Sapta 17
“Holim Strong Pasin Bilong Sori Long Ol Brata”
TAIM ol nupela man i kam long ol miting bilong kongrigesen bilong ol Witnes Bilong Jehova ol i lukim ol brata i stap wanbel na ol brata i kam sekanim ol na ol i pilim gutpela pasin sori i stap namel long ol brata.
2 Long ol kibung tu ol nupela man inap lukim dispela pasin bilong sori. Ol i lukim planti bilong yumi i sindaun gut na bihainim gutpela pasin. Wanpela niusman i go long wanpela kibung olsem na em i tok: ‘No gat man i spak long dring o long drak. No gat bikmaus o singaut. No gat man i subim narapela man. No gat tok swea. No gat tok pilai nogut o tok doti. No gat smok. No gat stil. No gat pipia. Em i narapela kain tru.’ Ol dispela samting i kamapim pasin sori bilong ol. Ol man i gat dispela kain pasin bilong sori, ol ‘i no save bikhet nabaut o tingting tumas long ol samting bilong ol yet.’—1 Ko. 13:4-8.
3 Pasin bilong sori em i wanpela mak bilong ol Kristen tru. (Jon 13:35) Taim yumi wok long kamap strong long spirit, yumi mas bihainim moa yet dispela pasin. Aposel Pol i beten bambai sori bilong ol brata i ken “kamap bikpela moa yet.” (Fl. 1:9; 1 Te. 3:12) Na Pita i kirapim ol Kristen long laikim tru olgeta brata. (1 Pi. 2:17) Sapos yumi laikim tru ol brata, bai yumi wok long save gut long ol. Bai yumi no miting tasol wantaim ol na tok ‘Gude’ tasol long ol long wan wan taim. Aposel Jon i tok yumi mas redi long i dai tu bilong helpim ol. Em i tok: “Jisas em i lusim laip bilong em yet bilong helpim yumi, na long dispela yumi save pinis pasin bilong sori. Na yumi tu yumi mas lusim laip bilong yumi bilong helpim ol brata.” (1 Jon 3:16; Jon 15:12, 13) Yumi no lusim yet laip bilong yumi bilong helpim ol brata, tasol yumi redi long mekim olsem? Orait, olsem wanem? Nau yumi save tingim ol na helpim gut ol maski dispela i putim hevi liklik long yumi?
4 Tru yumi mas helpim ol brata na yumi no ken tingim tumas skin bilong yumi yet, tasol narapela bikpela samting em olsem: Yumi mas laikim tru ol brata. Baibel i tok: “Yupela i mas givim bel bilong yupela long ol brata na laikim ol tru.” (Rom 12:10) I gat sampela brata yumi save laikim tru ol, a? Tasol olsem wanem? Yumi inap laikim tru sampela brata moa? Olpela pasin i laik pinis, olsem na i bikpela samting yumi mas pas moa yet wantaim ol brata. Baibel i toksave olsem: “Taim bilong olgeta samting i laik pinis em i klostu nau. . . . Yupela i mas holim strong pasin bilong sori long ol brata. Pasin bilong sori em i save karamapim planti sin.—1 Pi. 4:7, 8.
5 Tasol yumi stap sinman yet, olsem na sampela taim bai yumi rongim narapela man. Na ol tu i save mekim kain kain samting na ol i rongim yumi. (1 Jon 1:8) Taim samting olsem i kamap, yu mas mekim wanem?
Taim Hevi i Kamap Yu Mas Mekim Wanem?
6 Baibel i soim rot long yumi. Tasol ating sampela taim tok bilong en i pait wantaim ol samting yumi ol sinman i laik mekim. (Rom 7:21-23) Tasol sapos yumi wok strong long bihainim tok bilong Baibel bai yumi kamapim bel bilong yumi, yumi laik tru long bihainim laik bilong Jehova. Na bai yumi mekim gutpela pasin sori moa yet long ol narapela man.
