Nau Em Gutpela Taim Bilong Mekim Wok!

PETER i skul bilong kamap dokta. Klostu long skul bilong em i pinis em i harim gutpela tok bilong Baibel olsem God i laik kisim bek ol man. Taim em i winim skul na wok olsem dokta long wanpela haus sik, ol bos bilong em i no les long strongim em long kamap wanpela bikpela dokta bilong stretim sik bilong kru. Em nau, rot i op long em i ken kisim wanpela gutpela wok planti nupela dokta bai amamas long kisim.

Tasol Petera i pasim tok long bel olsem em bai sakim dispela wok. Bilong wanem em i mekim olsem? Em i no laik wok strong long kamap kain dokta olsem? Nogat. Peter i bin tingting gut long em bai mekim dispela wok o nogat. Bihain long em i dediket na baptais olsem wanpela Witnes Bilong Jehova, em i gat bikpela laik long tromoi bikpela hap taim moa long ol wok Kristen. Em i ting, bihain long em i kamap wanpela bikpela dokta bilong stretim sik bilong kru, dispela wok bai pulim bikpela hap taim na strong bilong em. Olsem wanem? Peter i bihainim tingting kranki, long wanem, em i sakim dispela gutpela wok, o em i bihainim gutpela tingting?

Ating sampela i ting Peter i bihainim tingting kranki. Tasol em i bin tingim sampela tok bilong Baibel olsem tok bilong Efesus 5:​15, 16. Aposel Pol i strongim ol wanbilip olsem: “Lukaut gut long wokabaut bilong yupela. Yupela i no ken wokabaut olsem man i no gat save. Nogat. Yupela i mas wokabaut olsem man i gat save. . . . Dispela taim nau yumi stap long en, em i taim nogut, olsem na yupela i mas lukaut, nogut dispela taim i lus nating.”

Tingim dispela tok, “i gat taim.” Em i kam long wanpela tok Grik na planti taim Baibel i save kolim dispela tok bilong makim wanpela taim o hap taim i gat sampela samting i kamap long en o bilong mekim wanpela kain wok. Olsem na Pol i tok, ol Kristen i mas makim taim bilong tingim ol bikpela samting. Tru tumas, ol i mas “skelim gut olgeta pasin na kisim ol pasin i gutpela tru.” (Filipai 1:10) Kristen i mas tingim wanem ol samting i bikpela samting.

Orait, God i gat wanem laik long taim bilong yumi? God i laik ol man i save givim bel long em, ol i mekim wanem? Ol tok profet bilong Baibel i kamapim klia olsem yumi stap long “taim bilong las de.” (Daniel 12:4; 2 Timoti 3:⁠1) Krais Jisas i tok klia long wanem samting bai i nambawan bikpela samting long taim bilong yumi. Em i tok, paslain long pasin nogut bilong dispela graun i pinis, ol man bai ‘autim gutnius long tok bilong Kingdom long olgeta hap bilong graun,’ na bihain pinis bai kamap.​—⁠Matyu 24:​3, 14.

Olsem na taim rot i op, olgeta taim yumi mas autim gutpela tok bilong Kingdom na kamapim ol disaipel. (Matyu 28:​19, 20) Taim dispela wok i pinis, em i no ken kamap gen. Nau em i laspela taim bilong mekim dispela wok, olsem na yumi mas givim bel long en bilong helpim ol man long kisim laip. “Nau tasol em i taim bilong God i mekim gut long yumi.” Tru tumas, “nau tasol em i taim bilong God i kisim bek yumi.”​—⁠2 Korin 6:⁠2.

Bihainim Gutpela Tingting

Peter​—⁠dispela yangpela man yumi stori long em pastaim​—⁠em i bin tingting gut na skelim wanem wanem samting em bai mekim. Em i save i no gat rong sapos em i stadi bilong kamap wanpela bikpela dokta bilong stretim sik bilong kru. Tasol wanem samting i bikpela samting long em? Em wok Kristen bilong em, long wanem, em i save i no gat bikpela hap taim moa i stap bilong mekim dispela wok. Tasol em i gat sampela wok moa em i mas mekim. Em i marit na em i mas lukautim meri bilong em, em i save mekim wok autim tok long olgeta de. (1 Timoti 5:⁠8) Na Peter i mas bekim sampela dinau em i bin kisim bilong helpim em long skul bilong kamap dokta. Orait, Peter i tingting long mekim wanem samting?

Em i tingting long mekim narapela kain wok olsem kisim piksa eksre na sken bilong ol man. Dispela kain wok i no inap pulim bikpela hap taim bilong Peter. Na bilong kisim save long dispela wok em bai skul long taim bilong wok. Yes, ating sampela bai ting dispela kain wok i no gat biknem, tasol em bai givim rot na Peter inap mekim bikpela wok moa long ol samting bilong spirit.

Na i gat narapela samting i helpim Peter long pasim tok long bel long samting em bai mekim. Peter i no kotim ol man sapos tingting bilong ol i narapela kain long tingting bilong em long dispela samting, tasol em i save, sapos Kristen i pas tumas long wok bilong skin, dispela inap pundaunim em. Wok inap mekim na em i les long mekim ol wok bilong spirit em i mas mekim. Bilong kamapim klia dispela samting, yumi ken skelim wok mani bilong narapela man.

