Taim Yu Lainim Man, Putim Tok i Go Daun Long Bel
1, 2. (a) Yumi mas mekim wanem na bai yumi inap helpim narapela man long laikim tumas Jehova na ol lo bilong em? (b) Bilong wanem yumi no ken putim tok long tingting tasol bilong man?
OL MAN inap wokim kwik wanpela haus kunai, tasol bilong wokim wanpela gutpela haus bilong king ol i mas lusim bikpela hap taim. Na i wankain tu long kamapim disaipel. Wok bilong helpim narapela man long laikim tumas Jehova na ol lo bilong em, em i bikpela wok. Yumi mas lusim bikpela hap taim bilong wokim na mekim gut wok bambai yumi inap kamapim kain “gutpela haus olsem.”
2 Yumi no ken lainim tasol tingting bilong man, olsem givim save long em. Nogat. Yumi mas putim tok i go daun long bel bambai em i ken tingim gut. Provep 3:1 i tok: “Pikinini, mi laik skulim yu nau, na yu no ken lusim tingting long dispela tok. Nogat. Oltaim yu mas tingim gut.” Yumi mas lainim ol Baibel stadi bilong yumi long ol tok bilong Baibel. Na yumi mas putim dispela tok i go daun long bel bilong ol. Yes, yumi mas putim tok i go daun long bel bilong man bambai dispela man i ken kamap strong na pas tru long Jehova na dispela “haus” i no ken paia.
3. (a) Bilong putim tok i go daun long bel bilong ol man, bilong wanem yumi mas “skulim ol gut”? (b) Nau yumi laik skelim sampela tok bilong helpim yumi long skulim gut ol man na yumi mas tingim husat?
3 Em hatwok liklik. Bilong putim tok i go daun long bel na wokim strongpela haus, yumi mas i gat ol gutpela samting bilong wokim haus na yumi mas mekim gutpela wok tisa. Yumi mas “skulim ol gut.” (2 Timoti 4:2) Yumi no ken tokim tasol ol Baibel-stadi long tok i tru. Sapos yumi laik “skulim ol gut,” yumi mas helpim ol long tingim ol tok yumi lainim ol long en na skelim gut. Save bilong yumi na gutpela wok tisa yumi mekim i no dispela samting i mekim na ol i kamap strong; nogat; blesing bilong Jehova i mekim. (1 Korin 3:5, 6) Tasol i gat sampela tok nau yumi ken skelim bilong helpim yumi long skulim gut ol man na putim tok i go daun long bel. Taim yu skelim ol dispela tok, yu mas tingim ol manmeri yu save skulim ol, olsem ol Baibel-stadi bilong yu na ol pikinini bilong yu.
Makim Gutpela Pasin Ol i Ken Bihainim
4. (a) Kolim wanpela samting Jisas i mekim na em i skulim gut ol man. (b) Taim yu skulim narapela man, bilong wanem yu mas bihainim ol gutpela pasin yu laik lainim em long en?
4 Krais Jisas em i nambawan gutpela tisa. Sapos yumi bihainim pasin bilong em bai yumi inap putim gut tok long bel bilong ol man. Em i mekim wanem na em i skulim gut ol man? Wanpela samting em olsem: Em i bihainim ol tok em i lainim narapela man long en. Em i makim gutpela pasin ol disaipel bilong em i ken bihainim. (Jon 13:15; 1 Pita 2:21) Olsem na namba wan tok bilong helpim yumi, em olsem: Yumi mas makim gutpela pasin. Yumi yet yumi mas bihainim ol gutpela pasin Kristen yumi laik kirapim narapela man long bihainim. I olsem Jisas i tok: “Skulboi ․․․ i skul pinis pastaim, orait em i wankain olsem tisa bilong en”—Luk 6:40.
5. Baibel i tok wanem na yumi ken save yumi mas mekim stretpela pasin bambai yumi inap putim tok i go daun long bel bilong narapela man?
