Singsing 165 na beten.

Wik i Kirap long Disemba 20

Singsing 189.

10 min: Ol toksave bilong kongrigesen. Sapos kongrigesen bilong yu i no gat kibung distrik long Disemba 25, orait, toksave long ol bung bilong i go autim tok long Disemba 25.

20 min: “Putim Tok i Go Daun Long Bel Bilong Baibel-Stadi Bilong Yu.” Ol askim na bekim na mekim wanpela soim. Stori gut olsem, olgeta long kongrigesen i mas wok long kamap gutpela tisa. Taim yu kamapim pinis tok bilong paragraf 3, wanpela pablisa i ken mekim soim long pasin bilong toktok gut wantaim wanpela Baibel-stadi. Em i ken mekim wok long ol askim na skripsa i stap long paragraf 13 na 14 long sapta wan bilong buk Stap Oltaim.

15 min: “Yiabuk​—⁠Em Gutpela Samting Tru Bilong Strongim Yumi.” Kamapim gut ol tok bambai ol brata sista i amamas long harim, na kamapim klia olsem wanem ol skripsa inap helpim ol. Singautim tupela pablisa long kamapim ekspiriens olsem i stap long paragraf 3, na ol ekspiriens i stap long pes 32 bilong Wastaua bilong Janueri 1, 1990, na Janueri 1, 1987

Kirapim Nupela Baibel-Stadi Long Mun Disemba

¹ Jisas i tokim ol disaipel bilong em long ol i mas lainim ol man long ol gutpela tok bilong Kingdom. (Mt 28⁠:​19, 20) Pasin bilong mekim Baibel-stadi em i nambawan rot bilong lainim ol. Olsem wanem? Yu insait long dispela wok? Sapos nogat, orait yu ken mekim wanem bilong kirapim wanpela Baibel-stadi na bai yu inap mekim bikpela wok moa bilong lainim ol man?

² Ating yumi bin givim wanpela liklik nius long man bilong haus, em Ol Man Bilong Graun Bai Abrusim Bagarap o Nogat?, na yumi bin tokim em long yumi bai kam bek na stori wantaim em long ol tok bilong en.

Taim yumi go bek lukim man i bin kisim liklik nius, yumi ken mekim tok olsem:

◼ “Taim mi kam lukim yu pastaim, yumi bin toktok long taim i sot pinis na long Jisas i bin kolim stret ol samting i kamap long nau. Mi laik stap liklik hap taim tasol na stori liklik long sampela tok i stap long dispela liklik nius mi bin givim long yu. Lukim ol tok i stap aninit long dispela het-tok ‘Mak.’ ” Opim liklik nius long pes 4 na stori long tupela o tripela paragraf aninit long dispela het-tok. Sapos i gat taim, kaunim ol skripsa. Kamapim klia olsem wanem ol samting Jisas i tok profet long en i wok long kamap long nau. Stretim rot bilong i go bek na stori long sampela paragraf moa aninit long dispela het-tok. Kirapim man bilong haus long kaunim ol dispela paragraf paslain long taim yu go bek lukim em.

³ O yu ken mekim tok olsem:

◼ “Taim mi toktok wantaim yu pastaim mi bin givim wanpela liklik nius long yu, nem bilong en, Ol Man Bilong Graun Bai Abrusim Bagarap o Nogat? Yumi bin stori long wok Jisas i mekim nau long dispela taim. Na yumi bin kaunim wanpela tok bilong em i stap long Baibel long Jon 17⁠:⁠3. [Kaunim.] Sapos yumi laik kisim laip oltaim, yumi mas kisim save long God na long Jisas, olsem na gutpela sapos yumi wok nau long kisim dispela save. Taim Jisas i stap long graun, em i bihainim tru ol gutpela pasin bilong God. Olsem na sapos yumi wok long kisim sampela save moa long i stap na wok bilong Jisas, bai yumi save moa long pasin bilong Papa bilong em, a? [Larim man i bekim tok.] Lukim dispela tok hia long buk Nambawan Man Tru i Winim Olgeta Narapela Man.” Kaunim paragraf 1 na 2 long pes 10 bilong sapta 116. Stori gut olsem dispela buk i kamapim olgeta stori bilong Jisas olsem i stap long Fopela Gutnius, na i stori long ol samting i bin kamap pastaim na i stori i go i go long ol samting i bin kamap bihain. Yu ken kolim het-tok bilong sampela sapta, na soim sampela piksa long em, na mep i stap long kirap bilong buk. Orait nau yu ken tilim buk.

⁴ Taim yu tok gude pinis long man bilong haus i kisim buk “Nambawan Man Tru,” yu ken mekim tok olsem:

◼ “Taim mi kam lukim yu pastaim mi bin tokim yu, buk Nambawan Man Tru i bilong helpim man long stadi long Baibel. Mi laik stori liklik long yu long olsem wanem dispela buk i ken helpim yu.” Opim buk long sapta wan, “Ol Tok i Kam Long Heven.” Soim ol askim long man bilong haus. Kaunim namba wan askim, na nau stori liklik long ol paragraf bilong sapta ol i kam paslain. Stori long olsem wanem piksa long pes 2 i stret long ol tok bilong buk. Sapos i gat taim, kamapim ol narapela askim na kamapim klia ol bekim. Bilong pinisim tok, stretim rot bilong go bek na stori moa wantaim em.

⁵ Sapos yumi tingting strong long kirapim Baibel-stadi, na yumi redi gut pastaim, na yumi wok long kirapim Baibel-stadi long olgeta taim yumi gat rot, bai yumi redi long kirapim wanpela nupela Baibel-stadi long mun Disemba.

