Kamapim Rong Bilong “Dispela Man Bilong Sakim Lo”
“Yupela ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long ol sin em i save mekim. Na nogut yupela bai . . . i kisim pe nogut bilong ol dispela sin.”—KAMAPIM TOK HAIT 18:4.
1, 2. (a) Olsem wanem yumi inap save long dispela man bilong sakim lo? (b) God i ting olsem wanem long ol man i tok ol i mekim wok bilong em, tasol ol i gat asua long blut? (Matyu 7:21-23)
BAIBEL i tok profet olsem bai wanpela “man bilong sakim lo” i kamap. Na Baibel i tok, God i makim Krais Jisas bilong ‘kilim i dai na bagarapim tru’ dispela man bilong sakim lo. (2 Tesalonaika 2:3-8) Tok i kamap paslain long dispela i bin makim olsem dispela man bilong sakim lo em ol pris pasto samting bilong ol misin i holim nating nem Kristen. Long bipo yet ol i bin lusim ol tok i tru bilong God long Baibel na kisim ol bilip haiden, olsem tok bilong God Triwan, na bikpaia, na yumi gat tewel. Na tu ol i bin mekim ol pasin i no stret long ol lo bilong God long Baibel. Ol i bin mekim pasin wankain olsem ol man, em Pol i bin toksave long Taitus long ol, olsem: “Maus bilong ol i save tok olsem, ‘Mi save long God.’ Tasol pasin bilong ol i soim olsem, ol i givim baksait pinis long em. God i no laik tru long ol. Ol i man bilong sakim tok, na ol i no inap tru long mekim wanpela gutpela pasin.”—Taitus 1:16.
2 Jisas i tok: “Yupela lukaut long ol giaman profet. Ol i save mekim gutpela tok bilong grisim yupela, tasol tingting tru bilong ol em i bilong paulim yupela na bagarapim yupela. Ol i olsem ol weldok i pasim skin bilong sipsip, bai ol i ken i go klostu long ol sipsip na holimpas ol. Yupela lukim pasin bilong ol na bai yupela i save, ol i giaman profet, o nogat.” Ol profet giaman i save kamapim “kaikai nogut.” (Matyu 7:15-17) Wanpela “kaikai nogut” ol pris pasto i bin kamapim em olsem: Ol i gat bikpela asua tru long blut bilong ol man. Inap planti handet yia pinis, ol i bin helpim ol pait bilong lotu, na ol kot nogut bilong misin, na ol bikpela pait i bin kapsaitim blut bilong planti milion manmeri. Na ol i bin beten na givim blesing long ol ami bilong narapela narapela lain i insait long pait. Na long ol dispela pait, ol lain bilong misin i bin kilim i dai ol wanlotu bilong ol. Ol i gat bikpela asua long blut bilong ol man. Tasol aposel Pol inap tok: “Sapos wanpela namel long yupela em i lus, dispela em i no asua bilong mi.” (Aposel 20:26) Aposel Pol i no gat asua long blut bilong wanpela man, tasol ol pris pasto i gat bikpela asua. God i tokim ol kain man olsem: “Maski yupela i [beten] planti taim, bai mi pasim yau bilong mi. Long wanem, blut bilong ol man yupela i bin kilim, em i pas yet long ol han bilong yupela.”—Aisaia 1:15.
3. Wanem ol bikpela samting i laik kamap long graun klostu nau?
3 Taim bilong God i givim strafe long dispela man bilong sakim lo i wok long i kam klostu kwiktaim. Olsem Jisas i tok, klostu nau “bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.” (Matyu 24:21) Dispela taim bilong bikpela hevi tru bai kirap taim Bikpela Babilon, em olgeta lotu giaman, na ol lotu i holim nating nem Kristen tu, i bagarap. Ol lain politik “bai i bagarapim em tru na rausim olgeta klos samting bilong en. Na ol bai kaikai mit bilong bodi bilong en, na kukim em olgeta long paia.” (Kamapim Tok Hait 17:16) Na dispela taim bilong bikpela hevi tru bai pinis taim God i bagarapim ol narapela lain bilong Satan long Armagedon, em pait bilong “dispela bikpela de bilong God I Gat Olgeta Strong.”—Kamapim Tok Hait 16:14, 16; 19:11-21.