5 Planti taim Baibel i soim yumi, yumi mas makim gutpela pasin bambai yumi ken putim tok i go daun long bel bilong narapela man. Diuteronomi 6:4-6 i tok, papamama i mas laikim tumas Jehova ‘long bel bilong ol’ pastaim bambai ol inap skulim gut ol pikinini long ol tok bilong Jehova na putim ol dispela tok i go daun long bel bilong pikinini. (Provep 20:7) Jisas i krosim ol Farisi, long wanem “ol i save mekim planti tok, tasol ol yet ol i no save bihainim.” Olsem na “bel bilong dispela lain manmeri i pas pinis.”—Matyu 23:3; 13:13-15.
6. Bilong wanem i bikpela samting yu mas bihainim ol tok yu lainim narapela man long en? (Rom 2:21-23)
6 Olsem na yumi mas bihainim ol tok yumi laik lainim ol narapela man long en. Olsem: Sapos yu laik helpim ol Baibel-stadi o ol pikinini bilong yu bambai ol i laikim tumas Jehova na ol i laik tru long mekim wok bilong Jehova, orait, long taim yu beten na long ol toktok na pasin bilong yu yu mas kamapim bel bilong yu, yu yet yu laikim tumas Jehova na yu laik tru long mekim wok bilong Em. Sapos yu laik lainim ol gut bambai ol i strong long bihainim ol lo bilong Baibel, orait, yu yet yu mas bihainim ol dispela lo. Yu no ken kalapim liklik long ol tok o pasin bilong yu. Pasin yumi mekim, dispela inap skulim ol narapela man, na skulim gut ol pikinini, winim ol tok yumi mekim. Taim ol i lukim yumi, yumi bihainim ol tok yumi lainim ol long en, dispela i helpim yumi long putim gut ol tok long bel bilong ol.
Mekim Askim
7, 8. (a) Wanem samting inap helpim yumi long kamap gutpela tisa na putim tok i go daun long bel bilong ol man yumi lainim ol? (b) Olsem wanem ol askim inap helpim yumi long putim tok i go daun long bel bilong man?
7 Namba tu samting yumi ken mekim, em Jisas tu i save mekim na em i gutpela tisa tru, em olsem: yumi ken mekim ol askim. Jisas i save moa long pasin bilong kirapim tingting bilong ol man na bai ol i skulim gut ol tok long tingting. (Matyu 17:24-27) Sapos yu mekim ol askim, dispela bai helpim yu long kamap gutpela tisa na bai yu inap putim gut tok i go daun long bel bilong man yu laik lainim ol. Olsem wanem dispela pasin inap helpim yu?
8 Taim yu givim askim long sumatin, yu inap save em i kisim gut ol tok yu lainim em long en o nogat. Sapos em i no kisim gut ol tok na bilipim, orait, bel bilong em i no inap holimpas ol dispela tok, a? (Luk 8:15) Na tu, sapos yu laik putim tok i go daun long bel bilong man, pastaim yu mas save wanem kain tingting i stap long bel bilong em. Em i kisim pinis sampela tingting na ating sampela bilip bilong lotu giaman i pas strong long bel bilong em. Yumi no inap save long ol tingting i stap long bel bilong man, olsem na yumi mas mekim ol askim bilong kirapim dispela man long kamapim tingting bilong em na bai yumi ken save long em. Olsem:
9, 10. Stori long olsem wanem yumi ken mekim wok long askim bilong kirapim man long kamapim tingting bilong em.
9 Sapos yu stadi wantaim wanpela man na yutupela i toktok long ol tok bilong sapta 10 bilong buk Yu Inap i Stap Oltaim long Paradais long Graun. Nem bilong dispela sapta em olsem: “Ol Spirit Nogut i Gat Strong.” Ating yutupela i toktok long paragraf 18 long pes 97 na askim long buk i tok: “Sapos man i laik lusim ol wok bilong ol spirit nogut, em i ken bihainim wanem gutpela pasin bilong ol Kristen bilong Efesas?” Ating sumatin i bekim stret tok long paragraf, tasol em i gat wanem tingting tru long dispela samting? Ating inap planti yia pinis em i bilip long wok bilong ol spirit. Olsem wanem? Nau em i save em i mas lusim ol dispela kain wok, olsem kain kain wok marila na posin samting? Orait, yu ken givim askim long em, olsem: ‘Yu ting olsem wanem long dispela samting? Yu ting yu yet yu mas mekim wanem bilong bihainim dispela tok?’ Ol tok em i bekim em i helpim yu long save, dispela tok i go daun pinis long bel bilong em na em i bilip long en o nogat.
