Yu Bihainim God i Laikim Olgeta Lain Man?
YUMI mas go we bilong painim man i mekim wankain pasin tasol long olgeta man? I gat wanpela Man i save mekim olsem, na em i no tingting nogut long narapela man o narapela lain, na em i no save laikim sampela na sampela nogat, na em i no daunim narapela lain. Em God Jehova, Man bilong wokim yumi. Tasol long yia 1830 samting, wanpela man bilong raitim buk, em Charles Lamb bilong Inglan i kamapim klia olsem ol man i narapela kain, em i tok: “Mi ken tok klia olsem mi man bilong tingting nogut long sampela lain—sampela mi laikim na sampela nogat.”
Planti man i no gat pasin bilong laikim olgeta lain man. Planti handet handet yia i go pinis, saveman King Solomon bilong Israel, em i tok: “Sampela bikman i wok long daunim ol arapela manmeri na mekim nogut long ol.” (Saveman 8:9) Birua long man bilong narapela skin, ol kantri i pait, ol bikpela kros namel long ol famili—dispela ol hevi i wok long i go bikpela. Olsem wanem? Yu ting ol man yet inap kamapim wanpela lain man i save laikim olgeta lain man?
Yumi mas wok strong bambai yumi inap bosim tingting bilong yumi, na sapos tingting nogut long narapela i pas strong long yumi, yumi mas rausim. (Efesus 4:22-24) Maski yumi no save, tasol ating sampela tingting bilong yumi i bin kamap long kain sindaun bilong yumi na skul yumi bin kisim, na i strong tru insait long famili na lain na kantri yumi bin kamap long en. Yumi inap ting dispela kain tingting i no bikpela samting, tasol planti taim em i pas strong long yumi, na em inap kamapim pasin bilong laikim sampela na sampela nogat. Bikman Francis Jeffrey bilong Skotlan, em i tok: “Man inap tingim olgeta pasin bilong em, tasol em i no save tingim pasin bilong em long bel nogut long man.”
Lena,a em wanpela meri i tokaut olsem em i mas wok strong bilong daunim pasin bilong laikim sampela na sampela nogat. Em i tok, bilong daunim tingting nogut long narapela, “em i hatwok, long wanem, pasin bilong famili i bin stiaim strong tingting bilong em.” Na Lena i tok, planti taim em i mas kisim sampela tok bilong helpim em long dispela samting.
Jehova i Laikim Olgeta Man
Jehova i makim gut tru pasin bilong laikim olgeta man. Kirap long namba wan hap bilong Baibel, yumi kaunim tok long olsem wanem em i mekim wankain pasin long olgeta man maski ol i bilong wanem lain. Ol gutpela pasin na tok bilong Jehova inap givim save long yumi.
Wanpela samting Jehova i mekim i kamapim klia olsem em i no tingim lain bilong man—long yia 36 C.E. em i opim rot bilong wanpela aposel Juda, em Pita, i ken autim gutpela tok long Kornilius na long sampela man moa bilong ol narapela lain. Long dispela taim Pita i tok: “Nau mi save, God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.”—Aposel 10:34, 35.
Long olgeta samting Jehova em i bin mekim long ol man, em i kamapim klia olsem, long olgeta taim em i save mekim wankain pasin tasol long ol man. Krais Jisas i stori long Papa bilong em olsem: “Em i save mekim san bilong en i kamap antap long ol man nogut na long ol gutpela man wantaim. Na em i save mekim ren i kam daun long ol stretpela man na long ol man bilong mekim pasin i no stret tu.” (Matyu 5:45) Pita tu i kamapim klia olsem Jehova em i God bilong laikim olgeta lain manmeri, na em i tok: “Em i no laik bai wanpela man i lus. Em i laik bai olgeta man i mas tanim bel, olsem na em i isi long yupela na em i wet i stap yet.”—2 Pita 3:9.