Ol i Mas Laikim Ol Narapela
4. Ol man i save lotu long God “long strong bilong Holi Spirit na long pasin i tru,” ol i mas tingim wanem samting?
4 Ol dispela bikpela bikpela samting liklik taim bai kamap long graun, olsem na ol man i save “lotu long Papa long strong bilong Holi Spirit na long pasin i tru” ol i mas mekim wanem? (Jon 4:23) Wanpela samting ol i mas mekim, em olsem: Ol i mas tingim tok bilong Jisas, em i tok: “Sapos yupela i bihainim gut ol lo na tok bilong mi, orait yupela bai i stap insait long [sori] bilong mi, olsem mi bin bihainim gut ol lo na tok bilong Papa bilong mi, na mi stap insait long [sori] bilong em. . . . Lo bilong mi em i olsem: Yupela wan wan i mas laikim tru ol arapela, long wankain pasin olsem mi bin laikim yupela. Sapos wanpela man i laikim tumas ol pren bilong en na i lusim laip bilong em yet bilong helpim ol, orait dispela pasin bilong laikim ol arapela i winim tru ol arapela pasin bilong laikim ol arapela manmeri. Na sapos yupela i mekim olsem mi bin tokim yupela, orait yupela i stap pren bilong mi.”—Jon 15:10-14; 1 Jon 5:3.
5, 6. (a) Jisas i tok ol disaipel i mas mekim wanem na bai olgeta man i ken save, ol i disaipel bilong em? (b) Olsem wanem dispela em i nupela lo?
5 Olsem na ol Kristen tru i mas laikim ol arapela man, na ol i mas laikim moa yet ol brata sista Kristen bilong ol bilong olgeta hap bilong graun. (Aposel 10:34; Galesia 6:10; 1 Jon 4:20, 21) Tru tumas, ol Kristen i mas “holim strong pasin bilong laikim tru ol arapela manmeri bilong God.” (1 Pita 4:8) Sapos ol i laikim tru ol brata bilong ol bilong olgeta hap, dispela bai makim olsem ol i disaipel tru bilong Jisas, long wanem Jisas i tok: “Nau mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela. Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”—Jon 13:34, 35.
6 Olsem wanem dispela lo em i nupela lo? Ol Juda i stap aninit long Lo bilong Moses na ol i gat wankain lo i tok, “Yu mas laikim tru ol [arapela] olsem yu laikim yu yet,” a? (Wok Pris 19:18) Tru, tasol i olsem Jisas i skruim hap tok moa long dispela lo, long wanem em i tok, “Mi bin laikim yupela tru, na olsem tasol yupela wan wan i mas laikim tru ol arapela.” Em i laikim tru ol na em i dai tu bilong helpim ol, na ol disaipel i mas redi long mekim olsem bilong helpim ol narapela. (Jon 15:13) Dispela lo bilong laikim ol narapela, em Jisas i kolim, em i winim Lo bilong Moses na i antap moa, long wanem Lo bilong Moses i no tok ol i mas redi long i dai tu bilong helpim ol narapela.
7. Long taim bilong yumi, wanem lotu i bin bihainim dispela lo bilong laikim ol narapela?
7 Long taim bilong yumi, wanem lotu i bin bihainim dispela lo bilong laikim ol narapela? Ol misin i gat nem Kristen ol i no bin bihainim, long wanem narapela i bin kilim i dai narapela inap planti milion long tupela bikpela pait bilong olgeta hap na long ol narapela pait tu. Ol Witnes Bilong Jehova tasol i bin bihainim dispela lo bilong laikim ol narapela, na ol i bihainim long olgeta hap bilong graun. Ol i no save insait liklik long ol pait bilong ol lain man, long wanem Jisas i bin tok, ol disaipel bilong em “ol i no bilong dispela graun.” (Jon 17:16) Olsem na ol inap mekim tok wankain olsem bilong Pol—ol inap tok olsem ol i no gat asua long blut bilong wanpela man. Wanpela samting i kamapim dispela samting long ples klia em wanpela tokaut ol wokboi bilong Jehova i bin mekim long kibung bilong Wosington, long Amerika, long Novemba 27, 1921, em ol i bin tokaut olsem:
7“Mipela i Kristen na mipela i wok strong long bihainim ol tok bilong Bikpela bilong yumi, Krais Jisas, na tok bilong ol Aposel bilong em, olsem na mipela i bilip tru olsem: Pait em i wanpela samting nogut tru, na em i bagarapim gutpela pasin bilong ol man na semim nem bilong ol lain i tok ol i Kristen; na mipela i bilip olsem: Ol lo Bikpela Krais Jisas i bin lainim ol man long en i pasim ol Kristen i bilong God stret na ol i no ken insait long pait, o long narapela pasin bilong bagarapim man na kapsaitim blut bilong man.”