10 Na sapos yu stadi wantaim pikinini bilong yu na yutupela i toktok long ol tok bilong sapta 26, nem bilong en: “Yumi Gat Pait long Mekim Pasin i Stret.” Long pes 220 askim 8 (b) i tok: “Gutpela sapos yumi kisim wanem tingting olsem bilong wanpela yangpela man?” Ating pikinini i kolim sampela tok bilong paragraf na bekim dispela askim, tasol em i no kamapim tingting tru bilong em. Orait, long pasin isi yu mas kirapim em long kamapim tingting tru bilong em. Yu ken givim askim long em, olsem: “Yu ting olsem wanem long dispela samting? Yu ting tingting bilong dispela yangpela man i stret?” O ating yu ken stori long wanpela samting em inap kamap, olsem: “Sapos long skul sampela pikinini i smok na ol i laik givim sigaret long yu, bai yu mekim wanem? Olsem wanem sapos bikpela lain liklik ol i bung na ol i lap na tok bilas long yu, long wanem yu no laik kisim?” Ol kain askim olsem inap helpim yu na bai yu inap save long tingting tru i stap long bel bilong pikinini.
11. (a) Taim yumi mekim ol askim, yumi mas was gut long wanem samting? (b) Bilong wanem ol papamama i mas was gut taim pikinini i kamapim tingting kranki? (Kolosi 3:21)
11 Tasol yu mas was gut. Ating sampela taim bai yu kirap nogut long ol tok Baibel-stadi o pikinini i bekim long yu o bai yu bel hevi long ol tok em i bekim long yu. Sapos olsem, orait yu mas mekim wanem? Sapos yu laik stretim tingting bilong em, tasol yu pilim olsem em bai sem, orait yu no ken subim em. Ating yu ken tok: “Orait yumi stadi i go na bihain yumi ken toktok moa long dispela samting.” (Jon 16:12) Ol papamama i mas was gut tru long dispela samting. Taim pikinini i kamapim tingting kranki, yu no ken kros. Nogut yu krosim pikinini na bai em i no laik toktok moa wantaim yu long ol tingting bilong em. Sapos yu krosim em bai em i surik long kamapim tingting bilong em long yu, na olsem wanem bai yu inap save long ol tingting i stap long bel bilong em?
Helpim Ol long Save i Gutpela Ol i Bihainim Lo Bilong God
12, 13. (a) Sapos stadi o pikinini i pilim ol gutpela samting inap painim em taim em i bihainim ol lo bilong God, olsem wanem dispela samting inap helpim em? (b) Yumi mas mekim wanem na bai yumi helpim sumatin long save i gutpela em i mas bihainim ol lo bilong Jehova?
12 Namba tri samting yu ken mekim, em olsem: Yu ken helpim Baibel-stadi o pikinini bilong yu long save sapos em i bihainim lo bilong God em i bihainim gutpela tingting. (Diuteronomi 4:5, 6; 10:12, 13) Em gutpela rot bilong putim tok i go daun long bel. Long wanem sapos long bel em i bilip tru olsem pasin bilong bihainim lo bilong Jehova inap helpim em, ating dispela bai kirapim em long givim bel tru long Jehova na mekim ol samting bambai Jehova i ken amamas long em.—Sam 112:1.