Long taim bilong Noa, “pasin bilong ol manmeri long olgeta hap i nogut tru. Ol manmeri i tingting tasol long ol samting nogut.” Olsem na Jehova i tok em bai bagarapim ol. (Stat 6:5-7, 11, 12) Olsem God i tok na long ai bilong ol man, Noa i wokim wanpela sip. Taim Noa na ol pikinini man bilong em ol i wokim sip, Noa i “tokaut long stretpela pasin.” (2 Pita 2:5) Maski Jehova i save olsem bel bilong ol man long dispela taim i nogut, long rot bilong Noa em i mekim gutpela pasin long ol na larim ol i harim tok. Long rot bilong wokim sip na wok autim tok, Jehova i laik kirapim bel na tingting bilong ol man. Rot i op bilong ol i ken bihainim tok, tasol “ol i stap olsem tasol i go inap long taim bikpela tait i kamap na i pinisim olgeta dispela manmeri.”—Matyu 24:39.
Man! Jehova i makim gutpela pasin tru olsem man bilong sori long olgeta man! Long dispela taim nogut bilong las de, dispela pasin bilong Jehova i save kirapim lain bilong em long mekim wankain pasin long olgeta man taim ol i autim gutpela tok bilong Kingdom. Na tu, ol i no surik long autim tok bilong de bilong Jehova bilong bekim nogut long ol man. Long ai bilong ol man, ol i givim tok bilong Jehova long olgeta man, maski ol i bilong we o ol i gat wanem kain sindaun.—Aisaia 61:1, 2.
Ol tok promis Jehova i bin givim long Abraham na Aisak na Jekop, i kamapim klia olsem em i God bilong laikim olgeta lain manmeri. Dispela Man God i bin makim em bai kamap long lain bilong ol yet, na long rot bilong em ‘olgeta lain bilong graun’ bai kisim blesing. (Stat 22:18; 26:4; 28:14) Krais Jisas em i dispela Man God i bin makim. Jisas i dai na kirap bek, na long rot bilong em, Jehova bai givim laip oltaim long olgeta manmeri i bihainim tok bilong Em. Tru tumas, rot i op bilong olgeta man i ken kisim ol gutpela samting ofa bilong Krais bai kamapim.
Long taim bilong Moses, pasin bilong Jehova long mekim wankain pasin long olgeta man i bin kamap klia long narapela kain rot, olsem: Selofehat i gat 5-pela pikinini meri, tasol ol i gat hevi long graun bilong lain bilong papa bilong ol long Graun Bilong Promis. Na i gat hevi, long wanem, pasin bilong ol Israel i olsem: Taim papa i dai, ol pikinini man i mas kisim graun bilong em. Tasol Selofehat i dai na em i no gat pikinini man bilong kisim graun bilong em. Olsem na ol 5-pela pikinini meri bilong Selofehat i kam long Moses na askim em long mekim wankain pasin long ol olsem em i save mekim long olgeta narapela. Ol i tok: “I tru, em [papa] i no gat pikinini man bilong kisim nem bilong en, tasol bilong wanem nem bilong papa i mas lus long yumi Israel? Olsem na mipela i laik bai yu givim mipela sampela hap graun bilong ol lain bilong papa bilong mipela.” Jehova i harim tok bilong ol na em i tokim Moses, olsem: “Sapos man i no gat pikinini man, na em i gat pikinini meri tasol, na bihain em i dai, orait ol pikinini meri bilong en i ken kisim ol samting bilong en.”—Namba 27:1-11.
Em i wanpela gutpela pasin ol i ken bihainim! Jehova i no laik graun bilong lain bilong papa bilong ol i go long narapela lain taim ol pikinini meri i marit, olsem na em i tok ol i mas “maritim man long lain bilong ol yet tasol.”—Namba 36:5-12.
Na yumi ken save moa long pasin bilong Jehova long mekim wankain pasin long olgeta man taim yumi tingim samting i bin kamap long taim bilong wanpela jas na profet, em Samuel. Jehova i tokim em long makim wanpela nupela king long lain Juda long famili bilong Jesi, em wanpela man bilong Betlehem. Tasol Jesi i gat 8-pela pikinini man. Samuel bai makim husat long kamap king? Samuel i kirap nogut long Eliap; em i longpela man. Tasol Jehova i no save tingim skin bilong man. Em i tokim Samuel: “Yu no ken ting long em i longpela bun o long em i luk naispela na bai mi makim em. . . . Ol man i save lukluk long bodi. Tasol mi save lukim tingting na laik bilong man na mi skelim ol.” Samuel i makim laspela pikinini man bilong Jesi, em Devit.—1 Samuel 16:1, 6-13.
