Stap Klin Long Tingting na Long Skin

“Yupela mas givim bodi bilong yupela long God olsem ofa. Bodi i gat laip yet na yupela givim long God, na i bilong God wanpela tasol, na bai yupela i mekim pasin God i laikim.”−Rom12:⁠1.

1. Bilong wanem yumi mas i stap klin long tingting na long skin, olsem aposel Pol i tok?

MAN i laik mekim wok bilong God holi Jehova em i mas i stap klin long spirit na long pasin bilong em. Olsem na em i mas i stap klin long tingting na long skin tu. Pasin bilong graun long nau i nogut, olsem na taim wanpela man i lusim pasin bilong graun bambai em i ken mekim wok bilong Jehova em i mas senisim tingting na pasin bilong em. Aposel Pol i raitim pas long ol Kristen long Rom na em i tok: “Ol brata mi tingting long bikpela marimari bilong God na mi tokaut long yupela. Yupela mas givim bodi bilong yupela long God olsem ofa. Bodi i gat laip yet na yupela givim long God, na i bilong God wanpela tasol, na bai yupela i mekim pasin God i laikim. Yupela i mekim olsem na yupela i ken lotu tru long God. Na yupela i no ken wokabaut wankain olsem ol man bilong dispela graun. Nogat. Yupela mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bambai yupela inap long save tru long pasin God i laikim. Bai yupela i save long pasin i gutpela, pasin God i laikim tumas, pasin em inap tru.” (Rom 12:​1, 2) Orait, yumi mas mekim wanem na bai yumi inap i stap klin long tingting na long skin?

Stap Klin long Tingting

₂ Taim God i no givim yet Lo long lain Isrel, gutpela man Jop i tokaut olsem ai na bel bilong yumi inap pulim yumi long mekim “pasin nogut tru” sapos yumi no bosim gut. Em i tok: “Mi wokim tok promis wantaim ai bilong mi. Olsem na ai bilong mi i no ken lukluk long yangpela meri singel. Sapos bel bilong mi i kirap long wanpela meri . . . em i pasin nogut tru, em i wanpela bikpela rong na bai mi gat kot.” (Jop 31:​1, 9-11, NW ) Sapos yu save aigris long ol meri na bel bilong yu i save kirap nabaut, orait yu mas bosim gut tingting na bel bilong yu. Yumi mas “skulim” tingting bilong yumi bambai yumi ken bihainim “ol gutpela na stretpela pasin.”−Provep 1:⁠3.

₃ King Devit i larim ai bilong em i pulim em na em i trabel long Batsiba. (2 Samuel 11:​2, 4) Olsem na yumi save, maski man i kisim bikpela wok long Jehova, tasol sapos em i no bosim gut tingting em inap pundaun na mekim rong. Ating sampela bai hatwok long stretim na senisim tingting bilong ol. Tasol sapos ol i wok strong long mekim na ol i beten strong na askim Jehova long helpim ol, bai ol inap long mekim. Devit i hevi long rong em i mekim taim em i trabel long Batsiba, na em i tanim bel. Tanim bel pinis na nau Devit i beten na em i tok: “God, yu wokim nupela klinpela bel insait long mi. Putim nupela spirit insait long mi bai mi bihainim yu tasol.”−Sam 51:⁠10.

₄ Ol elda Kristen i mas was gut tru, nogut ol i larim laik nogut i kamap long bel bilong ol na dispela i kirapim ol long mekim bikpela rong. (Jems 1:​14, 15) Pol i raitim pas long elda Kristen Timoti na Pol i tok: “Dispela lo nau mi givim long yu, sapos ol i bihainim, orait bai bel bilong ol i klin na i stap isi, na ol i bilip tru long Jisas. Na bai dispela olgeta pasin i kirapim ol long pasin bilong sori.” (1 Timoti 1:⁠5) Sapos wanpela elda i mekim ol wok bilong spirit insait long kongrigesen, tasol em i save aigris long ol meri na em i larim ai bilong em i kirapim laik nogut long bel bilong em, orait em i mekim pasin giaman tru.

