Singsing 38 (65) na beten.

WIK I KIRAP LONG ME 27

Singsing 18 (5)

(10 min) Ol toksave bilong kongrigesen.

(15 min) “Autim Tok long Longwe Teritori.” Wanpela strongpela brata i mas stori long ol dispela tok wantaim kongrigesen.

Harim: Sampela taim yumi autim tok long longwe teritori na sampela man i kros long yumi o ol i laik rausim yumi long ples bilong ol. Olsem na gutpela sapos ol brata sista i laik go autim tok long longwe teritori ol i ken lukim gen ol tok i stap long Wok Kingdom Bilong Yumi, bilong Jun 1990, pes 2.

(20 min) “Wok Autim Tok long Ol Ailan Pasifik.” Paslain long miting makim wanpela brata bilong kaunim ol paragraf na bai em i ken redi gut. Kaunim pinis wanpela paragraf, orait kamapim ol bikpela tok bilong en.

Harim: Sapos i gat taim, kamapim sampela stori bilong tilim ol magasin long Papua Niugini.

Singsing 59 (31) na beten.

Kisim Pe Inap Long Wok Yumi Yet i Mekim

(Namba 1 Hap)

¹ Long kain kain rot Jehova i bin kamapim bel bilong em, olsem em i laikim tru ol manmeri. Jisas i tokim bikpela lain manmeri i kam bung olsem, God i gat bikpela sori tru long ol man, olsem na “em i save mekim san bilong en i kamap antap long ol man nogut na long ol gutpela man wantaim. Na em i save mekim ren i kam daun long ol stretpela man na long ol man bilong mekim pasin i no stret tu.” (Mt 5⁠:​43-48) Long narapela taim Jisas i kamapim nambawan bikpela samting Jehova i bin mekim bilong soim olsem, em i laikim tru ol manmeri​—⁠em i givim Pikinini bilong em olsem ofa bilong kisim bek yumi. (Jo 3⁠:16) Jisas i kirapim ol man i harim tok bilong em long mekim sampela wok bilong kamapim bel bilong ol, olsem ol i pilim tru gutpela pasin sori bilong Jehova. Olsem wanem? Yumi mekim olsem?

² Bilong kamapim bel bilong yumi, olsem yumi pilim tru gutpela pasin sori bilong Jehova na bai sori bilong em i ken helpim yumi oltaim, yumi mas kisim save long em. (Jo 17⁠:⁠3) I mas i gat man bilong givim gutpela tok na tingting long yumi bambai yumi ken mekim wok bilong Jehova long pasin em i laikim. Yumi save Jehova i tingim tru yumi, long wanem em i givim Baibel long yumi​—⁠em Tok bilong em, na long rot bilong gutpela oganaisesen bilong em, em i save skulim yumi na givim gutpela tok long yumi. (Mt 24⁠:​45-47; 2 Ti 3⁠:​16, 17) Jehova i skulim yumi ol lain i dediket pinis long em long ol pasin yumi mas bihainim. Tasol olsem wanem? Yumi yet i mekim wok bilong kamapim bel bilong yumi, olsem yumi pilim tru sori bilong God? Yumi save bihainim tok bilong em long pasin em i laikim na bai dispela i helpim yumi yet? (Ais 48⁠:17; Je 1⁠:22) Long 1 Korin 3⁠:8 aposel Pol i tok: “Man i planim pikinini kaikai na man i givim wara, tupela wantaim i mekim wok bilong God. Na tupela wan wan bai i kisim pe inap long wok tupela i bin mekim.”

³ Tru tumas, yumi mas wok strong long mekim laik bilong God. Tasol yumi olgeta i no wankain long mekim wok long kamap strong long spirit. I gat sampela samting i mekim na sampela inap kamap strong long spirit hariap na sampela i isi liklik, olsem na i no gutpela sapos yumi skelim narapela wantaim narapela. Nogat. Nogut dispela i mekim na sampela i bel hevi. Tasol bikpela samting em wok yumi yet i mekim bilong kamap strong long spirit. Orait, i gat wanem ol samting yumi ken mekim na bai yumi ken pas gut long oganaisesen bilong Jehova? I gat sampela samting yumi ken mekim bilong mekim wok Kristen bilong yumi i kamap gutpela moa? Yumi ken mekim wanem bilong helpim ol wok insait long kongrigesen? Yumi bihainim olgeta tok yumi kisim long oganaisesen?​—⁠1 Ti 4⁠:16.

