YU SAVE LONG DISPELA?
Pol i stap sitisen bilong Rom na olsem wanem dispela i helpim em?
Pol i tok: “Mi apil long Sisar!”
Ol man i stap sitisen bilong Rom i gat ol raits long ol kantri em gavman Rom i bosim. Ol sitisen bilong Rom i bihainim lo bilong Rom, na ol i no bihainim ol lo bilong ol biktaun. Olsem na taim ol man i laik kotim ol, ol i no inap kotim ol aninit long lo bilong biktaun, nogat. Ol sitisen bilong Rom i gat rait long go long kot bilong Rom. Na sapos ol i kotim ol bilong kilim ol i dai, orait ol i gat rait long apil long empera.
Olsem na Sisero, em wanpela bikman bilong Rom long yia 100 B.C.E. i tok: “Sapos man i sutim tok long wanpela sitisen bilong Rom, o paitim em na kilim em i dai, em i mekim bikpela rong.” Dispela pasin i olsem man i kilim i dai papa na mama o wanblut bilong em.
Aposel Pol i bin autim tok long planti hap em gavman Rom i bosim. Olsem wanpela sitisen bilong Rom em i gat raits. Baibel i stori long 3-pela narapela taim em i yusim raits bilong em: (1) Em i tokaut long ol majistret bilong Filipai olsem ol i kalapim lo bilong Rom taim ol i paitim em. (2) Taim Pol i stap long Jerusalem, em i tokaut olsem em i sitisen bilong Rom na bai ol man i no ken wipim em. (3) Pol i apil long Sisar em empera bilong Rom, na bai em i ken harim kot bilong em.—Aposel 16:37-39; 22:25-28; 25:10-12.
Ol man i lukautim sipsip long taim bilong ol man i raitim Baibel i kisim wanem pe?
Hap ston i soim kontrak bilong baim ol sipsip na meme long yia 2050 B.C.E. samting
Bilipman Jekop i bin lukautim ol sipsip bilong ankol bilong em Laban inap 20 yia. Pastaim Jekop i wok inap 14 yia na bai em i ken maritim 2-pela pikinini meri bilong Laban. Na bihain em i wok 6-pela yia moa, na bai Laban i ken givim ol sipsip long em olsem pe. (Stat 30:25-33) Nius Biblical Archaeology Review i tok: “Ol man bilong raitim Baibel long bipo na ol man i save ritim Baibel bai kliagut long kontrak em Laban i mekim wantaim Jekop bilong lukautim ol sipsip bilong em.”
Ol saveman i mekim wok painimaut long Nuzi na Larsa, na ol narapela ples long kantri nau ol i kolim Irak. Na ol i painim ol rait bilong bipo i soim ol kontrak bilong man i lukautim ol sipsip. Ol dispela kontrak i kirap long taim ol i katim gras bilong ol sipsip i go inap long narapela yia. Ol wasman bilong sipsip i save makim hamas man na meri sipsip ol bai lukautim na krismas bilong ol. Bihain long wanpela yia, bosman i save kisim ol pikinini sipsip, wul, milk na sis samting inap long mak stret olsem kontrak i makim. Na wasman bilong sipsip i save kisim ol hap wul na milk samting.
Sapos wasman bilong sipsip i lukautim planti meri sipsip, orait ol bai karim planti pikinini sipsip. Olsem, sapos wasman i lukautim 100 meri sipsip, orait ol dispela sipsip inap karim 80 pikinini sipsip. Olsem na ol wasman bilong sipsip i mas lukautim gut ol sipsip em bosman i givim long ol.