₅ Yumi olgeta Kristen i mas wok strong long i stap klin long tingting. Olsem na yumi no ken lukim sampela piksa wokabaut long haus piksa o long televisen, o kaunim sampela buk o nius, em ol inap bagarapim tingting bilong yumi. Bilong i stap klin long tingting yumi mas wok strong long tingim “olgeta pasin i tru, . . . na pasin i stret, na pasin i klin.” Aposel Pol i tok moa olsem: “Yupela i mas tingting long ol dispela pasin hia: . . . olgeta pasin i nambawan tru, na olgeta pasin em inap long yumi litimapim nem bilong en.”−Filipai 4:⁠8.

Stap Klin long Skin

₆ I gat wanpela tok, olsem: ‘Namba wan samting em man i mas tingim God, na namba tu samting, em i mas i stap klin.’ Tru, sampela man i save bihainim klinpela pasin na i stap klin long skin, tasol ol i no tingim God. Tasol man i tingim God, dispela man i mas bihainim klinpela pasin na i stap klin long skin tu. Lo bilong Moses i kolim stret ol samting ol Isrel i mas mekim bambai haus i ken kamap klin gen taim i gat sik long en; na lo i tok sapos i gat sampela samting i mekim man o meri i no klin, olsem sua o blut samting, orait em i mas waswas. (Lukim Levitikas, sapta 14 na 15.) Olgeta Isrel i mas i stap holi. (Levitikas 19:⁠2) Wanpela buk (Insight on the Scriptures) i tok: “Olgeta lo God i givim [long ol Isrel] long kaikai, na waswas, na long stretpela pasin ol i mas bihainim, dispela i kirapim tingting bilong ol oltaim olsem ol i narapela kain na ol i mas i stap holi long ai bilong God.”−Volyum 1, pes 1128.

₇ Lain Witnes Bilong Jehova i klia olgeta long ol lotu giaman bilong Bikpela Babilon na ol i stap klin long ol samting bilong lotu. Na sapos wanpela man long lain bilong ol em i mekim pasin doti ol i no save larim dispela rong i stap. Tasol sampela wasman bilong raun i raitim ripot na ol i tok, sampela Witnes i no stap klin long skin. Ol i no waswas gut o mekim gut skin, na sampela i no stretim gut haus bilong ol. Olsem wanem yumi ken save yumi stap klin long dispela samting tu? Ol haus Betel, insait bilong dispela nem i olsem “Haus Bilong God,” ol i stap olsem gutpela piksa, na haus bilong olgeta Kristen i mas i stap klin na stret olsem.

₈ Taim Sosaiti Was Taua i singautim wanpela brata o sista i go wok long Betel, olsem long namba wan ofis o long wanpela brens-ofis, ol i save givim wanpela liklik buk long em, em Lain Bilong Bosim Ol Witnes i bin redim. Dispela liklik buk i kolim ol lo em i mas bihainim long wok na long pasin bilong em. Wanpela het-tok long dispela liklik buk i olsem: “Bilong Lukautim Rum Slip na i Stap Klin.” Dispela hap bilong buk i tok: “Long Betel ol brata sista i mas i stap klin tru long skin na long pasin na long spirit. Olgeta wan wan brata sista long Betel i mas tingting strong long lukautim gut skin bilong em yet na rum slip bilong em bambai i stap klin. I no gat as na bai wanpela brata o sista long Betel i no klin. Gutpela sapos yu bihainim pasin olsem: Yu mas waswas long olgeta de. . . . Long taim bilong kaikai mipela i laik bai olgeta i mas waswas pastaim. Yu mas tingim gut wanrum bilong yu na sista i save klinim rum slip bilong yu, na taim yu wasim han o yu waswas, bihain yu ken klinim sink o ples waswas.”