BIHAINIM PASIN BILONG OL BRATA I STAP GUT LONG JEHOVA

⁴ Ol brata sista i stap gut long Jehova i bin autim gutpela tok bilong Kingdom inap planti yia. Gutpela sapos yumi bihainim pasin bilong ol, olsem yumi bihainim pasin bilong Pol. (1 Ko 11⁠:⁠1) Ol i pilim tru sori bilong Jehova na dispela i bin kirapim ol long mekim wok, olsem na ol i kisim planti gutpela samting long han bilong Jehova, long wanem ol i bin wok strong long mekim wok na bihainim tok bilong Baibel. Ol i mekim bikpela wok insait long kongrigesen na ol i no surik long mekim ol wok bilong ol yet. Yumi lukim pinis ol kaikai em hatwok bilong ol wan wan i bin kamapim.​—⁠Ro 1⁠:13; 2 Ko 3⁠:​1-3.

⁵ Long olgeta yia, planti tausen nupela man i kam insait long oganaisesen bilong Jehova. (Ais 60⁠:⁠8) Ol tu i gat bikpela laik long mekim wok bilong kamap strongpela Kristen, na ol i wok strong long mekim wok autim tok, na yumi mas tokaut olsem ol i mekim gutpela wok. Ol i lukim ol blesing Jehova i givim long ol brata i wok strong long mekim wok bilong em na dispela i helpim ol. Ol strongpela brata sista i stap olsem gutpela piksa bilong helpim ol nupela man long save olsem, dispela taim yumi stap long en i no taim bilong slek o les long mekim wok bilong God. Maski yumi nupela pablisa o yumi save gut long mekim dispela wok, olsem wanem? Yumi wok long kamap strong long ol samting bilong spirit, na mekim wok Kristen bilong yumi yet, na insait long olgeta wok bilong kongrigesen?

Kisim Pe Inap long Wok Yumi Yet i Mekim

(Namba 2 Hap)

¹ Sapos yumi laik kisim pe inap long wok yumi yet i mekim, orait yumi mas bihainim ol tok yumi lainim. Jems i tok, yumi mas ‘bihainim tok bilong God.’ (Je 1⁠:25) Paslain tru long Jems i mekim dispela tok, Moses i bin tokim ol Juda, ‘Yupela i mas pulapim ol dispela lo long bel na tingting bilong yupela.’ Ol i mas mekim olsem bambai ol i ken bihainim. (Lo 11⁠:18) Olsem na nogut ol i kisim save tasol​—⁠em i no inap. Na dispela lo i stap yet long nau. Jisas, em Pikinini bilong God, em i save pinis olsem, pasin bilong bihainim tok em i bikpela samting. (Jo 8⁠:28) Long Matyu 7⁠:24 Jisas i tok: “Man i harim dispela tok bilong mi na i bihainim, em i olsem wanpela man i gat gutpela tingting.”

² Olsem wanem? Yumi bihainim ol tok yumi harim long ol kibung sekit? Yumi save bilong wanem em i bikpela samting yumi mas redi na was gut long dispela taim nau yumi stap long en? Yumi save was gut long ol pasin Satan i wok hait long mekim bilong pulim yumi? Yumi pilim tru ol tok yumi kisim long olgeta taim long rot bilong oganaisesen na bai kongrigesen i ken i stap klin long spirit na long pasin? Yumi yet i bihainim ol tok yumi harim o olsem wanem?​—⁠Je 1⁠:​23-25.

