“Yumi Amamas Long ol Lapun!”
JOP i tok: “Save i stap namel long ol lapun na gutpela tingting i stap long ol man i gat bikpela krismas, a?” (Jop 12:12, NW) Na Solomon i tok: “Ol man i lukim waitpela gras bilong ol lapun, na ol i save, ol lapun i bin bihainim stretpela pasin na ol i stap longpela taim long graun. Olsem na ol i givim biknem long ol.” (Provep 16:31) Long taim bilong Jop na Solomon ol man i save amamas long ol lapun na harim gut tok bilong ol. Na planti taim Baibel i stori long ol yangpela i bin poromanim ol lapun na dispela samting i bin helpim ol.
Tingim Rut. Em i stap wantaim tambu mama bilong em inap planti yia, na em inap lukim gutpela pasin bilong Neomi na tingim gut pasin bilong em. Rut i poromanim Neomi na dispela samting i kirapim bel bilong Rut na em i gat laik long lotuim Jehova. Olsem na taim Neomi i tok Rut i mas lusim em na Rut i mas go bek long ples bilong em, em ples bilong ol man i lotuim ol god giaman, Rut i no laik lusim Neomi. Rut i tok: “Olgeta ples yu go long en, mi tu bai mi go. Olgeta ples yu stap long en, mi tu bai mi stap. Lain bilong yu bai i kamap lain bilong mi tu. Na God bilong yu bai i kamap God bilong mi tu” (Rut 1:16, 17) Rut i stap pren bilong Neomi na em i kamap “gutpela meri.”—Rut 3:11.
Timoti tu i poroman wantaim wanpela lapun na dispela samting i bin helpim em. Inap planti yia em i bin raun wantaim aposel Pol. Na taim Pol i stap long kalabus, em i save salim pas i go long Timoti na ol dispela pas i strongim Timoti. Tok bilong ol dispela pas i “kirapim tingting” bilong Timoti na bai Timoti i ting long dispela presen bilong God i stap long em na em i ken “kirapim moa dispela presen, olsem man i winim paia na i kirap bikpela.” (2 Timoti 1:6-8) Timoti i poromanim Pol na em i lain gut, olsem na taim Pol i raitim pas i go long ol Filipai, Pol i tok, “Mi no gat narapela man olsem Timoti, em i wanbel wantaim mi. Bel bilong em i save tingting planti long helpim yupela.”—Filipai 2:20.
Tasol long nau, long planti hap bilong graun, ol yangpela i no amamas long ol lapun; ol i no save harim tok bilong ol. Tasol olsem wanem long lain Kristen? Ol Kristen tru ol i save amamas long ol lapun o nogat? Ol i save laikim tru ol lapun! Ol i save ol lapun long lain bilong ol, ol i bilip na givim bel long God, na ol i bin i stap longtaim, olsem na ol i gat save pinis. Wanpela sista i tok: “Taim pasin bilong dispela graun i putim hevi long mi, mi save lukluk i go long ol lapun long kongrigesen, em ol i bin karim hevi na sanap strong inap planti yia, na dispela samting i strongim mi.” Wanpela brata i gat 34 krismas em i stori long ol lapun i stap gut long Jehova na em i tok: “Ol i bin helpim mi long kain kain rot. Taim mi laik save olsem wanem mi ken skelim gut ol wok mi mas mekim, wanpela lapun brata i gat 72 krismas em i tokim mi, ‘Yu mas tingim wok bilong Jehova pastaim. Em hatwok. Tasol sapos yu tingim Kingdom pastaim, bai yu bihainim gutpela tingting na i stap stret na mekim gut ol wok bilong yu.”’
Wanpela lapun brata i gat 87 krismas em i kisim bikpela sik. Wanpela elda i kisim wanpela brata i lusim wok autim tok na tupela i go lukim dispela lapun. Brata i lusim wok autim tok i lukim lapun brata hia i gat bikpela sik na em i krai. Em i tok: “Yu bin i stap gutpela pren bilong mi. Sapos yu dai bai mi hevi tru.” Lapun brata i tok: “Na mi sori long yu.” Brata i lusim wok autim tok i krai yet na em i tok: “Tasol bai mi lukim yu long Nupela Taim bihain sapos dispela Nupela Taim i kamap.” Maski lapun brata i gat bikpela sik, em i kirap sindaun long bet na em i tok strong olsem: “Em bai kamap.” Brata i lusim wok autim tok em i no pilim dispela tok bilong lapun em bilong strongim em, tasol elda i pilim tru strongpela bilip bilong dispela lapun. Em i tok, “Bilip bilong em i strongim mi.”
Ol lapun brata sista i save tingim ol samting i bin painim ol taim ol i wokabaut long pasin Kristen na ol inap givim gutpela tok long yumi bilong helpim yumi. Wanpela lapun i givim gutpela tok long ol brata bilong helpim ol long lukautim gut pikinini bilong ol, em i tok: “Planti taim yu mas holim ol liklik pikinini bilong yu, long wanem kwiktaim bai ol i go bikpela. Tingim ol pastaim na lukautim gut ol. Yu gat wok long helpim ol long kamap disaipel na yu inap helpim ol i kamap gutpela disaipel tru.” Narapela lapun i tok: “Taim hevi bilong dispela graun i painim yu, o Seten i traim yu, yu no ken lusim tok i tru. Wok yet long bihainim, long wanem em rot bilong yu ken i stap amamas.” Tupela lapun i stap long Nu Silan na inap 43 yia ol i sindaun long wanpela hap na autim tok long en, tupela i tok: “Sapos yu inap, gutpela sapos yu stap long wanpela hap tasol na yu no ken raun raun. Sapos yu mekim olsem, olgeta manmeri long dispela hap bai save long yu na pasin bilong yu, na dispela samting inap kirapim ol long laikim tok i tru na kirapim yu long was gut na mekim gutpela pasin tasol.”
Planti lapun brata sista ol i no inap autim tok long ol haus olsem ol yangpela inap mekim. Sampela i mas slip tasol long bet. Sampela i gat sik na ol i karim bikpela pen. Wanpela lapun sista i tok: “Mi no pret long kamap lapun. Tasol mi no laikim ol pen na hevi bilong lapun.” Tasol dispela sista i strong yet long mekim ol wok Kristen!
Olsem wanem? Yu wok long kisim save long ol lapun brata sista? Yu wok long bihainim ol gutpela pasin bilong ol? Tru tumas, ol lapun brata sista Kristen ol inap helpim yumi sapos yumi lukim gut pasin bilong ol na i go toktok wantaim ol. Wanpela yangpela Kristen i tok: “Ol lapun brata sista i bin i stap gut long Jehova, ol i mekim gutpela pasin mi mas bihainim. Ol i givim bel olgeta long tok i tru, na mekim pasin sori, na bilip bilong ol i strong, na ol i pilim tru hevi bilong ol narapela man, na ol i wok strong long mekim wok bilong God. Long ai bilong mi ol i olsem wanpela gutpela samting, olsem wanpela gutpela diwai i putim planti plaua, o gutpela paia long taim bilong bikpela kol.” Tru tumas, yumi amamas long ol lapun!