₉ Long ol haus Betel ol i save klinim gut tru ol toilet, na ol i putim sink samting klostu na taim man i go long toilet, bihain em i ken wasim kwik han bilong em. Taim brata o sista i go long toilet, bihain em i mas opim em i mas lukim gut toilet, i stap klin o nogat, olsem wara i bin wasim ol pipia i go pinis o nogat. Long dispela rot bai em i tingim gut man i kam bihain long em na i go long toilet. Ol kain gutpela lo olsem i mas bosim olgeta wan wan famili Kristen tu, a?

₁₀ Tru, ol man long narapela narapela kantri i gat narapela narapela kain sindaun. Long sampela haus i no gat rum waswas. Tasol ating ol Kristen man na meri inap painim liklik sop na wara inap long mekim gut skin bilong ol yet na bilong ol pikinini.a Planti haus i no gat toilet long en. I wankain long Isrel long bipo, tasol ol Isrel i gat lo i tok taim ol i laik pekpek ol i mas wokim liklik hul pastaim, na bihain ol i mas karamapim graun antap long pekpek; na taim ol ami i stap long kem tu ol i mas mekim olsem. (Diuteronomi 23:​12, 13) Ol lo bilong Jehova bilong bosim sindaun bilong ol Isrel taim ol i stap long kem, ol dispela i tok ol i mas wasim klos bilong ol long olgeta taim, na ol i mas waswas long olgeta taim, na ol i mas lukim kwik man i gat sik na wok long stretim sik bilong em; na ol dispela lo i makim ol samting ol i mas mekim sapos ol i holim skin bilong man o animal i dai pinis, na ol samting ol i mas mekim bambai kaikai bilong ol i ken i stap klin. Olgeta i helpim lain Isrel long i stap gutpela long skin na i no ken sik planti. Orait, olsem wanem long lain bilong Jehova long nau? Ol tu i mas wok long i stap klin olsem, a?−Rom 15:⁠4.

Stretim Gut Haus na Ka

₁₁ Haus bilong yumi, maski em i rabis haus nating, em i mas i stap klin, na yumi mas stretim gut ol samting long haus. Famili i mas stretim tok wantaim na wok gut wantaim bambai haus bilong ol i ken i stap gutpela olsem. Nogut papa na ol pikinini i tromoi nabaut ol klos na buk na pepa samting insait long haus. Sapos olsem bai mama i mas lusim bikpela hap taim long olgeta de long stretim dispela, na bai em i no gat taim bilong mekim ol wok bilong spirit, olsem long autim tok samting. Long ol haus Betel i gat ol sista i save klinim ol rum slip, tasol lo bilong Betel i tok, olgeta wan wan long Betel i mas stretim bet bilong em long moningtaim, na stretim gut ol samting bilong em long rum slip bilong em. Yumi olgeta yumi save amamas long ol gutpela klinpela Haus Kingdom na Haus Kibung bilong yumi, a? Olsem na haus bilong yumi tu i mas kamapim long ples klia olsem yumi lain bilong Jehova yumi klinpela holipela manmeri!

₁₂ Planti wokboi bilong Jehova long nau ol i gat ka, na taim ol i go long miting o long autim tok, ol i save go long ka. Long sampela kantri, sapos man i no gat ka, ating bai em i hatwok long mekim wok bilong Jehova. Olsem na ka tu i mas i stap klin na yumi mas stretim gut ol samting i stap insait long ka, olsem, yumi mekim long haus bilong yumi, a? Tru, yumi no ken lusim bikpela hap taim tumas long wasim ka na polisim polisim, olsem planti man bilong graun i save mekim. Tasol ol wokboi bilong Jehova i mas wasim na stretim gut ka bilong ol. Long sampela kantri, long sevis-stesen o ples bensin, i gat ples bilong wasim ka na yu ken wasim kwik na i no gat bikpela pe bilong en. Na sapos yu lusim 10-pela minit samting long stretim ol samting insait long ka, em inap long yu stretim gut. Ol elda na wokman bilong kongrigesen i mas was gut moa yet long dispela samting, na sapos ol i save kisim ol brata long ka bilong ol i go long autim tok, ka bilong ol i mas klinpela. Ol i mas makim gutpela pasin ol narapela i ken bihainim. Taim wanpela Witnes i go long ka bilong em bilong kisim nupela man i kam long miting, i no gutpela sapos ka bilong em i doti o ol samting i stap nabaut insait long ka. Dispela samting i no litimapim nem bilong Jehova.