³ Program bilong bikpela de kibung bai helpim yumi long save, i bikpela samting yumi mas i stap holi olsem Jehova i holi. (1 Pi 1⁠:​14-16) Dispela tok “holi” i makim olsem man i stap klin na stret long ol samting bilong lotu, na i makim tu olsem God i makim man bilong mekim wok bilong em. God i givim wok long yumi bilong autim gutpela tok, olsem na yumi mas i stap klin long spirit, na long pasin bilong yumi, na long skin, bambai yumi inap karim tok i tru bilong Baibel holi i go long ol man. Olsem na yumi mas was gut long pasin bilong yumi yet. (Hi 2⁠:⁠1) Taim yumi mekim olsem, bai yumi kisim pe inap long wok yumi yet i mekim.

TAIM YU YET YU STADI EM BAI HELPIM YU

⁴ Taim yumi yet yumi stadi, dispela bai strongim bilip bilong yumi, na bai yumi pilim moa yet ol tok i tru yumi kisim save long en. Stadi bai strongim yumi na inapim yumi long mekim gut tok. Stadi bai givim gutpela save na tingting long yumi na helpim yumi long kamap olsem nupela man. (Kl 1⁠:​9-11) Tasol taim yumi yet yumi stadi, yumi mas wok strong na lusim bikpela hap taim bambai stadi i ken helpim yumi​—⁠yumi no inap mekim hariap. Sapos yumi stadi liklik em bai helpim yumi liklik​—⁠yumi stadi planti em bai helpim yumi planti.​—⁠2 Ko 9⁠:​6, 7.

⁵ Olsem wanem? Yumi save makim sampela hap taim long olgeta wik inap long yumi redim gut tok bilong ol miting? Em i wanpela rot bilong yumi ken kamapim bel bilong yumi olsem yumi pilim tru ol gutpela kaikai bilong spirit yumi kisim long Jehova. Pasin bilong redim gut ol tok bilong miting bai helpim yumi long bihainim sedyul bilong kaunim na stadi long Baibel. Olsem wanem? Yumi save makim hap taim long olgeta wik bilong kaunim hap tok bilong Baibel em sedyul bilong Skul Bilong Wok Autim Tok i makim? Miting Bilong Wok Autim Tok i save helpim yumi long tingim gut ol kain kain rot bilong yumi ken autim gut ol tok. Yumi save redim ol dispela samting? Yumi save tingim gutpela rot bilong mekim wok long ol tok yumi kisim long ol miting taim yumi autim tok? Na kwiktaim yumi mekim wok long en o olsem wanem? Yumi mas makim taim stret bilong redim Stadi Wastaua na Buk-Stadi. Yumi save mekim olsem o olsem wanem?

Kisim Pe Inap long Wok Yumi Yet i Mekim

(Namba 3 Hap)

BEKIM TOK LONG OL MITING

¹ Ol miting bai helpim moa yumi sapos yumi bekim sampela tok. Taim yumi redim gut ol tok bilong miting na wok strong long bekim tok, bai tingting bilong yumi i no ken wokabaut na bai yumi putim gut yau long harim bekim bilong ol narapela. Planti ol i tingim yet ol bikpela wok ol i mekim bilong redim bekim ol i mekim namba wan taim long miting, o namba wan tok ol i mekim long Skul Bilong Wok Autim Tok. Ating pastaim yumi pret liklik na nau yumi no pret tumas, tasol yumi mas wok strong yet na bai olgeta manmeri i ken lukim pasin bilong yumi long ol samting bilong spirit i kamap gut. (1 Ti 4⁠:15) Ol bekim yumi mekim i save helpim na strongim ol narapela. Sapos yumi redim gut ol tok bilong miting na yumi bekim gut ol tok, dispela inap kirapim ol brata long laikim ol narapela na mekim ol gutpela pasin long ol.​—⁠Hi 10⁠:​23, 24.

² Taim yumi bekim tok long miting, yumi no ken bekim ol strongpela strongpela tok ol i hatwok long kisim, na bekim i no ken longpela tumas, nogat. Gutpela sapos yumi mekim sotpela tok tasol i bekim stret ol askim o i kamapim klia insait bilong wanpela tok bilong Baibel. Sapos yumi redim gut ol bekim, bai yumi inap kolim long toktok bilong yumi yet. Taim yumi mekim olsem, bai yumi helpim gut yumi yet na ol narapela. Long wanem, yumi mas tingting gut long ol tok yumi laik kolim na kisim gut insait bilong en bambai yumi inap kamapim gut. Ating dispela bai helpim tu ol narapela, long wanem, bai ol i no hatwok tumas long kisim gut ol tok. Na tu, dispela bai helpim yumi long holim tok long tingting na bai yumi ken tingim na mekim wok long en long narapela taim.