8. Stori bilong ol samting i bin kamap long taim bilong Namba 2 Pait Bilong Olgeta Hap i tok wanem long ol Witnes Bilong Jehova?
8 Orait, olsem wanem ol i bin bihainim dispela tingting bilong ol long taim bilong Namba 2 Pait Bilong Olgeta Hap? Dispela pait em i pait nogut tru, winim olgeta pait i bin kamap long bipo—dispela pait i bin kilim i dai inap olsem 50 milion manmeri. Tasol i no gat wanpela man namel long ol i bin kisim bagarap long han bilong wanpela Witnes Bilong Jehova. Nogat tru! Olsem: Taim Hitler i bosim Jemani, klostu olgeta pris pasto i bin helpim ol wok nogut bilong gavman bilong em—ol i bin mekim sampela wok o sampela tok bilong helpim dispela gavman. Tasol ol Witnes Bilong Jehova i stap aninit long dispela gavman ol i no bin helpim liklik ol wok nogut bilong en, na ol i no bin mekim salut bilong litimapim nem bilong Hitler o insait long ami bilong em. Olsem na ol i no bin kilim i dai sampela wanlotu o brata spirit bilong ol, em ol i bilong narapela kantri. Ol i no bin kilim i dai wanpela man long dispela pait. Na ol Witnes Bilong Jehova long ol narapela kantri tu i no save insait long ol pait.
9. Taim gavman bilong Hitler i bin bosim Jemani na Austria, wanem samting i bin painim ol Witnes Bilong Jehova i stap long dispela tupela kantri?
9 Ol Witnes Bilong Jehova i bin bihainim lo bilong laikim ol narapela na planti ol i bin lusim laip bilong ol yet bilong helpim ol pren bilong ol. Wanpela man i raitim ripot long wanpela buk (Kirchenkampf in Deutschland, bilong Friedrich Zipfel), em buk i stori long ol misin long Jemani, na dispela ripot i tok long ol Witnes olsem: “Ol i liklik lain tasol bilong lotu, tasol gavman bilong Hitler i bin mekim nogut tru long planti Witnes, inap 97 pesen. Sapos yumi brukim ol Witnes long Jemani long 3-pela lain, orait gavman bilong Hitler i bin kilim i dai wanpela lain olgeta, olsem kot i tok na ol i kilim ol i dai, o ol i bagarapim ol na ol i dai, o ol i no givim kaikai long ol na ol i dai, o sik o wok kalabus i bagarapim ol na ol i dai. I no gat wanpela lain bipo i bin mekim pasin nogut bilong daunim narapela lain kain olsem lain bilong Hitler i mekim bilong daunim ol Witnes. Ol i laik daunim ol Witnes, long wanem ol Witnes i holimpas bilip bilong ol na ol i no orait liklik long tingting bilong lain bilong Hitler.” Ol i bin kilim i dai planti Witnes (inap 25 pesen) long Austria tu, olsem kot i tok na ol i kilim ol i dai, o ol i paitim ol nogut tru na ol i dai, o ol i stap long ol banis kalabus nogut bilong lain bilong Hitler na sik o wok kalabus i bagarapim ol.
10. Ol man i bin bihainim dispela lo bilong laikim ol narapela na ol man i kilim ol i dai, ol i bilip tru long wanem samting?
10 Ol dispela manmeri i bin bihainim lo bilong laikim ol narapela na ol birua i bin kilim ol i dai, ol i bilip tru olsem “God em i no man nogut na bai em i lusim tingting long ol gutpela wok [ol] i bin mekim.” Nogat. Ol i bin givim bel long God, na dispela i bin kirapim ol long helpim ol manmeri bilong em. (Hibru 6:10) Ol i save, pasin bilong dispela graun i laik pinis, “tasol man i bihainim tok bilong God, em bai i stap oltaim.” 1 Jon 2:17) Ol i bilip tru olsem ol inap kirap bek na kisim laip i stap oltaim.—Jon 5:28, 29; Aposel 24:15.