[Ol Askim]

1. Wanem nambawan rot yumi mekim wok long en bilong lainim ol man long tok i tru?

2. Stori long wanpela rot bilong kirapim Baibel-stadi wantaim man i bin kisim liklik nius.

3. Taim yumi go bek lukim man i bin kisim wanpela liklik nius, yumi ken mekim wanem bilong tilim buk long em?

4. Yumi ken mekim wanem bilong kirapim wanpela Baibel-stadi long rot bilong buk Nambawan Man Tru?

5. Kolim 3-pela samting yumi ken mekim bilong kirapim wanpela nupela Baibel-stadi long mun Disemba?

Putim Tok i Go Daun Long Bel Bilong Baibel-Stadi Bilong Yu

¹ Olsem wanem? Yu laik bai Baibel-stadi bilong yu i bihainim ol tok em i lainim? Em i mas mekim olsem na bai save em i wok long kisim inap helpim em. Bilong kirapim Baibel-stadi bilong yu long bihainim ol tok em i lainim, yu mas putim tok i go daun long bel bilong em. Tok aposel Pita i mekim long de Pentikos long yia 33, i “sutim tru bel” bilong 3,000 samting manmeri, na ol i kisim baptais long dispela de. (Ap 2⁠:​37, 41) Yu ken mekim wanem bilong putim tok i go daun long bel bilong Baibel-stadi bilong yu?

² Redi Gut Pastaim: No ken mekim planti paragraf tumas, long wanem, dispela bai sotim tru taim bilong yumi long toktok gut wantaim man long ol dispela paragraf. Paslain long stadi, tingim ol tok yu laik lainim man long en. Askim yu yet: ‘Mi yet mi save gut long ol skripsa? Mi inap kamapim klia olsem wanem ol skripsa i stret long ol tok bilong paragraf?’ Tingim ol askim ating man bai kamapim, na redim bekim. Sapos yu save gut long dispela man, dispela bai helpim yu long redim sampela tok i stret long em.

³ Bihainim Pasin Jisas i Mekim Bilong Lainim Man: Taim Jisas i skulim ol man, em i mekim ol tok piksa na bai ol i no hatwok long kisim save long ol bikpela tok na ol i ken pilim tru ol tok bilong em. (Lu 10⁠:​29-37) Yu tu inap putim ol gutpela tok i go daun long bel bilong Baibel-stadi bilong yu sapos yu mekim tok piksa i no gat planti bikpela tok tumas long en, na i stori long ol samting ol i save gut long en, na i stret long wok na sindaun bilong ol.

⁴ Olsem Jisas i mekim, yumi tu i ken mekim wok long ol askim bilong putim tok i go daun long bel bilong man yumi skulim. (Lu 10⁠:36) Sapos man i kaunim tasol bekim i stap long paragraf, kamapim sampela askim moa. Kamapim sampela askim i bilong stiaim tingting bilong man na bai em inap skruim sampela save moa long dispela save em i kisim pinis. Long dispela rot bai em i lain long wokim gut tingting. O yu ken givim askim long man bilong kamapim bel bilong em, em yet i ting olsem wanem long dispela samting. Long dispela rot yu inap save long sampela samting yu ken mekim bilong helpim em moa.

⁵ Sapos Baibel-stadi i no wok long kamap strong, yu mas wok long painimaut as bilong dispela samting. Ating yu mas i go lukim em long narapela taim, em i no taim bilong stadi. Ating yu laik save: Bilong wanem em i no wok long kamap strong? I gat sampela tok bilong Baibel em i no kisim gut? Em i no laik senisim sampela pasin bilong em? Sapos Baibel-stadi i gat “tupela tingting,” helpim em long save, dispela inap nogutim em.​—⁠1 Ki 18⁠:⁠21.

⁶ Aposel Pol i save, wok bilong lainim man long ol tok bilong Baibel em inap helpim man long abrusim bagarap na i stap laip. Olsem na em i tokim ol Kristen long ol i mas ‘was gut long wok ol i mekim bilong skulim ol manmeri.’ (1 Ti 4⁠:16) Tru ol Baibel-stadi bilong yu i mas kisim save long ol tok bilong Baibel na long ol samting i kamap long graun, tasol ol i mas kisim sampela save moa. Ol i mas kisim stretpela save long Jehova na long Jisas na yumi mas helpim ol long pas gut wantaim ol olsem pren bilong ol. Ol i mas mekim olsem bambai bel i kirapim ol long kamapim bilip bilong ol na mekim wok. (Je 2⁠:​17, 21, 22) Taim tok i go daun pinis long bel bilong man yu stadi wantaim em, bel bai kirapim em long mekim ol samting i bilong givim biknem long Jehova na i bilong lukautim laip bilong em yet.​—⁠Snd 2⁠:​20-22.

[Ol Askim]

1. Yumi ken mekim wanem bilong kirapim Baibel-stadi bilong yumi long mekim wok?

2. Paslain long mekim Baibel-stadi bilong yu, yu mas redi gut olsem wanem?

3. Taim Jisas i skulim ol man, em i mekim wok long wanem samting bilong helpim ol long kisim gut tok?

4. Taim yumi skulim man, yumi ken mekim wok long wanem kain askim?

5. Sapos Baibel-stadi i no wok long kamap strong, yu ken mekim wanem?

6. Baibel-stadi bilong yu i mas kisim wanem kain save?

Yiabuk​—⁠Em Gutpela Samting Tru Bilong Strongim Yumi