Olsem wanem? Yu gat ol kain askim olsem: ‘Wanem samting i save painim ol man i dai pinis? Ol man em yumi laikim tru i dai pinis i kisim pen na hevi long wanpela ples? Bai yumi bungim ol gen? Olsem wanem yumi inap save olsem ol dispela samting bai kamap tru?’ I gutpela yu ritim ol tok Baibel i kamapim. Pastaim, yumi laik save long Baibel i tok wanem long samting i painim ol man i dai pinis. Na bihain, bai yumi stori long ol gutpela samting bai painim ol.

Wanem samting i painim ol man i dai pinis?

BAIBEL I TOK: “Dok i gat laip i winim laion i dai pinis. Olsem tasol, ol man i gat laip i winim ol man i dai pinis. Long wanem, ol i save wanpela samting bai i kamap long ol. Ol i save bai ol i dai. Tasol ol man i dai pinis, ol i no inap save long wanpela samting. Bai ol i no kisim gutpela samting moa. Ol man i lusim tingting pinis long ol. Sapos yu mekim wanpela wok, orait taitim bun na mekim save tru. Long wanem, bai yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.”a—Saveman 9:4, 5, 10.

Matmat em ples ol man i dai pinis i save go stap long en. Dispela i no makim wanpela ples tru, tasol em i tok piksa bilong makim olsem long dispela hap ol man i no inap kisim save na mekim wok. Bilipman Jop i gat wanem tingting long Matmat? Long wanpela de tasol olgeta pikinini bilong en i dai, na tu, ol man i stilim olgeta kago bilong en. Na i no longtaim, em i kisim ol sua na dispela i givim bikpela pen long em. Olsem na em i tokim God: “I gutpela sapos yu haitim mi long ples bilong ol man i dai pinis, [“long hel,” Catholic Douay Version].” (Jop 1:13-19; 2:7; 14:13) I klia tru olsem Jop i no tingim matmat olsem ples paia we ol man i kisim bikpela pen na hevi, nogat. Em i tingim matmat olsem ples we man i kisim bel isi.

Na tu, i gat narapela rot we inap helpim yumi long kisim save long samting i save painim ol man i dai pinis. Yumi ken skelim ol stori Baibel i kamapim long 8-pela man husat i bin kirap bek.—Lukim blok “Baibel i Stori Long 8-pela Man i Bin Kirap Bek.”

Dispela 8-pela man i kirap bek i no bin stori olsem ol i go stap long wanpela gutpela ples o ples bilong karim pen. Sapos ol i bin go stap long kain ples olsem, ating ol bai stori long ol dispela samting, tasol Baibel i no mekim kain stori olsem. Na dispela i makim olsem taim ol i dai, ol i no save long wanpela samting. Sampela taim Baibel i tok piksa long man i dai pinis i kain olsem em i slip. Olsem, taim Lasarus i dai, Jisas i tok: “Pren bilong yumi Lasarus, em i slip. Tasol mi bai go long hap na kirapim em.”—Jon 11:11.

Wanem samting bai painim ol man i dai pinis? Yu ting ol bai kirap bek?

Yu ting ol man i dai pinis inap stap laip gen?

BAIBEL I TOK: “Taim i laik kamap na olgeta man i stap long matmat ol bai harim nek bilong [Jisas] na kam ausait.”—Jon 5:28, 29.

Jisas i tok profet olsem wanpela taim bai kamap we Kingdom bilong em bai bosim graun, na long dispela taim ol man i stap long matmat ol bai kam ausait. Fernando, em yumi stori long en long fes atikol i tok: “Long namba 1 taim mi ritim tok bilong Jon 5:28, 29, mi kirap nogut tru. Dispela tok i helpim mi long bilip na wet long ol gutpela samting bai kamap bihain.”

Long bipo, bilipman Jop i bilip olsem sapos em i dai, God bai kirapim em bek. Olsem na Jop i tok: “Ol manmeri i dai pinis, ating ol i no inap kisim laip gen. Tasol God, i gutpela sapos yu haitim mi long ples bilong ol man i dai pinis, inap belhat bilong yu i slek olgeta. Na yu ken makim wanpela taim bilong tingim mi gen. Na bai mi wet i stap inap long taim yu makim bilong mi i stap long dispela ples [Matmat], em i pinis. . . . Olsem na bai yu singautim mi na bai mi lusim dispela ples na kam long yu.”—Jop 14:13-15.