7 Sampela man, taim ol i bel hevi long samting narapela man i mekim long ol, orait, ol i save painim rot bilong bekim nogut long dispela man. Tasol dispela pasin i mekim hevi i kamap bikpela moa. Sapos i gat wok long bekim pe nogut, orait yumi mas larim God i mekim. Em wok bilong Em. (Pro. 24:29; Rom 12:17-21) Sampela ol i save givim baksait long man i rongim ol na ol i no laik toktok wantaim em. Tasol yumi no ken mekim olsem long ol brata Kristen bilong yumi. Yumi mas laikim tru ol brata bambai God i ken orait long ol samting yumi mekim bilong lotuim em. (1 Jon 4:20) Sapos yumi no laik toktok wantaim wanpela man o stap klostu long em, yu ting i stret yumi ken tok yumi laikim em? Nogat, a? Taim hevi i kamap, yumi mas wok long stretim. Tasol yumi ken mekim olsem wanem?
8 Aposel Pol i toktok long dispela samting, em i tok: “Sapos wanpela man namel long yupela em i gat tok long brata i mekim rong long em, orait em i mas larim em na lusim sin bilong en. Bikpela em i lusim pinis sin bilong yupela, olsem tasol yupela tu i mas mekim.” (Kl. 3:13) Yu inap mekim olsem? Olsem wanem sapos planti taim man i mekim kain kain rong long yu?
9 Aposel Pita i gat kain askim olsem na em i ting em i ken lusim rong bilong brata inap 7-pela taim. Tasol Jisas i tok: “Mi no tokim yu inap 7-pela taim tasol. Nogat. Mi tok, inap 70 taims 7-pela taim.” Bilong wanem em i mas mekim olsem? Jisas i mekim wanpela tok piksa bambai yumi ken save, yumi gat bikpela rong long ai bilong God, olsem “dinau,” i winim tru ol rong narapela man i mekim long yumi. (Mt. 18:21-35) Long olgeta de yumi mekim kain kain rong long God—ating yumi tingim tumas skin bilong yumi yet, o yumi mekim tok kranki, o tingting kranki, o yumi no mekim sampela samting yumi mas mekim. Sampela taim yumi no save yumi bin mekim pasin i no stret, o yumi gat planti wok na yumi hariap hariap na yumi no pilim ol rong yumi mekim long God. Dai em i pe bilong sin na God inap tekewe laip bilong yumi. (Rom 6:23) Tasol em i marimari yet long yumi. (Sam 103:10-14) Olsem na i stret em i tok yumi mas mekim wankain pasin long ol narapela man. (Mt. 6:14, 15; Ef. 4:1-3) Taim yumi mekim pasin marimari olsem na yumi no bel nogut long man i rongim yumi, orait yumi kisim pinis dispela kain pasin bilong sori Baibel i tok long en, em i tok, man i gat dispela kain pasin bilong sori em i “no save tingim rong ol i mekim long em.”—1 Ko. 13:4, 5; 1 Pi. 3:8, 9.
10 Tasol ating sampela taim yumi no gat tok long brata, tasol yumi pilim olsem em i gat tok long yumi. Sapos olsem, orait yumi mas mekim wanem? Kwiktaim yumi mas i go toktok wantaim em bambai yumi ken kamap wanbel gen wantaim em. Baibel i tok, yu yet yu mas i go long dispela brata—yu no ken wetim em i kam long yu. (Mt. 5:23, 24) Ating em hatwok. Bilong mekim olsem yu mas i gat pasin sori na pasin daun. Olsem wanem? Dispela tupela pasin i kamap strong long bel bilong yu inap long kirapim yu long bihainim dispela tok bilong Baibel? Dispela i olsem wanpela bikpela mak yu mas wok strong long winim.
11 Tasol ating wanpela brata i mekim sampela samting yu bel hevi long en—na ating ol narapela tu i bel hevi long en. Ating gutpela sapos wanpela man i givim sampela tok long em long dispela samting, a? Ating olsem. Sapos yu go na toktok isi wantaim em long dispela samting, ating bai em i senisim pasin bilong em. Tasol pastaim askim skin bilong yu yet, olsem: ‘Baibel i tok dispela samting em i mekim i no stret? O mi hevi long dispela samting long wanem pasin bilong ples bilong mi i narapela kain long pasin bilong ples bilong em?’ Sapos olsem, orait yu no ken putim sampela lo bilong yu yet na skelim ol brata long dispela. (Jems 4:11, 12) Jehova i save laikim olgeta kain kain man, maski ol i bilong wanem ples, na em i save isi long ol na wetim ol i kamap strong long spirit.