13 Olsem wanem yumi inap helpim Baibel-stadi o pikinini bilong yumi bambai em i save, sapos em i bihainim ol lo bilong God, dispela bai helpim em? Orait yumi ken tok piksa olsem: Lo bilong Jehova i olsem wanpela toksave i tok: “I Tambu.” Tru, dispela i toksave long yumi, tasol sapos ol i raitim sampela tok moa na kamapim as bilong dispela tambu, dispela bai helpim yumi moa na kirapim yumi long bihainim. Olsem: Sapos ol i raitim tok olsem: “I Tambu—Dok Nogut i Stap,” orait, nau bai yumi no laik brukim dispela tambu. Yumi no laik kisim nogut.
14. (a) Olsem wanem yu ken helpim stadi o pikinini long skelim wanpela pasin, i gutpela em i bihainim o nogat? (b) Wanem ol skripsa i soim yumi, yumi mas tokim man long as bilong ol tambu bambai yumi skulim gut em?
14 Na i wankain tu long ol tambu God i putim. Yumi mas lainim pikinini na Baibel—stadi long ol dispela tambu, tasol em i mas save tu long as bilong en. Yumi mas helpim em long save, sapos em i bihainim ol dispela lo em i bihainim gutpela tingting, na sapos em i sakim, em i mekim longlong pasin. Em i mas save long ol samting nogut inap painim em sapos em i kalapim lo bilong God. Baibel yet i save stori olsem. Lukim Provep 22:24, 25; 23:4, 5; 24:15, 16, 19, 20. Baibel i kolim ol samting nogut i save painim man i mekim pasin i no stret.
15. Kamapim ol askim na skripsa i stap long dispela paragraf na stori long olsem wanem i gutpela yumi mas bihainim tambu bilong God long stil na pamuk.
15 Orait nau yumi ken skelim ol dispela askim na skripsa bilong helpim yumi long save bilong wanem i gutpela yumi mas bihainim lo bilong God:
Giaman na stil: Pasin bilong mekim tok giaman o stil em i nogutim yumi olsem wanem? (Provep 15:27; 20:10; Revelesen 21:8) Bilong wanem i gutpela yumi mas mekim stretpela pasin long ol narapela manmeri? (Provep 3:3, 4; 12:19; Hibru 13:18)
Pamuk: Dispela kain pasin inap nogutim yumi olsem wanem? (Provep 5:9; 7:21-23; 1 Korin 6:18) Em inap nogutim ol narapela man olsem wanem? (1 Tesalonaika 4:6; 1 Korin 5:6; Hibru 12:15, 16) Sapos yu bihainim ol tambu bilong Baibel, dispela bai helpim yu olsem wanem? (Provep 5:18, 19; Hibru 13:4)
Taim yu toktok pinis olsem long wanpela lo bilong Baibel, ating yu ken askim olsem: ‘Yu ting Jehova i laik helpim yumi na em i putim dispela lo? O yu ting ol lo bilong em i pasim yumi long kisim sampela gutpela samting?’
16. Sapos yu stori olsem wantaim Baibel-stadi o pikinini, ating dispela bai helpim em long mekim wanem?
16 Taim yu mekim stadi, yu mas toktok olsem long lo bilong God long pasin bilong dring spak, na baim takis, na smok, na blut samting. Olsem na Baibel-stadi bilong yu o pikinini bilong yu inap save olgeta lo bilong God i gutpela na i bilong helpim yumi. I no olsem em i mas save long as bilong olgeta lo bilong God na bai em i bihainim. Nogat. Tasol sapos yu stori gut long as bilong sampela lo, ating dispela bai kirapim bel bilong em na bai em i gat laik long bihainim ol lo bilong God. Na taim traim olsem “paia” i painim em, bai em i no pundaun, bai em i bihainim lo bilong God.—1 Korin 3:13.
Helpim Ol Bai Ol i Save long God
17. I gat wanem samting moa yu ken mekim bilong putim tok i go daun long bel bilong stadi ol pikinini?
17 Namba foa samting yu ken mekim, em olsem: Helpim stadi o pikinini bai em i save long God. (Jon 17:3) Yu mas helpim em bai em i save God em i stap na em i gat nem, tasol yu mas helpim em bai em i save tru long God. Dispela bai kirapim bel bilong em, long wanem save man i kisim long God, dispela bai kirapim em long givim bel bilong em long God.