11. Olsem wanem ol wokboi bilong Jehova i narapela kain? Ol i truim wanem tok profet?
11 Ol wokboi bilong Jehova i narapela kain, long wanem ol i save bihainim wanpela lo em Pita na ol narapela aposel i bin kolim taim ol i kot long bikpela kaunsil, em ol i tok: “Mipela i mas bihainim tok bilong God tasol. Mipela i no ken bihainim tok bilong ol man.” (Aposel 5:29) Ol Witnes Bilong Jehova i save bihainim dispela lo, olsem na “God i bin givim Holi Spirit long ol.” (Aposel 5:32) Dispela samting i givim strong long ol inap long ol i truim tok profet i stap long Aisaia 2:2-4. Dispela tok profet i stori long taim bilong yumi na i tok bai lotu i tru i kamap strong gen na bai ol manmeri bilong olgeta lain na lotu i go long en. Ol i mekim olsem na wanem samting i mas kamap? Wanpela samting em olsem: “Bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.” Ol wokboi bilong Jehova i wok long redi bambai ol inap i stap long gutpela nupela taim i no gat pait long en, olsem na ol i no ken skul moa long pait. Ol i lain long bihainim lo bilong laikim ol narapela.—Jon 13:34, 35.
12. Ol man i bihainim lo bilong laikim ol narapela, ol i mas mekim wanem bilong helpim ol narapela?
12 Ol Kristen i mas ‘laikim ol arapela man olsem ol i laikim ol yet,’ olsem na ol wokboi bilong God i mas sori long ol narapela man na tokim ol long ol samting ol yet i kisim save pinis long en. (Matyu 22:39) I gat planti manmeri moa bai ol i laik mekim wok bilong God na i stap long nupela taim em bai kamapim. Liklik hap taim i stap yet na ol dispela manmeri i mas kisim save long lo bilong laikim ol narapela man na long ol narapela planti tok i tru em i samting bilong King Bilong Olgeta Hap, em God Jehova. Ol i mas save, Jehova wanpela tasol em inap long yumi lotuim em, na ol i mas save long pasin bilong lotuim em. (Matyu 4:10; Kamapim Tok Hait 4:11) Ol manmeri i kisim save pinis long ol dispela samting ol i mas tokim ol narapela manmeri long en bambai ol tu i ken bilip na Jehova i ken amamas long ol.—Esekiel 33:7-9, 14-16.
Kamapim Rong Bilong Dispela Man Bilong Sakim Lo
13. Ol wokboi bilong God i mas autim tok long olgeta hap bilong graun, na hap wok bilong ol em ol i mas tokaut long wanem samting? Bilong wanem ol i mas mekim olsem?
13 Jisas i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Ol wokboi bilong God i mas autim dispela tok long olgeta hap bilong graun, na hap wok bilong ol em olsem: Ol i mas tokaut long strafe bilong God bai painim ol lotu giaman, na em bai painim tru ol pris pasto bilong ol misin i holim nating nem Kristen. Ol dispela pris pasto i gat bikpela asua moa long ai bilong God, long wanem ol i tok ol i Kristen. Yumi mas kamapim ol long ples klia bambai ol i no ken paulim moa ol manmeri i laik mekim wok bilong God, na ol dispela manmeri i ken kirap mekim ol samting tru ol i mas mekim bilong abrusim bagarap. Olsem Jisas i tok: “Tok tru bai i mekim yupela i kamap fri.”—Jon 8:32.
14. Ol i mas tokaut klia olsem wanem long ol lotu giaman?
14 Olsem na ol Witnes Bilong Jehova i mas tokim ol man long dispela tok bilong God olsem lain bilong em i mas lusim ol lotu giaman, em i tok: “Yupela ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long ol sin em i save mekim. Na nogut yupela bai i poroman wantaim em tu long taim em i kisim pe nogut bilong ol dispela sin. Em i hipim ol sin bilong en i kam antap inap long heven. Na God i tingim gut olgeta pasin nogut em i bin mekim. . . . ol kain kain samting nogut tru bai i kamap long em long wanpela de tasol. Planti sik bai i kamap, na planti man bai i krai nogut, na bikpela hangre bai i kamap. Na paia bai i kukim Babilon olgeta. God, [Jehova] em i gat bikpela strong na em i skelim pinis pasin bilong Babilon na em tok long em i mas bagarap.”—Kamapim Tok Hait 18:4-8.
15. Wanem samting i kamap long yia 1914, olsem Jehova i makim pinis bilong dispela taim? Bihain long Namba Wan Pait Bilong Olgeta Hap wanem samting i bin kamap?