12 Tasol sapos wanpela brata o sista long kongrigesen i mekim bikpela rong, orait ol i mas stretim kwiktaim. Tasol husat i mas stretim? Ol elda i mas mekim. Tasol sapos kros i kamap namel long ol brata long samting bilong wok bisnis, o wanpela brata o sista i mekim sampela tok baksait samting, na dispela i bagarapim nem bilong narapela na nogutim em tru, orait, pastaim em yet i mas i go toktok wantaim dispela brata o sista i bin rongim em. Tru, ating sampela bai ting em i hatwok. Tasol long Matyu 18:15-17 Jisas i tok yumi mas mekim olsem. Sapos yu laikim tru brata bilong yu na yu laik bai em i ken i stap brata bilong yu, orait, taim yu go toktok wantaim em, dispela bai kirapim yu long mekim gutpela tok na gutpela pasin na ating bai em i tanim bel.—Pro. 16:23.
13 Taim hevi i kamap, maski em i bikpela hevi o liklik hevi, tasol yumi mas save Jehova i ting olsem wanem long dispela samting. Em i no save laikim sin, tasol em i save yumi olgeta yumi gat sin. Ol manmeri i save mekim sin na ol i no tanim bel, orait bihain bai God i rausim ol long lain bilong em. Em i gat taim bilong mekim. Tasol olsem wanem long yumi ol narapela? God i no les kwik long yumi; em i isi long yumi na em i marimari long yumi. Em i makim gutpela pasin yumi mas bihainim. Taim yumi mekim olsem, yumi bihainim pasin sori bilong God.—Ef. 5:1, 2.
Mekim “Moa Yet”
14 Aposel Pol i stap planti mun wantaim kongrigesen long Korin na em i wok long strongim ol. Em i wok strong long helpim ol brata long Korin, na em i laikim tumas ol. Tasol sori! Sampela ol i no laikim tumas em. Ol i save kros na toktok planti long ol samting em i mekim. Em i kirapim ol long givim bel “moa yet” long em na ol narapela brata. (2 Ko. 6:11-13; 12:15) Yumi olgeta yumi ken skelim yumi yet: Yumi givim bel tru long ol narapela na yumi painim rot bilong mekim “moa yet”?—1 Jon 3:14; 1 Ko. 13:3.
15 Olsem wanem? I gat sampela long kongrigesen yumi save hatwok long pren gut wantaim ol? Sapos yumi lusim tingting long ol liklik pasin kranki bilong ol olsem yumi laik bai ol i mekim long yumi, bai yumi inap pren gut wantaim ol. (Pro. 17:9; 19:11) Na sapos yumi wok long tingim ol gutpela pasin bilong ol, dispela tu inap helpim yumi long pren gut wantaim ol. Yumi tingim ol wok bilong Jehova ol i mekim? Sapos yumi tingim ol dispela samting, orait dispela bai helpim yumi long laikim ol moa yet.—Luk 6:32, 33, 36.
16 Tru yumi no inap mekim olgeta samting bilong helpim olgeta man. Ating yumi no inap tok gude long olgeta brata sista long olgeta miting. Yumi no inap singautim olgeta wantaim ol i kam kaikai wantaim yumi. Yumi save pren gut wantaim sampela brata sista, winim ol narapela. Tasol yumi inap pren gut wantaim sampela moa? Long olgeta miting yumi ken toktok wantaim sampela brata sista yumi no save gut long ol, a? O sampela taim yumi ken singautim ol i kam wok wantaim yumi long autim tok, a? Sapos yumi holim strong pasin bilong sori long ol brata bai yumi painim rot bilong kamapim dispela pasin.