₁₃ Olsem na taim yumi wok strong bambai skin bilong yumi na haus na ka samting bilong yumi i ken i stap klin, dispela samting i save litimapim nem bilong Jehova, long wanem yumi lain bilong em na yumi stap klin.

Stap Klin Bilong Mekim Ol Ofa Bilong Spirit

₁₄ Ol Isrel i mas i stap klin bilong mekim lotu. Sapos nogat, ol i mas i dai. Jehova i tokim Moses tupela Eron: “Yupela i mas helpim ol Isrel bambai ol i klia long ol samting i mekim ol i no klin; nogut ol i no klin na bai ol i bagarapim haus lotu sel bilong mi na ol i mas i dai.” (Levitikas 15:​31, NW ) Long De Bilong Tekewe Sin, hetpris i mas “waswas long wara” tupela taim. (Levitikas 16:​4, 23, 24, NW ) Long haus lotu sel na long haus lotu long Jerusalem i gat draipela dis bras em wara i pulap long en. Dispela wara em bilong ol pris i ken waswas long en taim ol i laik mekim ofa long Jehova. (Eksodas 30:​17-21; 2 Kronikel 4:⁠6) Na olsem wanem long ol wan wan Isrel yet? Sapos i gat sampela samting i mekim wanpela i no klin bilong lotu, lo i tambuim em long mekim lotu. Em i mas mekim ol samting bilong kamap klin pastaim. (Nambas 19:​11-22) Dispela olgeta samting i kamapim long ples klia olsem ol manmeri i lotuim God holi, em Jehova, ol i mas i stap klin long skin.

₁₅ Tru i no gat lo long nau i tok lain bilong Jehova i mas kilim ol animal na mekim ofa long wanpela haus lotu hia long graun. Ofa bilong Krais Jisas i senis bilong ol dispela ofa. Baibel i tok: “Jisas Krais em i . . . givim bodi bilong em yet olsem ofa wanpela taim tasol.” (Hibru 10:​8-10) Yumi save “lotu long Papa long spirit na long pasin i tru.” (Jon 4:​23, 24) Tasol olsem wanem? I gat sampela ofa yumi mas mekim long God holi bilong yumi, Jehova? Na Jehova i putim lo long ol Isrel i mas i stap klin, orait olsem wanem long yumi? Em i putim wankain lo long yumi o nogat?

₁₆ Tok profet bilong Malakai i makim olsem ol Kristen God i bin makim long spirit holi na ol i stap long graun long taim bilong pinis, em lain remnan, God i mas mekim ol i kamap klin bambai ol inap lotuim em long haus holi bilong em. Ol samting i bin kamap long ol Witnes Bilong Jehova long taim bilong yumi i makim olsem wok bilong mekim ol i kamap klin em i bin kirap long yia 1918. Kirap long yia 1919 na bihain long dispela taim, “long ai bilong Jehova” lain remnan i “kamap wanpela lain i mekim ofa long stretpela pasin,” na Jehova i amamas long “ofa” bilong ol. (Malakai 3:​3, 4, NW ) Olsem na ol inap mekim ol gutpela ofa bilong spirit na “God i ting long Jisas Krais na i laik tumas long kisim dispela ofa.” (1 Pita 2:⁠5) Aposel Pol i tok: “Yumi mas amamas long God long nem bilong Jisas, na yumi mas givim dispela amamas long em oltaim oltaim, olsem ofa. Yes, yumi mas givim maus bilong yumi long em, na telimautim nem bilong em.”−Hibru 13:⁠15.