15 Ol tok profet bilong Baibel i makim olsem “taim bilong las de” bilong dispela pasin nau i stap long graun, dispela taim i bin kirap long yia 1914. (2 Timoti 3:1-5, 13; Matyu 24:3-13) Olsem na kirap long dispela yia na i kam inap long nau, yumi bin stap long ‘taim bilong pinis.’ (Daniel 12:4) Bihain long Namba Wan Pait Bilong Olgeta Hap; long taim stret olsem Jehova i bin makim, kwiktaim ol wokboi bilong em i bin kirap long wok strong moa long autim tok bilong Kingdom bilong God, em dispela wok Matyu 24:14 i tok profet long en. Na ol i kirap tu long kamapim long ples klia rong bilong ol lotu giaman na ol i tokaut strong moa long dispela, na ol i mekim olsem moa yet long ol pris pasto bilong ol misin i holim nating nem Kristen, em ol dispela pris pasto i olsem lain bilong sakim lo.
16. Wok bilong kamapim rong bilong sakim lo, olsem wanem dispela wok i bin kamap strong winim 70 yia pinis?
16 Nau, winim 70 yia pinis, ol wokboi bilong God i bin wok strong moa long toksave long ol manmeri long ol pasin giaman bilong dispela man bilong sakim lo. Taim Namba Wan Pait Bilong Olgeta Hap i pinis, ol Witnes i autim dispela tok ol i liklik lain tasol, inap sampela tausen. Tasol nau ol i kamap “planti moa,” winim 3 milion 500 tausen, na ol i stap long 60,000 samting kongrigesen long olgeta hap bilong graun. (Aisaia 60:22) Long olgeta taim ol wokboi bilong Jehova i wok strong long mekim bikpela wok moa long autim tok olsem Kingdom bilong God tasol inap helpim ol man. Na ol i kamapim long ples klia olsem ol pris pasto i “man bilong sakim lo” na ol i giamanim ol man.
Bilong Wanem Ol i Tokaut Strong?
17. Olsem wanem na ol wokboi bilong Jehova i bin tokaut strong na kamapim ol rong bilong man bilong sakim lo?
17 Olsem wanem na ol wokboi bilong Jehova i bin tokaut strong long ol rong bilong dispela man bilong sakim lo? Ol i bin mekim olsem, long wanem, ol i laik helpim bikpela lain sipsip bilong Jehova ol i stap long rot bilong kisim laip, nogut dispela graun bilong Satan na ol lotu giaman i paulim ol. (Jon 10:16; Kamapim Tok Hait 7:9-14) Na ol i tokaut strong long ol rong bilong ol pris pasto, long wanem, ol i laik helpim tu ol manmeri i gat gutpela bel na ol i no insait yet long lain sipsip bilong God, nogut ol i bihainim rot nogut. Olsem na ol i tokaut strong olsem Jisas i bin mekim. Jisas i bin tokim ol manmeri long ol bikman bilong lotu long taim bilong em, em ol i man bilong tupela maus, na em i tok: “Ol i olsem ol aipas, na ol i laik soim rot long ol arapela. Tasol sapos aipas i soim rot long narapela aipas, orait tupela wantaim bai i pundaun long hul.”—Matyu 15:14; lukim tu 2 Korin 4:4; 11:13-15.
18. Ol man i laik save long tok i tru ol i mas save long wanem samting?
18 Ol pris pasto i hap lain bilong dispela graun em Satan i bosim. (Jon 8:44) Tasol liklik taim bai God i pinisim dispela graun bilong Satan olgeta. (2 Pita 3:11-13; 1 Jon 2:15-17) Olsem na Baibel i mekim toksave olsem: “Harim. Sapos man i laikim pasin bilong graun, em i mekim pasin birua long God.” (Jems 4:4) Ol pris pasto i save sakim dispela toksave na ol i insait yet long ol kain wok politik. Ol i save tokim lain bilong ol olsem wok bilong ol man bilong politik inap stretim ol hevi bilong graun na givim gutpela sindaun long ol man. Tasol dispela samting i no inap kamap, long wanem dispela graun Satan i bosim i laik pinis nau. Olsem na ol i giamanim ol man na ol man i wet nating long ol lain bilong dispela graun i helpim ol. Yumi mas tokaut long ol bambai ol i ken save long ol samting tru i laik painim dispela graun, na long nupela pasin i laik kamap olsem senis bilong dispela pasin bilong nau.—Sindaun 14:12; 19:21; Matyu 6:9, 10; Kamapim Tok Hait 21:4, 5.