Marta, em susa bilong Lasarus, em tu i bilip long kirap bek. Olsem na bihain long Lasarus i dai, Jisas i tokim Marta: “‘Brata bilong yu bai kirap bek.’ Marta i tokim em: ‘Mi save em bai kirap bek long las de.’ Jisas i tokim em: ‘Kirap bek em mi yet na laip em mi yet. Man i bilip long mi, maski em i dai, em bai kisim laip gen.’” (Jon 11:23-25) Bihain Jisas i kirapim bek Lasarus! Dispela narakain stori i helpim yumi long tingim ol gutpela samting bai kamap bihain. Yumi bai amamas tru long lukim ol man i kirap bek long olgeta hap bilong graun!

Yu ting sampela man bai kirap bek na go long heven?

BAIBEL I TOK: Baibel i kamapim klia olsem kirap bek bilong Jisas i narakain long 8-pela narapela kirap bek em Baibel i stori long en. Ol dispela man i bin kirap bek na stap laip gen long graun. Tasol Baibel i stori long kirap bek bilong Jisas olsem: “Jisas Krais i go long heven na nau em i stap long han sut bilong God.” (1 Pita 3:21, 22) Olsem wanem? Jisas wanpela tasol i kirap bek na kisim laip long heven? Paslain long Jisas i dai, em i tokim ol aposel bilong em olsem: “Mi bai go na redim hap bilong yupela, na bai mi kam bek na kisim yupela i go wantaim mi, na hap mi stap long en yupela tu bai i stap.”—Jon 14:3.

Krais i go long heven na redim ples bilong sampela disaipel bilong em. Baibel i tok namba bilong lain husat bai kirap bek na go long heven em inap olsem 144,000. (Revelesen 14:1, 3) Tasol ol dispela disaipel bilong Jisas bai go long heven na mekim wanem wok?

Ol i gat bikpela wok long mekim! Baibel i tok: “Ol manmeri i insait long namba 1 kirap bek, ol i holi na ol i amamas. Namba 2 dai i no gat strong long daunim ol. Ol bai stap pris bilong God na bilong Krais, na ol bai mekim wok king wantaim em inap 1,000 yia.” (Revelesen 20:6) Ol lain husat bai kirap bek na go long heven bai mekim wok olsem ol king na pris wantaim Krais na bosim graun.

I gat sampela lain moa bai kirap bek bihain?

BAIBEL I TOK: Baibel i kamapim tok bilong aposel Pol, olsem: “Mi bilip na wet long God, na ol dispela man tu i bilip, olsem bai i gat kirap bek bilong ol man i dai pinis, em ol stretpela man na ol man nogut wantaim.”—Aposel 24:15.

Husat em ol dispela man Pol i kolim olsem “ol stretpela man”? Tingim wanpela eksampel. Klostu long taim bilipman Daniel i dai, God i tok: “Bai yu dai, tasol bihain bai yu kirap bek na long las de bai yu kisim ol samting God i bin makim bilong yu.” (Daniel 12:13) Taim Daniel i kirap bek, em bai go stap long wanem hap? Baibel i tok: “Ol stretpela man bai i kisim graun God i givim ol, na bai ol i stap oltaim long en.” (Song 37:29) Na tu, Jisas i bin tok profet olsem: “Ol man i bihainim pasin isi, ol i ken amamas, long wanem, ol bai kisim graun olgeta.” (Matyu 5:5) Daniel na olgeta bilipman na bilipmeri bai kirap bek na stap laip gen long graun inap oltaim oltaim.

Husat em ol dispela man Pol i kolim olsem “ol man nogut”? Dispela i makim planti bilion manmeri husat i dai, planti bilong ol i no bin kisim save long tok i tru bilong Baibel na bihainim. Bihain long taim ol i kirap bek ol bai kisim save long Jehovaa na Jisas. Na tu, ol bai tenkyu long ol samting tupela i mekim bilong helpim ol. (Jon 17:3) Ol man husat i laik lotuim God inap long i stap laip oltaim, long wanem, Jehova em God bilong i stap oltaim oltaim.

Ol man bai i gat wanem kain sindaun long graun long bihain?

BAIBEL I TOK: God “bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen.” (Revelesen 21:4) “Ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring.”—Aisaia 65:21.

Yumi bai amamas tru long stap long kain ples olsem wantaim ol famili na ol pren bilong yumi taim ol i kirap bek! Tasol yumi laik save long bekim bilong dispela askim, Bilong wanem yumi bilip tru olsem ol man i dai pinis bai kirap bek?

