I Stap na Wok Bilong Jisas
Ating Jon i Sot long Bilip?
Inap wanpela yia pinis Jon Bilong Baptais i stap kalabus. Na nau em i harim tok olsem Jisas i bin kirapim bek pikinini man bilong meri wanpis long Nen. Tasol Jon i laik save long as tru bilong ol wok Jisas i mekim. Olsem na em i salim tupela disaipel bilong em i go givim askim long Jisas, olsem: “Ating yu dispela man i mas kam, o bai mipela i mas wetim narapela?”
Tupela yia bipo, Jon i baptaisim Jisas na em i lukim spirit bilong God i kam daun long Jisas, na em i harim maus bilong God i tok em i belgut long Jisas. Olsem na bilong wanem Jon i givim dispela askim long Jisas? Sampela man i tok, ating bilip bilong Jon i no strong moa. Tasol yumi save dispela tok i no stret, long wanem Jisas i bin litimapim nem bilong Jon long dispela taim. Orait, bilong wanem Jon i bin mekim dispela askim?
Ating Jon i laik harim Jisas yet i tok, tru em i Krais. Dispela bai strongim Jon, long wanem em i stap kalabus. Tasol i gat bikpela samting moa Jon i laik save long en, olsem: Bai i gat narapela man i mas kam bihain long Jisas, olsem senis bilong em, bilong inapim olgeta samting ol profet i tok Krais bai mekim?
Jon em i save long ol tok profet bilong Baibel na em i save, Krais o man God i makim em bai mekim wok king na kisim bek ol man. Jisas i baptais inap planti mun pinis, tasol Jon i stap kalabus yet. Olsem na Jon i laik save, Jisas em i man bilong kamapim Kingdom bilong God wantaim strong bilong en long graun, o ol i mas wetim narapela man i kam bihain na em bai mekim olgeta samting ol profet i tok Krais i mas mekim taim em i kisim biknem.
Jisas i no tok stret long ol disaipel bilong Jon olsem: ‘Yes, mi tasol, mi dispela man!’ Nogat. Tasol long dispela taim stret Jisas i kirap wokim planti mirakel, em i oraitim planti manmeri i gat kain kain sik. Na Jisas i tokim ol disaipel bilong Jon: “Yutupela i go tokim Jon long ol samting nau yutupela i lukim na harim. Ol aipas ol i lukluk gen, na ol lek nogut i wokabaut. Skin bilong ol lepraman i kamap klin, na ol [yaupas] ol i harim tok. Ol daiman i kirap, na ol rabisman i harim gutnius. Na ol man, bilip bilong ol i no bagarap long mi, em ol i ken amamas.”
Olsem na ating as bilong askim bilong Jon i olsem: Jisas bai mekim ol dispela wok tasol bilong helpim ol man, o em bai mekim sampela samting moa, olsem helpim Jon yet na bai em i lusim kalabus. Olsem na nau Jisas i tokim Jon, em i no ken wetim Jisas i mekim sampela samting moa.
Ol disaipel bilong Jon i go pinis, na bihain Jisas i tokim ol manmeri long Jon. Jisas i tok, Jon em i dispela “man bilong autim tok” bilong Jehova, em Malakai 3:1 i bin tok profet long em, na Jon em dispela man profet Ilaija i makim, olsem Malakai 4:5 na 6 i tok long em. Olsem na Jisas i litimapim nem bilong Jon na i tok, Jon em i wankain olsem olgeta profet i kamap paslain long em. Jisas i tok olsem: “Mi tok tru long yupela: Jon Bilong Baptais em i winim olgeta man i bin kamap long graun. Tasol man i liklik long kingdom bilong heven, em i winim Jon. Long taim bilong Jon Bilong Baptais inap long nau, ol man [i wok strong long kisim] kingdom bilong heven, na [ol man i wok strong ol i] holimpas.”
Jisas i tok, man i liklik long Kingdom bilong heven, em i winim Jon, na dispela tok i makim olsem bai Jon i no i stap long Kingdom bilong heven. Jon i redim rot bilong Jisas, tasol em i dai paslain long taim Jisas i wokim kontrak wantaim ol disaipel bilong em long mekim wok king wantaim em long Kingdom. Olsem na Jisas i tok, bai Jon i no i stap long Kingdom bilong heven. Jon bai stap long graun aninit long Kingdom bilong God. Luk 7:18-30; Matyu 11:2-15.
◆ Bilong wanem Jon i laik save Jisas em i “dispela man i mas kam” o ol “ i mas wetim narapela”?
◆ Jisas i kolim wanem ol tok profet i makim Jon?
◆ Bilong wanem Jon bai i no i stap long heven wantaim Jisas?