17 Long ol kibung yumi inap kamapim “moa yet” dispela “pasin bilong sori long ol brata.” Ating planti tausen ol i kam bung. Yumi no inap sekanim olgeta. Tasol yumi ken mekim gutpela pasin na bai ol i ken save yumi laik helpim ol na yumi no tingim tumas skin bilong yumi yet. Na long belo samting yumi ken sekanim sampela na toktok wantaim ol. Bihain olgeta manmeri i stap long graun bai ol i stap olsem ol brata sista. Bai ol i wanbel long lotuim God na Papa bilong ol. Long dispela taim bai yumi inap save long olgeta wan wan na save long kain kain gutpela pasin bilong ol na bai yumi amamas tru! Bai yumi gat laik long mekim olsem, long wanem bai yumi laikim tru ol. Orait, gutpela sapos nau yu kirap mekim olsem, a?
stori gen long ol dispela tok
● Taim hevi i kamap namel long ol brata o sista, ol i mas stretim olsem wanem? Bilong wanem ol i mas mekim olsem bilong stretim?
● Taim yumi wok long kamap strong long spirit, yumi ken mekim wanem bilong kamapim moa yet dispela pasin bilong sori long ol brata?
● Olsem wanem yumi ken laikim tumas sampela brata moa, na yumi no ken laikim tasol ol brata yumi pren gut wantaim ol?
[Askim Bilong Stadi]
1, 2. (a) Planti taim ol nupela man i pilim wanem samting long miting bilong ol Witnes Bilong Jehova? (b) Ol i lukim wanem samting long ol kibung i kamapim dispela pasin sori?
3. (a) Pasin sori bilong yumi i mas wok long kamap ples klia moa yet olsem wanem? (b) Yumi mas wok long kisim wanem kain pasin bilong sori, olsem bilong Krais?
4. (a) Long wanem narapela rot yumi ken kamapim moa yet sori bilong yumi? (b) Bilong wanem i bikpela samting yumi mas holim strong pasin bilong sori long ol brata?
5. Bilong wanem i no stret yumi ting hevi i no inap kamap namel long ol brata sista long kongrigesen?
6. (a) Olsem wanem na sampela taim tok bilong Baibel i pait wantaim laik bilong yumi? (b) Tasol sapos yumi bihainim ol gutpela tok bilong Baibel, wanem samting bai kamap?
7. (a) Sapos wanpela man i mekim nogut long yumi, bilong wanem yumi no ken bekim? (b) Bilong wanem yumi no ken givim baksait long brata i rongim yumi?
8, 9. (a) Sapos yumi gat tok long wanpela brata, i stret yumi mas mekim wanem? (b) Tasol olsem wanem sapos planti taim em i bin rongim yumi? (c) Bilong wanem yumi mas bihainim dispela rot bilong stretim hevi? Wanem samting inap helpim yumi long mekim olsem?
10. Sapos wanpela brata i gat tok long yumi, yumi mas mekim wanem?
11. Sapos wanpela brata i save mekim sampela samting na yumi bel hevi long en, yumi mas mekim wanem?
12. (a) Tasol sapos wanpela brata o sista i mekim bikpela rong, orait husat i mas stretim? (b) Wanem sampela hevi inap kamap na long kain taim olsem, orait, man ol i rongim em, em yet i mas kirap long stretim dispela samting? Em i gat wanem laik na em i mekim olsem?
13. Sapos hevi i kamap namel long yu wantaim wanpela brata, wanem samting inap helpim yu long kisim stretpela tingting long dispela?
14. (a) Bilong wanem Pol i tok ol Kristen i mas givim bel “moa yet” long em na ol narapela brata? (b) Olsem wanem ol skripsa long paragraf i soim yumi, yumi mas tingim gut dispela samting?
15. Sapos i gat sampela brata o sista yumi no save laikim ol tumas, wanem samting inap helpim yumi long laikim tru ol?
16. Yumi ken mekim wanem na bai yumi sori “moa yet” long ol brata sista long kongrigesen bilong yumi?
17. Taim yumi bung wantaim ol brata yumi no save long ol, yumi ken mekim wanem na bai ol i ken save yumi laikim tumas ol tu?