Jehova i Skulim Yumi Long Laikim Olgeta Man
I gutpela sapos ol elda Kristen i bihainim pasin bilong Jehova na tingim ol gutpela pasin bilong spirit em wanpela wanbilip i save kamapim. I no hatwok long skelim man long ol samting yumi yet i ting i stret, na larim tingting bilong yumi long dispela man i paulim yumi na yumi no inap skelim stret dispela samting. Olsem wanpela elda i tok: “Mi traim long mekim pasin long ol narapela olsem Jehova i laik bai mi mekim—mi no bihainim tingting bilong mi yet, olsem mi gat wanem tingting long ol.” Em gutpela tru olgeta long lain bilong Jehova i mekim wok long Baibel bilong makim pasin i stret!
Ol dispela stori bilong Baibel yumi kamapim pinis i ken helpim yumi long lusim tru pasin bilong tingting nogut long skin o lain bilong narapela. Taim yumi bihainim pasin bilong Jehova long laikim olgeta man, dispela i save lukautim kongrigesen Kristen, na pasin bilong laikim sampela na sampela nogat, o mekim gut long sampela na sampela nogat, i no ken kamap insait long kongrigesen.
Aposel Pita i bin lain olsem “God i save mekim wankain pasin long olgeta manmeri.” (Aposel 10:34) Pasin bilong mekim gut long sampela na sampela nogat i save daunim pasin bilong laikim olgeta man, na i save brukim lo olsem narapela i mas laikim narapela na i stap wanbel. Jisas i bin tingim ol rabisman na ol man i no gat strong, na em i no putim hevi long ol—em i helpim ol. (Matyu 11:28-30) Em i narapela kain tru long ol bikman bilong lotu Juda, em ol i bin bosim strong ol man, na putim planti lo i putim hevi long ol. (Luk 11:45, 46) Pasin bilong ol long mekim olsem na long laikim tasol ol maniman na ol man i gat namba, i no stret wantaim ol tok bilong Krais.—Jems 2:1-4, 9.
Long nau, ol elda Kristen i daun long Krais olsem bos bilong ol, na ol i save mekim wankain pasin long olgeta man i dediket long Jehova. Taim ol i “lukautim gut ol manmeri bilong God,” ol i no save tingim mani bilong ol, o ol i gat narapela kain pasin, o em famili bilong ol, na long dispela as ol i mekim gut long ol dispela man o nogat. (1 Pita 5:2) Ol i bihainim God bilong laikim olgeta lain manmeri, na ol i bihainim tok bilong em long ol i no ken laikim sampela na sampela nogat, olsem na ol elda Kristen i save kamapim pasin bilong laikim olgeta man insait long kongrigesen.
Kongrigesen Kristen bilong ol Witnes Bilong Jehova i stap olsem wanpela bikpela lain brata long olgeta hap. Pasin bilong dispela lain i kamapim klia olsem: Aninit long wok bos bilong Krais Jisas yumi gat rot bilong pinisim pasin bilong tingting nogut long ol narapela, na long laikim sampela na sampela nogat. Ol Witnes i “kamap ol nupela manmeri, em ol manmeri God i mekim ol i kamap nupela na ol i stap olsem God yet, long wanem, pasin bilong ol i stretpela olgeta na i holi tru.” (Efesus 4:24) Tru tumas, ol i skul long nambawan pasin bilong God Jehova, em God bilong laikim olgeta lain manmeri, na ol i tingting long kisim laip i stap oltaim long nupela graun i no gat pasin bilong laikim sampela na sampela nogat.—2 Pita 3:13.
[Futnot]
a I no nem tru bilong em.
[Piksa long pes 26]
Aposel Pita i bin lain olsem God i save mekim wankain pasin long olgeta manmeri