18. Taim yu mekim stadi olsem wanem yu ken stori long ol gutpela pasin bilong Jehova?
18 Orait, olsem wanem yu ken helpim stadi o pikinini na em i ken save tru long God? Em i mas save long ol pasin bilong God. Olsem na taim yu mekim stadi, oltaim yu mas stori long ol pasin bilong God na helpim sumatin long tingim ol gutpela pasin bilong God. Maski wanem wanem samting yu toktok long en, yu ken mekim olsem. Taim yu toktok long God i salim Krais bilong baim bek ol man, yu ken askim olsem: ‘Olsem wanem dispela samting i kamapim ples klia pasin sori bilong God, em i laikim tumas yumi ol manmeri?’ O taim yu toktok long God i larim pasin nogut i stap na as bilong dispela samting, yu ken tok: ‘Olsem wanem dispela samting i kamapim pasin isi bilong God, em i no les kwik long ol man?’ O ‘Taim God i wok long stretim hevi i kamap long pasin bikhet long Iden, olsem wanem em i bihainim gutpela tingting tru?’. Sapos yu mekim kain askim olsem na kirapim tingting bilong stadi o pikinini, yu helpim em long givim bel olgeta long Jehova. Bai em i tingim Jehova i olsem wanpela Man em i stap klostu tru long em na em i laikim ol pasin bilong em.
19, 20. (a) I gat wanem samting moa man i mas mekim bambai em i ken save tru long God? (b) Ekspiriens long dispela paragraf i helpim yumi olsem wanem bambai yumi ken save, yumi mas makim gutpela pasin bilong beten?
19 Na sapos yu laik save gut long wanpela man yu mas toktok wantaim em. Olsem na yu mas kirapim stadi o pikinini long toktok wantaim Jehova. Yu mas lainim em long mekim beten bambai em i ken i stap klostu long Jehova, olsem pren tru bilong em. Helpim em long save i gat kain samting i stret em i ken beten toktok wantaim God long en. (1 Jon 5:14) Kirapim em long laikim tru Jehova, long wanem, Em i save harim beten bilong man na helpim em. (Sam 65:2) Kirapim em long kamapim ol tingting tru i stap long bel bilong em na “autim olgeta hevi na olgeta tingting” bilong em long Jehova.—Sam 62:8.
20 Yu yet yu inap makim gutpela pasin ol i ken bihainim. Olsem wanem? Taim yu mekim beten yu kamapim bel bilong yu, yu givim bel olgeta long Jehova? Dispela inap helpim tru ol man yu laik lainim ol na ol pikinini bilong yu. Lukim dispela gutpela ekspiriens:
Sampela yia bipo wanpela brata na meri bilong em ol i wok long lainim liklik pikinini man bilong ol long mekim beten. Manki hia i gat 3-pela krismas. Wanpela apinun em i beten na em i askim Jehova long lukautim Mama na Papa, na bihain em i askim Jehova long lukautim “Wali” tu. Papamama i no save husat dispela “Wali.” Tasol taim manki hia i beten, oltaim em i save kolim nem bilong “Wali” tu. Bihain bihain ol i save, em i beten askim Jehova long lukautim ol brata long Malawi, tasol em i kolim kranki dispela tok Malawi. (Long dispela taim ol man i mekim nogut long ol brata long Malawi.) Pikinini i harim papamama i beten askim Jehova long helpim ol brata, long Malawi na em i bihainim pasin bilong ol. Papamama i amamas tru!
Olsem na yumi save, yumi yet mas makim gutpela pasin bilong beten na bai ol pikinini bilong yumi na ol Baibel-stadi tu i bihainim dispela pasin.
