BEKIM OL ASKIM BILONG BAIBEL

Yu ting yumi inap kisimgut mining bilong ol tok bilong Baibel?

Baibel em i Tok Bilong God. Em i olsem pas i kam long wanpela gutpela papa. (2 Timoti 3:16) Long Baibel, God i tokim yumi long ol samting yumi inap mekim bilong amamasim em, as na em i larim pasin nogut i stap, na ol samting em bai mekim bilong helpim ol man long bihain. Tasol ol tisa bilong lotu i bin paulim tok bilong Baibel; olsem na planti man i ting ol i no inap kliagut long ol tok bilong Baibel.—Aposel 20:29, 30.

God Jehova i laik bai yumi kisim stretpela save long em. Olsem na em i givim yumi wanpela buk em yumi inap kliagut long ol tok bilong en.—Ritim 1 Timoti 2:3, 4.

Olsem wanem yu inap kliagut long ol tok bilong Baibel?

Jehova i givim Baibel long yumi, na tu, em i givim helpim long yumi bambai yumi ken kisimgut mining bilong ol tok bilong en. Em i bin salim Jisas i kam bilong skulim yumi. (Luk 4:16-21) Jisas i helpim ol man long kisimgut ol tok i stap long Buk Bilong God, long rot bilong kamapim ol narapela narapela ves.—Ritim Luk 24:27, 32, 45.

Jisas i kamapim kongrigesen Kristen bilong mekim yet wok em i bin kirapim. (Matyu 28:19, 20) Long nau, ol man i bihainim tru Jisas ol i save helpim ol manmeri long kliagut long ol tok bilong Baibel long God. Sapos yu laik kliagut long ol tok bilong Baibel, ol Witnes Bilong Jehova bai amamas long helpim yu.—Ritim Aposel 8:30, 31.