Yu Bel Hevi Long Samting i Pasim Yu?

YUMI olgeta i laik i stap fri, tasol sori tumas, i gat sampela samting i pasim yumi na yumi no inap mekim olgeta samting yumi laik mekim. Yumi no amamas long dispela, tasol yu pilim olsem i gat planti samting tumas i pasim yu na yu bel hevi? Sapos olsem, ating yu mas stretim tingting bilong yu. Yu no ken kros kros na bel hevi long samting yu no inap mekim; yu mas wok strong long mekim ol samting yu gat rot long mekim.

Olsem: Planti rabisman i laik kamap maniman. Tru, sapos yumi stap rabis, dispela i pasim yumi na i gat sampela samting yumi no inap mekim long dispela taim nau. Tasol i gat planti gutpela samting yumi olgeta inap mekim​—⁠ol rabisman na ol maniman tu. Yumi olgeta inap laikim wanpela man o meri, na marit, na kamapim ol pikinini, na kisim ol gutpela pren samting. Na yu mas tingim: Ol rabisman wantaim ol maniman i save long Jehova na wetim nupela taim i kamap olsem em i promis pinis. Ol rabisman wantaim ol maniman inap kisim gutpela save na tingting Kristen na dispela i winim mani. (Sindaun 2:​1-9; Saveman 7:12) Ol maniman wantaim ol rabisman, olgeta inap kisim gutpela nem long ai bilong Jehova. (Saveman 7:⁠1) Long lain Kristen long taim bilong Pol, planti ol i man i no gat nem, olsem ol wokboi nating, tasol ol i gat rot bilong mekim sampela samting na ol i mekim gutpela wok long dispela.​—⁠1 Korin 1:​26-29.

Lo Bilong Baibel Long Man i Stap Bos

Long marit Kristen, meri i mas aninit long man bilong em​—⁠dispela pasin i helpim famili olgeta. (Efesus 5:​22-24) Yu ting dispela i daunim meri? Nogat tru. Man na meri i wok wantaim. Sapos man i mekim wok bos bilong em long pasin bilong Krais, bai em i no pasim tumas meri bilong em; bai em i givim rot long meri long mekim wok long save na strong bilong em. (Efesus 5:​25, 31) Sindaun sapta 31 i stori long meri marit “i gat gutpela pasin tru.” Dispela meri i mekim planti samting em i amamas long mekim na em i mas i gat save long mekim. Tru, em i mas aninit long man bilong em, tasol dispela i no mekim em i bel hevi.​—⁠Sindaun 31:​10-29.

Na Baibel i no orait long meri i go pas o bosim ol brata long kongrigesen Kristen. (1 Korin 14:34; 1 Timoti 2:​11, 12) Olsem wanem? Ol meri Kristen i bel hevi na pilim olsem dispela i pasim ol tumas? Nogat. Planti tru ol i amamas i gat ol man bilong lukautim dispela wok Kristen long pasin God i makim. Ol i amamas long gutpela wok wasman na wok tisa ol elda i mekim bilong helpim ol, na ol yet i wok strong long mekim wok bilong autim tok na kamapim ol disaipel. (Matyu 24:14; 28:​19, 20) Dispela wok bilong ol meri Kristen i karim planti kaikai, na ol i kisim biknem long ai bilong God.​—⁠Song 68:11; Sindaun 3:35.

Samting i Pasim Ol Yangpela

Sampela yangpela i les long i stap aninit long papamama; ol i tok papamama i pasim ol tumas. Tasol Baibel i tok ol i mas aninit long papamama. (Efesus 6:⁠1) Ol yangpela Kristen i gat gutpela tingting ol i no save tingim ol samting papamama i pasim ol long mekim na kros kros; ol i amamas long ol samting ol inap mekim, olsem ol i fri long mekim planti samting, long wanem, ol i no gat ol wok olsem bilong man i bikpela pinis. Ol i ken mekim wok long yangpela bilong ol na strong bilong skin bilong ol na redi long taim ol i bikpela pinis.

Wanpela brata bipo em i mekim wok sekit long Brasil em i tingim wanpela manki i gat 12-pela krismas. Manki i stap long wanpela liklik lain Witnes longwe long kongrigesen na em i no inap mekim planti wok. Brata i lukautim ol pepa ripot samting em i wok mani na em i no gat bikpela hap taim bilong helpim dispela liklik lain tasol em i wokim rot na dispela manki i helpim em. Manki i lain long ol pepa i stap we na em i redi oltaim long helpim ol brata. Em i gat laik long mekim wok na dispela i strongim ol narapela, na em i save wok gut wantaim ol long autim tok. Nau dispela yangpela man em i wanpela elda.

I gat planti samting i save pasim yumi, olsem sampela i gat sik, o ol i marit na poroman bilong ol i no bilip. Ol i laik bai i no gat ol dispela samting i pasim ol, tasol maski, ol inap i stap amamas. Dispela nius i bin stori long planti manmeri i gat kain hevi olsem, tasol ol i bilip strong long Jehova na mekim ol samting ol inap mekim, na dispela i strongim tru ol narapela.

Aposel Pol i stori long pasin i stap long taim bilong em: “Ating yu bin i stap wokboi o wokmeri nating na God i singautim yu? Orait yu no ken bel hevi long dispela. Tasol sapos i gat rot bilong yu kamap fri, orait i gutpela sapos yu bihainim dispela rot.” (1 Korin 7:21) Em gutpela tingting! Senis inap kamap. Samting i pasim yu long nau, ating bihain bai em i no pasim yu moa. Ol yangpela i save go bikpela. Ol poroman i birua, sampela ol i kisim bilip. Man i gat hevi long mani, sindaun bilong em inap kamap gutpela. Man i gat sik em inap orait gen. Tasol long sampela samting Jehova i mas kamapim nupela taim pastaim na bai senis i kamap. Tasol sapos yu les na bel hevi, long wanem, yu no inap mekim samting ol narapela inap mekim, dispela bai helpim yu olsem wanem?

Yu bin lukim ol pisin i flai antap? I olsem ol i stap fri tru, a? Ating yu laik flai olsem. Tasol yu no inap mekim, na bihain tu bai yu no inap flai olsem ol pisin! Tasol yu no bel nogut na toktok planti long dispela, a? Yu amamas long samting yu inap mekim taim yu inap wokabaut hia long graun. Olsem tasol, maski yumi gat wanem kain sindaun, yumi mas tingim ol samting yumi inap mekim; yumi no ken bel hevi long ol samting yumi no inap mekim. Olsem bai yumi stap belgut, na amamas long mekim wok bilong Jehova.​—⁠Song 126:​5, 6.

[Piksa long pes 28]

Yu ting papamama i pasim yu tumas?