FRAN PES STORI | YU INAP KLIAGUT LONG BAIBEL
Bilong Wanem Yu Mas Kliagut Long Baibel?
“Baibel em wanpela buk bilong lotu em planti man i save gut long en. Tasol ol man long Saina i no save ritim Baibel, long wanem, ol i ting em i buk bilong ol man bilong narapela kantri.”—LIN, SAINA.
“Mi no inap kliagut long ol buk holi bilong lotu Hindu, em lotu bilong mi. Olsem na hau bai mi kliagut long ol tok bilong Baibel Holi?”—AMIT, INDIA.
“Mi rispektim Baibel olsem wanpela buk bilong bipo tru, na tu, mi harim olsem planti man i baim Baibel winim ol narapela buk. Tasol mi no lukim yet wanpela Baibel.”—YUMIKO, JAPAN.
Planti man long olgeta hap bilong graun i tingim Baibel olsem wanpela gutpela buk tru. Maski i olsem, planti bilong ol i no save gut long ol tok bilong Baibel. Planti bilong ol dispela milion man i stap long Esia, na tu, long ol kantri we planti i gat Baibel bilong ol yet.
Tasol ating bai yu askim olsem, ‘Bilong wanem mi mas kliagut long tok bilong Baibel?’ Sapos yu kliagut long ol tok bilong Baibel, yu inap long mekim ol dispela samting:
Stap belgut na amamas
Karim hevi insait long famili
Helpim yu long karim ol hevi
Helpim yu long pas gut wantaim ol narapela
Basetim gut mani
Tingim stori bilong Yoshiko long Japan. Em i laik save long tok bilong Baibel, olsem na em i kirap long ritim Baibel. Wanem gutpela samting i kamap long dispela? Em i tok: “Baibel i helpim mi long save long as bilong laip, na mi bilip na wet long ol gutpela samting bai kamap bihain. Nau mi stap amamas tru.” Amit em yumi stori pinis long en i kirap long skelim ol tok bilong Baibel. Em i tok: “Mi kirap nogut olsem Baibel i gat ol tok bilong helpim olgeta man.”
Ol tok bilong Baibel i bin helpim i stap bilong planti milion manmeri. I gutpela yu yet i skelim Baibel, na kisim save long olsem wanem ol tok bilong en i ken helpim yu.