₁₇ God i no singautim ol manmeri bilong ‘bikpela lain’ bilong mekim wok pris olsem lain remnan, tasol “long san na long nait” ol dispela manmeri i “save lotu long [God]” long banis bilong haus holi bilong em hia long graun. (Revelesen 7:​9, 10, 15) Bipo, ol Isrel, i no bilong lain pris ol tu i mas i stap klin bilong mekim lotu long haus lotu sel, na bihain long haus lotu bilong Jerusalem. Olsem tasol long nau, ol “arapela sipsip” bilong bikpela lain ol i mas i stap klin long skin na tingting na pasin na spirit. Ol i mas i stap klin olsem bambai ol i ken mekim wok bilong God long haus holi bilong em, na wok wantaim lain remnan long ‘givim maus bilong ol long God, olsem ofa’ na “telimautim nem bilong em.”

Stap Klin na Mekim Gut Skin Bilong Autim Tok na Go long Ol Miting

₁₈ Orait, yumi mas mekim wanem samting tru na bai yumi stap klin na God i ken amamas long ofa bilong yumi? Yumi mas mekim olsem: Taim yumi go long haus bilong ol man bilong autim tok, o yumi autim tok long rot, o mekim Baibel-stadi samting long haus bilong wanpela man, yumi mas waswas gut na bilas gut. Sapos yumi no mekim olsem bai yumi sakim tok bilong Jehova na bagarapim nem bilong Em. Yumi no ken slek long dispela samting. Yumi mas was gut na oltaim mekim pasin i stret olsem ol wokman bilong Jehova i mas mekim. Maski klos bilong yumi i no gat bikpela pe bilong en, tasol klos i mas klin na stret na gutpela, na dispela, bai litimapim nem bilong God Jehova. Nogut su o slipas bilong yumi i doti o i bruk bruk. Na long olgeta miting, long BukStadi tu, skin bilong yumi i mas i stap klin na yumi mas bilas gut na pasim klos i stret.

₁₉ Sapos yumi was gut na putim klinpela klos taim yumi autim tok o yumi go long miting, em wanpela rot bilong “kirapim biknem bilong dispela tok yumi save autim long ol man.” (Taitus 2:10) Dispela samting i litimapim nem bilong God na i save pulim ol man i kam lotu long em. Planti man i lukim yumi i stap klin na klos bilong yumi i stret na dispela samting i kirapim ol long putim yau long ol tok yumi autim long ol, em ol tok bilong ol gutpela samting God holi bilong yumi, Jehova, em i laik mekim, olsem em i laik kamapim stretpela nupela skai na klinpela nupela graun.−2 Pita 3:⁠13.

₂₀ Klinpela nupela taim bilong Jehova i klostu pinis, olsem na yumi olgeta i mas skelim yumi yet, nogut yumi mas stretim sampela tingting o pasin bilong yumi. Pol i tok: “Tingting bilong yupela i no gat strong yet, olsem na mi bihainim tingting bilong yumi man na mi tok. Mi tok klia olsem: Bipo yupela i putim ol hap bodi bilong yupela i stap wokboi bilong dotipela pasin na pasin bilong sakim lo. Tasol nau yupela i mas putim ol hap bodi bilong yupela i stap wokboi bilong stretpela pasin, na yupela i ken kamap holi.” (Rom 6:19) Sapos yumi stap klin long spirit na long skin, dispela inap kamapim gutpela samting long nau tu−“Bai yupela i kisim gutpela samting olsem: Yupela i stap holi bilong olgeta wokabaut bilong yupela na [bihain bai] yupela kisim laip i stap oltaim oltaim.” (Rom 6:22) Olsem na taim yumi ‘givim bodi bilong yumi long God bilong mekim pasin God i laikim,’ yumi mas i stap klin long tingting na long skin−Rom 12:⁠1.

[Futnot]

Sampela Tok Bilong Tingim Gen

◻ Olsem wanem ai na bel bilong yumi inap pulim yumi long mekim pasin pamuk samting?

◻ Taim ol Isrel i bihainim ol lo bilong Jehova long ol yet wan wan na lain Isrel olgeta i mas i stap klin long skin, dispela i helpim ol olsem wanem?