TAIM YUMI AUTIM TOK, PLANIM PLANTI PIKININI BILONG KAIKAI

³ Wok Kristen bilong yumi long mekim wok autim tok i wanpela gutpela samting tru. (2 Ko 4⁠:⁠7) Yu tu yu ting olsem? Long rot bilong wok autim tok yumi inap kamapim bilip bilong yumi long ol narapela. Jisas i tok: “Tingting i pulap long bel, em maus i save autim.” (Lu 6⁠:45) Sapos yumi yet i wok strong long mekim bikpela wok autim tok, bai dispela i helpim yumi. Save yumi kisim long tok i tru bai kamap gutpela, na pasin bilong mekim wok long Baibel bai kamap gutpela moa. Bai yumi kisim bikpela amamas long helpim ol narapela long kisim save long tok i tru na long Bikpela Man i bin wokim yumi. Yumi tokaut olsem i stret God i stap King bilong olgeta samting na mekim wok bos. Yumi amamas, long wanem, yumi save yumi mekim ol samting God i laikim, na yumi wok long kamap olsem em yet, na yumi mekim laik bilong em.​—⁠Mt 5⁠:⁠48.

⁴ Sapos long olgeta taim yumi skelim ol wok yumi mekim, bai yumi no lotu nating long Jehova. Bai yumi no givim hap bel tasol long mekim wok bilong em, na yumi no mekim liklik tasol, olsem giaman long mekim wok bilong em. Yumi mas givim bel olgeta long Jehova na long mekim wok bilong em. Baibel i tok, yumi mas givim yumi yet, olsem givim strong bilong yumi olgeta, long mekim wok bilong em. (Kl 3⁠:​23, 24) I stap bilong yumi i narapela narapela, olsem na Jehova i no putim mak i antap tumas na yumi no inap winim. Nogat. Tasol ol samting yumi inap mekim, yumi mas mekim​—⁠em laik bilong Jehova. (Mt 22⁠:37) Tasol yumi ol sinman i save slek na tingim yumi yet, olsem na gutpela sapos planti taim yumi skelim yumi yet na bai yumi ken save long olsem wanem ol wok bilong Jehova yumi mekim i ken kamap gutpela moa. Yumi save mekim olsem?

⁵ Yumi mas was gut bambai yumi no ken larim ol laik bilong yumi yet i pasim yumi long givim bel olgeta long Jehova. Ol samting yumi mekim bilong kisim malolo na amamas i mas i stap olsem namba tu. Na tu yumi mas was gut, nogut yumi lusim bikpela hap taim tumas long mekim wok bilong skin. Sapos yumi bihainim tok bilong Jisas long Matyu 6:22, 23, ating bai yumi inap wok strong moa long mekim wok bilong spirit na bai yumi kisim pe inap long wok yumi mekim.

⁶ Taim yumi wok strong long kamap olsem nupela man, yumi yet i gat wok long bihainim ol gutpela tok yumi kisim long rot bilong ol miting na kibung na ol buk samting bilong yumi. Yumi olgeta wan wan i mas stadi gut, na bekim tok long miting, na insait long wok bilong kamapim ol disaipel inap long skel bilong yumi. Sapos yumi kamapim bel bilong yumi olsem yumi pilim tru pasin sori bilong Jehova, orait yumi ken bilip olsem nau bai yumi kisim gutpela pe long ol samting bilong spirit, na bihain long nupela taim em Jehova bai kamapim bai yumi kisim laip oltaim.

[Questions for Part 1]

1. (a) Stori long sampela samting Jehova i bin mekim bilong kamapim bel bilong em, olsem em i laikim tru ol manmeri. (b) Pasin sori bilong Jehova i mas mekim wanem long yumi?