Gutpela Pe
21. (a) Ol wokman Kristen i ken tingting long kisim wanem samting, olsem 1 Korin 3:14, 15 i tok? (b) Dispela “pe” em laip i stap oltaim long Nupela Taim God i laik kamapim o olsem wanem?
21 Olsem na sapos yumi laik lainim gut ol narapela man bambai ol inap sanap strong na “paia” i no ken bagarapim ol, na yumi laik helpim ol long i stap gut long ai bilong Jehova na pas tru long Em, orait, yumi mas putim ol tok i tru i go daun long bel bilong em. Ating em i hatwok liklik, tasol gutpela samting bai kamap. Pol i tok: “Sapos wanpela man i wokim haus antap long dispela pos, na sapos haus bilong em i no paia, orait bai dispela wokman i kisim pe. Tasol sapos haus bilong wanpela wokman em i paia olgeta [long wanem em i no wokim haus long wanpela samting i no inap paia—em i no lainim gut man], orait olgeta wok bilong dispela man bai i lus [“paia” bai bagarapim ol samting em i bin wokim na i lus]. Na wokman em yet bai i stap gut, tasol em i olsem man yumi kisim bek long paia.” Gutpela wokman bai kisim wanem “pe”? Ol i no tingim prais bilong laip i stap oltaim long Nupela Taim God bai kamapim. Nogat. Long wanem, Pol i tok, man i no wokim gut haus em i no kisim “pe,” tasol em bai i stap gut. “Em i olsem man yumi kisim bek long paia.”—1 Korin 3:14, 15.
22, 23. (a) Aposel Pol i kisim wanem “pe” long ol brata Kristen long Tesalonaika? (b) Yu laik kisim wanem “pe”? Yu mas mekim wanem na bai yu inap kisim?
22 Orait, wanem dispela “pe” o “prais”? Sampela tok Pol i mekim long ol Tesalonaika i helpim yumi long save long dispela samting. Ol man i mekim nogut long ol Kristen long Tesalonaika na Pol i salim pas long ol na em i tok: “Bihain bai Bikpela bilong yumi Jisas em i kam bek na yumi sanap long pes bilong em. Long dispela taim bai mipela kisim wanem samting? Bai mipela i belgut long wanem samting? Bai mipela i amamas long wanem prais? Yupela tasol. Yes, yupela yet i olsem biknem na amamas bilong mipela.” (1 Tesalonaika 2:19, 20) Pol i bin helpim ol dispela Kristen long kirap bihainim rot i go long laip. Na maski ol man i mekim nogut long ol, ol i sanap strong. Gutpela pe Pol i kisim em olsem: Em i amamas long lukim ol i sanap strong maski hevi i painim ol. Dispela samting i soim yumi, Pol i bin mekim gut wok—“haus” em i wokim i no paia.
23 Na i wankain nau long yumi. Yumi tu yumi laik kisim dispela gutpela pe, a? Yumi laik tru bai ol manmeri yumi lainim ol, ol i ken sanap strong na sakim olgeta hevi na traim i painim ol. Tru tumas, taim “paia” i painim ol stadi bilong yumi o ol pikinini bilong yumi na ol i sanap strong, yumi save amamas, a? Taim ol i karim hevi na sanap strong, yumi save yumi bin mekim gut wok. Mipela laik bai yu ken kisim dispela “pe,” long wanem yu wokim “haus” i sanap antap long pos stret na yu wokim long ol samting i no save paia na Jehova i blesim wok bilong yu.
Yu Inap Tingim?
Bilong putim tok i go daun long bel—
◻ Bilong wanem yu mas makim gutpela pasin?
◻ Wanem ol kain askim i gutpela? Bilong wanem ol i gutpela?
◻ Bilong wanem sumatin i mas save sapos em i bihainim ol lo bilong God dispela bai helpim em?
◻ Bilong wanem sumatin i mas lain long beten?
[Piksa long pes 19]
Olsem wanem? Taim yu beten yu kamapim bel bilong yu, yu givim bel olgeta long Jehova? Dispela inap helpim pikinini bilong yu na bai em i givim bel long Jehova