◻ Wanem ol lo ol i bihainim long ol haus Betel i mas bosim olgeta famili Kristen?

◻ Long wanem wanem taim yumi mas was gut long klos samting bilong yumi i stap klin?

◻ I gat wanem ol samting bilong spirit na ol wokboi bilong Jehova i save klinim na stretim gut haus na ka bilong ol?

2. Olsem wanem ai o bel bilong yumi inap pulim yumi long mekim pasin pamuk samting? Yumi mas mekim wanem na bai yumi no pundaun olsem?

3, 4. (a) Stori bilong Devit na Batsiba i lainim yumi long wanem samting? Yumi mas mekim wanem na bai yumi inap stretim tingting bilong yumi? (b) Bilong wanem ol elda Kristen i mas was gut tru long dispela samting?

5. Yumi mas klia long wanem ol samting bambai tingting bilong yumi i ken i stap klin?

6. (a) Kolim sampela tok bilong hap bilong Levitikas i makim olsem ol Isrel wan wan na lain Isrel olgeta i mas i stap klin long skin. (b) Ol dispela lo i gat wanem wok?

7. Lain Witnes Bilong Jehova ol i mekim wanem? Tasol sampela wasman bilong raun ol i raitim ripot na ol i tok wanem?

8, 9. (a) Ol i givim wanem tok long olgeta nupela man long Betel? (b) Ol i bihainim wanem ol lo long ol Haus Betel na ol dispela lo i mas bosim olgeta famili Kristen?

10. (a) Maski yumi no gat gutpela ples waswas long haus bilong yumi, tasol olsem wanem yumi yet na ol pikinini bilong yumi inap i stap klin? (b) Wanem ol lo bilong ol Isrel i helpim ol long i stap gutpela long skin? Dispela inap givim wanem save long lain bilong Jehova long nau?

11. (a) Maski Kristen i stap long rabis haus nating, tasol haus bilong em i mas i stap olsem wanem? (b) Olgeta brata sista long Betel i mas wok gut wantaim long mekim wanem?

12, 13. (a) Olsem wanem long ol ka yumi mekim wok bilong Jehova long en? Yumi ken mekim wanem na bai yumi no lusim bikpela hap taim tumas long klinim ka? (b) Yumi tingim wanem samting bilong spirit na yumi save stap klin long skin na yumi stretim gut haus na ka bilong yumi?

14 Wanem ol lo i bosim ol Isrel bambai ol i ken i stap klin bilong mekim lotu ? Ol dispela lo i kamapim klia wanem samting?

15. Bilong wanem i no gat wok moa long givim ol animal olsem ofa? Tasol i gat wanem ol askim?

16. Kirap long yia 1918, olsem wanem ol samting i bin kamap tru long lain remnan, olsem Malakai 3:​3, 4 i bin tok profet long en? Ol i ken givim wanem samting long God olsem ofa, na bai God i laikim?

17. God i no singautim ol manmeri bilong ‘bikpela lain’ bilong kamap king na pris, tasol bilong wanem ol tu i mas i stap klin long skin, na tingting, na pasin, na spirit?

18. Taim yumi autim tok o go long ol miting, yumi mas ting olsem wanem long skin na klos na su bilong yumi i mas klinpela?

19. Sapos yumi ol wokman Kristen bilong God i stap klin na yumi mekim gut skin, dispela bai helpim wok bilong God olsem wanem?

20. Sapos yumi stap klin long tingting na long skin, dispela inap kamapim wanem narapela gutpela samting?

[Piksa long pes 19]

“Long Betel ol brata sista i mas i stap klin tru long skin na long pasin na long spirit”

[Piksa long pes 20]

Yu ting i stret mama i mas lusim bikpela hap taim long olgeta de bilong stretim ol samting em famili i tromoi nabaut?

[Piksa long pes 21]

Insait long 10-pela minit tasol yu inap stretim gut ol samting insait long ka