Askim

Wanem taim God bai pinis long singautim ol wan wan Kristen bilong kisim laip long heven?

Baibel i no kamapim bekim stret bilong dispela askim. Yumi save pinis, wok bilong makim ol disaipel bilong Jisas bilong kisim laip long heven em i bin kirap long 33 C.E. (Aposel 2:​1-4) Na yumi save tu olsem bihain long taim ol aposel i dai pinis, ol Kristen God i bin makim tru, olsem “wit,” ol i wok long “kamap wantaim” ol Kristen giaman, em ol “gras nogut.” (Matyu 13:​24-​30) Orait kirap long 1890 samting, ol Kristen God i bin makim, ol i kirap gen long mekim wok. Long 1919, wok i kirap bilong kisim na bungim “olgeta kaikai bilong graun i mau pinis,” na hap bilong dispela wok i bilong bungim ol laspela Kristen God i bin makim.​—KTH 14:​15, 16.

Kirap long 1890 samting na i kam inap long 1931, bikpela wok bilong autim tok em bilong bungim ol laspela Kristen bilong lain, olsem bodi, bilong Krais. Long 1931, ol Sumatin Bilong Baibel i kisim nem em Baibel i as bilong en, olsem ol Witnes Bilong Jehova, na long nius The Watchtower bilong Novemba 15, 1933, ol i kamapim tingting olsem dispela gutpela nem ol i kisim, em dispela “wan kina” long tok piksa bilong Jisas i stap long Matyu 20:​1-​16. Ol i ting dispela 12-pela aua long tok piksa em i makim 12-pela yia kirap long 1919 na i kam inap long 1931. Inap planti yia bihain long dispela, ol i ting wok bilong singautim ol Kristen bilong i go long Kingdom bilong heven, em i bin pinis long 1931, na ol Kristen God i bin singautim ol long 1930 na 1931 bilong mekim wok king wantaim Krais, ol i las tru bilong dispela lain. (Matyu 20:​6-8) Tasol long 1966, ol i kisim stretpela save long dispela tok piksa na i klia tru olsem dispela tok piksa i no toktok long pinis bilong wok bilong singautim ol Kristen God i makim.

Long 1935, ol i kisim save olsem ol dispela “planti manmeri tru” bilong Kamapim Tok Hait 7:​9-​15 em “ol arapela sipsip,” olsem ol Kristen ol i wet long kisim laip i stap long graun, em ol bai kamap long “taim bilong las de” na dispela lain bai abrusim bagarap long Armagedon. (Jon 10:16; 2 Timoti 3:1; KTH 21:​3, 4) Bihain long dispela yia, bikpela wok bilong kamapim ol disaipel em bilong bungim dispela lain planti manmeri tru. Olsem na bihain long 1966, ol i bilip olsem wok bilong singautim ol Kristen bilong i go long heven em i pinis long 1935. Samting i strongim dispela tingting i olsem: Klostu olgeta manmeri i bin kisim baptais bihain long 1935, ol i pilim olsem ol i bilong dispela lain bilong i stap long graun. Olsem na ol i ting bihain long dispela taim, ol Kristen God i singautim ol bilong i go long heven, ol i olsem senis bilong sampela ol i no bin stap gut long God.

Tru tumas, sapos wanpela Kristen God i bin makim i pundaun na em i no tanim bel, Jehova i save singautim narapela bilong kisim ples bilong em. (Rom 11:​17-​22) Tasol yumi ken ting ol Kristen God i bin makim tru, wan wan tasol i no stap gut long em. Tasol sampela Kristen em ol i bin kisim baptais bihain long 1935, holi spirit i bin givim save long ol olsem ol i bilong i go long heven. (Rom 8:​16, 17) Olsem na i luk olsem yumi no inap makim wanpela taim stret em God i pinis long singautim ol Kristen bilong i go long heven.

Yumi mas ting olsem wanem long wanpela Kristen i tingting strong long bel bilong em olsem God i makim em pinis long holi spirit na em i kirap long kisim bret na wain long bung bilong Memorial? Yumi no ken skelim em. Dispela em samting bilong em na Jehova. (Rom 14:12) Tasol ol Kristen God i bin makim tru, ol i no save strong long ol man i mas mekim gut long ol olsem ol i samting tru. Ol i no bilip olsem ol i bin kisim narapela kain save tru, winim save bilong sampela bilong bikpela lain, husat i bin stap insait long tok i tru longpela taim. Na ol i no ting ol i gat holi spirit moa yet, winim ol poroman bilong ol bilong lain arapela sipsip. Na ol i no ting ol narapela i mas i stap olsem wokman bilong ol, na ol i no tok ol i save kisim bret na wain, olsem na ol i antap long ol elda bilong kongrigesen, nogat. Long pasin daun ol i tingim olsem sampela man em God i bin makim long taim bilong ol aposel, ol i no bin winim mak bilong mekim wok elda o kongrigesen sevan. (1 Timoti 3:​1-​10, 12, 13; Taitus 1:​5-9; Jems 3:1) Na sampela Kristen God i makim long dispela taim bipo, ol i no bin strong long ol samting bilong spirit. (1 Tesalonaika 5:14) Na maski ol sista i bilong dispela lain God i makim, ol i no bin stap olsem tisa insait long kongrigesen.​—1 Timoti 2:​11, 12.

Olsem na ol Kristen God i bin makim, wantaim ol poroman bilong lain arapela sipsip, ol i taitim bun tru bilong i stap strong long ol samting bilong spirit, na ol i wok long kisim ol pasin em holi spirit i save kamapim, na wok strong bambai bel isi i ken i stap insait long kongrigesen. Olgeta Kristen, maski ol i bilong lain God i bin makim o bilong lain arapela sipsip, ol i wok strong aninit long Gavening Bodi long autim tok bilong gutnius na kamapim ol disaipel. Ol Kristen God i bin makim, ol i amamas long mekim dispela wok i go inap long taim God i makim bilong ol i stap yet long graun olsem wokman bilong Jehova.