2. (a) Kolim tupela samting Jehova i mekim na dispela i mas kirapim yumi long mekim sampela wok bilong soim olsem yumi pilim tru pasin sori bilong em. (b) 1 Korin 3⁠:8 i kamapim wanem lo bilong dispela?

3. (a) Taim yumi mekim wok bilong soim olsem yumi pilim tru pasin sori bilong Jehova, yumi mas tingim wanem samting? (b) Yumi mas givim wanem ol askim long yumi yet?

4. (a) Gutpela yumi bihainim pasin bilong husat insait long kongrigesen bilong yumi? (b) Wanem samting i olsem pas bilong tokim ol man Pol em i wanpela wokman bilong God, olsem 2 Korin 3⁠:3 i tok?

5. (a) Ol strongpela brata sista i stap olsem gutpela piksa na dispela i helpim yumi long save long wanem samting? (b) Olgeta pablisa i mas givim wanem askim long ol yet?

[Questions for Part 2]

1. (a) Inap planti handet handet yia wanem lo i no save senis? (b) Olsem wanem ol tok bilong Jisas long Matyu 7⁠:24 i kamapim dispela lo?

2. (a) God bai mekim wok bilong husat i kamap gutpela tru na em i ken amamas, olsem Jems 1⁠:​23-25 i tok? (b) Yumi ken givim wanem ol askim long yumi yet?

3. (a) Dispela tok “holi” i makim wanem samting? (b) Yumi mas mekim wanem bilong i stap holi?

4. (a) Taim yumi yet yumi stadi em bai helpim yumi olsem wanem? (b) Tasol yumi mas mekim wanem bambai dispela stadi i ken helpim yumi?

5. (a) I gat hamas miting bilong kongrigesen insait long wanpela wik? (b) Yumi ken mekim wanem bilong kamapim bel bilong yumi olsem yumi pilim tru ol wan wan miting?

[Questions for Part 3]

1. (a) Taim yumi bekim gut ol tok long miting dispela bai helpim yumi yet olsem wanem? (b) Yumi ken mekim wanem bilong kirapim ol brata long laikim ol narapela na mekim ol gutpela pasin long ol?

2. (a) Sapos yumi kolim bekim long toktok bilong yumi yet, dispela bai helpim yumi olsem wanem? (b) Taim yumi kolim bekim long toktok bilong yumi yet, dispela bai helpim ol narapela olsem wanem?

3. Taim yumi wok strong long mekim bikpela wok long autim tok, bai dispela i helpim yumi olsem wanem?

4. (a) Bilong wanem Jehova i no amamas sapos yumi mekim nating wok bilong em? (b) Bilong wanem sampela taim i gutpela sapos yumi skelim yumi yet?

5. Sapos yumi bihainim tok bilong Jisas long Matyu 6⁠:​22, 23, bai yumi no mekim wanem? Taim yumi bihainim dispela tok, em bai helpim yumi long mekim wanem?

Haus Kingdom i Mas i Stap Klin

BILONG WANEM HAUS KINGDOM I MAS I STAP KLIN?

Nehemia 12⁠:30: “Ol pris na ol Livai i bihainim pasin bilong mekim ol yet i kamap klin long ai bilong God. Na ol i mekim wankain pasin long ol manmeri na long banis bilong Jerusalem na long ol dua bilong banis tu.”

2 Stori 29⁠:​2-5, 15-17: “Hesekia i mekim gutpela pasin long ai bilong Bikpela, . . . Long namba wan yia bilong Hesekia i stap king, . . . em i opim ol dua bilong haus bilong Bikpela gen na em i tokim sampela man long stretim ol dispela dua.”

OLSEM WANEM YUMI INAP LAINIM PIKININI LONG MEKIM DISPELA WOK?

Sindaun 22⁠:⁠6.

OLSEM WANEM OL INAP WOKIM SEDYUL BILONG KLINIM HAUS KINGDOM?