Yu ting dispela tok olsem ol man bai kirap bek em wanpela stori nating? Nogat, aposel Pol i tok: “Sapos long dispela laip tasol yumi bilip long Krais, orait yumi stap tarangu lain stret. Tasol God i bin kirapim bek Krais long dai. Em i kirap bek paslain long ol arapela man i dai pinis, olsem namba 1 kaikai i redi long gaden.” (1 Korin 15:19, 20) Pol i bilip olsem ol man bai kirap bek. Kirap bek bilong Jisas i strongim dispela bilip bilong em.a (Aposel 17:31) Olsem na Pol i kolim Jisas olsem “namba 1 kaikai,” long wanem, em i fes man long kirap bek na kisim laip oltaim. Sapos Jisas i kirap bek, dispela i makim olsem ol narapela tu bai kirap bek.

I gat narapela risen na yumi ken bilip long kirap bek. Jehova em God bilong tok tru. Baibel i tok: “God . . . i no inap giaman.” (Taitus 1:2) Oltaim Jehova i save tok tru tasol, i nogat wanpela taim em i bin tok giaman. Tingim, God i bin kirapim bek ol man long bipo. Olsem na yu ting Em bai no inap long truim tok promis bilong em long kirapim bek ol man i dai pinis? Nogat tru, long wanem, God i no inap long giaman!

Jehova i stretim rot long ol man i ken kirap bek, long wanem, em i gat pasin laikim. Jop i tok: “Ol manmeri i dai pinis, ating ol i no inap kisim laip gen. . . . Long dispela taim bai yu ting long yu yet yu bin wokim mi, na bai yu laikim tumas bai mi stap klostu long yu gen. Olsem na bai yu singautim mi na bai mi lusim dispela ples na kam long yu.” (Jop 14:13-15) Jop i bilip olsem Papa bilong em long heven i laik tru long kirapim em bek. Yu ting God i senisim tingting bilong em? Nogat. God i tok: “Mi tasol mi Bikpela na mi no save senisim tingting bilong mi.” (Malakai 3:6) Ol papamama i gat laik tru long lukim pikinini bilong ol i dai pinis i kirap bek, na God tu i laik tru long lukim ol man i dai pinis i kirap bek, kisim gutpela helt, na stap amamas. Tasol God i gat strong long kirapim bek ol man, na ol papamama nogat.—Song 135:6.

Jehova bai givim strong long Pikinini bilong em long kirapim bek ol man i dai pinis, na ol man i krai sori bai amamas long lukim ol gen. Jisas i gat wanem tingting long kirap bek? Paslain long Jisas i kirapim bek Lasarus, em i luksave olsem ol susa na pren bilong Lasarus i bel hevi, olsem na “aiwara bilong Jisas i pundaun.” (Jon 11:35) Long narapela taim, Jisas i bungim wanpela wido meri bilong Nain em pikinini man bilong em i dai. Jisas “i sori tru long em na tokim em: ‘No ken krai moa.’” Na kwiktaim em i kirapim bek pikinini man bilong dispela meri. (Luk 7:13) Dispela i soim olsem Jisas i pilim hevi bilong ol man i krai sori taim wanpela ol i laikim i dai. Na em bai amamas tru long lukim olsem ol man long graun olgeta bai stap amamas long taim ol man i kirap bek!

Olsem wanem? I gat wanpela taim yu bel hevi tru? Ating yu pilim olsem i nogat rot bilong pinisim dai. Tasol long rot bilong Jisas, God bai kirapim bek ol man i dai pinis. Tingim, God i laik bai yu lukim truim bilong dispela tok promis, na em i laik bai yu amamas long bungim gen ol man yu laikim i kirap bek. Tingim ol samting yupela bai mekim wantaim long bihain inap oltaim oltaim!

Lionel em yumi bin stori pinis long en i tok: “Nau mi save olsem ol man bai kirap bek. Pastaim mi hatwok long bilip long man i autim tok long mi na ol samting em i stori long en. Tasol long rot bilong Baibel, mi luksave olsem dispela tok i tru! Mi laik tru long lukim tumbuna papa bilong mi taim em i kirap bek.”

Yu laik kisim sampela save moa? Ol Witnes Bilong Jehova bai amamas tru long soim yu long Baibel bilong yu yet long as na ol i bilip olsem ol man i dai pinis bai kirap bek long bihain.b