot bilong fon o kompiuta samting.

Yu ken toktok wantaim wanpela Witnes Bilong Jehova long olsem wanem ol tok bilong Baibel inap helpim i stap bilong yu. Bai yu luksave olsem i no hatwok long kliagut long ol tok bilong Baibel, nogat. Baibel “i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God.”—2 Timoti 3:16, 17.