19. Long dispela taim nau, long ol nius na long televisen, olsem wanem ol man i bin kamapim pasin nogut bilong ol pris pasto, em ol i save laikim ol samting bilong dispela graun?
19 Long dispela taim, long ol nius na long televisen tu ol man i bin kamapim rong bilong ol pris pasto, em ol i laikim ol samting bilong dispela graun. Ol i bin tokaut long pasin nogut bilong sampela pasto i save autim tok bilong misin long televisen, em ol i bin mekim pasin pamuk na ol i gat bikpela mani kago na ol bikpela haus i gat ol gutpela gutpela samting long en. Wanpela man bilong raitim tok bilong ol singsing long nau em i raitim wanpela singsing, em nem bilong en i olsem: “Yu Ting Jisas Bai Pasim Hanwas Rolex [em wanpela kain hanwas i gat bikpela pe tru bilong en, inap olsem K10,000] na Autim Tok long Televisen?” Dispela singsing i tok moa olsem: ‘Sapos Jisas i kam bek long graun, yu ting em bai mekim wok politik, na kisim tupela haus, em namba tu haus i stap long hap bilong ol bikpela maniman, na em bai wok long giaman olsem em i stap rabis?’ Narapela rong bilong ol pris pasto long nau em olsem: Long nau planti pris pasto moa i save mekim pasin bilong Sodom o ol i orait long ol man i mekim dispela pasin. Long dispela taim Misin Katolik long Amerika i wok long baim planti milion dola kompensesen bilong stretim rong bilong ol pris, em ol i bin mekim pasin sem long ol pikinini.—Rom 1:24-27; 1 Korin 6:9, 10.
20. Bilong wanem ol wokboi bilong God i mas wok yet long kamapim rong bilong man bilong sakim lo?
20 Ol dispela kain rong i stap na ol wokboi bilong God i no ken pasim maus; ol i mas tokaut na kamapim long ples klia ol dispela rong bilong helpim ol narapela man. Ol i mas lukautim bikpela lain arapela sipsip—ol i mas toksave long ol long dispela lain i laik pulim ol long brukim ol lo bilong God. Na ol i mas wok long painim ol manmeri i “bel nogut na i wari long olgeta dispela pasin nogut ol [man] i save mekim.” Ol i mas wok long bungim ol i stap aninit long Bikpela Wasman, God Jehova, na “gutpela wasman,” Krais Jisas, bambai tupela i ken lukautim ol na soim rot long ol.—Esekiel 9:4; Jon 10:11; Sindaun 18:10.
21. Ol Witnes Bilong Jehova bai wok yet long autim wanem tok?
21 Olsem na lain bilong God ol i no pret liklik long tokaut long strafe bilong God em bai painim olgeta lain bilong Satan, na dispela man bilong sakim lo tu, em ol pris pasto bilong ol misin i holim nating nem Kristen. Bai ol wokboi bilong God i wok strong long autim tok bilong ensel long Kamapim Tok Hait 14:7, olsem: “Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em.” Na bai ol i autim tu toksave i stap long Kamapim Tok Hait 18:4, olsem: “Yupela ol manmeri bilong mi, yupela i mas lusim dispela ples [olgeta lotu giaman] na i kam ausait. Nogut yupela i poroman wantaim em long ol sin em i save mekim. Na nogut yupela bai i poroman wantaim em tu long taim em i kisim pe nogut bilong ol dispela sin.”
Sampela Askim Bilong Kamapim Gen Ol Bikpela Tok:
◻ Wanem samting bai painim man bilong sakim lo? Bilong wanem dispela samting i mas painim em?
◻ I gat wanem ol samting ol wokboi bilong Jehova i mas mekim bilong helpim ol narapela man?
◻ Lain bilong Jehova ol i bin mekim wanem na ol i no gat asua long blut bilong wanpela man?
◻ Yumi mas mekim wanem long Bikpela Babilon?
◻ I gat wanem as na bai yumi wok strong yet long tokaut long rong bilong dispela man bilong sakim lo?
[Piksa long pes 25]
Taim ol aposel i kot long bikpela kaunsil, ol i tok: “Mipela i mas bihainim tok bilong God tasol. Mipela i no ken bihainim tok bilong ol man”
[Piksa long pes 26]
Ol man i gat gutpela bel ol i mas save long ol samting i laik painim dispela graun na ol lotu bilong en