‘Ol Wok Em i Mekim i Go Wantaim Em’
LONG 8:50 long moningtaim long Fonde, Julai 28, 1994, George D. Gangas i dai na pinisim wok bilong em long graun. Em i gat 98 krismas. George Gangas em i wanpela bilong dispela lain God i bin makim ol, na em i bin insait long Lain Bilong Bosim Ol Witnes Bilong Jehova kirap long Oktoba 15, 1971.
Ol man i save gut long Brata Gangas ol i save em i laikim tumas stretpela pasin na em i nolaik tru long ol pasin nogut. Ol i tingim yet ol tok em i mekim long Satan, olsem em i wanpela man nogut tru, em i gat tingting long mekim ol pasin i nogut olgeta, na em i man bilong giaman tru. Tasol em i save tok, Jehova i gutpela Papa tru i save laikim tru yumi na mekim gut long yumi na mekim pasin sori na pasin isi long yumi na tingim yumi. Na Brata Gangas i save laik tru long kamapim ol askim long ol tok bilong Baibel. Maski em i toktok nating wantaim man, em bai givim sampela askim long ol—sampela i no hatwok long bekim, na sampela i hatwok long bekim. Tru tumas, em i bin laikim tumas tok i tru bilong Baibel.
Brata Gangas i bin kisim baptais long Julai 15, 1921. Em i kirap mekim wok painia long Mas 1928. Olsem na em i wok oltaim long wok bilong Jehova inap 66 yia olgeta. Em i bin kirap mekim wok long nambawan ofis bilong Sosaiti Was Taua long Bruklin long Oktoba 31, 1928.
Stori bilong em i bin kamap long Wastaua (tok Inglis) bilong Oktoba 15, 1966, na i kamapim klia olsem em i wanpela man bilong God i save tingim ol samting bilong spirit. Long dispela stori bilong em, em i tokaut olsem: “Mi laikim tumas laip, na mi laik bai ol brata bilong mi i ken kisim laip. Mi gat wankain tingting olsem aposel Pol—mi tingim olgeta samting bilong dispela graun i olsem pipia nating, long wanem, ‘mi save long Krais Jisas, . . . na mi lukim dispela save tasol em i samting tru.’ ”—Filipai 3:8.
Ol samting Brata Gangas i bin mekim i kamapim klia olsem em i laikim tumas laip, na ‘ol save bilong em long Krais Jisas’ em i amamas long givim long ol narapela. Yumi sori long em i bin lusim yumi, tasol yumi amamas long em i kisim pinis gutpela prais long heven! Nau ‘em i ken malolo. Gutpela pasin em i bin mekim, i go wantaim em.’—Kamapim Tok Hait 14:13.