1 King 5:14: “Em [King Solomon] i tilim ol long tripela lain, na ol wan wan lain i gat 10,000 man. Na long olgeta mun wanpela lain i save go wok long Lebanon inap wanpela mun na ol i save kam bek. Na narapela lain i save senisim ol. Dispela tripela lain i save senis senis olsem, na long dispela pasin wan wan lain i save mekim wok long wanpela mun na kam bek i stap long ples long tupela mun. Adoniram i bosim ol dispela lain wokman.”

OL TOILET BILONG HAUS KINGDOM I MAS I STAP OLSEM WANEM?

Lo 23⁠:14: “God, Bikpela bilong yumi, bai i stap oltaim long kem wantaim yupela, long helpim yupela long winim ol lain birua. Olsem na kem bilong yupela i mas i stap klin long ai bilong em oltaim. Yupela i no ken mekim wanpela samting i doti long ai bilong God. Nogut Bikpela i givim baksait long yupela.”

YUMI MAS KISIM WANEM TINGTING LONG WOK BILONG KLINIM HAUS KINGDOM?

Nehemia 10⁠:39: “Mipela ol manmeri na ol Livai i save bringim olgeta namba wan hap bilong wit samting . . . na putim long dispela ol rum long haus bilong God. Na bai mipela i no ken lusim wok bilong lukautim haus bilong God.”

This article is unique to PNG.

Autim Tok Long Longwe Teritori

¹ Sosaiti i makim gen mun Julai, 1991, olsem gutpela taim bilong autim tok long longwe teritori bilong kongrigesen. Sosaiti bai raitim pas i go long olgeta kongrigesen na olgeta grup i stap longwe long kongrigesen, na makim hap teritori bilong ol i go autim tok bilong Kingdom long en.

² Lukim lista daunbilo na bai yumi ken skelim ol wok yumi mekim long yia 1990 wantaim yia 1989.

1989 1990 1989 1990

Ol kongrigesen 43 37 Ol buklet 693 772

Ol pablisa 550 497 Ol magasin 1680 1828

Ol buk 161 459

³ Ol buk samting yumi tilim long yia 1990 i winim yia bilong 1989. Olsem na yumi bin planim planti “pikinini bilong kaikai.” Planti kongrigesen i laik kisim hap teritori ol i kisim long yia i go pinis na bai ol i ken autim tok gen long dispela hap long yia 1991. Em gutpela​—⁠no gat rong long dispela. Olsem wanem? Yu tingting long “givim wara” long ol pikinini bilong kaikai yu planim pinis na planim sampela moa?​—⁠1 Ko 3⁠:​6, 7.

⁴ Long yia 1990, inap olsem 116 kongrigesen i bin autim tok long longwe teritori. Tasol lukim lista na bai yumi save 37 kongrigesen tasol i salim ripot long Sosaiti long wok ol i mekim. Olsem wanem? Yupela i autim tok long longwe teritori na lusim tingting long salim ripot i go long Sosaiti? O sampela samting i mekim na yupela i no bin mekim wok long dispela hap teritori Sosaiti i makim bilong yupela. Tasol maski yu no salim ripot long yia 1990, Sosaiti bai amamas long kisim ripot long wok autim tok yupela i mekim long longwe teritori long dispela yia 1991. Aposel Jon i save gut long dispela lo bilong wokim ripot long ol samting em i lukim na harim. (1 Jo 1⁠:⁠2) Gutpela tok man i harim, i olsem kolwara long man em skin bilong em i les pinis. (Snd 25⁠:25) Olsem wanem? Kongrigesen inap wokim ripot bilong autim tok long longwe teritori na salim i kam long Sosaiti long dispela yia 1991?

BILONG WANEM YUMI MAS AUTIM TOK LONG LONGWE TERITORI?

⁵ Planti manmeri long Papua Niugini i save sindaun long ol liklik ples i stap longwe long ol bikpela na liklik taun, na i hatwok long bungim ol. Olsem na yumi ol Witnes i dediket na baptais pinis, yumi gat sampela wok yumi mas mekim, olsem Rom 10⁠:​13-15 i makim. (Plis kaunim tok bilong ol dispela ves.) Yumi tok pinis olsem yumi laik kamap man God i salim bilong i go autim tok, a? Olsem na yumi mas mekim dispela wok.