Wanpela man bilong autim tok bilong Kingdom long olgeta de, em i gat save long wokim ol piksa. Em inap lukautim em yet long ol samting bilong skin, long wanem, em i baim ol piksa bilong em i go long ol man. Olsem na em inap lusim bikpela hap taim long mekim wok autim tok, na em inap lukautim em yet long skin. Tasol laik bilong em long wokim ol piksa i go bikpela moa. Em i kirap na mekim moa yet dispela wok, na em i poromanim moa ol man bilong wokim ol piksa samting. Em i lusim wok long autim tok bilong Kingdom long olgeta de, na bihain em i slek na lusim olgeta. Bihain, em i mekim ol pasin i no stret wantaim tok bilong Baibel, na nau em i no stap moa insait long kongrigesen Kristen.​—⁠1 Korin 5:​11-13.

Taim Bilong Yumi Em Bikpela Taim Tru

Yumi lotuim Jehova nau, na tru tumas yumi laik stap gut long em. Yumi save yumi stap long wanpela bikpela taim tru i no bin kamap bipo. Ating yumi mas senisim sampela pasin bilong yumi bambai yumi inap mekim yet wok bilong God na karim ol hevi i save kamap long nau. Yumi ken skelim pasin bilong yumi wantaim pasin bilong fama long taim bilong bungim kaikai. Em taim bilong bikpela wok na ol man i wok long fam ol i mas taitim bun, winim ol narapela taim, na ol i mas wok planti aua moa. Bilong wanem? Long wanem, taim i sot long bungim kaikai.

Dispela pasin nogut bilong graun klostu i laik pinis. Long nau, winim ol narapela taim bilong bipo, ol trupela Kristen i mas taitim bun bilong ol i ken bihainim pasin na lek bilong Jisas. Pasin bilong Jisas hia long graun i kamapim klia wanem samting i bikpela samting long em. Em i tok: “Nau em i tulait yet, na yumi mas mekim wok bilong God, em i bin salim mi na mi kam. Tudak bai i kamap, na ol man bai i no inap mekim wanpela wok.” (Jon 9:⁠4) Taim Jisas i toktok long tudak i laik kamap, em i tingim taim wok bilong em hia long graun bai i pinis na em i no inap mekim moa ol wok bilong Papa bilong em long heven, long wanem, ol bai kotim em, nilim em long pos, na kilim em i dai.

Tru, insait long 3-pela yia na hap Jisas i mekim wok, em i lusim hap taim bilong wokim ol mirakel na oraitim ol sikman. Tasol bikpela hap taim bilong em, em bilong autim gutpela tok bilong Kingdom na long autim tok “long ol man i stap long kalabus” bilong lotu giaman. (Luk 4:18; Matyu 4:17) Jisas i bin wok strong long autim tok, na tu, em i lusim hap taim long skulim ol disaipel bilong em na bai dispela i ken stap olsem as bilong ol save ol bai kisim, na ol inap mekim yet gutpela wok long autim tok. Olgeta taim Jisas i mekim ol samting bilong helpim wok bilong Kingdom na em i laik ol disaipel bilong em i mekim wankain samting.​—⁠Matyu 5:​14-16; Jon 8:⁠12.

Olsem Jisas, yumi lain bilong em long nau, yumi mas tingting long i stap bilong ol man olsem Jehova i save tingting long en. Taim i sot pinis​—⁠klostu nau pasin bilong dispela graun bai pinis, na God bilong marimari i laik olgeta man i save long rot bilong kisim laip i stap oltaim. (2 Pita 3:⁠9) Olsem na ating i gutpela sapos yumi tingim laik bilong Jehova pastaim na olgeta narapela samting i ken stap namba tu, a? (Matyu 6:​25-33) Long nau yumi stap long wanpela bikpela taim, olsem na sampela samting yumi ol Kristen i ting i bikpela samting long i stap bilong yumi, ating em inap stap olsem samting i no bikpela tumas.

Olsem wanem? Yu ting yumi bai bel hevi, long wanem, yumi putim laik bilong God olsem nambawan bikpela samting long i stap bilong yumi? Nogat tru, long wanem, Kristen i save lusim sampela samting bilong em yet, em i save kisim planti blesing. Olsem: Jisas i tokim ol disaipel bilong em: “Mi tok tru long yupela, olgeta man i bin ting long mi na long gutnius na i lusim haus o brata o susa o mama o papa o pikinini o gaden, bai ol i kisim 100 moa. Taim ol i stap yet long dispela graun God bai i givim ol planti samting tru, i winim ol samting ol i bin i gat bipo. Ol bai i kisim planti haus na planti brata na planti susa na planti mama na planti pikinini na planti gaden. Na tu, bai sampela man i mekim pasin nogut long ol. Na long taim i laik kamap bihain ol bai i kisim laip i stap gut oltaim oltaim.”​—⁠Mak 10:​29, 30.

I no gat wanpela man i ken makim pe bilong ol gutpela samting ol man i amamas long kisim taim ol i lusim taim bilong ol long litimapim nem bilong Jehova na autim gutpela tok bilong Kingdom. Ol i kisim planti blesing! Sampela blesing i olsem ol gutpela pren, na bel bilong ol i amamas, long wanem, ol i mekim laik bilong God, na God i amamas na orait long ol, na ol inap kisim laip i stap oltaim. (KTH 21:​3, 4) Na em i wanpela gutpela blesing long helpim ol man long ol samting bilong spirit, na long litimapim nem holi bilong Jehova olsem ol Witnes bilong em! Tru tumas, yumi bihainim gutpela tingting na rot bilong kisim blesing sapos yumi no larim “dispela taim i lus nating.” Nau, winim olgeta taim bipo, i taim bilong autim gutpela tok bilong Kingdom bilong God. Olsem wanem? Bai yu mekim na holimpas dispela gutpela wok?

[Futnot]